09/05/2025
ကီၢ်ပယီၤပှၤမၤတၢ်ဖိသ့ၣ်တဖၣ်လၢ အလဲၤတုၤလၢကီၢ်ကၠီၣ်တဲၣ်တဘၣ်ဖိးမံသဲစးဘၣ်န့ၣ် တမၤတၢ်တပှၢ်ကတၢၢ်
၂၀၂၅ နံၣ်, လါစဲးပထ့ဘၢၣ် ၅ သီ၊ ကီၢ်ပယီၤ / Taw Naw FM
၂၀၂၁ တၢ်ဟံးန့ၢ်စူၣ်တၢ်စိကမီၤဝံၤအလီၢ်ခံ လၢအဘၣ်ထွဲဒီမုၢ်ကျိၤဝဲၤကွၥ်အစုၥ်စုၥ်တၢ်ကီခဲသ့ၣ်တဖၣ်ဒီး သုးမီၤစိရိၤ အတၢ်မၢစူၣ်တၢ်ထၢသုးအဃိ ပပှၤလၢလဲၤမၤတၢ်လၢ ထံလီၢ်ကီၢ်ချၢသ့ၣ်တဖၣ်လၢတဘၣ်ဖိးမံသဲစးဘၣ်န့ၣ် အါထီၣ်ဝဲအါမးန့ၣ်လီၤ.
ကီၢ်ကၠီၣ်တဲန့ၣ် ပှၤလၢဟဲနုၥ်လီၤမၤတၢ်မၤ လၢတဘၣ်တၢ်ဘျၢသဲးစးဘၣ်သ့ၣ်တဖၣ် တကီၢ်ခါပူၤ အဝဲသ့ၣ်ဟဲနုၥ်လီၤဝဲအဆၢကတီၢ်န့ၣ် တၢ်လုၢ်တၢ်ပှ့ၤတၢ်လၢၤကျိၣ်လၢၤစ့သ့ၣ်တဖၣ် ကလိၣ်ကဒါက့ၤ ဘၣ်မၤဂုၥ်ကျဲးစၢးဝဲတပှၢ်ကတၢၢ်န့ၣ် စံးဝဲန့ၣ်လီၤ.
IOM Thailand အလံၥ်စရီစံးဝဲအသိး ကီၢ်ပယီၤဖိ လွံၢ်ကကွဲၢ်ဘျဲၣ်အံၤ အိၣ်ဝဲဖဲကီၢ်ကၠီၣ်တဲၣ်ပူၤဝံၤဒီး ဖဲန့ၣ်အကျါ ခံကလီၢ်ဘျဲၣ်န့ၣ် အိၣ်လၢ တၢ်လိၥ်ဖိးမဲသဲစးသ့ၣ်တဖၣ် ဖီၣ်ဃၥ်ဝဲန့ၣ် စံးဝဲဒၣ်လီၤ.
အိၣ်စိၤဝဲလၢ တဘၣ်တၢ်ဘျၢအပူၤဃိ ဘၣ်မၤတၢ်ဖံးတၢ်န့ၣ် လါလဲစ့သ့ၣ်တဖၣ် စှၤဝဲဒၣ်, တၢ်ဖံးတၢ်မၤလါလဲစ့ ဃုပူၣ်တပူၣ်ဘၣ်ဖၠးဝဲဒၣ်, တန့ၢ်လါလဲဘၣ်အိၣ်စ့ၢ်ကီးအသိး ဘၣ်တၢ်ဖီၣ်ချုးသ့ၣ်တဖၣ်အိၣ်စ့ၢ်ကီးဒီး ဘၣ်သဂၢၢ်ဝဲဒီးထံၣ်ဘၣ်န့ၣ် ပှၤမၤတၢ်ဖိတနီၤ တဲဝဲလၢတီနီၢ်အံၤလီၤ.
ကလဲၤတုၤလၢကီၢ်ကၠီၣ်တဲၣ်အဂီၢ်စ့ၢ်ကီၢ် ဘၣ်ဟ့ၣ်ဝဲ ပွဲဆါခၣ် ကၠီၣ်တဲၣ်စ့ ဘၢ် ၁၂,၀၀၀ ဒီး ကျဲတၢ်လၢၥ်ဘူၣ်လၢၥ်စ့တခီ ကီၢ်ပယီၤစ့ အကလီၢ် ၃၀ လၢၥ်ဒံးဝဲန့ၣ် ကီၢ်ပယီၤပှၤမၤတၢ်ဖိလဲၤတုၤလၢကၠီၣ်တဲၣ် မၣ်ဒ့စံ တဲဝဲလၢ တီနီၢ်အံၤလီၤ.
" တဲပှၤဆှၢတၢ်ဖိ တကးဒံးဘၣ် ကၠီၣ်တဲၣ်စ့ ၁၂,၀၀၀ , တၢ်အီၤန့ၣ် မ့ၢ်ဝဲအပုၢ်ဒ့မုၣ်လီၤ ဘၣ်ဟ့ၣ်န့ၣ် ကိၢ်ညၢ်ဒံးန့ၣ်, အဝဲန့ၣ်အလဲၤတုၤဆိဝဲ ကျဲတၢ်လၢၥ်ဘူၣ်လၢၥ်စ့တခီ ကီၢ်ပယီၤစ့ အကလီၢ် ၃၀ လၢၥ်ဒံးဝဲ" န့ၣ် သဝဲ စံးဝဲန့ၣ်လီၤ.
လၢကီၢ်ပယီၤ ကၠီၣ်တဲ_ပယီၤကီဆၢ ရၤမတဲ_ မဲးစီး, ဖိးဖးဝ့ၢ်, ဃိၣ်သၢဖျၢၣ်_ ဆၣ်ခလဘူးရံး, ထံခံ, ယနီကျဲသ့ၣ်တဖၣ်လၢ ကီၢ်ကၠီၣ်တဲၣ်ပူၤ ကဟဲနုၥ်လီလၢ တဖိးမံသဲစးဘၣ်ဒီး ဘၣ်ဟ့ၣ်ဝဲ ပှၤဆှၢတၢ်ဖိတဖၣ်ခီ လၢပယီၤကီၢ်ဆၢ ကဃုမၤ တုၤလၢကၠီၣ်တဲၣ်ပူၤန့ၣ် ဘၢ် ၁၅,၀၀၀ ဖီခိၣ် အိၣ်ဝဲန့ၣ်လီၤ.
ပှၤသ့ၣ်တဖၣ်သွ့နုၥ်ဟ့ၣ်ဝဲန့ၣ် ကိးဝဲလၢစမၣ်စ့ တၢ်တူၣ်လိၥ်အပှ့ၤခီ တဘၣ်ဃ့ၣ်ဘၣ် ကန့ၢ်တၢ်မၤအနၥ်က့ ကိးဝဲလၢဘၢ် ကၠီၣ်တဲၣ်ပဒိၣ်ပၥ်ပနီၣ်ဝဲ ပါယီၤကးကန့ၣ်အဂီၢ်ခီ ကလၢၤဝဲ ဘၢ် ၁၆,၀၀၀ ဒီး ကဘၣ်ဒုးလၢၤကရ့န့ၣ် အ့ၣ်ယၣ်ဝတံၣ်ကီၢ်ခီ, ဟ့သတၣ်ဝ့ၢ်ဖိတဂၤ တုၤဝဲလၢကၠီၣ်တဲၣ် ကိၤဖၠိတဂၤ တဲဝဲဒၣ်လီၤ.
" လိၣ်ဘၣ်ဝဲဟံၣ်ဖိဃီဖိ မုၢ်ဂါတဂၤသွ့ဟ့ၣ်ဝဲဒၣ် အဃိ စမၣ်စ့န့ၣ်တဘၣ်ဟ့ၣ်ဘၣ် ပှၤအဂၤသ့ၣ်တဖၣ်ခီဘၣ်ဟ့ၣ်ဝဲ တၢ်အီၣ်တၢ်အီ တၢ်ဒိဘၢ်တခီ တၢ်မၤဝဲဝံၤခဲလၢၥ်န့ၣ် လၢၥ်ဝဲ ဘၢ် ၁၆,၀၀၀ တနွံန့ၣ် ၅၀၀ ဘၣ်က့ၥ်ဟ့ၣ်န့ၣ် အိၣ်ဒံးဝဲခံလါဘျဲၣ်" န့ၣ်စံးဝဲဒၣ်လီၤ.
လဲၤတုၤလၢကၠီၣ်တဲၣ် တၢ်ဆၢကတီၢ်ခံနံၣ်အပူၤ မၤဝဲ တၢ်သုးလီၢ်သုးကျဲးတၢ်မၤန့ၣ် လၢအဟဲန့ၢ် စ့ၢ်မိၣ်ပှၢ်အလၢၤသ့ၣ်တဖၣ်ကလိၣ်ကဒါက့ၤ တန့ၢ်ဒ်ဘၣ်န့ၣ် အဝဲတဲဝဲန့ၣ်လီၤ.
" စးထီၣ်လၢ တၢ်ထၢသုးလံန့ၣ် ဟဲတုၤအိၣ်ခံနံၣ်ဘျဲၣ်ဝံၤ, ကျဲတၢ်လၢၤကျိၤလၢၤစ့တလၢဒံးဘၣ်, ဆူမဲၥ်ညါခံလဲၣ်ဒံးမၣ် ကလၢ" န့ၣ် စံးဝဲဒၣ်လီၤ.
လ့ၤတက့ၤတန့ၢ်စ့ဒီး ဘၣ်မၤတ့ၢ်တၢ်မၤခံနံၣ်ဘျဲၣ်အသိး ခဲအံၤ တနွံန့ၣ် န့ၢ်ဘၣ်ဝဲ ထဲ ဘၢ် ၅၀၀ န့ၣ် လဲၤတုၤလၢကၠီၣ်တဲၣ် ကီၢ်ပယီၤ ပှၤတ့ကျဲဖိတဂၤ တဲဝဲလၢ တီနီၢ် အံၤလီၤ.
" ဘၣ်မၤဝဲတၢ်မၤခံနံၣ် စ့တန့ၢ်ဘၣ်န့ၣ်, အခဲအံၤဘၣ်ဂီၢ်ဧါန့ၣ် တဘၣ်ဂီၢ်ဘၣ်, ဒ်သိးဒီးလၢညါလီၤ တလါတဘျီခီတမ့ၢ်ဘၣ်, တနွံန့ၣ် တစဲးတစဲး ယဲၢ်ပီၢ်ယဲၢ်ပီၢ် ဟံးဝဲဒံးအံၤန့ၣ်, တၢ်ဆၢကတီၢ်ခဲအံၤအကီခဲကတၢၢ်န့ၣ် တန့ၢ်စ့ဘၣ်န့ၣ်လီၤ မၤခီဘၣ်မၤ စ့ခီတနီၤဘၣ်" န့ၣ် အဝဲ စံးဝဲဒၣ်လီၤ.
ဘၣ်မၤတၢ်မၤနးနးဒီး ဟ့ၣ်လါလဲစ့ဒီး တၢ်လုၢ်တၢ်ပှ့ၤထီၣ်န့ၣ် တလီၤဆီအဃိ တဘၣ်ဂီၢ်ဘၣ်န့ၣ် ကီၢ်ပယီၤပှၤသူၣ်ထီၣ်တၢ်ပှၤတ့ၢ်တၢ်ဖိတဂၤ တဲပၠးဝဲန့ၣ်လီၤ.
" ဖဲမၤတၢ်မၤဖဲအံၤန့ၣ် တၢ်မၤနး တဘျီဘျီ တဟ့ၣ်စ့ဘၣ်ဒီး, ဘၣ်မနုလံၣ်ဒီး တဘျီဘျီဘၣ်သးက့ၤ'' န့ၣ် အဝဲစံးဝဲန့ၣ်လီၤ.
ဖဲကီၢ်ကၠီၣ်တဲၣ်ပူၤ မၤတၢ်မၤဒီး ကီခဲဒ်အံၤပနၥ်က့စ့ၢ်ကီး ဂ့ၤန့ၣ်ဒံး ပမၤတၢ်မၤလၢ ကီၢ်ပယီၤ စ့နုၥ်လီၣ်ကိညၢ်တစ့န့ၣ် ကီၢ်ကၠီၣ်တဲၣ် ပှၤမၤတၢ်မၤလၢသ့ၣ်ရူတခါပူၤ တၢ်ဖီလၥ်ပှၤမၤတၢ်ဖိတဂၤ တဲဝဲန့ၣ်လီၤ.
ဘၣ်ဆၣ်သနၥ်က့ဒီး အန့ၣ်ဝဲအါသနၥ်က့ စ့တအိၣ်တ့ၢ်ဘၣ်ခီ ဒ်သိးသိးဒီးကီၢ်ပယီၤလီၤန့ၣ် စံးဝဲဒၣ်လီၤ. ဖဲလၢဟဲအဆၢကတီၢ် တၢ်လၢၤကျိၢ်လၢၤစ့သ့ၣ်တဖၣ်, ဒ်သိးကဖိးမံသဲစးအဂီၢ် တၢ်ပၥ်ပနီၣ်ကၣ်(ဘၢ်) အဂီၢ် ဘၣ်မၤသ့ၣ်တဖၣ်န့ၣ် အမၢ်သ့ၣ်တဖၣ်ထီၣ်ဒီး အခဲအံၤကဲထီၣ်သးဒ်အံၤန့ၣ် စံးဝဲန့ၣ်လီၤ.
" ကိၢ်ညၢ်ဒ်လၢ ဒိဘၣ်ဘၢ်, တၢ်အံၤစ့ၢ်ကီး ဘၣ်ဟ့ၣ်ဝဲအယ့" န့ၣ် တဲပၠးဝဲန့ၣ်လီၤ.
တၢ်ကစီၣ် - Caius
လံၥ်တၢ်ဂီၤ - ကၠီၣ်တဲၣ်-ပယီၤကီၢ်ဆၢ သူမွဲကျိလၢ လဲၤခီဂၥ်ထံနံၤထံး ပယီၤသ့ၣ်တဖၣ်
တၢ်ဂီၤ - IOM Thailand
Tawnaw FM ပၥ်ဖျါထီၣ်လံၥ်ကဘျံးပၤ အဖီလၥ်အံၤန့ၣ် နုၥ်လီၤကွၢ်ဘၣ်လၢ် သ့န့ၣ်လီၤ.
Website - www.tawnawfm.com
Telegram - https://t.me/tawnawfm
Youtube - https://shorturl.at/ksHUV
