Daly Valet-JEWOPOLIS

05/23/2024

Jaden nou nan Gran Sid...Mayi sa plante nan mwa davril la...Nan mwens ke 1 mwa edmi ankò n ap rekòlte...Nou plante pwa kongo, pwa chous, manyòk ak mayi a....100% òganik..Nou pa itilize okenn angrè chimik. Nou sè ak konpòs òganik

Peyi a twò rich pou l pòv. Depi gen bon jan politik agrikòl, nou ka di Sendomeng kenbe manje merilan ki chaje ak pwodui chimik yo lakay li....An nou tout mete men nan konba agrikòl la !

DV

03/27/2024

https://www.facebook.com/share/v/LCgd96dHryeM6bfX/?mibextid=oFDknk

11/27/2023

11/09/2023

Preyalab ak kondisyon pou Fwontyè Ayiti ak RD relouvri

1. Diplomasi fèt sou baz prensip resiprosite ak egalite. Relasyon ki pa gen ekilib ant 2 peyi ap lakòz gen youn k ap soti foule nan rapò fòs yo. Ajan Leta ayisyen yo nan Wanament dwe sispann travèse tout tan ale Dajabon pou al negosye ak Dominiken sou ouvèti fwontyè a. Si metòd pou rezoud kriz ki rele "diplomasi navèt " la nan relasyon entènasyonal dwe kontinye, fòk yon jou Dominiken travèse Wanament tou al rankontre reprezantan Leta ayisyen yo menm jan reprezantan ayisyen sa yo ale Dajabon.

Si prensip resiprosite ak egalite pa ka respekte, Ayiti ak Sendomeng dwe antant yo pou yo konstui yon espas rankont bilateral nan zòn net ant 2 peyi yo sou fwontyè a.

2. Negosyasyon ni komès fwontalye Ayiti ak Sendomeng pa ka rekòmanse toutotan Lame Dominiken deplwaye sou fwontyè a an pozisyon konba. Akò 1929 pou Amitye ak Lapè ki siyen ant Ayiti ak Sendomeng lan prevwa yon "zone démilitarisée" ki mezire 10 km e ki kòmanse a pati liy fwontyè a pou 2 peyi yo. Sa vle di ni Ayiti ni Sendomeng pa ka deplwaye Fòs militè ni konstui barak militè sou teritwa yo nan yon distans ki mwens ke 10 km apati liy fwontyè a. Kidonk prezans solda dominiken yo sou liy fwontyè a konplètman ilegal. Sa reprezantan yon vyolasyon akò 1929 la, yon agresyon ak yon menas kont Ayiti.

Ministè Afè Etranjè Ayiti, ajan Leta yo ak sosyete sivil la nan Wanament dwe egzije pou Sendomeng retounen nan lespri ak lèt akò 1929 la avan pou relasyon ant AYiti ak Sendomeng retounen nòmal e avan komès regilye rekòmanse sou fwontyè ant 2 peyi yo. Pèsonn pa ka alèz pou al vizite ni achte kay yon vwazen ki pwente kanon degè sou ou. Tout sektè ayisyen ki enplike nan dosye fwontyè a ant Ayiti ak Sendomeng, dwe egzije pou Sendomeng demilitarize fwontyè a avan menm pou Ayiti ta anvizaje negosye ak Sendomeng sou kèlkeswa dosye ki konsène yo. Dayè ni moun ni yon Eta pa ka negosye trankilman e ak sanfwa pandan zam pwente sou ou.

3. Solda dominiken dwe sispann penetre ak zam sou espas lib ant fwontyè 2 peyi yo. Dwa entènasyonal rele espas sa zòn net ak "no man's land ". Se yon espas kote reprezantan 2 peyi ka rankontre lè yo nan kriz. Dwa Entènasyonal entènasyonal imanitè rekonèt zòn net yo kòm yon espas pwoteje pou evakye ak trete blese, ak pou resevwa deplase ak refijye nan peryòd lagè. Kidonk solda ak zam pa gen dwa ap s*kilè ni penetre nan espas sa.

Zòn net pa vle di "Terra Nullius", tèm laten sa an dwa entènasyonal ki vle di "teritwa ki pa gen mèt". Zòn net sou fwontyè a ant Ayiti ak Sendomeng gen dwa gen pati ladan l ki fè pati teritwa Ayiti ak Sendomeng. Prensip la sèke 2 peyi yo antann yo pou zòn sa pa sèvi pou konfli ame ni pou deplwaman pèman sivil. Kidonk Ayiti dwe diskite ak Sendomeng sou baz prensip ak dwa nan moman Dominiken kanpe sou lafòs ak agresyon pou entimide Ayiti.

NB. Tout sa k di nan tèks sa yo se sou prensip Sendomeng se yon Eta rasyonèl, rezonab ki respekte ki respekte lalwa. Men depi 1937, ane Sendomeng komèt yon jenosid sou pèp ayisyen an nan zòn fwontyè a malgre Ayiti te siyen an 1929, 8 lane avan, yon Trete Lapè ak Amitye ak li, ebyen depi lè sa jiska jodi a peyi vwazen Ayiti sa montre li se yon Eta vwayou ak kriminèl ki pa respekte okenn akò, okenn trete ak pwotokòl Ayiti siyen ak li. Li pa respekte nonplis konvansyon rejyonal ak entènasyonal sou dwa moun. Donk Ayiti dwe ase reyalis pou l pa twò optimis nan dyaloge ni siyen dokiman antant ak Sendomeng.

DV/JEWOPOLIS/9/11/23

11/08/2023

Oubyen n ap fè peyi, oubyen se jwèt timoun n ap fè !

Leta ayisyen sipoze san pèdi tan òganize yon seminè teknik ak enfòmasyon pou ajan Polifront ak BSAP yo sou fwontyè a. Gouvènman ap mobilize teknisyen kalifye yo nan Ministè Afè Etranjè, pwofesè dwa entènasyonal, relasyon entènasyonal ak istwa nan UEH la pou òganize yon seminè entansif pandan yon semèn yon seminè pou kò sa yo sou dwa entènasyonal, sou trete ak akò ki siyen ant AYiti ak Sendomeng e sou Istwa 2 peyi yo. Pa gen gad fwontyè san fòmasyon kontini sou dwa ak prensip ji gouvènen fwontyè yon peyi ak lòt peyi. Se evidan gen yon pwoblèm fòmasyon ki poze ak kò sa yo.

Pou rann kò sa yo pi efikas, Leta dwe anplwaye pwofesyonèl Ayisyen ki pale espayòl pou entegre yo kòm kad sivil nan kò espesyalize sa yo sou fwontyè a. Plen jenn gason ak jenn fi ayisyen ki etidye Kiba, Meks*k ak Sendomeng ki metrize panyòl men ki pa p travay. Mete konpetans sa osèvis peyi a nan moman an peyi a bezwen yo e kote peyi a bezwen yo.

Moman rive tou anfen pou Ministè Defans ak Ministè Afè Etranjè mete sou peye chak nan bò pa yo yon Inite Refleksyon Estratejik/ Inite de Refleksyon Stratégique ki espesyalize sou Sendomeng. Rezon ki fè refleksyon Inite sa yo dwe estratejik se paske, anplis enfòmasyon faktyèl ki disponib piblikman sou istwa, ekonomi, lame, polis ak sevis ransèyman dominiken ( open sources ), yo ap entegre tou enfòmasyon ke sèvis ransèyman eksteryè peyi Dayiti kolekte ( covert sources). Refleksyon estratejik vle di nou sèvi ak enfòmasyon konjonktirèl yo pou fè pwojeksyon sou lavni sou yon dirijan ak kandida etranje pou pòs enpòtan nan peyi yo ak sou peyi sa li menm. M ap fè nou konnen Depatman Deta ameriken gen pwòp sèvis ransèyman pa l. Se pa inikman CIA ki ap fè ransèyman eksteryè pou Leta ameriken.

Nan Anbasad ameriken Pòtoprens, non sèlman gen ajan *CIA, FBI, DEA, DIA* ( Defense Intelligence Agency ), gen pwop ajan ransèyman Depatman Deta tou.

Ayiti dwe mete anbasad ak konsila li yo aletranje otravay ak osèvis enterè nasyonal peyi a andedan kou deyò. Oubyen n ap fè yon peyi jan peyi fèt, oubyen se jwèt timoun n ap fè ak peyi a. Se jwèt timoun sa ki eksplike awogans Sendomeng ak Ayiti yo. Donk jwèt timoun lan dwe fini.

DV/JEWOPOLIS/08/11/23

11/05/2023

*Gang oubyen Gwoup Paramilitè ?*

*Otè*: DV/JEWOPOLIS

Gang pran kontwòl *Maryani* . Se te dènye aksyon taktik " *gang* " yo te gen pou poze pou yo kontwole kapital la nan tout antre estratejik *Sid* ak **Nò yo*. Yon lòt fwa ankò ti rès Leta a *K.O* .

Pwoblèm mwen sèke mwen pa fouti ka konprann ki objektif swadizan gang sa yo. *Ki sa yo vle* *fè ojis ak peyi a* ? Pa gen okenn lojik ki montre se koze gang ki ap regle la. Nan okenn peyi *gang* pa bay tèt li misyon pou depatcha yon peyi, demantle yon kapital, teworize ak apovri popilasyon pwòp klas sosyal yo. Sa yo se aksyon politik gwoup ame ki gen objektif pran kontwòl yon peyi ak mete aparèy sekirite Leta ajenou pou yo enpoze pwòp lòd sosyal ak politik pa yo.

*Kesyon an* : ki laboratwa ak lènmi lokal ou etranje ki rive enfiltre katye defavorize Ayiti yo nan pwofondè sa jiskaske yo reyisi rive drese jèn yo nan geto yo kont pwòp katye yo, vil yo, peyi yo, vwazen yo, fanmi yo ak kont pwòp pèp yo ?

Repons fasil yo ka di tante di ak konviksyon se *gwoup kriminèl nakotrafikan* k ap opere. Efektivman nakotrafik ka ladan l tou . Men sa pa sifi pou eksplike operasyon san pran souf pou demantle kapital la gwoup ame yo ap mennen an. *Rezon an* *senp* : nakotrafik bezwen yon Leta k ap fonksyone pou machandiz estipefyan yo pran oubyen kenbe valè finansye sou mache nasyonal ak entènasyonal la akòz siveyans ak kontwòl menm sipèfisyèl Leta egzèse sou s*kilasyon machandiz sa yo.

*An rezime* : biznis kokayin bezwen yon Leta fonksyonèl pou l pwospere. Kòm pa gen yon Leta fonksyonèl an Ayiti depi kèk tan, agiman nakotrafik la pa konvenkan pou eksplike aktive gwoup ame yo ki depatya kapital la an plizyè moso ak fyèf yon chèf degè kontwole.

M kwè *Sun Tzu*, estratèj militè chinwa nan Lantikite, bay kèk p*s pou reponn kesyon k ap toumante nou yo nan *L' Art de la Guerre*.

Eleman repons pou kesyon sa yo se nan resèt Sun Tzu bay yo pou detui yon peyi san w pa deklare peyi sa lagè ouvètman. Nou jwenn tout engredyan resèt sa yo nan operasyon gwoup ame yo depi 4 lane. Lè n ap analize aksyon gwoup nou rele " *gang ak bandi* " yo, nou ka pran ris di gen aktè lokal oubyen etranje ki ap mennen yon *"gè ibrid* " ki pa deklare kont Ayiti nan objektif pou destabilize l nan dimansyon ekonomik ak sosyal nan pwòp enterè yo e pou fè Ayiti pèdi nan dimansyon politik tout kalite ak karakteristik ki defini yon Leta ak yon Eta nan pèspektiv **dwa konstitisyonèl ak dwa entènasyonal*.

Nou ka di aktè sa yo ki an gè kont Ayiti yo reyisi reyalize objektif yo ki pa deklare . Yon *prezidan asasine* depi plis ke 2 lane e depi lè sa Ayiti pa gen okenn dirijan eli lejitim k ap dirije l. Sa vle di aparèy Leta a Ayiti a sispann yon Repiblik e peyi a sispann yon Demokrasi. E sa vle di tou Ayiti sispan yon *Eta* nan sistèm entènasyonal la paske li pèdi *3 kalite* ki defini yon *Eta* nan dwa entènasyonal : *1)* yon otoritè politik lejitim k ap jere estrikti politik entèn ki rele Leta a *2* ) kontwòl teritwa nasyonal la sou plan sekirite sekirite nasyonal ak pwoteksyon popilasyon an ak teritwa a *3)* yon popilasyon ki fikse sou teritwa sa.

Mwen pa panse tèm gang lan apwopriye pou karakterize gwoup ame sa yo. Tèm ki pi kòrèk la, dapre mwen, se *Gwoup Paramilitè.* Paske aksyon yo kite espas kriminalite òdinè a l la pou yo pran gwo pòte politik. Jou nou a rive sènen vrè objektiv estratejik ak final gang sa yo....li ka gen tan twò ta pou Pòtoprens ak rès peyi a.

Annatandan, lis *teritwa pèdi* yo ak vin pi long chak jou.

*DV/JEWOPOLIS*
5 Nov 2023

11/03/2023

Souflèt Diplomatik pou Ayiti

Otè : DV/JEWOPOLIS

Sa k vle konprann a konprann. Ayiti pa envite nan Somè Biden ap òganize jodi a Washington sou Pwosperite nan Kontinan ameriken an. Abinader envite. Li gen tan rankontre Biden yè jedi a. Diplomasi tyoul Etazini Ayiti ap suiv la pa rapòte l anyen. Sa pa t toujou konsa. An n fè liswta pale.

An 2018 , Pouvwa Tèt Kale a vote pou mete Venezuela deyò nan OEA apre yo fin gagote lajan Ayiti Venezuela te prete nou nan pwogram Petrocaribe a. Ayiti pa jwenn anyen pou vòt iresponsab sa pou fè Etazini plezi.

Pandan menm ane 2018 la, Sendomeng ki te vote tou pou mete Venezuela deyò nan OEA, te jwenn fe vè Washington pou l koupe fache ak Taiwan epi tabli relasyon diplomatik nan nivo anbasadè ak Lachin. Menm ane a Sendomeng te jwenn vòt Etazini pou l syeje kòm youn nan 10 manm non pèmanan Konsèy Sekirite Loni. Se te yon dil. Pandan Etazini kite Sendomeng ap fè tout mannèv diplomatik sa yo san anmède peyi sa, prezidan Jovenel te resevwa tout kalite chantaj ameriken pou l pa t koupe relasyon ak Taiwan e pou l pa genyen relasyon diplomatik ak Lachin nonplis. Dinamik global la nan rejyon an se mete Taiwan sou kote pou tabli relasyon diplomatik fòmèl ak Lachin kontinantal. Jovenel te fini pa tabli relasyon ak Larisi. Tonton Sam te move kou kong. Listwa va di pli sou koneksyon Jovenel, Tiki ak Larisi a.

N ap raple an 1962, lè Ayiti te vote sou Duvalier pou mete Cuba deyò nan OEA pandan Somè òganizasyon rejyonal ki te fèt Punta Del Este ( Uruguay), Duvalier se tankou vann li te vann Etazini vòt sa pou 2 milyon dola ameriken apre anpil negosyasyon sere minis Afè Etranjè Duvalier a, René Chalmers ak Sekretè Deta Ameriken an Dean Rusk.

Alepòk, Duvalier te sou anbago ameriken Kennedy te mete sou rejim diktati li a. Se menm peryòd sa tou Kennedy te lanse pwogram " Alliance Pour le Progrès " pou finanse pwojè devlopman nan Amerik Latin lan ak nan Karayib lan. Se te yon pwogram 10 miya dola ki te gen objektif atire peyi nan kontinan ameriken an nan jiron Tonton Sam ak kwape enfliyans Inyon Sovyetik nan rejyon an. Se menm jan Somè Pwosperite Biden ap òganize a se pou bese fe enfliyans Lachin nan rejyon Amerik Latin lan.

Ayiti pa t nan pwogram Alyans pou Pwogrè Kennedy a. Se te akoz rejim Duvalier a te pran chimen diktati kanson fè ak kraze zo. Apre vòt Punta Del Este a, Kennedy ta pral rekòmanse ak èd devlopman yo an favè Ayiti. Duvalier pa t vote gratis pou bèl figi Tonton Sam .

Duvalier ta pral sèvi ak 2 milyon dola ameriken Etazini ta pral ba li pou vòt kont Cuba a nan kad konstriksyon Ayewopò Entènasyonal Pòtoprens lan ki ta pral pote non l. Lajan pèp ayisyen an te patisipe tou nan konstriksyon Ayewopò sa ki pote non Toussaint Louverture jodi a.

Depi peryòd Etazini te okipe tout zile Ayiti a ( Ayiti 1915-1934, Sendomeng 1916-1923 ), Washington te toujou gen politik ki favorize Sendomeng anpil kontrèman ak Ayiti. Modènizasyon aparèy Leta a, enfrastrikti ak endistri nan Sendomeng kòmanse ak okipasyon ameriken an. Yo te akonpaye Dominiken yo nan ranfòse kapasite aparèy Leta a. Yo te fè sa Ayiti tou, men nan yon fason pi kavalye e nan yon nivo pi fèb. Se pa san rezon Dominiken yo pa gen menm memwa twomatis de okipasyon ameriken an ak pèp ayisyen an. Faktè ras la jwe anpil nan politik etranjè ameriken. Fòk nou pa bliye tou avan okipasyon ameriken an, Ayiti te yon peyi nwa endepandan depi plis ke yon syèk. Nan peryòd okipasyon an, nwa te toujou pa t konsidere kòm moun ki gen dwa tankou tout lòt moun nan sosyete amerikèn lan.

Ayiti ki pa envite nan Somè Biden lan pandan Sendomeng ap prezan, se yon lot souflèt diplomatik pou Ayiti nan rejyon an. Men sa pa dwe etone nou. Tandans natirèl la nan rejyon an depi 1804 se izole Ayiti. Kidonk Ayiti dwe toujou ap goumen pou plas li. N ap toujou konfòte vwazen yo nan rejyon an nan prejije yo ak nan tandans istorik yo pou izole Ayiti, si pwòp Ayisyen ap mennen politik pou detui Ayiti ak izole peyi a davantaj.

Kijan ou ka envite Ayiti nan diskite sou Pwosperite sou kontinan ameriken an pandan peyi sa angaje tèt li depi plis ke yon deseni nan yon s*k vyolans sosyal sevè, enstabilite politik ak degrengolad ekonomik ki pa montre li ap gen fen demen ? Kijan pou Ayiti envite nan deba sou Pwosperite pandan nou se inik peyi nan rejyon an ki sou titèl entènasyonal yon sèten Kò Gwoup ? Ki lòt peyi nan rejyon an nou tande ki pase 10 fòs entènasyonal sou teritwa l swadizan pou vin mete lòd nan dènye 30 lane yo ? Fwa sa se an Afrik Blan yo ak chache konkou militè pou vin mete lòd an AYiti. Ki peyi nan rejyon an nou tande gang divize kapital li an fyèf ak kas*ka ? Ki peyi nan rejyon an nou konnen ke Leta efondre ladan l kote menm yon katye Leta pa ka bay sekirite ?

Nan nivo jewopolitik ak jewoekonomik, defi ak kontrent yo anpil pou Ayiti. Anviwonman entènasyonal ak rejyonal la te toujou ostil pou AYITI lè w ap gade listwa. Men fondman kontrent ak defi sa yo se dabò Ayisyen. Sa vle di pwoblèm Ayiti deyò tou, men li an Ayiti an premye. Kidonk solisyon yo se dabò Ayisyen ki dwe jwenn yo. Se Ayisyen ki dwe sispann detui pwòp peyi yo pandan tout lòt peyi vwazen Ayiti yo ap diskite ant yo pwosperite pou pwòp tèt yo ak tout rejyon an.

DV/JEWOPOLIS
3 Novanm 2023

11/02/2023

Peyi a difisil anpil. Ayisyen biza anpil tou. Se mechan pou yon moun twouve li dwe pran tribin rezososyo pou l bave sou Anie Alerte nan moman nasyon an ap chache inite l, nan moman peyi a anba atak lènmi e pandan Anie devwe tout kò l, tout nanm li pou peyi l nan kòz kanal la.

An nou bay Anie lòv la pou mwen tanpri isit la. An nou ba li respè pou devouman l, santiman apatenans li ak patriyotis li.

Anie nou renmen w. Pèp la ak ou e Bondye bò kote w. Se bon moun ou ye ! Ou pa fanatik Ti Bab.

KPK li ye !

Anpil lòv.

DV

10/31/2023

Sektè Anti-Gè a Ozetazini mobilize pou yo mande yon seselfe nan Gè Israël-Hamas la. Plizyè nan militan sa yo antre andedan Sena Ameriken an pou al pètibe yon prezantasyon Sekretè Deta Anthony Blinken devan Komisyon Bidjè a.

10/31/2023

Pèp Dajabon frape pye yo atè kont Abinader. Pèp Wanament ap rele anmwey kont Ariel