Life of Okka

05/31/2026

This is my answer✨

04/23/2026

“ကိုယ်ဖြစ်သင့်တယ် ထင်တဲ့အတိုင်းဖြစ်ရမယ်” အစွဲက စိတ်မငြိမ်းချမ်းရခြင်းရဲ့ အဓိကတရားခံ

များသောအားဖြင့် လူတွေရဲ့စိတ်ထဲမှာ ကိစ္စတိုင်းကို ဒါကတော့ “ဒီလိုဖြစ်သင့်တယ်” ဆိုပြီး စံနှုန်းတစ်ခု သတ်မှတ်ထားတတ်ကြတယ်။

သူငါ့ကို ခင်တယ်ဆို စာအရင်စပို့ရမှာပေါ့။ သူဌေးကတော့ ဒီလိုမပြောသင့်ဘူး။ တကယ်ချစ်တဲ့သူဆို ဒါမျိုးလုပ်မှာမဟုတ်ဘူး စသဖြင့် ကိုယ့်စံနှုန်းအတိုင်း တစ်ဖက်လူက လိုက်လုပ်သင့်တယ်လို့ အလိုလို ထင်တတ်ကြတယ်။

လူတိုင်း ဖြတ်သန်းခဲ့ရတဲ့ ဘဝအတွေ့အကြုံ မတူကြတဲ့အတွက် တစ်ယောက်နဲ့ တစ်ယောက် သတ်မှတ်ချက်တွေ၊ တိုင်းတဲ့ပေတံတွေလည်း တူကြမှာမဟုတ်ပါဘူး။

ဒါပေမယ့် ကျွန်တော်တို့က ကိုယ့်ရဲ့ “ဖြစ်သင့်တယ်” ဆိုတဲ့စံနှုန်းကနေ တစ်စုံတစ်ယောက်က သွေဖီသွားတာနဲ့ “ဒီလူမှားတယ်၊ ဒါမကောင်းဘူး” စသဖြင့် တိတ်တိတ်လေး တံဆိပ်ခတ်တတ်ကြတယ်၊ အပြစ်ဖွဲ့တတ်ကြတယ်။

ဘာနဲ့သွားတူလည်းဆိုတော့ တစ်ယောက်နဲ့ တစ်ယောက် ပါဝါမတူတဲ့ မျက်မှန်တွေ တပ်ပြီး အနီးအဝေးမြင်နေရတာ မတူဘူးဆိုပြီး ထိုင်ငြင်းနေကြသလိုမျိုးပေါ့။

ဒါဆို ဒီအစွဲတွေကို ဘယ်လိုလွှတ်ချရမလဲ?

✨၁။ အရင်သတိပြုပါ

ပထမဆုံးအဆင့် ကိုယ်က ပြင်ပ ပကတိရှိတဲ့အတိုင်း ကြည့်နေတာလား ဒါမှမဟုတ် ကိုယ့်ရဲ့ “ဖြစ်သင့်တယ်” ဆိုတဲ့ ရှုထောင့်ကနေ ကြည့်နေတာလားဆိုတာ သတိပြုမိဖို့ပါ။

✨၂။ လက်ခံပါ

အရာရာကို ကိုယ်ဖြစ်စေချင်တဲ့ အတိုင်းဖြစ်ဖို့ အတင်းကြိုးစားနေတာ ကိုယ့်ကိုယ်ကိုယ် ပင်ပန်းစေရုံပဲရှိပါတယ်။ ကိုယ်ဖြစ်စေချင်သလို မဟုတ်ပေမဲ့ လက်ရှိဖြစ်နေတာကတော့ ဒီအတိုင်းပဲ လို့ လက်ခံလိုက်တာနဲ့လည်း စိတ်က အလိုလိုငြိမ်းချမ်းသွားပါလိမ့်မယ်။

✨၃။ အရှိကို အရှိအတိုင်းကြည့်ပါ

လက်တွေ့အမှန်တရားဟာ ကိုယ်ဖြစ်စေချင်တာနဲ့ ထပ်တူမကျနိုင်ပါဘူး။ ဒါပေမဲ့ အရှိကို အရှိအတိုင်း ကြည့်တတ်လာတဲ့အခါ တစ်ဖက်လူရဲ့ လုပ်ရပ်ကို ပိုပြီးနားလည်တတ်လာမယ်။ ကိုယ့်ရဲ့ စိတ်ခံစားချက်တွေကို ပိုထိန်းချုပ်လာနိုင်ပြီး မှန်ကန်တဲ့ တုံ့ပြန်မှုတွေလုပ်လာနိုင်မယ်။

တဖြည်းဖြည်းနဲ့ “ဖြစ်သင့်တာ” ထက် “ဖြစ်နေတာ” ကိုပိုပြီး သတိပြုမိလာတဲ့အခါ ကိုယ့်ရဲ့ စိတ်က ပိုပြီး ငြိမ်းချမ်းလာပါလိမ့်မယ်။ တစ်ဆက်တည်း ပိုပြီးလည်းပေါ့ပါးလာပါလိမ့်မယ်။

03/01/2026

Tesla တကယ်ရော ကောင်းလား 🤔

09/09/2025

လိုရာပြည့်သောဘဝမှာ မပျော်နိုင်ရင် ဘာလိုနေသေးလဲ?

ပိုက်ဆံပမာဏတစ်ခု ဘဏ်ထဲရှိရင်
ကိုယ်အရမ်းလိုချင်တဲ့ ပစ္စည်းရရင်
မရောက်ဖူးတဲ့နေရာတွေ ခရီးသွားရရင်
ပျော်မယ်ထင်ခဲ့ဘူးတယ်

ဒါပေမယ့် အကုန်ရလည်း မပျော်သေးဘူး

နေ့ရက်တိုင်းက ဖန်တရာလည်နေတယ်
ကိုယ်ပျော်မယ်ထင်တဲ့
အရာတွေ အားလုံးကလည်း
လက်တွေ့ကို ခဏမေ့ဖို့အတွက်
အာရုံလှည့်ဖြားမှု သက်သက်ပဲ

ဘဝက ငယ်ငယ်ကစီးတဲ့
ချားရဟတ်လိုပဲ
နိမ့်လိုက် မြင့်လိုက်နဲ့
စီးခါစကဆို ပျော်ဖို့ကောင်းသလောက်

အချိန်ကြာတော့ ရိုးလာတယ်
လည်တော့လည်နေတယ်
ဒါပေမယ့် ဘယ်မှ မရောက်ဘူး

တကယ်ပျော်ခဲ့ရတဲ့ အချိန်တွေ
ပြန်စဥ်းစားကြည့်တော့..

ပျော်ရွှင်မှုအစစ်အမှန်တွေက
ရုပ်ဝတ္ထုတွေ ခမ်းနားမှု​တွေ မဟုတ်ဘူး

ဗိုက်အရမ်းဆာနေတဲ့အချိန်
အမေ့လက်ရာလေး စားရတာ
ကိုယ်လိုချင်တဲ့အရုပ် မရမချင်း
အဖေက လိုက်ဝယ်ပေးတာ

သူငယ်ချင်းတွေနဲ့ ညလုံး​ပေါက်
အရေမရအဖတ်မရပြောပြီး ထိုင်ခွီတာ
မိုးထဲရေထဲ ချစ်သူနဲ့လက်တွဲပြီး
တစ်မိုးအောက် လမ်းတူတူလျှောက်တာ

ကိုယ်ကူညီလိုက်လို့ တစ်ဖက်လူ အဆင်ပြေသွားတာ
လိုအပ်တဲ့အချိန်တိုင်း အား​ပေးမယ့်သူ ရှိ​နေတာ

တကယ်တော့ ဘဝရဲ့ ပျော်ရွှင်မှုအစစ်အမှန်ဆိုတာ
ကိုယ်ချစ်ရတဲ့သူတွေ အနားမှာ ဝန်းရံထားပြီး
အတူတူ အမှတ်တရတွေ အများကြီး ချန်ခဲ့ဖို့ပဲ

တစ်နေ့နေ့မှာ
တစ်ယောက်ယောက်က
ပိုင်ဆိုင်မှုတွေ ဘယ်လောက်ချမ်းသာပြီလဲလို့
မေးလာခဲ့တဲ့အခါ

ချစ်ရတဲ့သူ တသီတသန်းနဲ့
အမှတ်တရတွေ အလျှံအပယ်
သိမ်းထားတဲ့ ကိုယ့်ရဲ့ Relationship စုဗူးလေးကို
ထုတ်ပြဖြစ်မယ်ထင်တယ်

03/22/2025

“‘Let Them”

ကိုယ့်စိတ်ချမ်းသာမှုကို ကာကွယ်ဖို့ အရိုးရှင်းဆုံးနည်းလမ်းက “Let Them” ကို လက်ခံကျင့်သုံးဖို့ပါပဲ

လူတွေရဲ့ တုံ့ပြန်မှုကို လိုက်ပြီး ထိန်းချုပ်နေမယ့်အစား သူတို့လုပ်ချင်တဲ့အတိုင်း လုပ်ခွင့်ပေးလိုက်ပါ

စာပို့တယ် မပြန်ဘူး ဖုန်းဆက်တယ် မကိုင်ဘူး.. Let them
ကူညီတာတွေ အသိအမှတ်ပြုမခံရဘူး.. Let them
ထိုက်တန်တဲ့အချစ် ပြန်မရဘူး.. Let them

မကြာခဏဆိုသလို လူတွေက တစ်ဖက်လူရဲ့
အပြုအမူကို ထိန်းချုပ်ဖို့ ကြိုးစားကြတယ်
ထိန်းချုပ်ဖို့ ကြိုးစားရင်း ထင်သလို ဖြစ်မလာတဲ့အခါ စိတ်ပျက်ကြတယ် ဝမ်းနည်းရတယ်

တစ်ဖက်လူရဲ့ စိတ်တို့ အပြုအမူတို့ဆိုတာ
ထိန်းချုပ်လို့ရတဲ့ အရာတွေမဟုတ်ပါဘူး
ထိန်းချုပ်လို့ မရတဲ့အရာတွေ အပေါ် ထိန်းချုပ်ဖို့ ကြိုးစားရင်တော့ တစ်သက်လုံး စိတ်ချမ်းသာရမှာ မဟုတ်ပါဘူး

ကိုယ့်အတွက်ရှိမယ့်သူတွေက
ကိုယ်ဖြစ်နေလို့ကို အနားမှာရှိနေမှာပါပဲ
အနားမှာ ရှိပေးဖို့အတွက် အကြောင်းပြချက်တွေ တသီတသန်းကြီး ရှိနေဖို့ မလိုပါဘူး

ကိုယ့်အတွက် မရှိပေးချင်တဲ့သူတွေအတွက်ကြတော့လည်း ဘယ်လောက်ပဲ ကောင်းပေးသည့်တိုင်
သူတို့ဘက်က ပြောင်းလဲမှာမဟုတ်ပါဘူး..နောက်ဆုံးကိုယ်ပဲ အချိန်ကုန်လူပင်ပန်းဖြစ်ရမှာပါပဲ

လက်လွှတ်လိုက်တာ ဆုံးရှုံးရတာမဟုတ်ပါဘူး.. ကိုယ့်ကို ရွေးချယ်မယ့်သူတွေ အတွက်နေရာပေးလိုက်တာပါ

တကယ်တမ်း ထိန်းချုပ်လို့ရတာ လူတွေအပေါ် ကိုယ်ဘယ်လို တုံ့ပြန်မလဲဆိုတာပဲ ရှိတဲ့အတွက်

ကိုယ့်အနားမှာ ရှိပေးတဲ့သူတွေအတွက်
အချိန်ပေးပြီး အကောင်းဆုံးရှိပေးပါ
ကိုယ်ကို အမြဲပျော်စေတဲ့သူတွေကို
နှစ်ဆပျော်အောင် ပြန်လုပ်​ပေးပါ

ကိုယ့်အနားမှာ မရှိချင်တဲ့သူကိုလည်း
ထိန်းချုပ်ဖို့ ပြောင်းလဲဖို့ အတင်းမကြိုးစားပါနဲ့
သူတို့ အရှိ အရှိတိုင်း ပေးရှိနေလိုက်ပါ
ကိုယ်လည်း ပိုပြီး လွတ်လပ်ပေါ့ပါးလာပါလိမ့်မယ်

ဒီတော့ အခုကစပြီး စိတ်ချမ်းသာချင်ရင် စကားနှစ်လုံးကိုဆောင် “Let them” ပါ

စာကြွင်းအနေနဲ့ “Let them”ကို သုံးဖို့အတွက် ကိုယ်တိုင်ကလည်း လူ​တွေအ​ပေါ် Effort အပြည့်အဝထုတ်ပြီး အကောင်းဆုံးလုပ်ပေးပြီးတဲ့ အခြေအနေတစ်ခုမှာ ရှိဖို့တော့လိုပါတယ်

ကိုယ်တိုင်ကလည်း ဘာ Effort မှ မထုတ်ပဲ “Let Them” ထိုင်လုပ်နေရင်တော့ လူတွေနဲ့ ဝေးပြီး တစ်ယောက်ထဲ ပိုအထီးကျန်ဖို့ပဲရှိပါမယ်

Ref - “The Let Them Theory” by Mel Robbins

02/24/2025

"𝗧𝗮𝗸𝗶𝗻𝗴 𝗳𝗼𝗿 𝗴𝗿𝗮𝗻𝘁𝗲𝗱"

လူတော်တော်များများက
ကိုယ်ချစ်ရတဲ့သူနဲ့ အမြဲအတူရှိမှာပဲ
အချိန်တွေလည်း အများကြီးရှိတာပဲလို့
ခပ်ပေါ့ပေါ့လေးတွေးမိကြတယ်

လိုချင်တဲ့အရာတွေနောက်
တကောက်ကော်လိုက်ရင်း
ကိုယ့်ဘေးမှာရှိတဲ့သူတွေကို
တန်ဖိုးထားဖို့ မေ့နေတတ်ကြတယ်

သတိရလို့ လှည့်ကြည့်မိတဲ့အချိန်မှာ
ဘာမှလုပ်လို့မရတော့တဲ့ အခြေအနေတွေရှိတယ်

ဒါတွေ မလုပ်ပေးလိုက်ရကောင်းလားလို့
ရတဲ့ နောင်တက နင့်နေအောင်ခံစားရတတ်တယ်

တစ်သက်လုံး မကျက်တဲ့
အနာလည်း ဖြစ်သွားနိုင်တယ်

ဆုံးရှုံးပြီးမှ နောင်တရတာထက်
မဆုံးရှုံးခင်တည်းက တန်ဖိုးထားရမယ်ဆိုတာ
အချိန်လွန်မှ သိရတယ်

လူတစ်ယောက်စိတ်ကုန်သွားလို့
ပြန်မလှည့်ကြည့်တော့တဲ့အခါ
ဇွတ်သွားကောင်းပြနေလည်း အပိုပဲ

ကော်ဖီတစ်ခွက်လိုပဲ ပူတုန်းသောက်မှ
အေးသွားရင် သောက်လို့မကောင်းတော့ဘူး

ဆက်ဆံရေးတစ်ခုလည်း နွေးထွေးမှုမရှိပဲ
အေးစက်သွားရင် ဘာမှလုပ်လို့မရတော့ဘူး

အချစ်ကြောင့် နာကျင်နိုင်ရတယ်ဆိုပေမယ့်
အချစ်ကြောင့်ပဲ အသက်ရှင်နေရတာမလား

ကိုယ်ကတစ်ခါနာဖူးတိုင် နောက်တစ်ကြိမ်နာရမှာ
ကြောက်နေတယ်ဆိုရင် တကယ်ချစ်တဲ့သူနဲ့
တစ်ဘဝစာလွဲသွားနိုင်ပါတယ်

နောက်တစ်ခုရှိတာက..

လူတစ်ယောက်က ကိုယ့်အပေါ်ကောင်းပေးသလိုမျိုး
နောက်တစ်ယောက်က ထပ်တူကောင်းပေးလိမ့်မယ်လို့

ဘယ်သောအခါမှ လွယ်လွယ်လေး မတွေးနဲ့
တွေးတဲ့နေ့က ခင်ဗျား ဒုက္ခရောက်တဲ့နေ့ပဲ

အခြားတစ်ဖက်မှာလည်း
ကိုယ့်ဘက်ကချည်ပေးနေရတယ်လို့
ခံစားမိလာရင် အရင်ဆုံး လိုချင်မှန်းမလိုချင်မှန်း မသိ
ကိုယ်က ပိုပေးမိနေတာလားဆိုတာ ပြန်စဥ်းစားရမယ်

တခါတလေ ကိုယ်ရှိပေးလုပ်ပေးနေတဲ့ အချိန်မှာ
တစ်ဖက်က နားလည်ဖို့ အချိန်လိုနေတာ ဖြစ်နိုင်သလို
သူကြုံခဲ့တဲ့ ဘဝအတွေ့အကြုံရ ကိုယ်ပေးတာကို
လက်ခံဖို့ Ready မဖြစ်သေးတာလည်း ဖြစ်နိုင်ပါတယ်

ဒီလိုအခြေအနေမျိုးမှာ အစစ်အမှန်လားသိဖို့
ကိုယ်ပေါင်းစိတ်ခွာ လုပ်သင့်ရင်လုပ်ရမယ်
အသာလေး လှည့်ထွက်သင့်ရင် လှည့်ထွက်ရမယ်
ဒီလိုမလုပ်နိုင်ရင် ကိုယ်ပဲ စိတ်ပင်ပန်းရမယ်

နောက်ဆုံးအနေနဲ့ နောင်တကင်းကင်း လိပ်ပြာသန့်သန့်နဲ့
ဘဝကို ရှေ့ဆက်ချင်တယ်ဆိုရင်တော့

အမြဲမမေ့သင့်တာတစ်ခုက..

ကိုယ့်ငြီးငွေ့တယ်လို့ထင်ပြီး
မလိုချင်တော့တဲ့ အနားကသူက

ကမ္ဘာတစ်ဖက်ခြမ်းမှာ
လူတစ်ယောက် အသည်းအသန်လိုချင်လို့
ရှာတာတောင် ရှာမတွေ့နိုင်တဲ့သူမျိုး
ဖြစ်နေနိုင်တယ်ဆိုတာ မမေ့ဖို့တွေးရင်း…

Life of Okka
02.23.25

Send a message to learn more

02/18/2025

ဘဝမှာ တစ်ခါလောက် စမ်းကြည့်သင့်တဲ့ Skydiving🪂

02/09/2025

"𝙏𝙝𝙚 𝙨𝙠𝙮 𝙝𝙖𝙨 𝙣𝙤 𝙡𝙞𝙢𝙞𝙩"

မင်းဟာမင်း ဘာကောင်ကြီးဖြစ်ခဲ့ ဖြစ်ခဲ့ နိုင်ငံခြားရောက်ရင် ဘဝကို သုညက ပြန်စရတာပဲ

လူမသိသူမသိ အခက်အခဲတွေ ရင်ဆိုင်ပြီး အောင်နိုင်တဲ့အခါ အားပေးတဲ့သူကလဲ ကိုယ်တိုင်ပဲဖြစ်နေတတ်တယ်

အရင်က တော်ရုံမငိုဘူးဆိုတဲ့သူကလဲ သီချင်းစာသားတစ်ကြောင်းကြားပြီး ရှိုက်ကြိီီးတငင် ငိုချင်ငိိုနေလိမ့်မယ်

အထီးကျန်တယ်ဆိုတာ ပေါတောတောနဲ့လို့ ထင်ခဲ့တဲ့သူတွေလည်း ဟာသမဟုတ်မှန်းသိလာလိမ့်မယ်

သိမ်ငယ်မှုတွေကြားထဲက ကိုယ့်ယုံကြည်မှုကို မနည်းပြန်ရှာခဲ့ရတဲ့နေ့တွေ

ငါလုပ်နိုင်ပါ့မလားဆိုပြီး ကြောက်ကြောက်ရွံ့ရွံ့နဲ့ ရှေ့တိုးခဲ့ရတာတွေ

အနားမှာ အဖော်ရှိချင်တာနဲ့ ကိုယ့်တန်ဖိုးကိုနှိမ့်ချပစ်ခဲ့မိတာတွေ

နောက်ဆုံးငါ့မှာ ငါပဲရှိတယ်ဆိုတာ လက်မခံချင်ပဲ လက်ခံခဲ့ရတဲ့နေ့တွေ

တကယ်တော့ လူကြီးဆိုတာ မရင့်ကျက်ချင်ပဲ ရင့်ကျက်ခဲ့ရတဲ့ ကလေးတွေပဲ

ဒါပေမယ့် ဒါတွေအားလုံးရဲ့ အဆုံးမှာ ကိုယ်တစ်ခါမှ ရှိမယ်လို့တောင် မတွေးထားတဲ့ ကိုယ့်ရဲ့အရင့်ကျက်ဆုံး နဲ့ အသန်မာဆုံး ပုံစံကို တွေ့ရလိမ့်မယ်

ဂိမ်းဆော့သလိုပဲပေါ့ အစထဲက ကိုယ့် Character က ကြမ်းထော်ပြီး တွေ့သမျှ ရန်သူအလွယ်လေးနိုင်ရင် ပျင်းစရာကြီးပေါ့

ကိုယ့် Character ကို Level တွေ တဖြည်းဖြည်းတင် Item တွေဆက် ခဲရာခဲဆစ်ဆော့ပြီး အနိုင်ယူရတာကမှ တကယ် အရသာရှိတာ

သေချာ ပြန်စဥ်းစားကြည့်ရင်လဲ အဆိုးဆုံးဆိုတဲ့ အရာတွေက အကောင်းဆုံးတွေဆီ တွန်းပို့ခဲ့တာများတယ်

အဆိုးဆုံးတွေကြောင့် ကိုယ့်အတွက် မဟုတ်တဲ့ နေရာတွေ လူတွေဆီကနေ ရုန်းထွက်ပြီး လွတ်လပ်ကြတယ်…ပိုကောင်းတဲ့ ရွေးချယ်မှုတွေရှိသေးတယ်ဆိုတာ သိရတယ်

ဒီအဆိုးတွေကြောင့်ပဲ ကိုယ့်အပေါ်ကောင်းတဲ့သူတွေ အမြဲရှိပေးတဲ့သူတွေအပေါ်လည်း ပိုပြီး Appreciate ဖြစ်ရတယ်

ဒီတော့ ကိုယ့်လူတို့ ဘာပဲဖြစ်ဖြစ် ဖြစ်သမျှအကြောင်းအကောင်းလို့မှတ်ပြီး ဆက်တိုက်သာဒိုးပါ

မလွယ်မှန်းသိတယ်..ဒါပေမယ့် "𝙏𝙝𝙚 𝙨𝙠𝙮 𝙝𝙖𝙨 𝙣𝙤 𝙡𝙞𝙢𝙞𝙩" ပါ
အစွမ်းကုန်သာ တောက်ပပစ်လိုက်..မဖြစ်နိုင်တဲ့ အိပ်မက်ကြီးကြီးတွေ ပွေ့ပိုက်ထားလိုက်.. မလုပ်နိုင်ဘူးလို့ထင်တာတွေ အကုန်လုပ်ပြလိုက်

မဝေးတော့တဲ့ တစ်နေ့မှာ အခုဒီအကြောင်းတွေကို အတူတူ ရီမောပြီးပြန်ပြောကြတာပေါ့

01/26/2025

“Face Everything And Rise”

လူတိုင်းမှာ ကြောက်စိတ်တွေ ကိုယ်စီရှိကြတယ်

ကြီးပြင်းခဲ့တဲ့ ပုံစံ နဲ့ ကြုံတွေ့ခဲ့ရတဲ့ အတွေ့အကြုံ ပေါ်မူတည်ပြီး ကြောက်တာတွေ မတူကြဘူး

ကိုယ်တကယ် ကြောက်ရမယ့် အရာတွေကို ကြောက်တာ ကိစ္စမရှိပေမယ့်

တခါတလေ တကယ် မကြောက်သင့်ပဲ ကြောက်နေတာတွေ အများကြီးရှိနေတတ်တယ်

ဒါ့ကြောင့်ပဲ အစွမ်းအစရှိရဲ့သားနဲ့ တိုးတက်သင့်သလောက် မတိုးတက်တာမျိုးတွေ၊ မဖွင့်လိုက်ရတဲ့ အခွင့်အရေးတံခါးတွေ အများကြီးရှိနိုင်တယ်

လူအများစုက လုပ်လိုက်ရင် ဘာဖြစ်နိုင်တယ်ဆိုတာ တွေးပူတတ်ကြပေမယ့်

မလုပ်လိုက်တဲ့အတွက် ရေရှည် ဘာတွေနစ်နာသွားနိုင်လဲဆိုတာကို မတွေးမိကြတာ များတယ်

ကိုယ်တိုင်ဆိုရင်လည်း အွန်လိုင်းပေါ်မှာ စာတွေရေးပြီး တင်ချင်ရက်နဲ့ တင်ရမှာကို အမြဲ ကြောက်သလိုလို ရှက်သလိုလို ဖြစ်တယ်

ဒါပေမယ့် တစ်ရက် စာဖတ်ရင်းနဲ့ ကိုယ်ကြောက်တဲ့ ကိစ္စတွေကို ဖြေရှင်းလို့ရတဲ့ နည်းတစ်ခုကို တွေ့သွားတယ်

ဘယ်လိုမျိုးလဲဆိုတော့ ကိုယ်ကြောက်တဲ့ ကိစ္စရဲ့ အဓိက အကြောင်းအရင်းကို မသိမချင်း “Why” တွေ ထပ်ခါ ထပ်ခါ မေးတဲ့ နည်းလမ်းပါပဲ

ကိုယ်တိုင်ကိုပဲ ဥပမာဆက်ပေးရရင်..

◾️ငါဘာလို့ အွန်လိုင်းပေါ်မှာ စာရေးရမှာ ကြောက်တာလဲ?
"လူတွေက ဝေဖန်မှာ ကြောက်လို့"

◾️ငါဘာလို့ ဝေဖန်ခံရမှာ ကြောက်တာလဲ?
"လူတွေက အထင်သေးမှာ ကြောက်လို့"

◾️ငါဘာလို့ အထင်သေးခံရမှာ ကြောက်တာလဲ?
"လူတွေ အထင်သေးရင် ထားခဲ့မှာကြောက်လို့"

ဒါဆိုဘာလို့ လူတွေထားသွားမှာ ကြောက်လဲဆိုရင်တော့..

ရှင်းပါတယ်.. ကျောက်ခေတ်ထဲကပါလာတဲ့ ဦးနှောက်အတွက် လူတွေထားခဲ့တာသာခံရရင်..

အချိန်မရွေး သတ္တဝါ တစ်ကောင်ကောင်ရဲ့ အစာဖြစ်သွားနိုင်တဲ့အတွက် ဦးနှောက်က အသက်အန္တရာယ်လို့ သတ်မှတ်ပြီး ကြောက်ပါတယ်

ဒါပေမယ့် သေချာပြန် စဥ်းစားကြည့်မယ်ဆိုရင် ကိုယ် အခုအွန်လိုင်းပေါ်မှာ စာရေးပြီးတင်တာ ဘာအသက်အန္တရာယ်မှ မဖြစ်နိုင်ပါဘူး

ကိုယ့်ရဲ့ ဦးနှောက်က ကိုယ်လုပ်နေကြ မဟုတ်တဲ့ ကိစ္စတွေလုပ်ဖို့ ကြံတိုင်း Safety အရ အဆိုးဘက်ကို ပိုပိုသာသာတွေးပြီး မလုပ်မိအောင် ကြောက်အောင်လုပ်တဲ့ သဘောပါပဲ

ကိုယ်က ဒါကိုနားလည်ပြီး အဲ့ဒီလိုအခြေအနေမျိုးမှာ ကြောက်တဲ့ စိတ်ဖြစ်လည်း ကြောက်နေတာကို သိပြီး ဆက်လုပ်ရပါမယ်

ဒီလို လုပ်ရင်းနဲ့ အန္တရာယ် မဖြစ်နိုင်ဘူးဆိုတာ ကိုယ့်ဦးနှောက်က တဖြည်းဖြည်း နားလည်သွားတဲ့အခါမှာတော့ ကြောက်တဲ့ စိတ်လည်း သူ့ဘာသာ ပျောက်သွားပါလိမ့်မယ်

ဒီတော့ အတိုချုံးပြန်ပြောရရင် ကြောက်တဲ့စိတ်ကို ဖျောက်ဖို့အတွက်

- ဘာကို ကြောက်လဲ အရင်သိအောင်လုပ်
- သိပြီဆိုရင် “Why” တွေဆက်တိုက်မေးပြီး အဓိက အကြောင်းအရင်းကိုရှာ
- အကြောင်းအရင်း သိပြီဆိုရင် နားလည်အောင်လုပ်
- နားလည်သွားတဲ့အခါ ကြောက်လည်း ကြောက်တဲ့ စိတ်ကိုသိပြီး ဆက်သာလုပ်

ကိုယ်တိုင်ကလည်း ဘဝတစ်လျှောက်လုံး ခြေထောက်ထဲမှာ အဆူးစူးနေမှန်း သိရက်နဲ့ ဆွဲနှုတ်ဖို့ မကြိုးစာပဲအမြဲအနာခံပြီး ဆက်လျှောက်ခဲ့တယ်

ဒါပေမယ့် အခုကစပြီးတော့ အဆူးကို တစ်ခါထဲ အနာခံနှုတ်ပြီး ဆက်လျှောက်ဖြစ်တော့မယ် ထင်ပါတယ်

အားလုံး အဆုံးထိဖတ်ပေးတဲ့အတွက် ကျေးဇူးပါဗျ

01/19/2025

"အခက်ခဲဆုံးလမ်းမှ အလှဆုံးနေရာဆီသို့"

ပြီးခဲ့တဲ့ တနင်္ဂနွေက ခက်ခက်ခဲခဲ တောင်သွားတက်ရင်း ရလာတဲ့ အတွေးတစ်ခုကို ပြန်မျှဝေပေးချင်လို့ပါ

ကိုယ်တိုင်ကိုက လိုလိုလားလားနဲ့ အပင်ပန်းခံပြီးသွားတက်တာပါ.. ဒါပေမယ့် စတက်ပြီး (၁၅) မိနစ်လောက်ပဲ ရှိသေးတယ်

လမ်းက တော်တော်လေးကို မတ်တော့ လူက အရမ်းမောလာပြီး ခြေထောက်တွေပါထုံပြီး ကိုက်လာတယ်.. အသက်ရှူသံတွေလည်း တော်တော်မြန်လာတယ်

အဲ့ဒီအချိန် ကိုယ့်ဘာသာ စိတ်ထဲမှာ မေးလိုက်မိတယ်"ငါ ဘာလို့ ဒါတွေ လုပ်နေတာလဲပေါ့?"

တစ်ပတ်မှတစ်ခါရတဲ့ ပိတ်ရက်လေးကိုကွာ အိမ်မှာ ဖုန်းလေးပွတ် ရုပ်ရှင်ကြည့် အေးဆေး Chill နေလို့ရတာကို ငါဘာလို့ ဒီမှာလာပြီး သက်သက်ဒုက္ခခံနေတာလဲဆိုတဲ့ အတွေးကြီးက ရုတ်တရက် ဝင်လာတယ်

ကိုယ်လည်း လူထဲက လူပဲဆိုတော့ အခက်ခဲကြုံလာတဲ့အခါ ကိုယ့်ဘာသာ မေးခွန်းပြန်ထုတ်မိတယ်.. ကိုယ့်ရွေးချယ်မှုတွေကို သံသယ ဖြစ်မိတယ်..ခုလုပ်နေတာကြီးက မှန်သလား၊ မှားသလားပေါ့

အဲ့ဒါနဲ့ စိတ်ကိုငြိမ်ငြိမ်ထားပြီး ကိုယ်တိုင်လည်း ငါ ဘာလို့ ဒါကို စလုပ်ချင်ခဲ့တာလဲဆိုတာ သေချာပြန်စဥ်းစားတယ်

ကိုယ့်စိတ်က မလုပ်နိုင်ဘူးလို့ ထင်တာကို လုပ်ပြချင်တဲ့စိတ်၊ ပြီးတော့ တောင်ထိပ်ပေါ်မှာ သူများတွေ ဓါတ်ပုံရိုက်ရိုက်နေတဲ့ ဘာကိုရည်ညွှန်းပြီး ဘာကြောင့်ရှိနေမှန်းလည်းမသိတဲ့ တိုင်ကြီးနဲ့ ဓါတ်ပုံရိုက်ချင်တဲ့စိတ်

နောက်ပြီး အနည်းဆုံး အိမ်မှာထိုင်နေတာထက်စာရင်တော့ အခု တောင်ထိပ်ရောက်ဖို့ ပိုနီးလာပြီဆိုတာ တရေးရေးနဲ့ ပြန်တွေးမိသွားတယ်

အဲ့ဒီစိတ်နဲ့ပဲ နှေးတာ မြန်တာ အရေးမကြီးဘူး ဘာပဲဖြစ်ဖြစ် အဲ့ဒီတောင်ပေါ်ကို ရောက်အောင်တက်မယ်ကွာ ဆိုပြီး ကြိုးစားပြီး ရအောင်ဆက်တက်ဖြစ်ခဲ့တယ်

ဒီလိုနဲ့ပဲ နောက်ဆုံး တောင်ထိပ်ဆုံးကို ရောက်သွားတယ်.. မြင်ရတဲ့ ရှူခင်းကြောင့် ပင်ပန်းတာတွေ အကုန်ပျောက်သွားတယ်..ကိုယ်မလုပ်နိုင်ဘူးထင်တာကို လုပ်လိုက်နိုင်တဲ့အတွက်လည်း စိတ်က တော်တော်လေး ကျေနပ်သွားတယ်

တောင်တက်နေတဲ့အချိန် အရေးကြီးတာတစ်ခု သတိထားလိုက်မိတာရှိသေးတယ်..ထိပ်ဆုံးနဲ့ နီးလာလေလေ လမ်းကြောင်းက ပိုခက်လာလေလေပါပဲ..တောင်က ပိုမတ်လာတယ်၊ လေတွေလည်း ပိုတိုက်လာတယ်၊ ခြေလှမ်းတိုင်း ပိုလေးလာတယ်

ဒါနဲ့ ဘဝဆိုတာလည်း ဒီလိုပါပဲလားပေါ့ "အခက်အခဲ အတိုက်အခိုက်တွေ ပိုကြုံလာရလေ၊ ကြိုးစားပြီးဖြေရှင်းလေ အောင်မြင်ဖို့ ပိုနီးလာလေလေပါပဲ"

မတော်လို့ တောင်တက်တာ ခရီးတစ်ဝက်မှာ ရပ်လိုက်မိမယ်ဆိုရင် တောင်ထိပ်ပေါ်က ရှုခင်းနဲ့ ကျေနပ်တဲဲ့ စိတ်လေးကို ပိုင်ဆိုင်ရတော့မှာ မဟုတ်သလို

"ဘဝမှာလည်း အခက်အခဲတွေနဲ့ ကြုံတိုင်းသာ လက်လျှော့မိလိုက်ရင် ကိုယ့်အတွက် တစ်ဖက်မှာစောင့်နေတဲ့ တန်ဖိုးရှိတဲ့အရာတွေ နဲ့ အသစ်သစ်သော အတွေ့အကြုံတွေ အားလုံးကို လက်လွှတ်ဆုံးရှုံးလိုက်ရမှာပါ"

ဒီတော့ အခုကစပြီး ဘဝဆိုတဲ့ တောင်တွေတက်ရလို့ စိတ်ညစ်တဲ့အခါတိုင်း အခက်အခဲတွေကြုံလာတိုင်း ရပ်လိုက်ဖို့ထက် အောင်မြင်ဖို့ ခြေတစ်လှမ်းပိုနီးလာပြီလို့ စိတ်ကို တစ်ဖက်လှည့်ပြီး ပြောင်းတွေးကြည့်ပါ

ဘယ်လောက်ပဲ နှေးနှေး၊ ဘယ်လောက်ပဲ ခက်ခက် ခြေတစ်လှမ်းတိုင်းက ထိပ်ဆုံးရောက်ဖို့ ပိုနီးစေတယ်..အရမ်းပင်ပန်းနေရင် ခဏရပ်ပြီး အနားယူလို့ရတယ်.. အရေးကြီးတာ လုံးဝရပ်မသွားဖို့နဲ့ အရှုံးမပေးလိုက်ဖို့ပါပဲ

ဘာလို့လဲဆိုတော့..

"အခက်ခဲဆုံး လမ်းတွေကပဲ အလှဆုံးနေရာတွေဆီကို ပို့ပေးလို့ပါ"

စွန့်စားလိုက်ပြီဆိုတာနဲ့ ကိုယ့်အတွက် အကျိုးအမြတ်ဆိုတာ နောက်က တစ်ခုမဟုတ်တစ်ခုလိုက်လာပြီးသားပါ..ဒီတော့ ဇွဲမလျှော့လိုက်ဘဲ အတူတူ ဆက်ကြိုးစားလိုက်ကြရအောင်လားဗျာ..

အဆုံးထိဖတ်ပေးတဲ့အတွက်လည်း အားလုံးကိုကျေးဇူးပါဗျ