03/21/2026
ជាថ្មីម្តងទៀតអាជ្ញាធរមីន នៅថ្ងៃទី២០ ខែមីនា ឆ្នាំ២០២៦ បានអំពាវនាវដល់ពលរដ្ឋខ្មែរ ឲ្យបង្កើនការប្រុងប្រយ័ត្នខ្ពស់ចំពោះគ្រាប់បែកចង្កោម និងគ្រាប់មិនទាន់ផ្ទុះ ដែលប្រើប្រាស់ដោយយោធាថៃ។ ការអំពាវនាវជាថ្មីនេះ ធ្វើឡើងក្រោយមានពលរដ្ឋខ្មែរកាលពីពេលថ្មីៗនេះ បានរងគ្រោះថ្នាក់ដល់ជីវិត របួស និងពិការជាបន្តបន្ទាប់ដោយសារគ្រាប់របស់យោធាថៃ ជាពិសេសគ្រាប់បែកចង្កោម ដែលនៅរាយប៉ាយតាមបណ្តោយព្រំដែន ក្នុងខេត្តព្រះវិហារ ឧត្តរមានជ័យ បន្ទាយមានជ័យ ពោធិ៍សាត់ និងខេត្តបាត់ដំបង។ អាជ្ញាធរមីនបានណែនាំដល់ពលរដ្ឋ កុំរើស កុំកាន់ កុំគប់ កុំដំ ឬកែច្នៃជាដាច់ខាត ប្រសិនប្រទះឃើញវត្ថុ ដែលមានរូបរាងស្រដៀងនឹងគ្រាប់បែកចង្កោម។ លើសពីនេះ អាជ្ញាធរមីនក៏ប្រាប់ឲ្យពលរដ្ឋរាយការណ៍ភ្លាមៗ ទៅកាន់កងកម្លាំងមានសមត្ថកិច្ច និងអាជ្ញាធរមូលដ្ឋានដែលនៅជិតបំផុត និងហាមចូលទៅក្នុងតំបន់ ឬប្រើប្រាស់ដីធ្លីណា ដែលសង្ស័យថាមានគ្រាប់មិនទាន់ផ្ទុះ។ សូមរម្លឹកថា កាលពីថ្ងៃទី១៩ ខែមីនា ឆ្នាំ២០២៦ មានពលរដ្ឋខ្មែរចំនួន ២នាក់ នៅក្នុងខេត្តបន្ទាយមានជ័យ បានរងគ្រោះថ្នាក់ដោយសារការផ្ទុះគ្រាប់បែកចង្កោមរបស់ថៃ បណ្តាលឲ្យបុរសម្នាក់បាត់បង់ជីវិត និងម្នាក់ទៀតរងរបួសធ្ងន់៕
រូបភាព៖ អាជ្ញាធរមីន
