06/15/2026
Pjerin Ndreu i kërkon Koçekut të dorëzojë mandatin: “Kjo nuk është dramë për PS-në, por shkelje besimi”
Kryetari i Bashkisë së Lezhës, Pjerin Ndreu, ka reaguar pas vendimit të deputetes Marjana Koçeku për t’u larguar nga grupi i Partisë Socialiste, duke i bërë thirrje që të heqë dorë edhe nga mandati i deputetes.
Përmes një postimi në rrjetet sociale, Ndreu tha se dorëzimi i mandatit do të ishte një veprim që do ta nderonte dhe fisnikëronte Koçekun, duke theksuar se mandati është marrë falë besimit dhe votës së socialistëve shkodranë.
“Heqja dorë nga mandati i marrë në sajë të votës së mijëra socialistëve shkodranë do të ishte një akt që do ta fisnikëronte miken time, Marjana Koçeku”, shkroi ai.
Ndreu u shpreh se largimi nga një forcë politike është një zgjedhje legjitime, por sipas tij, nuk është morale të mbahet mandati i fituar nën siglën dhe mbështetjen e asaj force politike.
“Kjo nuk është dramë për PS-në, por është shkelje besimi, për sa kohë që keqpërdoret mandati i dhënë politikisht nga PS”, theksoi ai.
Në fund, Ndreu iu referua traditës së malësorëve, duke shkruar se “aty ku ha bukë, nuk përmbys kupën”, në një mesazh të drejtpërdrejtë për deputeten që tashmë ka shpallur rrugëtimin e saj si e pavarur.