TawNaw FM

TawNaw Radio Station

တောနော်အသံလွှင့်ဌာန သည် လူမှုကွန်ယက် facebook ပေါ်တွင် နိုင်ငံတစ်ဝန်း သတင်းများကို ဖလုံ၊ စှော်(စကော) စတဲ့ ကရင်ဘာသာစကားများ ဖြင့် နေ့စဥ်တင်ဆက်ပေးနေသည့် အပြင် အခြားစိတ်ဝင်စားဖွယ်ရာ အစီအစဥ်များကိုလည်း တင်ဆက်ပေးလျက်ရှိသည့် အသံလွှင့်ဌာနတစ်ခုဖြစ်ပါသည်။ ညနေ (၄) နာရီ တွင် ဖလုံဘာသာစကား သတင်းအစီအစဥ်၊ ည(၇) နာရီတွင် စှော် (စကော) ဘာသာစကားအစီအစဥ်ကို တောနော် အသံလွှင့်ဌာန page မှ နေ့စဥ်တင်ဆက်ပေးနေပါသည်။

တောနော် အသံလွှင့်ဌာနမှ တင်ဆင်ပေးနေတဲ့ သတင်းတွေ၊ ဗီဒီယိုတွေမှာ မိမိရဲ့ သဘောထားမှတ်ချက်တွေကို လွတ်လပ်စွာ ရေးသားဖော်ပြနိုင်သော်လည်း ရုန့်ရင်းကြမ်းတမ်းသော စကားလုံးအသုံးအနှုန်းများကို ရေးသားဖော်ပြခြင်းမပြုကြပါရန် မေတ္တာရပ်ခံအပ်ပါသည်။

09/10/2026

ကရင်အမျိုးသားရဲတပ်ဖွဲ့နေ့နဲ့ မူးယစ်ဆေးဝါး မီးရှို့ဖျက်ဆီးခြင်း အခမ်းအနား ဒူးပလာယာခရိုင်မှာ ကျင်းပပြုလုပ်

စက်တင်ဘာ - ၁၀၊ ၂၀၂၆ / TawNaw FM

ဒူးပလာယာခရိုင်မှာ ကရင်အမျိုးသားရဲတပ်ဖွဲ့နေ့ အခမ်းအနားနဲ့ သိမ်းဆည်းရမိတဲ့ မူးယစ်ဆေးဝါးတွေကို မီးရှို့ဖျက်ဆီးခြင်း အစီအစဉ်တွေကို စက်တင်ဘာ ၉ ရက်နေ့က ပြုလုပ်ကျင်းပခဲ့တယ်လို့ ကေအဲန်ယူ-ဒူးပလာယာခရိုင်၊ ပြည်သူ့ဆက်ဆံရေးနဲ့ သတင်းပြန်ကြားရေး လုပ်ငန်းကော်မတီက သတင်းထုတ်ပြန်ပါတယ်။

မနေ့ စက်တင်ဘာ ၉ ရက်နေ့မှာ ကျရောက်တဲ့ ၃၅ ကြိမ်မြောက် ကရင်အမျိုးသားရဲတပ်ဖွဲ့(KNPF)နေ့ အခမ်းအနားကို ဒူးပလာယာခရိုင်မှာ ပြုလုပ်ကျင်းပခဲ့ပြီး အဲဒီအခမ်းအနားမှာ ကရင်အမျိုးသားအလံတော် အလေးပြုတာ၊ ရဲမှူးကြီးကို အလေးပြုတာ၊ KNPF ဗဟိုက ပေးပို့တဲ့ သဝဏ်လွှာကို ဖတ်ကြားတဲ့ အစီအစဉ်တွေ ပါဝင်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

အဲဒီအခမ်းအနားမှာ သိမ်းဆည်းရမိ မူးယစ်ဆေးဝါးတွေကိုလည်း ဒူးပလာယာခရိုင် တရားသူကြီးက အမိန့်ပေးဖတ်ကြားခဲ့ပြီး ခရိုင်ရဲတပ်ဖွဲ့က မီးရှို့ဖျက်ဆီးခဲ့တယ်လို့ ထုတ်ပြန်ထားပါတယ်။

အဆိုပါသိမ်းဆည်းရမိတဲ့ မူးယစ်ဆေးဝါးတွေကတော့ ဘိန်းဖြူ ၁၀၀ ဂရမ် ၂ ကဒ်၊ စိတ်ကြွရူးသွပ်ဆေးပြား ၁၁၆၉၃၅ ပြားနဲ့ ဆေးခြောက် ၂ ထုပ် စတာတွေဖြစ်တယ်လို့ ဖော်ပြပါတယ်။

အဲဒီနောက် သင်တန်းခန်းမဆောင်အတွင်း တာဝန်ရှိလူကြီးတွေက ကရင်အမျိုးသားရဲတပ်ဖွဲ့ ဖြစ်ပေါ်လာပုံ အကျဉ်းချုပ်နဲ့ မိန့်ခွန်းတွေပြောကြားခဲ့ပြီး ကေအဲန်ယူ-ဗဟို၊ ကရင်လူငယ်အစည်းအရုံး၊ ကရင်အမျိုးသမီးအစည်းအရုံးတို့က ပေးပို့တဲ့ သဝဏ်လွှာတွေကို ဖတ်ကြားတဲ့အစီအစဉ်တွေ ကျင်းပခဲ့ပါတယ်။

အဆိုပါအခမ်းအနားကို ဗဟို ရဲစီမံရေးရာမှူးနဲ့ ခရိုင်တာဝန်ရှိ လူကြီးတွေ၊ ခရိုင် မြို့နယ် ရဲမှူးတွေနဲ့ ရဲတပ်ဖွဲ့တွေ၊ သင်တန်းသူသင်တန်းသားတွေ စုပေါင်းတက်ရောက်ဂုဏ်ပြုခဲ့ကြတယ်လို့ ကေအဲန်ယူ-ဒူးပလာယာခရိုင်က သတင်းထုတ်ပြန်ထားပါတယ်။

ဓာတ်ပုံ -ဒူးပလာယာခရိုင်

09/10/2026

ကော်သူးလေတည်ဆောက်ရေးကို အခြေခံကနေ တစ်ဆင့်ချင်း တည်ဆောက်သွားဖို့ လိုအပ်ကြောင်း ပဒိုစောလှထွန်း ပြော

စက်တင်ဘာ - ၁၀၊ ၂၀၂၆ / TawNaw FM

ကော်သူးလေတည်ဆောက်ရေးကို ကျေးရွာ၊ မြို့နယ်၊ ခရိုင်အဆင့်တွေကနေ ဗဟိုအဆင့်အထိ အခြေခံမှစတင်ပြီး တစ်ဆင့်ချင်းတည်ဆောက်သွားဖို့ လိုအပ်တယ်လို့ ကေအဲန်ယူ တွဲဖက်အထွေထွေအတွင်းရေါ်မှူး(၂) ပဒိုစောလှထွန်းက တိုက်တွန်းပြောကြားလိုက်ပါတယ်။

စက်တင်ဘာ ၉ ရက်နေ့က ကျရောက်တဲ့ ၃၅ နှစ်မြောက် ကရင်အမျိုးသားရဲတပ်ဖွဲ့(KNPF)နေ့ အခမ်းအနားမှာ ကေအဲန်ယူ-ကရင်အမျိုးသားအစည်းအရုံး တွဲဖက်အထွေထွေအတွင်းရေးမှူး(၂) ပဒိုစောလှထွန်းက အထက်ပါအတိုင်း တိုက်တွန်းပြောကြားခဲ့တာပါ။

ကော်သူးလေ(ကရင်ပြည်)တည်ဆောက်ရေးဟာ ကေအဲန်ယူရဲ့ နိုင်ငံရေးရည်မှန်းချက်နဲ့ တရားဥပဒေစိုးမိုးရေးကို အခြေခံတဲ့ လုပ်ငန်းစဉ်တစ်ရပ်ဖြစ်တယ်လို့ ပဒိုစောလှထွန်းက ဆိုပါတယ်။

"ကော်သူးလေအတွင်း ကိုယ်ပိုင်ပြဌာန်းခွင့် အပြည့်အ၀ရရှိရေးအတွက် အခြေခံစနစ်များကို စနစ်တကျ တည်ဆောက်ရန်နှင့် ပြည်သူလူထုနှင့် သက်ဆိုင်ရာဌာန၊ အဖွဲ့အစည်းများ၏ ပူးပေါင်းပါဝင်မှုကို ခိုင်မာစေရန် လိုအပ်ကြောင်း ပြောကြားခဲ့သည်" လို့ ပဒိုစောလှထွန်းက ပြောပါတယ်။

ကော်သူးလေတည်ဆောက်ရေးကို တစ်ဆင့်ချင်းတည်ဆောက်သွားတဲ့နေရာမှာ KNPF အနေနဲ့လည်း အဆိုပါလုပ်ငန်းစဉ်မှာ အရေးပါတဲ့ အခန်းကဏ္ဍတစ်ရပ်အဖြစ် ပါဝင်ဆောင်ရွက်ရမှာဖြစ်တယ်လို့ ပဒိုစောလှထွန်းက တိုက်တွန်းထားပါတယ်။

ဒါ့အပြင် နယ်စပ်ဖြတ်ကျော်ရာဇဝတ်မှုတွေအပါအဝင် Cyber Security နဲ့ Digital Security ဆိုင်ရာ စိန်ခေါ်မှုတွေကို နိုင်ငံတကာအဖွဲ့အစည်းတွေနဲ့ ချိတ်ဆက်ပူးပေါင်းကာ ကိုင်တွယ်ဖြေရှင်းနိုင်ရေးအကြောင်းအရာတွေကိုလည်း ပြောကြားသွားခဲ့ပါတယ်။

ဓာတ်ပုံ - ကေအဲန်ယူ

09/09/2026

ကရင်အမျိုးသားရဲတပ်ဖွဲ့ဝင်တွေကို ဂုဏ်ပြုကြောင်း ကေအဲန်ယူ ထုတ်ပြန်

စက်တင်ဘာ-၉၊ ၂၀၂၆ / TawNaw FM

ပြည်သူလူထုအားကိုးအားထားရတဲ့ စွမ်းရည်ပြည့်၀တဲ့ ကရင်အမျိုးသားရဲတပ်ဖွဲ့တစ်ရပ်ဖြစ်လာစေဖို့ ဆက်လက်တည်ဆောက်ကြဖို့ လိုအပ်လျက်ရှိတယ်လို့ ကေအဲန်ယူ-ကရင်အမျိုးသားအစည်းအရုံးက ဒီကနေ့မှာကျရောက်တဲ့ (၃၅)နှစ်ပြည့် ကရင်အမျိုးသားရဲတပ်ဖွဲ့နေ့မှာ သတင်းထုတ်ပြန်ပါတယ်။

ကော်သူးလေပြည်သူတွေ အေးချမ်းစွာနေထိုင်နိုင်ရေး ပြည်သူလူထုရဲ့ လုံခြုံရေးနဲ့ တရားဥပဒေစိုးမိုးရေးအတွက် ကေအဲန်ယူက ကရင်အမျိုးသားရဲတပ်ဖွဲ့(KNPF)ကို ၁၉၉၁ ခုနှစ်၊ စက်တင်ဘာလ ၉ ရက်နေ့မှာ ဖွဲ့စည်းတည်ထောင်ခဲ့ပြီး အခု ၂၀၂၆ ခုနှစ်မှာ ကရင်အမျိုးသားရဲတပ်ဖွဲ့ ဖွဲ့စည်းတည်ထောင်ခြင်း (၃၅)နှစ်ပြည့်မြောက်ခဲ့ပြီ ဖြစ်ပါတယ်။

ကော်သူးလေပြည်သူတွေ အေးချမ်းစွာနေထိုင်နိုင်ရေးနဲ့ တရားဥပဒေစိုးမိုးရေးဟာ KNPF တခုတည်းရဲ့ လုပ်ငန်းတာဝန်မဟုတ်ပဲ ပြည်သူလူထုနဲ့ ပူးပေါင်းဆောင်ရွက်ဖို့ လိုအပ်တဲ့ အရေးကြီးတဲ့ လုပ်ငန်းစဉ်တစ်ရပ်ဖြစ်တာကြောင့် ပြည်သူတွေအနေနဲ့ သတင်းအချက်အလက်ပေးပို့တာ လိုအပ်တဲ့ ပံ့ပိုးကူညီမှုတွေ ပြုလုပ်တာ အကြံဉာဏ်တွေ ပေးအပ်တာတို့ကို KNPF နဲ့ ပူးပေါင်းဆောင်ရွက်ဖို့ လိုအပ်တယ်လို့ ကေအဲန်ယူက ပြောပါတယ်။

ဒါ့အပြင် ပြည်သူလူထုကို ထိရောက်စွာ ကာကွယ်စောင့်ရှောက်နိုင်ဖို့အတွက် ရဲတပ်ဖွဲ့အင်အား အရည်အသွေး စွမ်းရည်နဲ့ လိုအပ်တဲ့ စက်ပစ္စည်းကိရိယာတွေ ဖြည့်ဆည်းပေးနိုင်ရေးဟာလည်း အရေးကြီးတဲ့ လိုအပ်ချက်တွေဖြစ်တယ်လို့ ဆိုပါတယ်။

ကရင်အမျိုးသားရဲတပ်ဖွဲ့ ဖွဲ့စည်းတည်ထောင်ခြင်း (၃၅)နှစ်ပြည့် ပြည့်မြောက်တဲ့အခါသမယမှာ ပြည်သူလူထုရဲ့ လုံခြုံရေးနဲ့ တရားဥပဒေစိုးမိုးရေးအတွက် တာဝန်ထမ်းဆောင်နေကြတဲ့ ကရင်အမျိုးသားရဲတပ်ဖွဲ့ဝင်တွေကို ဂုဏ်ပြုအပ်ကြောင်း ကေအဲန်ယူက ထုတ်ပြန်လိုက်ပါတယ်။

လက်ရှိ ကရင်အမျိုးသားရဲတပ်ဖွဲ့(KNPF)ရဲ့ ရဲမှူးချုပ်ဟာ ရဲမှူးချုပ်စောအယ်ကလူဖိုးက တာဝန်ယူဆောင်ရွက်နေတာဖြစ်ပါတယ်။

ဓာတ်ပုံ - ကေအဲန်ယူ

09/08/2026

ထော်မူပလဲမဲ စစ်တပ်စခန်း KNLA အမှတ် ၅ တပ်မဟာ သိမ်းပိုက်ရရှိ

စက်တင်ဘာ-၈၊ ၂၀၂၆ / TawNaw FM

ကေအဲန်ယူ-မူတြော်ခရိုင် တပ်မဟာ ၅ လူသောမြို့နယ်ရှိ လာရောက်ကျူးကျော်တပ်စွဲထားတဲ့ ထော်မူပလဲမဲစစ်တပ်စခန်းကို စက်တင်ဘာ ၈ ရက်နေ့မှာ KNLA တပ်မဟာ ၅ က နယ်မြေရှင်းလင်းပြီး ပြန်ထိန်းချုပ်လိုက်ကြောင်း သိရပါတယ်။

စစ်အုပ်စုရဲ့ ထော်မူပလဲမဲတပ်စခန်းကို KNLA အမှတ် ၅ တပ်မဟာက စနိုက်ပါနဲ့ ခြုံခိုတိုက်ခိုက်တာ ပျောက်ကြားတိုက်ခိုက်တာ ရိက္ခာဖြတ်တာ နည်းလမ်းမျိုးစုံနဲ့ ချေမှုန်းတိုက်ခိုက်ခဲ့တာတွေကြောင့် စခန်းရှိ စစ်ကော်မရှင်တပ်သားတွေဟာ စခန်းကိုစွန့်ခွာသွားခဲ့တာလို့ တပ်မဟာ ၅ သတင်းရင်းမြစ်ဆီကနေ သိရပါတယ်။

ဒီကနေ့ စက်တင်ဘာလ ၈ ရက်နေ့မှာ KNLA အမှတ် ၅ တပ်မဟာက ထော်မူပလဲမဲစခန်းကို တက်ရောက်ရှင်းလင်းသိမ်းပိုက်ပြီး နယ်မြေပြန်လည်ထိန်းချုပ်လိုက်တယ်လို့ တပ်မဟာ ၅ သတင်းရင်းမြစ်က ဖော်ပြထားပါတယ်။

ထော်မူပလဲမဲစခန်းဟာ ၁၉၉၇ ခုနှစ်က ကေအဲန်ယူ-မူတြော်ခရိုင် လူသောမြို့နယ် လွယ်မူပလောဒေသမှာ လာရောက်ကျူးကျော်တပ်စွဲထားတဲ့ စခန်းတစ်ခုဖြစ်ပြီး အဲဒီစခန်းကို ပြီးခဲ့တဲ့နှစ်ပိုင်းက အမှတ် ၅ တပ်မဟာက ဝိုင်းရံပိတ်ဆို့ခဲ့တာဖြစ်ပါတယ်။

ဓာတ်ပုံ - Wah Fish Paste

09/01/2026

တိုင်းနဲ့ပြည်နယ် ၅ ခုမှာ ရေဘေးသင့်သူ ၁ ဒသမ ၃ သန်းထက်မနည်း ရှိနိုင်

စစ်အစိုးရရဲ့ သဘာ၀ဘေးကယ်ဆယ်ရေး အစီအမံတွေ အားနည်းနေပြီး နေရာအနှံ့ လွမ်းခြုံနိုင်ခြင်းမရှိသေးကြောင်း ISP-Myanmar ပြော

စက်တင်ဘာ-၁၊ ၂၀၂၆ / TawNaw FM

မိုးများပြီး ရေကြီးတာကြောင့် တစ်လအတွင်း တိုင်းနဲ့ပြည်နယ် ၅ ခုမှာ ရေဘေးသင့်ပြည်သူ ၁ ဒသမ ၃ သန်းထက်မနည်း ရှိနိုင်ပြီး ဦးမင်းအောင်လှိုင်အစိုးရရဲ့ သဘာ၀ဘေးကယ်ဆယ်ရေးအစီအမံတွေဟာ ချက်ချင်းတုံ့ပြန်နိုင်စွမ်း အားနည်းနေတယ်လို့ မြန်မာ့မဟာဗျူဟာနဲ့ မူဝါဒလေ့လာရေးအင်စတီကျူ(ISP-Myanmar) ဒီကနေ့မှာ သတင်းထုတ်ပြန်ထားပါတယ်။

ဇူလိုင်လ ၁၀ ရက်ကနေ ဩဂုတ်လ ၁၁ ရက်အတွင်း မိုးများပြီးရေကြီးတာကြောင့် ဧရာ၀တီ၊ စစ်ကိုင်း၊ ပဲခူး၊ မန္တလေးတိုင်းနဲ့ ရခိုင်ပြည်နယ်တို့မှာ ရေဘေးသင့်ပြည်သူ ၁ ဒသမ ၃ သန်းထက်မနည်း ရှိနိုင်တာကို တွေ့ခဲ့ရတယ်လို့ ISP-Myanmar က ဖော်ပြထားပါတယ်။

ပြီးခဲ့တဲ့ဇူလိုင်လအစမှာ ပဲခူးတိုင်း၊ မွန်နဲ့ ကရင်ပြည်နယ်တို့မှာ ရေကြီးတာတွေ စကြုံခဲ့ပြီး ဇူလိုင်နှောင်းပိုင်းမှာတော့ ဧရာ၀တီတိုင်းက လေးမျက်နှာအပါအဝင် မြို့နယ် ၁၄ ခုမှာ ရေဘေးဒဏ်ကို ဆိုးဆိုးရွားရွား ကြုံနေရတယ်လို့ ISP-Myanmar က ဆိုပါတယ်။

ဒါ့အပြင် ဩဂုတ် ၇ ရက်ကစပြီး စစ်ကိုင်းတိုင်းထဲက မြို့နယ် ၁၂ ခုထက်မနည်းမှာလည်း ရေဘေးဒဏ်ခံနေကြရပြီး ကချင်၊ ရှမ်းပြည်နယ်နဲ့ နေပြည်တော်ထဲက ဒေသတချို့မှာလည်း ရေကြီးမှုတွေဖြစ်ခဲ့တယ်လို့ ဆိုပါတယ်။

လေးမျက်နှာရေဘေးကြောင့် လူဦးရေ ၃၉၀၀၀ ကျော် ထိခိုက်ခဲ့ကြောင်း ဦးမင်အောင်းလှိုင်အစိုးရက ထုတ်ပြန်ထားတယ်လို့ ဆိုထားပြီး အာရက္ခတပ်တော် AA ထိန်းချုပ်ထားတဲ့ ရခိုင်နဲ့ ပြည်သူ့ကာကွယ်ရေးတပ်တွေ LDF ၊ PDF ရဲ့ ထိန်းချုပ်နယ်မြေအများစုရှိတဲ့ စစ်ကိုင်းတိုင်းက ရေဘေးသင့်အခြေအနေတွေကိုတော့ ဦးမင်းအောင်လှိုင်အစိုးရက ထုတ်ပြန်တာနည်းတယ်လို့ ISP-Myanmar က ဆိုပါတယ်။

စစ်ကိုင်းနဲ့ မန္တလေးတိုင်းမှာ ရေဘေးသင့်သူ ၄ သိန်းကျော်ရှိတယ်လို့ NUG က ထုတ်ပြန်ထားပြီး Myanmar Emergency Response Coordination Unit(MERCU)ကလည်း ပြည်နယ်နဲ့တိုင်း ၄ ခုမှာ ရေဘေးသင့်ပြည်သူ ၄ သိန်း ၅ သောင်းကျော်ရှိနေတယ်လို့ ဩဂုတ် ၁၁ ရက်နေ့က ထုတ်ပြန်ထားပါတယ်။ ၂၀၂၄ ခုနှစ်ကလည်း လူဦးရေ ၅ ဒသမ ၆ သန်းကျော် ရေဘေးသင့်ခဲ့တယ်လို့ ISP-Myanmar က ဖော်ပြထားပါတယ်။

ဦးမင်းအောင်လှိုင်အစိုးရရဲ့ သဘာ၀ဘေးကယ်ဆယ်ရေးအစီအမံတွေဟာ ချက်ချင်းတုံ့ပြန်နိုင်စွမ်း အားနည်းသလို နေရာအနှံ့လွမ်းခြုံနိုင်စွမ်းလည်းမရှိသေးပဲ နှစ်စဉ်ကြုံနေရပေမယ့် ကြိုတင်ကာကွယ်နိုင်စွမ်းမှာ ဘက်ပေါင်းစုံ ချည့်နဲ့နေဆဲဖြစ်တယ်လို့ ISP-Myanmar က ဆိုထားပါတယ်။

ဓာတ်ပုံ - ISP ၊ AKY

08/30/2026

KNPP အထွေထွေအတွင်းရေးမှူး ရဲဘော်အောင်ဆန်းမြင့် ကွယ်လွန်

ဩဂုတ်-၃၀၊ ၂၀၂၆ / TawNaw FM

ကရင်နီအမျိုးသားတိုးတက်ရေးပါတီ(KNPP)ရဲ့ အထွေထွေအတွင်းရေးမှူး ရဲဘော်အောင်ဆန်းမြင့်ဟာ ဒီနေ့ ဩဂုတ် ၃၀ ရက်နေ့ ညနေပိုင်းမှာ ထိုင်းနိုင်ငံမှာ ကွယ်လွန်သွားခဲ့ကြောင်း KNPP ဗဟိုဌာနချုပ်က အသိပေးထုတ်ပြန်ထားပါတယ်။

ရဲဘော်အောင်ဆန်းမြင့် (အသက် ၆၃ နှစ်)ဟာ ထိုင်းနိုင်ငံ ဆေးရုံတစ်ခုမှာ ဆေးကုသမှုခံယူနေစဉ် ဩဂုတ်လ ၃၀ ရက်နေ့ ထိုင်းစံတော်ချိန် ညနေ ၃ နာရီ ၁၃ မိနစ်အချိန်မှာ ကွယ်လွန်သွားခဲ့တယ်လို့ KNPP က ထုတ်ပြန်အသိပေးပါတယ်။

ရဲဘော်အောင်ဆန်းမြင့်ဟာ KNPP ရဲ့ ပါတီအထွေထွေအတွင်းရေးမှူးအပြင် ကရင်နီပြည်အတိုင်ပင်ခံကောင်စီ(KSCC)ရဲ့ ဥက္ကဌ၊ တိုင်းရင်းသားလူမျိုးများကောင်စီ(Multi-Ethnic Councils)ရဲ့ Coordinator ၊ ဖက်ဒရယ်ဒီမိုကရေစီပြည်ထောင်စု ပေါ်ထွန်ရေး ဦးဆောင်ကောင်စီ(SCEF) ရဲ့ အတွင်းရေးမှူးအဖွဲ့ဝင်အဖြစ် တာဝန်ယူထားသူတစ်ဦးလည်းဖြစ်ပါတယ်။

ကွယ်လွန်သူ(ရဲဘော်အောင်ဆန်းမြင့်)ရဲ့ ရုပ်ကလာပ်ကို ကရင်နီပြည် နယ်စပ်တစ်နေရာမှာ လာမယ့် စက်တင်ဘာလ ၅ ရက်နေ့ မွန်းလွဲပိုင်းအချိန်မှာ မြေမြုပ်သင်္ဂြိုလ်မှာဖြစ်တဲ့အတွက် ရပ်ဝေးရပ်နီးက ဆွေမျိုးမိတ်ဆွေတွေ၊ တော်လှန်ရေးအဖွဲ့အစည်းတွေကို အသိပေးအပ်တယ်လို့ KNPP က ထုတ်ပြန်လိုက်ပါတယ်။

ဓာတ်ပုံ - KNPP

08/28/2026

ကရင်လူမျိုးတိုင်း စုစည်းပြီး ရိုးရာဓလေ့ထုံးတမ်းတစ်ခုဖြစ်တဲ့ ကရင်လက်ချည်ပွဲကို ကျင်းပဂုဏ်ပြုရမှာဖြစ်ကြောင်း ကေအဲန်ယူဥက္ကဌ ပဒိုစောကွယ်ထူးဝင်း ပြော

ဩဂုတ်-၂၈၊ ၂၀၂၆ / TawNaw FM

ကရင်ရိုးရာချည်ဖြူဖွဲ့ လက်ချည်ခြင်းအလေ့အထဟာ ယုံကြည်ကိုးကွယ်မှု၊ ဘာသာတရားတွေရဲ့ အလေ့အထမဟုတ်ပဲ ကရင်တမျိုးသားလုံးနဲ့ သက်ဆိုင်တဲ့ ရိုးရာဓလေ့၊ ယဉ်ကျေးမှု၊ ထုံးတမ်းအစဉ်အလာတစ်ရပ်ဖြစ်တယ်လို့ ကေအဲန်ယူ-ကရင်အမျိုးသားအစည်းအရုံး ဥက္ကဌ ပဒိုစောကွယ်ထူးဝင်းက ပြောပါတယ်။

ကရင်ရိုးရာ ဝါခေါင်လ ချည်ဖြူဖွဲ့မင်္ဂလာအခမ်းအနားကို ပေးပို့တဲ့ သဝဏ်လွှာထဲမှာ ကေအဲန်ယူ-ဥက္ကဌ ပဒိုစောကွယ်ထူးဝင်းက အထက်ပါအတိုင်း ထည့်သွင်းပြောကြားခဲ့တာဖြစ်ပါတယ်။

ကရင်ရိုးရာချည်ဖြူဖွဲ့ မင်္ဂလာအခမ်းအနားဟာ ရပ်ဝေးရပ်နီးတို့မှာရှိကြတဲ့ မိသားစုဆွေမျိုးတွေ ပြန်လည်စုရုံးလျက် လက်ချည်ခြင်း၊ ကွဲပြားဝေးကွာ ပျံ့လွင့်နေကြတဲ့ မိသားစုဝင်အသီးသီးတို့ရဲ့ အားမာန်၊ စိတ်နဲ့ခန္ဓာကို ပြန်လည်စုစည်းစေခြင်းဖြစ်တယ်လို့ ပဒိုစောကွယ်ထူးဝင်းက ဆိုထားပါတယ်။

မိသားစုအနွယ်ဝင်များရဲ့ စိတ်နဲ့ခန္ဓာမှာ လူမျိုးကိုချစ်သောစိတ်၊ စည်းလုံးညီညွတ်သောစိတ်ကို ပြန်လည်ရရှိစေဖို့ စောင့်ထိန်းကြရသော ကရင်လူမျိုးတို့ရဲ့ ရိုးရာဓလေ့ထုံးတမ်းတစ်ခုဖြစ်ပြီး မိမိတို့လူမျိုးကို မိမိတို့ လေးစားတန်ဖိုးထားခြင်း၊ အမျိုးသားရေးစိတ်ဓာတ်ကို တည်ဆောက်ခြင်း၊ စည်းလုံးညီညွတ်ခြင်းများကို ပြန်လည်အောက်မေ့လျက် အသစ်တဖန် ပြန်လည်အသက်သွင်းသော အခမ်းအနားတစ်ခုလည်းဖြစ်တယ်လို့ ဆိုပါတယ်။

ဒါကြောင့် ကရင့်ရိုးရာယဉ်ကျေးမှုအမွေအနှစ်အဖြစ် အလေးထား ထိန်းသိမ်းစောင့်ရှောက်နိုင်ဖို့ အနယ်နယ်အရပ်ရပ်နဲ့ ကမ္ဘာတစ်ဝှမ်းလုံးရှိ ကရင်လူမျိုးတိုင်း အချင်းချင်းဆက်သွယ်စုစည်းကြပြီး ရိုးရာချည်ဖြူဖွဲ့ခြင်းရဲ့ အဓိပ္ပါယ်ကို ဖော်ထုတ်ကာ လက်ချည်ပွဲအခမ်းအနားကို ကျင်းပဂုဏ်ပြုရမယ်လို့ ပဒိုစောကွယ်ထူးဝင်းက တိုက်တွန်းပြောကြားလိုက်ပါတယ်။

ဓာတ်ပုံ - ကေအဲန်ယူ

08/27/2026

ဒူးပလာယာခရိုင်မှာ ကော်သူးလေ တောင်သူလယ်သမားများသမဂ္ဂ ဖွဲ့စည်း

ဩဂုတ် - ၂၇၊ ၂၀၂၆ / TawNaw FM

ကော်သူးလေ အလုပ်သမား သမဂ္ဂများအဖွဲ့ချုပ်-FTUK နဲ့ ဒူးပလာယာခရိုင် တောင်သူလယ်သမားများသမဂ္ဂတို့ ပူးပေါင်းပြီး ဒူးပလာယာခရိုင်မှာ ကော်သူးလေတောင်သူလယ်သမားများသမဂ္ဂကို ကျေးရွာအဆင့်နဲ့ ကျေးနယ်အဆင့်တွေမှာ ဖွဲ့စည်းခဲ့တယ်လို့ FTUK က သတင်းထုတ်ပြန်ပါတယ်။

ဒီလ(ဩဂုတ်လ)အတွင်းမှာ ဖွဲ့စည်းခဲ့တာဖြစ်ပြီး တောင်သူလယ်သမားတွေရဲ့ စားဝတ်နေရေးနဲ့ လူနေမှုအဆင့်အတန်း တိုးတက်ကောင်းမွန်လာစေဖို့၊ ဒေသနဲ့ ကိုက်ညီတဲ့ စိုက်ပျိုးရေးအသိပညာနဲ့ နည်းလမ်းတွေရရှိစေဖို့၊ သီးနှံအထွက်နှုန်း တိုးမြှင့်နိုင်ဖို့နဲ့ သဘာ၀ပတ်ဝန်းကျင် ထိခိုက်မှု လျော့နည်းစေဖို့အတွက် အဓိကရည်ရွယ်ဖွဲ့စည်းတာလို့ ဖော်ပြပါတယ်။

ဒါ့အပြင် တောင်သူလယ်သမားတွေရဲ့ အခွင့်အရေးတွေကို ကာကွယ်မြှင့်တင်ကာ အမြတ်ထုတ်ခံရမှုနဲ့ အနိုင်အထက်ပြုမှုတွေကနေ ကာကွယ်နိုင်ရေးကိုလည်း ရည်ရွယ်တယ်လို့ ဆိုထားပါတယ်။

ဒီလို ကျေးနယ်နဲ့ ကျေးရွာအဆင့်တွေမှာ ကော်သူးလေ တောင်သူလယ်သမားသမဂ္ဂကို ဖွဲ့စည်းပြီးနောက်မှာ သမဂ္ဂရဲ့ လုပ်ငန်းတွေ ပိုမိုထိရောက်စွာ အကောင်အထည်ဖော်နိုင်ရေးအတွက် ကော်သူးလေအလုပ်သမားများသမဂ္ဂအဖွဲ့ချုပ်ဟာ ဒူးပလာယာခရိုင် အတွင်းရေးမှူး၊ တွဲဖက်အတွင်းရေးမှူးတို့နဲ့အတူ ရှေ့လုပ်ငန်းစဉ်တွေနဲ့ ဆက်လက်ဆောင်ရွက်မယ့် လုပ်ငန်းတွေကို ဆွေးနွေးခဲ့ကြတယ်လို့ ထုတ်ပြန်ချက်မှာ အသိပေးပါတယ်။

အဆိုပါ ဖွဲ့စည်းဆောင်ရွက်မှုကနေတစ်ဆင့် တောင်သူလယ်သမားတွေရဲ့ စိုက်ပျိုးရေးအသိပညာနဲ့ အခွင့်အရေးဆိုင်ရာ နားလည်မှုတွေ ပိုမိုမြင့်မားလာစေဖို့၊ စားဝတ်နေရေး ပိုမိုဖူလုံလာစေဖို့နဲ့ မိမိတို့ရဲ့ အခွင့်အရေးတွေကို စုပေါင်းကာကွယ်မြှင့်တင်နိုင်ဖို့ ဆက်လက်အကောင်အထည်ဖော် ဆောင်ရွက်သွားမယ်လို့ ထုတ်ပြန်ထားပါတယ်။

ဓာတ်ပုံ - ကော်သူးလေအလုပ်သမားများသမဂ္ဂအဖွဲ့ချုပ်

08/26/2026

ဒီထက်မက ငြိမ်းချမ်းဖို့ မျှော်လင့်ကြောင်း KNA စစ်ဒေသမှူး ဗိုလ်မှူးချုပ်စောတင်ဝင်း ပြော

ဩဂုတ် - ၂၆၊ ၂၀၂၆ / TawNaw FM

နယ်မြေဒေသ တည်ငြိမ်အေးချမ်းလို့ ကရင်လက်ချည်ပွဲကို ကောင်းကောင်းမွန်မွန် ကျင်းပနိုင်ခဲ့တာဖြစ်တယ်လို့ ကရင်အမျိုးသားတပ်မတော်-KNA အမှတ် ၂ စစ်ဒေသမှူး ဗိုလ်မှူးချုပ်စောတင်ဝင်းက ဒီကနေ့ သေ့ကတေရွာမှာပြုလုပ်တဲ့ ကရင်လက်နက်ချည်ပွဲအခမ်းအနားမှာ ပြောလိုက်ပါတယ်။

ကရင်လက်ချည်ပွဲကို ကောင်းကောင်းမွန်မွန် ကျင်းပလုပ်ဆောင်နိုင်တာဟာ မိမိတို့နယ်မြေအတွင်းမှာ ငြိမ်းချမ်းမှုရှိလို့ဖြစ်ပြီး ကရင်လူမျိုးတွေဟာ ငြိမ်းချမ်းရေးကို လိုလားကြောင်း၊ ငြိမ်းချမ်းမှုရှိမှ ကရင်လက်ချည်ပွဲ ကရင်နှစ်သစ်ကူးပွဲတို့ကို ကျင်းပလုပ်ဆောင်လို့ရမှာဖြစ်ကြောင်း ဗိုလ်မှူးချုပ်စောတင်ဝင်းက ဆိုပါတယ်။

"ဒီထက်မက ငြိမ်းချမ်းအောင်လည်း ကျွန်တော်တို့ ရှေ့ဆက်ပြီးတော့ မျှော်လင့်ပါတယ်" လို့ ဗိုလ်မှူးချုပ်စောတင်ဝင်းက ပြောပါတယ်။

KNA အမှတ် ၂ စစ်ဒေသမှူး ဗိုလ်မှူးချုပ်စောတင်ဝင်း ဦးဆောင်ကျင်းပတဲ့ ကရင်လက်ချည်ပွဲကို ဒီကနေ့ ဩဂုတ် ၂၆ ရက်နေ့က မြ၀တီမြို့နယ်၊ သေ့ကတေရွာမှာ ကျင်းပပြုလုပ်ခဲ့တာဖြစ်ပါတယ်။

ဓာတ်ပုံ - Nay Naw

08/25/2026

မယ်တော်ဆေးခန်း အိုကီနာဝါ ငြိမ်းချမ်းရေးဆု ချီးမြှင့်ခံရတဲ့အပေါ် အထူးဂုဏ်ယူဝမ်းမြောက်ကြောင်း OKOJ ထုတ်ပြန်

ဩဂုတ် - ၂၅၊ ၂၀၂၆ / TawNaw FM

ဒေါက်တာစင်သီယာမောင် ဦးဆောင်တဲ့ မယ်တော်ဆေးခန်းဟာ ဂျပန်နိုင်ငံရဲ့ အိုကီနာဝါ ငြိမ်းချမ်းရေးဆု ချီးမြှင့်ခံရတဲ့အတွက် အထူးဂုဏ်ယူဝမ်းမြောက်ကြောင်း ဂျပန်နိုင်ငံအခြေစိုက် နိုင်ငံခြားကရင်အဖွဲ့အစည်း-OKOJက ဩဂုတ် ၂၅ ရက်နေ့မှာ သတင်းထုတ်ပြန်ပါတယ်။

ထိုင်း-မြန်မာနယ်စပ်ဒေသရှိ စစ်ဘေးရှောင်ပြည်သူတွေ၊ ဒုက္ခသည်တွေ၊ ရွှေ့ပြောင်းအလုပ်သမားတွေနဲ့ ကျန်းမာရေးစောင့်ရှောက်မှု လိုအပ်နေသူတွေကို နှစ်ပေါင်း ၃၅ နှစ်ကျော်ကြာ လူမျိုး၊ ဘာသာနဲ့ နိုင်ငံသား မခွဲခြားပဲ လူသားချင်းစာနာမှုနဲ့ ကူညီစောင့်ရှောက်ပေးခဲ့တဲ့ ဒေါက်တာစင်သီယာမောင်နဲ့ မယ်တော်ဆေးခန်းရဲ့ မွန်မြတ်သောဆောင်ရွက်မှုတွေကို အခုလို အသိအမှတ်ပြုဂုဏ်ပြုတာဟာ အလွန်ထိုက်တန်သော ဂုဏ်ပြုမှုတစ်ရပ်ဖြစ်တယ်လို့ OKOJက ထုတ်ပြန်ထားပါတယ်။

ဒါ့အပြင် ဒေါက်တာစင်သီယာမောင်ဟာ OKO-Japan စတင်တည်ထောင်ရာမှာ ပါဝင်ခဲ့သူတစ်ဦးဖြစ်တဲ့အတွက် အခုအောင်မြင်မှုဟာ ကျွန်ုပ်တို့ OKOJ နဲ့ ကရင်လူမျိုးတွေအတွက်လည်း အထူးဂုဏ်ယူဝမ်းမြောက်ဖွယ်ရာဖြစ်ကြောင်း ထုတ်ပြန်ချက်မှာ ဖော်ပြပါတယ်။

ဒေါက်တာစင်သီယာမောင်၊ မယ်တော်ဆေးခန်းအဖွဲ့သားတွေနဲ့ ယင်းလူသားချင်းစာနာမှုလုပ်ငန်းတွေမှာ ပါဝင်ပံ့ပိုးပေးခဲ့ကြသူအားလုံးကို လှိုက်လှဲစွာဂုဏ်ပြုပြီး မယ်တော်ဆေးခန်းရဲ့ လူသားချင်းစာနာမှုလုပ်ငန်းတွေ ဆက်လက်တိုးတက်အောင်မြင်ပြီး လိုအပ်နေသူတွေအတွက် မျှော်လင့်ချက်နဲ့ အားကိုးရာအဖြစ် အစဉ်ရပ်တည်နိုင်ပါစေကြောင်း OKOJက ဆုမွန်ကောင်းတောင်းလိုက်ပါတယ်။

အိုကီနာဝါ ငြိမ်းချမ်းရေးဆုကို ပြည်ပအခြေစိုက် အဖွဲ့အစည်းတစ်ခုအနေနဲ့ မယ်တော်ဆေးခန်းက ပထမဦးဆုံးအကြိမ် ဆွတ်ခူးရရှိခဲ့တာဖြစ်ပြီး ဆုပေးပွဲအခမ်းအနားကို လာမယ့် အောက်တိုဘာလ ၁၉ ရက်နေ့မှာ ဂျပန်နိုင်ငံ၊ နာဟာမြို့မှာ ကျင်းပပြုလုပ်သွားမှာဖြစ်ပါတယ်။

ဓာတ်ပုံ - OKOJ ၊ မယ်တော်ဆေးခန်း

Address

1940 Oakwood Drive
Fort Collins, CO
80521

Website

http://www.tawnawfm.com/

Alerts

Be the first to know and let us send you an email when TawNaw FM posts news and promotions. Your email address will not be used for any other purpose, and you can unsubscribe at any time.

Contact The Business

Send a message to TawNaw FM:

Want your business to be the top-listed Media Company in Fort Collins?

TawNaw FM

09/10/2026

09/10/2026

09/09/2026

09/08/2026

09/01/2026

08/30/2026

08/28/2026

08/27/2026

08/26/2026

08/25/2026

Address

Website

Alerts

Contact The Business

Shortcuts

Share

Category

Listing takedown request