07/14/2025
သုးကီၣ်ကးတၢ်ဃုထၢအံၤ ပှကညီဖိသ့ၣ်တဖၣ် ကထၢနုၥ်မဲဧါ
လါယူၤလံ ၁၄ သီ ၂၀၂၅ နံၣ်၊ ကီၢ်သူလ့ၤ / TawNaw FM
၂၀၂၅ နံၣ် ဒံၤစ့းဘၢၤဒီး ၂၀၂၆ နံၣ် စၢၣ်နအါရံး အတီၢ်ပူၤ သုးကီၣ်ကးအံၤ ကမၤဝဲတၢ်ဃုထၢအဂီၢ်အိၣ်ဝဲန့ၣ်လီၤ.
တၢ်ဃုထၢအံၤန့ၣ် တၢ်ပၢၢ်စၢ, လၢထံရူၢ်ကီၢ်သဲးတကပၤတၢ်ဟံးန့ၢ်တ့ၢ်မီၤစိရိၤန့ၣ် ခီဖျိသုးမုၢ်သံၣ်ဘိန့ၣ်မၤဝဲဃိ တၢ်ဘၣ်တၢ်ဘျၢပူၤဘၣ်န့ၣ် စံးဝဲန့ၣ်လီၤ.
၂၀၂၅ နံၣ် သုးကီၣ်ကးကမၤဝဲ လၢအဘၣ်ဃးဒီးတၢ်ဃုထၢအံၤန့ၣ် လၢတီနီၣ် သံကွၢ်ကဒီဝဲလၢ ကညီကလုၥ်ဒူၣ်သ့ၣ်တဖၣ်အိၣ်လၢ အ့ၣ်ယၣ်ဝတံၤကီၢ်ခီဒိၣ်, ဝ့ၢ်တကူၢ်ကီၢ်ခီဒိၣ်, ပကိကီၢ်ခီဒိၣ်ဒီး ကညီကီၢ်စဲၣ်န့ၣ် လီၢ်ကဝီၤဖိတနီၤန့ၣ် တၢ်ဃုထၢတဘျီအံၤ တအဲၣ်ဒိးဝဲသ့ၣ်တဖၣ်န့ၣ် အါမးန့ၣ်လီၤ.
"တၢ်တီတၢ်တြၢ်တအိၣ်, ထံလီၢ်ကီၢ်ပူၤတၢ်မုၥ်တၢ်ခုၣ်တအိၣ် ပမ့ၢ်ဖၢနုၥ်လီၤတၢ်ဃုထၢအံၤန့ၣ် အကလီၤဆီမနုလဲၣ်"န့ၣ် အ့ၣ်ယၣ်ဝတံၤကီၢ်ခီဒိၣ်, ဟ့တရၣ်ဝ့ၢ်ဖိ ကညီတဂၤ တဲဝဲလၢ တီနီၣ်အံၤန့ၣ်လီၤ.
၂၀၂၅ နံၣ် တၢ်ဃုထၢပူၤ ထံရူၢ်ကီၢ်သဲးပၣ်တံၣ် အိၣ်ထီၣ်ဝဲ ၅၇ ပၣ်တံၣ်လံန့ၣ် တၢ်ဃုထၢအံၤကကဲထီၣ်လိၣ်ထီၣ်အဂီၢ် ပတၢ်လဲၤကျဲတုၤ အါမးစ့ၢ်ကးလံန့ၣ် သုးကီၣ်ကးအံၤ စံးဝဲန့ၣ်လီၤ.
သုးကီၣ်ကးတၢ်ဃုထၢပူၤကီၣ်မစံးန့ၣ် လၢထံရူၢ်ကီၢ်သဲးပၣ်တံၣ်လံၥ်တၢ်ပၥ်ပနီၣ်ပူၤ တၢ်ဟိၣ်ဝဲခွဲယၥ် တၢ်ဂီၣ်န့ၣ် ကညီဒီကလုၥ်ဒံၣ်မိၣ်ကြ့ၣ်တ့ၣ်ပၣ်တံၣ်(Karen National Democratic Party)၊ ကညီထံဖိကီၢ်ဖိပၣ်တံၣ်(KPP)၊ ဖှိၢ်_စၢၤဝီဒံၣ်မိၣ်ကြ့ၣ်တ့ၣ်ပၣ်တံၣ် ကညီၣ်ပၣ်တံၣ်သ့ၣ်တဖၣ်န့ၣ် ပထံၣ်ဘၣ်ဒီး လၢသုးကီၣ်ကး တၢ်မုၥ်တၢ်ခုၣ်ဖြိၣ်ကြၣ်ပူၤန့ၣ် လၢအဟဲၣ်ထီၣ်တဖၣ်, တရူးကီၣ်မၠူးနံၣ်ပၣ်တံၣ်ပဒိၣ်ဒီး လၢလဲၤထံၤလိၥ်သးဒီးတၢ်လဲၤကျဲသ့ၣ်တဖၣ်ပူၤ ပၣ်ဃုၤဝဲစ့ၢ်ကီးန့ၣ် ထံၣ်ဘၣ်န့ၣ်လီၤ.
"ထံကီၢ်ဒီဘ့ၣ် တၢ်ဂ့ၢ်လိၥ်တ့ၢ်ဝဲန့ၣ် လၢတၢ်ဃုထၢကကဲထီၣ်အံၤန့ၣ် ပသ့ၣ်ညါဒီး ပနုၥ်လီၤပြၢန့ၣ် လၢကမ့ၢ်ကညီဖိတဂၤအသိန့ၣ် လီၤမဲၥ်ဆှး,အဝဲသ့ၣ်အဘူးအတီၢ်န့ၣ် အဝဲသ့ၣ်ကဘၣ်စံးတီန့ၢ်ဝဲဒၣ်န့ၣ် လၢတၢ်ကဟဲပိၥ်ထွဲထီၣ်သးလၢလီၢ်ခံန့ၣ် အဝဲသ့ၣ်ကဘၣ်ဘှါၡဲဝဲန့ၣ်, အဝဲသ့ၣ်ကဘၣ်ဟံးမူဒါ"န့ၣ် တၢ်ပၢၢ်စၢဟီၣ်ကဝီၤပူၤ အိၣ်လၢ ပဲၥ်ကၠိၣ်ဝ့ၢ်ဖိတဂၤ တဲဝဲလၢ တီနီၢ်အံၤ န့ၣ်လီၤ.
ကညီပၣ်တံၣ်လၢနုၥ်လီၤပြၢဝဲ တၢ်ဃုထၢပူၤအံၤ ကညီကလုၥ်တဖၣ်အဂီၢ် မၤစၢၤဝဲအိၣ်တန့ၣ်နီၤမံၤဘၣ်န့ၣ် အနီၢ်ကီၢ် မ့ၢ်အိၣ်န့ၣ် တုၤခဲအံၤ ကညီကီၢ်စဲၣ်ဒီးကီၢ်စဲၣ် တၢ်ဟ့ၣ်ဂံၢ်ဟ့ၣ်ဘါတၢ်မၤစၢၤန့ၢ်ဝဲလံန့ၣ် အဝဲစံးဝဲန့ၣ်လီၤ.
"လီၢ်ကဝီၤတနီၤတဖၣ်န့ၣ် လၢယမ့ၢ်ကညီဖိအဂီၢ် အိၣ်ဝဲလၢယကဟ့ၣ်မဲလၢ ကညီကလုၥ်သ့ၣ်တဖၣ်"န့ၣ် အဝဲတဲဝဲန့လီၤ.
တၢ်ဆၢကတီၢ်ခဲအံၤ လၢအကြၢးမ့ၢ်ကတၢၢ်န့ၣ် လၢပကနုၥ်လီၤမၤဝဲသုးကီၣ်ကး အတၢ်ဃုထၢအံၤ ပပၥ်ဖှိၣ်ထီၣ်ပသးဒီး ပမိၢ်ခ့ၣ်အဲၣ်ယူၣ်ကရၢကရိဒီး ပကမၤလၢ ကညီဘဂ့ၢ်န့ၣ် ကဂ့ၤကတၢၢ်န့ၣ် အဝဲ ဆဲးတဲကဒီးဝဲန့ၣ်လီၤ.
လၢအဘၣ်ဃးဒီးတၢ်ဃုထၢအံၤန့ၣ် ထံကရူၢ်ကီၢ်သဲးပၣ်တံၣ်တဖၣ် လၢတၢ်တူၢ်လိၥ်တသ့ၣ်ဘၣ်တခီန့ၣ် လၢထံပူၤကီၢ်ပူၤ မၤသံဝဲကမျၢၢ်ထံဖိကီၢ်ဖိသ့ၣ်တဖၣ်, တၢ်မၢန့ၢ်ဆူၣ်ကီးန့ၢ်ဆူၣ်လၢကကဲသုးသ့ၣ်တဖၣ်, တၢ်မၤလိကၠိ, တၢ်ဘူၣ်တၢ်ဘါဖၠၣ်, ကမျၢၢ်အိၣ်လီၢ်အိၣ်ကျဲတဖၣ် ဟးတ့ၢ်လီၤမ့ၣ်ပိၢ်န့ၣ် ပၥ်ဖှိၣ်လိၥ်သးဒီး သုးကီၣ်ကးသုးဖိန့ၣ် တၢ်ကွၢ်သ့ၣ်တဖၣ် ထံၣ်ဝဲန့ၣ်လီၤ.
"တၢ်ကဖၢနုၥ်လီၤမဲတအိၣ်, အဝဲသ့ၣ်တၢ်ဃုထၢအံး တၢ်နၤအီၣ်အီၤတအိၣ်န့ၣ်, ပၣ်တံၣ်လၢ ပၥ်ဖှိၣ်သးဒီး သုးမီၤစိရိတဖၣ်န့ၣ် တအဲၣ်ဒိးဘၣ်" န့ၣ် ရၤပတံဝ့ၢ်ဖိတဂၤ တဲဝဲလၢ တီနီၢ်အံၤန့ၣ်လီၤ.
တၢ်ပၢၢ်စၢထံရူၢ်ကီၢ်သဲးအပူၤတခီ သုးမီၤစိရိးသုးခိၣ်နၢ် တၢ်ဟးထီၣ်ကျဲအံၤ တမ့ၢ်လၢသုးမုၢ်သံၣ်ဘိဘၣ် မ့ၢ်ထံကရူၢ်ကီၢ်သဲးတၢ်ဟးထီၣ်ကျဲန့ၣ် စံးဝဲဒီး သုးလၢဟံးန့ၢ်တၢ်စိကမီၤန့ၣ် တၢ်တီတၢ်တြၢ်တၢ်ဘျၢတအိၣ်အဂ့ၢ် တၢ်ကမၤမူးဝဲ တၢ်ဃုလထၢအံၤ အခွဲးတအိၣ်န့ၣ် စံးဝဲန့ၣ်လီၤ.
တၢ်ဂ့ၢ်တၢ်ကျိၤ - ဆိုဒ်ဖါန်ဟှေဝ်
လံၥ်တၢ်ဂီၤ - ၂၀၂၀ တၢ်ဃုထၢ မဲအဆၢကတီၢ် ရၤမတံဝ့ၢ်ပထံၣ်ဘၣ်
တၢ်ဂီၤ - KNDP
Tawnaw FM ပၥ်ဖျါထီၣ် လံၥ်အဖီလၥ်အံၤန့ၣ် နုၤလီၤကွၢ်ဘၣ်လၢ်သ့န့ၣ်လီၤ.
Website - www.tawnawfm.com
Telegram - https://t.me/tawnawfm
Youtube - https://shorturl.at/ksHUV
