05/29/2026
पवन मैनालीको जीवन पिंजडामा
🔴🔶⚫️
एक समय नेपाली फिल्म र नाटक क्षेत्रका चर्चित खलनायक पवन मैनाली अहिले आफ्नै जीवनको ‘पिंजडा’मा बन्दी छन्। शरीरको आधा भाग चल्दैन, हिँड्न मुस्किल छ, बोल्न स्पष्ट छैन तर अभिनयको तिर्खा अझै मरेको छैन।
“म अरु भूमिकामा अभिनय गर्न सक्छु, दौडिन मात्र सक्दिनँ, फाइट खेल्न सक्दिनँ, अरु सबै सक्छु,” पवन मैनाली भावुक हुँदै भन्छन, “तर निभेको आगो हूँ, कसैले ताप्दैन।”
२०५९ साल फागुन ८ गते बाराको निजगढमा भएको सवारी दुर्घटनाले पवनको जीवन पूरै बदलिदियो। त्यतिबेला उनको दोस्रो फिल्म ‘दिदी बैनी’को छायांकन सकिन एक साता मात्र बाँकी थियो। दुर्घटनामा गम्भीर घाइते भएका उनी एक महिनासम्म बेहोस रहे। बाँच्ने आशा पनि लगभग समाप्त भएको थियो।
होस खुले पनि उनी ‘स्प्यास्टिक हेमिप्लेजिया’ रोगको शिकार बने। यो रोगको पूर्ण उपचार सम्भव छैन। १६ वर्षदेखि उनी अत्यन्त पीडादायी र सीमित जीवन बिताइरहेका छन्।
सर्लाहीमा २०२२ सालमा जन्मिएका पवनले २०४९ सालमा चेतन कार्कीको निर्देशनमा बनेको फिल्म ‘पहिलो प्रेम’ बाट चलचित्र क्षेत्रमा प्रवेश गरेका थिए। त्यसपछि ‘वसन्ती’, ‘शिवशक्ति’, ‘दौंतरी’, ‘सुनचाँदी’, ‘आँधीबेरी’, ‘आफन्त’, ‘प्यारी बहिनी’, ‘जन्मभूमि’, ‘बिद्रोही’, ‘छोरी बुहारी’ लगायत एक सयभन्दा बढी फिल्ममा खलनायकको भूमिका निर्वाह गरे।
उनले ‘अमरसिंह’ नाटकबाट कलाकारिताको सुरुवात गरेका थिए भने ‘धर्मको मर्म’, ‘देशभक्त’, ‘राप’, ‘अस्मिता’ जस्ता टेलिसिरियलमा पनि मुख्य भूमिका खेलेका थिए। पवनले फिल्म लेखन, गीत लेखन र निर्देशनसमेत गरेका थिए।
उनको सर्वाधिक चर्चित फिल्म ‘पिंजडा’ हो, जसले निखिल उप्रेतीलाई एक्सन स्टारको रूपमा स्थापित गर्यो। तर दुर्घटनापछि उनको फिल्म ‘दिदी बैनी’ अधुरै रह्यो।
दुर्घटनापछि पवन दुई वर्ष अस्पतालको बेडमा र दुई वर्ष आश्रममा बसे। अहिले उनी काठमाडौंको कपनमा श्रीमती लक्ष्मी शिवाकोटीसँग बस्दै आएका छन्। उनकि दुई वटि छोरी छन।
लक्ष्मी उनको फ्यान थिइन् र २०७४ सालमा आफैंले बिहेको प्रस्ताव गरेकी थिइन्। पवन भन्छन्, “भाइबुहारी नभएको भए म यत्तिको पनि बाँच्न सक्ने थिइनँ। उनीहरूले नै जिउँदो लासलाई यत्तिको बनाएर पालेका छन्।”
दुर्घटनाले उनको सम्झने क्षमतामा पनि ७५ प्रतिशत असर पारेको छ। उनी भन्छन्, “नियतिले खटाएको जीवन बाँचिरहेछु। मर्न पाएको भए यो दुःख हुन्थेन।”
चलचित्र विकास बोर्डबाट मासिक ५ हजार र अपांग भत्ताबापत ४ हजार रुपैयाँ पाउँछन् पवन। तर उनी सरकारी सहयोग पर्याप्त नभएको गुनासो गर्छन्।
“कलाकार र पत्रकारले सकेको सहयोग गरे, तर सरकारबाट खासै सहयोग भएन,” उनले भने।
पवनलाई केही वर्षअघि निर शाहले ‘सेतो बाघ’ फिल्ममा गेस्ट रोल दिएका थिए। तर अरु पुराना साथीहरूले सम्पर्क गर्न छाडेकोमा उनी दुःखी छन्।
“म निभेको आगो हूँ, कसैले ताप्दैन,” उनी आँखामा आँसु पार्दै भन्छन्।
