06/11/2026
لودھراں میں المناک سانحہ، گٹر کی زہریلی گیس سے دو واسا اہلکار جاں بحق
لودھراں (نمائندہ خصوصی) لودھراں شہر کے جلالپور موڑ پر پیش آنے والے ایک افسوسناک واقعے میں واسا کے دو اہلکار گٹر کی صفائی کے دوران زہریلی گیس کی زد میں آکر جاں بحق ہوگئے۔
ابتدائی اطلاعات کے مطابق واسا کے سیور مین گٹر کی صفائی کے لیے اندر اترے تھے، تاہم انہوں نے حفاظتی کٹ اور دیگر ضروری حفاظتی سامان استعمال نہیں کیا تھا۔ گٹر کے اندر موجود زہریلی گیس کے باعث دونوں اہلکار بے ہوش ہوگئے اور جانبر نہ ہو سکے۔
جاں بحق ہونے والے اہلکاروں کی شناخت وسیم اور اکرام کے ناموں سے ہوئی ہے۔ واقعے کی اطلاع ملتے ہی ضلعی انتظامیہ، ریسکیو اور قانون نافذ کرنے والے اداروں کے افسران موقع پر پہنچ گئے۔
موقع پر موجود افسران میں ڈپٹی کمشنر لودھراں محمد اشرف، ایڈیشنل ڈپٹی کمشنر جنرل لیاقت علی گیلانی، اسسٹنٹ کمشنر فرخ اللہ خان، سٹی ایس ایچ او عمران ریاض گجر اور ڈپٹی کنٹرولر سول ڈیفنس شیخ حامد علی شامل تھے، جبکہ ریسکیو ٹیموں نے امدادی کارروائیاں جاری رکھیں۔
ڈپٹی کمشنر محمد اشرف نے میڈیا سے گفتگو کرتے ہوئے کہا کہ واقعے کی مکمل تحقیقات شروع کر دی گئی ہیں اور اس بات کا جائزہ لیا جا رہا ہے کہ حفاظتی اقدامات میں کہیں غفلت تو نہیں برتی گئی۔ انہوں نے کہا کہ ذمہ دار عناصر کے تعین کے بعد قانون کے مطابق کارروائی عمل میں لائی جائے گی۔
اس افسوسناک سانحے نے شہریوں اور اہلکاروں میں غم کی لہر دوڑا دی ہے، جبکہ مختلف سماجی حلقوں نے سیوریج لائنوں میں کام کرنے والے ملازمین کے لیے
حفاظتی اقدامات کو یقینی بنانے کا مطالبہ کیا ہے۔
