https://www.facebook.com/606091792596433/

Wah Latt, 7926 Hearthstone Way, Indianapolis, IN (2025)

08/11/2025

Sexual Harassment (လိင်ပိုင်းဆိုင်ရာ စော်ကားမှု) အကြောင်းလေး ကျွန်တော်တို့ အဖွဲ့သားတွေ ထပ်ပြီး ဆွေးနွေးထားကြပါတယ်။ ပုံစံအမျိုးမျိုးနဲ့ နေရာပေါင်းစုံမှာ ဖြစ်ပျက်နေတာတွေကို မအိန်ဂျယ်ကနေ ဦးဆောင်ဆွေးနွေးပေးထားတာပါ။ ကျွန်တော်တို့ သိချင်တာတွေမေး၊ သူကရှင်းပြဆွေးနွေးထားတဲ့ ပုံစံလေးပါ။

08/09/2025

၈ လေးလုံး (၃၇) နှစ်ပြည့် နှစ်ပါတ်လည်နေ့မှာ ဝါလက်သား (၃) ယောက်ဆုံပြီး ၈၈တုန်းက အကြောင်းတွေ (မမှီလိုက်ရပေမယ့်) အဲ့တုန်းက ဖြစ်ပျက်တွေကို စဉ်းစားကြပြီး လက်ရှိဖြစ်နေတဲ့ အခင်းအကျင်းတွေနဲ့ တီးမိခေါက်မိလေး စကားပြောဖြစ်ခဲ့ကြတယ်။ ခေတ်အဆက်ဆက်ကနေ ယနေ့ထိ အာဏာရှင်ကျဆုံးရေးမှာ ပါဝင်နေခဲ့ကြ၊ ပါဝင်နေဆဲ လူများကို လေးစားဂုဏ်ယူကြောင်းပါဗျာ

07/30/2025

လိင်ပိုင်းဆိုင်ရာ စော်ကားမှု (Sexual Harrassment) အကြောင်းကို ကျွန်တော်တို့ ဝါလက်အဖွဲ့သားတွေ ဝိုင်းပြီးဆွေးနွေးထားပါတယ်။ လက်တလော ကျယ်ကျယ်လောင်လောင်ကြားနေရတဲ့ အကြောင်းတွေကို ဘာကြောင့်ဖြစ်ရသလဲ၊ ဘယ်လိုတွေက အခြေတည်ပြီးဖြစ်လာရတလဲ စတာတွေကို ပွင့်ပွင့်လင်းလင်းဘဲ ပြောဖြစ်ခဲ့ကြတယ်။ သတိထားမိကြရအောင်ပါ။ အချိန်ရရင် နားထောင်ပေးကြပါဗျ။

07/26/2025

ဒီနေ့ကတော့ ကျွန်တော်တို့ ဝါလက်သား အဖွဲ့သားအသစ် ညီငယ်တစ်ယောက်နဲ့ မိတ်ဆက်ပေးလိုက်ပါတယ်။ ကျွန်တော်တို့နဲ့အတူ ၂၀၂၁ ခုနှစ် အာဏာသိမ်းမှု စကြုံကတည်းက အတူရှိလာခဲ့တဲ့ ညီလေးတစ်ယောက်ပါ။ လူငယ်ပီပီ ပြတ်သားတဲ့ သူရဲ့ ထင်မြင်ချက်တွေ၊ သဘောထားတွေကို ကျွန်တော်တို့ နားထောင်ရမှာပါ။ ဒီနေ့ကတော့ သူနဲ့ စတင်မိတ်ဆက်ပေးတာဖြစ်ပြီးတော့ နောက်ပိုင်းကျွန်တော်တို့ ဝါလက်သားတွေ လှေပေါ်မှာ လက်ရှိဖြစ်ပေါ်နေတဲ့ တိုင်းရေးပြည်ရေးအကြောင်းတွေကို ဝိုင်းဖွဲ့ဆွေးနွေးသွားကြမှာပါ။ စောင့်မျှော်ကြည့်ရှုပေးကြဖို့လည်း ဖိတ်ခေါ်ပါတယ်။

07/24/2025

ရင်းနှီးမိသော နရသိန်နှောင်ကြိုးများ (တိုက်သို့ အလည်သွားခြင်း)

လွတ်ရက်ကလည်း ရက်ပိုင်းလောက်ပဲလိုတဲ့အချိန်လဲဖြစ်တယ်။ နှစ်နဲ့ချီပြီး နံရံတွေကြားထဲ၊ ဘောင်တွေကြားထဲ အတူနေခဲ့ကြတဲ့ မိတ်ဆွေတွေ၊ သူငယ်ချင်းတွေနဲ့ ခွဲခွာရမယ့်အချိန်လည်းဖြစ်ခဲ့တယ်။ နှစ်ကြီးတွေကတော့ ငါတို့ကတော့ ဒီပွဲပြီးမှ ပြန်မယ်ဆိုတဲ့ ယုံကြည်ချက်တော့ ရှိနေကြတယ်။ ကျွန်တော်တို့ဘယ်လောက်ဘဲ ပြောပြောပါ အပြင်ပြန်ထွက်ရတော့မယ်ဆိုတဲ့ ခံစားချက်အရတော့ ဟန်မဆောင်နိုင်ခဲ့ကြပါဘူး။ စိတ်မကောင်းတာကတော့ တပိုင်းပေါ့။ ကျွန်တော့်သူငယ်ချင်းကတော့ မင်းတို့ လုပ်နိုင်တာရှိလုပ်ကြပေါ့ကွာဆိုပြီးဘဲ မှာတယ်။ ဒိုက်ဦးအကိုကြီးကတော့ ငါတို့ထွက်တာထက်စာရင် မင်းတို့လွတ်တာ ငါတို့ပိုကြိုက်တယ်ပြောတယ်။ တချို့သူငယ်ချင်းတွေဆို ကျွန်တော်တို့နဲ့ မျက်နှာချင်းမဆိုင်ကြတော့ဘူး။ သူတို့အခြားအလုပ်တွေလုပ်နေတဲ့ ပုံစံနဲ့ ရှောင်နေကြတော့တယ်။

လွတ်ရက်နီးလာတဲ့အမျှ ကျွန်တော်တွေ့ချင်တဲ့ လူတယောက်ရှိတယ်။ ပဲခူးနိုင်ငံရေးသမားဘဲ။ သူက တိုက်ထဲမှာ နေရတာ။ ကျွန်တော် ပဲခူးမှာကတည်းက သူ့ကို တွေ့ခဲ့တယ်။ သူ့ကို နိုင်ငံရေးသမားစစ်စစ်လို့ ကျွန်တော်သတ်မှတ်တယ်။ ပဲခူးအချုပ်ထောင်မှာတုန်းကဆို အမြဲ စကားပြောဖြစ်ခဲ့ကြတယ်။ ပဲခူးမှာတုန်းက ကျွန်တော်တို့ ကဗျာရွတ်တဲ့ အဖွဲ့လေးဆီ သူလာနားထောင်ပေးတယ်။ ကျွန်တော်မေးတဲ့ မေးခွန်းတွေကို သူအကောင်းဆုံးဖြေခဲ့တယ်။ ပါတီခေါင်းဆောင်တယောက်အနေနဲ့ ကျွန်တော်ရဲ့ စံပြပုဂ္ဂိုလ်တယောက်ဖြစ်ခဲ့ပါတယ်။ ပဲခူးဝန်ကြီးချုပ်တလွဲလုပ်ခဲ့တာတွေက ကျွန်တော်တို့ ရယ်စရာဖြစ်ခဲ့ရတာကိုး။ ၂၀၁၅ မှာ အကြောင်းကြောင်းကြောင့် သူက ဝန်ကြီးချုပ်မဖြစ်ခဲ့ပါဘူး။ ၂၀၂၀ ကျမှ ဖြစ်မယ့်လူပေါ့ဗျာ။ သို့ပေမယ့် အာဏာသိမ်းတော့ သူလည်း ထောင်ထဲရောက်နေရတာပေါ့။ သူနဲ့အတူ ဆုံတွေ့ရတာဟာ ကျွန်တော်အတွက် အဖိုးတန်တဲ့ အသိပညာတွေ အများကြီးရခဲ့ရပါတယ်။ အဓိကက လူငယ်တွေရဲ့ အားကို ယုံကြည်တဲ့ လူတယောက်ပေါ့ဗျာ။ ပဲခူးမှာကတည်းက ဆုံခဲ့၊ ရင်းနှီးခဲ့ရတော့ ဒိုက်ဦးရောက်တော့လည်း သွားနှုတ်ဆက်ချင်တာပေါ့။ လွတ်ခါနီး တခေါက်တော့ ရောက်အောင်သွားမယ်ဆိုပြီး ကြံနေခဲ့တယ်။

တရက်ဖိုကြီးကို ဖွဲထမ်းရမယ်ဆိုပြီးလူထုတ်တော့ ခပ်တည်တည် ဝင်တန်းစီလိုက်တယ်။ လမ်းကြောင်းတွေ ဘာတွေနဲ့ မဟုတ်တော့ ပထမတော့ လိုက်ခိုင်းဖို့ကို အင်တင်တင်နဲ့ဖြစ်နေတာ။ ဖိုကြီးက မျက်မှန်းတန်းမိတဲ့ လူတယောက်ပါတော့ လိုက်လိုက်ရတယ်။ ကားပေါ်ကဖွဲအိတ်တွေကို မီးဖိုကြီးကို ထမ်းရတာ။ အဲဒီကတဆင့် တိုက်ထဲဝင်ဖို့ချောင်းရတာ။ ဝန်ထမ်းကလည်း ဆရာရခိုင်ဆိုတော့ နဲနဲတော့အဆင်ပြေတယ်။ သူကတော့ မဝင်ခိုင်းဘူး။ ဝင်လို့ တခုခုဖြစ်ရင် သူနဲ့မဆိုင်ဘူးဆိုပြီးပြောတယ်။ ဒီလိုနဲ့ ကိုယ့်ဘာသာကို ချောင်းရတာပေါ့။ သုံးခေါက်မြောက် လစ်တာနဲ့ တိုက်ဝင်းထဲကို ခပ်တည်တည်ဝင်သွားပြီး တိုက်ထဲကလူတွေလိုက်မေးလိုက်တယ်။ သူ့အခန်းလည်းသိရော အရောက်သွားခဲ့လိုက်တယ်။ အခန်းဘေးမှာ ကတော့ ကျွန်တော်နဲ့ ပဲခူးမှာ ချက်ထိုးနေကျ ဝန်ကြီးတပါးရှိတယ်။ ချက်ထိုးနေကြတယ်။ ကျွန်တော့်ကို ချက်ထိုးရအောင်လှမ်းအော်ရင်း နှုတ်ဆက်ခဲ့တယ်။ ကျွန်တော်လည်းခဏဘဲ နှုတ်ဆက်ရင်း အခန်းထဲကို ဝင်လိုက်တော့ ဦးလေးကို ပြန်တွေ့လိုက်တယ်။ နဲနဲတော့ အမ်းတန်းတန်းတော့ ဖြစ်ခဲ့ပါတယ်။ သူလည်း ရုတ်တရက်ဆိုတော့ လာထိုင်ပြောရင်းနဲ့ မုန့်ချကျွေးလိုက်တယ်။ ကျွန်တော်လည်း မုန့်စားရင်း နေကောင်းကျန်းမာ သာကြောင်းမာကြောင်းမေး၊ နောက်မှ သူ့ကို စကားပြောခဲ့မိတယ်။ ကျွန်တော်တို့ ပြန်လွတ်ခါနီးပြီဖြစ်ကြောင်း၊ နိုင်ငံရေးအခြေအနေအရတော့ ကျွန်တော်တို့လည်း တခုခုလုပ်ရဦးမယ်လို့ ပြောပြီး တနင်္သာရီတိုင်းဘက်ကဖြစ်တော့ အဲ့ဖက်ကို ရောက်ပြီး လုပ်ဖြစ်မယ်ထင်တယ်လို့တော့ သူ့ကို ပြောဖြစ်လိုက်တယ်။ သိပ်မကြာပါဘူး။ ဆရာရခိုင်ကတော့ ကျွန်တော်တို့ နှစ်ယောက်သုံးယောက်ပျောက်သွားတော့ ခေါင်းကြီးနေကြပြီ။ မိန်းဂျေးကတဆင့် အဆောင်မှူးဆီကို သတင်းရောက်သွားပြီး ဝန်ထမ်းတွေကတဆင့် ပြန်ခေါ်ခိုင်းတယ်။ ဦးလေးကို နှုတ်ဆက်ရင်း ကျွန်တော်တို့ကို ဂရုစိုက်တဲ့ လူတွေရှိတယ်၊ ဦးလေးရေ တခုခုဆို မျက်စိအောက်က အပျောက်ခံကြတာမဟုတ်ဘူး ဆိုပြီး ပြန်ထွက်လာခဲ့ရတယ်။ တိုက်ထဲက ထွက်ခါနည်းမှာ တောင်ဒဂုံက အကိုတယောက်နဲ့ ဆုံဖြစ်တယ်။ သူက သေဒဏ်ကျနေတာ။ သူက ရန်ကုန်ကဘဲ ဆိုပြီး မိတ်ဆက်တယ်။ ဘယ်ကလဲဆိုတော့ တောင်ဒဂုံဖြစ်နေတော့ ဆွေးမျိုးဆက်ဖြစ်ခဲ့ကြတာပေါ့။ ကျွန်တော်တို့ ရပ်ကွက်ကဘဲ။ အချိန်အကြာကြီးရေလိုက်ရဘူး။ သူ့မိန်းမနဲ့ ကလေးကို ဆက်သွယ်လို့ရရင် ဆက်သွယ်ပေးဖို့ရယ်။ သူအဆင်ပြေကြောင်းရယ် မှာလိုက်တယ်။ သူကလည်းမခေပါဘူး။ သေဒဏ်ချတဲ့နေ့မှာ စိုးဝင်းကို လက်ခတ်ထားတဲ့ သံကြိုးနဲ့ လှမ်းရိုက်လိုက်တာ။ စိုးဝင်းဆီမရောက်ခင်ဘဲ။ ဘယ်ကနေထွက်လာမှန်းမသိတဲ့ လက်တွေ မျက်နှာနဲ့ မိတ်ဆက်ခံလိုက်တာဘဲ သတိရလိုက်တယ်တဲ့။ သူသတိရတော့ ထောင်က အခန်းထဲပြန်ရောက်နေပြီပြောတယ်။ ဒီလိုနဲ့ဘဲ ဝန်းထမ်းတွေကိုယ်တိုင် ကျွန်တော့်ကို လာရောက်ပင့်ဆောင်ကြတော့ အဆောင်ပြန်ခဲ့လိုက်ရတယ်။ အဆောင်ပြန်ရောက်တော့ ရုံးခန်းခေါ်ခံထိရောပေါ့။

ဆက်ပါဦးမယ်
အာကာ (ဝါလက်သား)

07/15/2025

ဒီနေ့ကတော့ ကိုညီရဲ့ ဒိုက်ဦးထောင်ကို စရောက်တဲ့ ကာလလေးအကြောင်း ပြန်ပြောဖြစ်ကြတယ်။ စစ်ကြောရေးကတဆင့် ဒဏ်ရာပေါင်းစုံနဲ့ ထောင်ကိုရောက်တယ်။ သေဒဏ်တိုက်ထဲမှာ ပို့ထားတယ်။ အသိလူတွေနဲ့ ပြန်တွေ့ကြတော့ ဝမ်းနည်း ဝမ်းသာဖြစ်တဲ့ အကြောင်းလေးပေါ့။ ကျွန်တော်တို့လည်း ပဲခူးမှာ ကိုဗစ်ဖြစ်တော့ ဒိုက်ဦးထောင်ရဲ့ ကိုဗစ်အကြောင်းလေးလည်း မေးဖြစ်တယ်။
မိုးတွင်းရောက်ပြီဆိုတော့ ကျန်းမာရေးဂရုစိုက်ကြဖို့လည်း ကျွန်တော်တို့ ဝါလက်သားတွေက တိုက်တွန်းလိုက်ပါတယ်။ စိတ်၏ ကျန်းမာခြင်း၊ ကိုယ်၏ ကျန်မားခြင်းများနဲ့ ပြည့်စုံကြပါစေ။

07/04/2025

ကိုညီ အကြောင်းအဆက်လေးပါ။ ကိုဗစ်ကာလနဲ့ အာဏာသိမ်းမှုတွေ ကြုံခဲ့ရချိန်မှာ ဘာအခက်အခဲတွေဖြစ်ခဲ့လဲ။ နောက်ပြီး အာဏာသိမ်းမှုကို ဆန့်ကျင်တဲ့ လူတယောက်အနေနဲ့ ဘာတွေတွေ့ကြုံခဲ့ရလဲ။ သူ့အကြောင်းတွေ နားထောင်ရင်းလည်း ကျွန်တော်တို့ အဖြစ်တွေ ပြန်မြင်ယောင်မိပါတယ်။ ဒီလိုမျိုး လူငယ်တွေလည်း ထောင်ထဲမှာ အများကြီး ရှိနေပါသေးတယ်။ နားဆင်ကြည့်ကြပါဗျာ။

07/01/2025

ရင်းနှီးမိသော နရသိန်နှောင်ကြိုးများ (ဘောလုံးကန်ဖြစ်ကြခြင်း)

၁၀ပေပတ်လည် နေရာလေးတကွက်ဟာ ကျွန်တော်တို့အဆောင်ရဲ့ စိတ်ထွက်ပေါက်တခုဖြစ်ခဲ့တယ်။ ဘောလုံးအားကစားဟာ ကျွန်တော်တို့ ငယ်ဘဝ၊ လူငယ်ဘဝတွေကို ခံစားချက်မျိုးစုံနဲ့ ပါဝင်ပက်သတ်နေတဲ့ အားကစားတစ်ခု။ ဘောလုံးရာသီရောက်ပြီဆိုရင် ကိုယ့်အားပေးတဲ့ အသင်းတွေကြားမှာ ပြိုင်ဆိုင်မှုပြင်းထန်တဲ့ အချိန်ကာလပေါ့ဗျာ။ အချင်းချင်းကြားမှာ လေတိုက်ကြတာဟာ ဘောလုံးအားကစားကို ကြိုက်နှစ်သက်တဲ့လူတွေအတွက်တော့ အရသာရှိကြတာပေါ့။ လေတိုက်ရုံနဲ့ ပြီးမသွားဘဲ လက်တွေ့လည်း အကောင်အထည်ဖော်ဖြစ်ခဲ့တာလေးပါ။ ထောင်မှာ ဘောလုံးကွင်းတော့ရှိပါတယ်။ အဆောင်အပေါ်ထပ်ကနေလှမ်းမြင်နေရတာ။ သော့ခတ်ထားပြီးတော့ မြက်တွေ ခြုံတွေ လူတစ်ရပ်စာလောက်ရှိနေတာလေ။ ငါတို့ကို ပေးကန်ရင်ကောင်းမှာဘဲလို့တော့ လှမ်းကြည့်ဖြစ်မိကြပါတယ်။ ဒီလိုနဲ့ စိုက်ခင်းနဲ့ ရေချိုးကန်နားမှာရှိတဲ့ နေရာလွတ်လေးမှာ စပြီး ခြင်းလုံးလေးနဲ့ ကန်ကစားဖြစ်ကြတယ်။

ထောင်မှာက ဘောလုံးပေးမသွင်းဘူး။ ဝန်ထမ်းတွေကတဆင့်လည်း မှာမရဘူးလေ။ ဒီတော့ ခြင်းလုံးဘဲ ပုံစံမျိုးစုံနဲ့ ထွင်ပြီး ဘောလုံးလုပ်ခဲ့ကြရတယ်။ ပါဆယ်ပို့တဲ့ ပလပ်စတစ်အိတ်ကို ကြိုးကျစ်၊ ခြင်းလုံးကို တုတ်၊ ဒူးစွပ်ကို ခြင်းလုံးအပေါ်က ထပ်စွပ်ပြီး ကျစ်ထားတဲ့ ကြိုးနဲ့ ပြန်ချုပ်၊ ဘောလုံးအသေးစားလေးဖြစ်သွားတာပေါ့။ မဆိုးပါဘူး။ ဒူးစွပ်က ဆွဲသားဆိုတော့ နှစ်ထပ်လောက်စွပ်လိုက်ရင် အဆင်ပြေသွားတယ်။ ဘောလုံးသရေလိုမျိုးတော့ နဲနဲခုန်သွားတော့ ကန်လို့ရသွားတယ်။ ဒီလိုနဲ့ဘဲ ကျွန်တော်တို့ (၂) အဆောင်မှာ ဘောလုံးပွဲလေး အသက်ဝင်ခဲ့ကြတယ်။ ဝန်ထမ်းတွေကအစ တော်တော်များများစိတ်ဝင်စားကြတယ်။ ညနေ ရေချိုးချိန်မတိုင်ခင် အမြဲကန်ဖြစ်ကြတယ်။ တဖက်ကို သုံးယောက်အသင်းပေါ့။ ရပ်ကွက်ထဲ လမ်းပေါ်ကန်ခဲ့ကြရတဲ့ ကျွန်တော်တို့အတွက် ကွက်တိပေါ့ဗျာ။ ဒီလိုဘဲ အခန်းအလိုက် နေ့တိုင်းနီးပါး ကန်ဖြစ်ကြတယ်။ ဘောလုံးကန်တာဟာ စိတ်ထွက်ပေါက်လည်းဖြစ်တယ်။ ပင်ပန်းပြီး ညဘက်စောစော အိပ်ပျော်တယ်လေ။ ခြေထောက်တွေတွေ ဒဏ်ရာတွေရကြပေမယ့် အားလုံးပျော်ကြတယ်။ ကျွန်တော်တို့အခန်းကတော့ ဘောလုံးကန်တတ်တဲ့ အမှုတွဲတယောက်ရယ် ကျွန်တော်ရယ် တွဲဘောကတော့ နံမည်ကြီးပေါ့ဗျာ။ စကားမစပ် ရပ်ကွက်ထဲမှာလိုဘဲ ကျွန်တော်တို့ကို အာရုံနောက်တဲ့ လူကြီးတစ်ယောက်ရှိတယ်။ စိုက်ခင်းဘုတ်ပေါ့ဗျာ။ ဘောလုံးကန်တိုင်း သူ့စိုက်ခင်းအပင်တွေထိလို့ ကျွန်တော်တို့ကို ပြသနာရှာတာ။ သူလဲ နိုင်ငံရေးအမှုပါဘဲ။ လူငယ်တော်တော်များများက သူ့ကို ဒေါသထွက်အောင် စကြတယ်။ သူက တကယ်ထိုးမယ့်ရုပ်ကြီးနဲ့ လိုက်ထိုးတာကိုး။ ပြေးနိုင်မှ လွတ်တာ။ မိရင်တော့ မလွယ်ဘူးလေ။

ထောင်တသက်ကျနေတဲ့ အောက်ထပ်က ကျွန်တော့်သူငယ်ချင်းကတော့ ဘောလုံးမကန်တတ်ဘူး။ ကျွန်တော်တို့ ဒိုက်ဦးထောင်ကိုမရောက်ခင် သူက အိပ်ရာကနေတောင်မထဘူးပြောတယ်။ တညလုံးစာဖတ်တယ်။ တနေ့လုံးအိပ်တယ်။ နိုးရင် ထမင်းထစားတယ်။ ပြီးရင် ပြန်အိပ်တယ်။ ဒီလိုနဲ့ ဒီကောင်လည်း‌ အောက်ပိုင်း တော်တော်ချိနေပြီလေ။ ကျွန်တော်တို့နဲ့ဆိုမှ ဒီကောင် လေ့ကျင့်ခန်းတွေ ပြန်လုပ်ဖြစ်တယ်။ ဘောလုံးကန်မယ်ဆိုတော့ ဒီကောင်ပထမတော့ မကန်ရဲဘူး။ နောက်မှ ဝင်ကန်ဖြစ်တာ။ ကျွန်တော်နဲ့ အတူတွဲဆော့တဲ့အချိန် မှတ်မိသေးတယ်။ ဒီကောင် ခဏဘဲကန်သေးတယ်။ ဒူးနှစ်ဖက်တုန်နေပြီ။ ကျွန်တော်လည်းမခံချင်အောင်ပြောလိုက်၊ နောက်က ဆဲလိုက်နဲ့ ဆွပေးတော့ ဒီကောင်ဆက်ကန်တယ်။ ပွဲကြည့်ပရိတ်သတ်ကလည်း များနေတဲ့အချိန်ဖြစ်နေတာ။ ကျွန်တော်တို့ကို ကြည့်ပြီး ပွဲကျနေကြတာ။ ကျွန်တော် ထိုးပေးလိုက်တဲ့ ဘောလုံးကို ဒီကောင်ပိတ်လိုက်တာ ဂိုးဝင်သွားတော့ တော်တော်ပျော်သွားတယ်။ အားပေးတဲ့အသံကျယ်သွားကြလို့တောင် ဝန်ထမ်းက သတိပေးလိုက်ရတယ်။ မှတ်မှတ်ရရပါဘဲ။ ဒီလိုနဲ့ နောက်ပိုင်း လွတ်လပ်ရေးနေ့ ပြိုင်ပွဲတွေဘာတွေလုပ်ဖို့ စီစဉ်ကြတော့ ကျွန်တော်တို့ မပါဖြစ်လိုက်ဘူး။ အတူနေဖြစ်တဲ့ အမှုတွဲကလည်း အားမပေးဘူးလေ။ ကျွန်တော်တို့ လွတ်လပ်ရေးအတွက် တိုက်ပွဲဝင်နေချိန်မှာ ဒီပွဲတွေမျိုး မပါချင်ဘူး ဆိုတဲ့ သဘောထားကြောင့်လည်း ကျွန်တော်တို့ အခန်းမပါဘူးလို့ ငြင်းလိုက်တော့ ပွဲလည်း မလုပ်ဖြစ်လိုက်ကြပါဘူး။

ဆက်ပါဦးမယ်ဗျာ
အာကာ (ဝါလက်သား)

ပုံကတော့ ကျွန်တော်တို့အဆောင်ရဲ့ ဘောလုံးကွင်းလေးပေါ့ဗျာ

06/29/2025

လွတ်ကြောင်၊ လွတ်ငြိမ်းနှင့် လွတ်ရက်စေ့ခြင်း

သာမာန်လူတစ်ယောက် အကြောင်းတစုံတရာကြောင့် ထောင်ထဲရောက်တဲ့အခါ သံတိုင်တွေကြားထဲမှာ အချိန်ကာလတစ်ခုဖြတ်ကျော်ရတဲ့အခါ၊ ထောင်နံရံတွေကြားထဲမှာ ရှင်သန်ရတဲ့အခါ အပြင်လောကကိုလွမ်းတဲ့စိတ်၊ အိမ်ကိုလွမ်းတဲ့စိတ်တွေဟာ အချိန်နှင့်အမျှ ဖြစ်ပေါ်နေပါတယ်။ မိမိတို့ ရှင်သန်ရတဲ့ ဘောင်အတွင်းမှာ သဟာဇာတဖြစ်အောင်နေဖို့ဆိုတာ မလွယ်ကူလှပါဘူး။ အာဏာပိုင်တွေရဲ့ ဂုတ်သွေးစုတ်အမြတ်ထုတ်မှု၊ အကျဉ်းသားအချင်းချင်း နှိပ်စက်မှု၊ စတဲ့ လူမိုက်ဆန်ဆန်အုပ်ချုပ်တဲ့ ပုံစံအရ မိုက်ရူးရဲဆန်တာတွေ၊ ဘယ်သူသေသေ ငတေမာ ပြီးရောဆိုတဲ့ စကားနဲ့အညီ လူအများ မည်သို့ပင်ဖြစ်စေ ကိုယ့်ဘက် ကောင်းစာရေးသာ ပဓာနထားသော စိတ်၊ လူမဆန်သောယုတ်မာသော စိတ်ရှိသော လူ့ပတ်ဝန်းကျင်တွင် မိမိကိုယ်ကို မထိခိုက်အောင် ကြိုးစားနေထိုင်ကြရရင်း အိမ်ပြန်မယ့်ရက်ကို လက်ချိုးရေပြီး ရှင်သန်နေထိုင်ကြရပါတယ်။

ထိုသို့နေထိုင်ကြရရင်း ထောင်တွင်းလျော့ရက်များ၊ ထောင်အာဏာပိုင်များကပေးသော လျော့ရက်များ၊ အလုပ်ဘုတ်တွေမှ ရရှိသော လျော့ရက်များ နှင့်တကွ အခါကြီး၊ ရက်ကြီးများတွင် ပေးလေ့ရှိသော နိုင်ငံတော်လွတ်ငြိမ်းများကို မျှော်လင့်နေရပါတယ်။ ထိုမှသာ အိမ်ပြန်မယ့်ရက် နီးကပ်လာမည်မဟုတ်ပါလား။ အိမ်ပြန်ရမယ့်ရက် နီးကပ်လာသည်နှင့်အမျှ ထိုသူ၏ စိတ်ပိုင်းဆိုင်ရာအခြေအနေမှာ ယခင်နှင့် လုံးဝမတူတော့ပေ။ လွတ်မည့်ရက် မသိစေကာမူ၊ ဒီတခါ လွတ်ငြိမ်းပေးရင်ဆိုသည့် အတွေးဖြင့် လွတ်မယ့်နေ့ကို တွက်ချက်ကြပြီး ဆန္ဒအကဲပိုမှုတွေ ဖြစ်ပေါ်နေပါတော့သည်။ ထိုသို့ဖြစ်ခြင်းကို လွတ်ကြောင်ဖြစ်သည်ဟု ခေါ်ကြသည်။ ဘောင်ငယ်အတွင်းမှ ထွက်ပေါ်သော လွတ်ငြိမ်းဆိုသည့်အသံမှာ အသံမထွက်သော်လည်း လှိုင်းအားဖြင့် အင်အားကြီးမားလှပါတယ်။ လှိုင်းဒဏ်ခံရသူခမျာ အစားအသောက်စားချင်စိတ် ပျောက်ဆုံးခြင်း၊ အိပ်မပျော်ခြင်း၊ စိတ်မူမမှန်ခြင်းများကို ဖြတ်ကျော်နေရပြီး အချိန်ကာလအားဖြင့် ကြာမြင့်လှသော အခိုက်အတန့်ကို ဖြတ်ကျော်နေကြရတာပါ။

အခန်းကျဉ်းကျဉ်းလေးထဲကနေ ထောင်နံရံတွေကြားထဲ နေခဲ့ကြရတဲ့ မိတ်ဆွေတွေရဲ့ ရင်းနှီးမှု သံယောဇဉ်ဟာ ညီအကို သံယောဇဉ်ထက် မနည်းလှပါဘူး။ စိတ်ပိုင်းဆိုင်ရာ အတက်အကျတွေကြားထဲကနေ ညှိနှိုင်းနေကြရတဲ့ ကာလတွေဟာ ပုံမှန်ကာလ ခင်မင်မှုအတိုင်းအတာထပ်အများကြီး ပိုကြပါတယ်။ ဒီသံယောဇဉ်တွေဟာ လွတ်ငြိမ်းလာတဲ့အချိန် သို့မဟုတ် လွတ်ရက်စေ့တွေအချိန်ကာလကို ရောက်တဲ့အချိန်မှာ ခွဲခွာခြင်းဆိုတဲ့ ဘူတာမှာ လက်ပြနှုတ်ဆက်ခဲ့ကြရပါတယ်။ အပြင်လောကကို ပြန်လည်ထိတွေ့ဖို့ စိတ်အားထက်သန်နေကြသူများနဲ့ တိတ်ဆိတ်ခြင်းတွေကို အဖော်ပြုရင်း နံရံတွေကြားထဲ ဆက်လက်ရှင်သန် ရမယ့် လူတွေကြားထဲက ကွာဟချက်တွေထင်ဟပ်စေတဲ့ အခိုက်အတန့်တွေဖြစ်ပါတယ်။ ဘာကို မကျေနပ်ရမလဲဆိုတဲ့ လိုက်ရှာကြရတဲ့ အချိန်ကာလလည်းဖြစ်ပါတယ်။ ကျွန်တော်တို့ရဲ့ အချိန်ကာလ အတိုလေးအတွင်းမှာဘဲ ကိုယ့်ကို ခွဲခွာသွားတဲ့ လူတွေကို နှုတ်ဆက်ခဲ့ရသလို၊ ကိုယ်က ပြန်ပြီး လက်ပြနှုတ်ဆက်ခဲ့ရတဲ့ အခြေအနေတွေလည်း ဖြတ်ကျော်ခဲ့ရပါတယ်။ ပြန်တွေ့ကြမယ်ဆိုတဲ့ မျှော်လင့်ချက်အပြည့်နဲ့ပါ။ ဒီလူတွေဟာ ဘဝတလျှောက်လုံး အရင်းနှီးဆုံး မိတ်ဆွေတွေအဖြစ် ဆက်ရှိနေကြမယ်ဆိုတဲ့ စိတ်မျိုးနဲ့ပါ။

ဆက်လက်ဖော်ပြပါဦးမယ်
အာကာ (ဝါလက်သား)

Photo - Myanmar Now

06/28/2025

ဒီလူတွေ ဘာတွေဖြစ်ခဲ့လဲ။ ဒီလူတွေဘယ်ကိုရောက်သွားပြီလဲ။ ဒီလူတွေရဲ့ တရာမျှတမှုက ဘယ်မှာလဲ။

အချိန်တွေကုန်တာမြန်ပါတယ်။ ရင်ဘက်ထဲထိ စူးစူးရှရှရောက်ခဲ့တဲ့ အဖြစ်အပျက်တွေဟာ မနေ့က ဖြစ်ခဲ့သလို ပြန်မြင်ယောင်စေပါတယ်။ အကျဉ်းကျနေစဉ်အတွင်း အတူတူနေထိုင်ခဲ့ကြဖူးတဲ့ မိတ်ဆွေတွေ သူငယ်ချင်းတွေလည်း အမြဲသတိရမိနေကြရတာပါ။ ထောင်ထဲကနေ လွတ်မြောက်တဲ့ လူတွေအတွက်က ယုံကြည်ချက်ကြောင့်ကလွဲရင်တော့ ပြန်လည်အမှတ်မရချင်တော့တဲ့ အချိန်ကာလအခိုက်အတန့်တွေဖြစ်နေမှာပါ။ ထောင်ထဲမှာ အမြဲပြောနေကြစကားတခွန်းရှိပါတယ်။ ထောင်ဗူးဝမှာ မေ့ပင်ဆိုတာရှိတယ်။ ထောင်ကထွက်ရင် မေ့ပင်ကျော်တာနဲ့ အကုန်မေ့သွားကြလိမ့်မယ်ဆိုပြီးတော့ပေါ့။ ကျွန်တော်တို့ကတော့ အဲ့ဒီမေ့ပင်ကို လဲဖြိုခဲ့ကြတဲ့ လူငယ်တွေဖြစ်ချင်ပါတယ်။ လက်ရှိအခိုက်အတန့်အားဖြင့် မိမိတို့ဟာ ရှင်သန်နေထိုင် ပတ်ဝန်းကျင်ပေါ်မူတည်ပြီး နှုတ်ဆိတ်နေကြရပေမယ့်၊ မိမိတို့နဲ့ ဘဝတူတွေ၊ ခံယူချက်တူသူတွေ၊ ယုံကြည်ချက်ပြင်းထန်တဲ့ သူငယ်ချင်း၊ မိတ်ဆွေတွေကတော့ အထဲကနေ မိမိတို့အပေါ်ယုံကြည်ကြရင်း၊ အားကိုးကြရင်း တစ်နေ့ပြီးတစ်နေ့ ဘောင်ကျဉ်းကျဉ်းလေးမှာ ဖြတ်ကျော်နေရဆဲပါ။

ကျွန်တော်တို့ဟာ အခြားလူငယ်တွေ၊ မိတ်ဆွေတွေထပ်စာရင် အချိန်ကာလအားဖြင့် အခိုက်အတန့်တခုသာ နေထိုင်ခဲ့ရခြင်းဖြစ်ပါတယ်။ သံတိုင်တွေ၊ ထောင်နံရံတွေကနေ ပြန်လည်ထွက်လာနိုင်ခဲ့တဲ့နောက်မှာ နေရာအသီးသီးမှာ ပြန်လည်ရှင်သန်နေရဆဲဖြစ်တယ်။ နံရံတွေထဲက အသံတွေကို ပြန်လည်ကြားနိုင်ဖို့ သံတိုင်တွေကြားထဲက မျှော်လင့်ချက်တွေ ခံစားနားထောင်နိုင်ဖို့အတွက် ကျွန်တော်တို့ရဲ့ ရင်ဘတ်တွေကို ကျယ်ကျယ်ဖွင့်ထုတ်ထားကြဖို့လိုပါတယ်။ နောင်တချိန် ကျွန်တော်တို့ မေ့ပင်ကို ခုတ်လှဲခဲ့ကြောင်းကိုလည်း လက်တွေ့သက်သေပြနိုင်ကြဖို့လိုပါတယ်။ မတရားဖမ်းဆီးခံကြရဲ့ လူတစ်ယောက်ချင်းစီရဲ့ တရားမျှတမှုဟာလည်း အရေးကြီးပါတယ်။ ဒီနိုင်ငံရေးအခင်းအကျင်းရဲ့ နေ့မြင်ညပျောက်ဘဝတွေ၊ မတရားသဖြင့် ဖမ်းဆီးထိန်းသိမ်းခံပြီး ဘောင်ထဲကနေရတဲ့ ဘဝတွေဟာ ကျွန်တော်တို့ စနစ်တခုကိုပြောင်းဖို့၊ ဒီစစ်ယန္တရားတစ်ခုလုံးကို ဖြိုချဖို့အတွက် လိုတာထက်ပိုပြီး အသံတိတ် ပေးဆပ်နေကြတဲ့ အခြေအနေတွေဖြစ်ပါတယ်။

ကျွန်တော်တို့ဟာ ကံကောင်းခဲ့ပါတယ်။ ကိုယ်နဲ့ ထိတွေ့ခဲ့ရတဲ့ အခင်းအကျင်းပေါ်မှာ ပေါ့ပေါ့နေပြီး ဖြတ်ကျော်ခဲ့ရပေမယ့် ကျန်ခဲ့သူတွေရဲ့ လောကဓံဟာ လှိုင်းကြမ်းလွန်းလှပါတယ်။ ကျွန်တော်တို့ဆိုရင် ဘယ်လိုဖြစ်မလဲဆိုတဲ့ အတွေးကြောင့် ဒီလူတွေအတွက် ကျွန်တော်တို့ရဲ့ မေ့ပင်ကို ခုတ်လှဲပစ်ဖို့လိုပါတယ်။ ဒါတွေကို ကျွန်တော်တို့ ဘယ်တော့မှ မေ့ပစ်လို့မရတဲ့ အဖြစ်အပျက်တွေထဲက တခုဖြစ်မှာပါ။ ကျွန်တော်တို့ လွတ်မြောက်ပြီး မကြာခင်မှာဘဲ ဒီကိစ္စတွေ ဆက်တိုက်ဖြစ်ခဲ့တော့ ကျွန်တော်တို့ အသည်းကွဲခဲ့ရပါတယ်။ အချင်းချင်းကြားမှာ သတင်းအချက်အလက်တွေ စုဆောင်းမိရင်းနဲ့ ကျွန်တော်တို့ သူတို့ဘာတွေဖြစ်ခဲ့ကြလဲဆိုတာ ပုံဖော်ချင်ပါတယ်။ ကျွန်တော်တို့ မဖြစ်မနေ ဒီလူတွေအတွက် ပုံဖော်နေအုံးမှာပါ။ ကျွန်တော်တို့နဲ့ ရင်းနှီးခဲ့ကြရတဲ့ အချိန်တွေ တိုတောင်းလွန်းလှပါတယ်။ သေချာတာက ဒီလူတွေဟာ တန်ဖိုးရှိတဲ့ လူသားတွေဖြစ်ကြောင်းပါဘဲ။

ဆက်လက်ဖော်ပြပါအုံးမယ်
ဝါလက်သားများ

06/27/2025

ကိုညီ နဲ့ ကျွန်တော်က ဒိုက်ဦးထောင်မှာ အတူဆုံဖြစ်ခဲ့တယ်။ သူကတော့ ဆံသဘုတ်ပေါ့။ ကျွန်တော်တို့ကို ဆံပင်ညှပ်ပေးခဲ့တာ။ အပြင်အတူတူထွက်လာပြီးနောက်မှာ သူကတော့ သူရဲ့နေရာဟောင်းဖြစ်တဲ့ ထိုင်းမှာ ပြန်ပြီး လှုပ်ရှားရုန်းကန်နေတဲ့ ဘဝသမားတစ်ယောက်ပေါ့ဗျာ။ ဒီတော့ သူအနေနဲ့ လူငယ်ဘဝအိမ်ပြေးဖြစ်ခဲ့ပြီး နေရာပေါင်းဆုံရောက် ကျင်လည်ခဲ့ရတယ်။ ထိုင်းနိုင်ငံမှာ (၁၀) နှစ်တာ ဖြတ်သန်းခဲ့ပြီး မြန်မာပြည်ပြန်လာခဲ့တယ်။ အစိုးရအပြောင်းအလဲဖြစ်တဲ့အချိန် အမေစုကို ယုံကြည်သက်ဝင်တဲ့ လူငယ်တစ်ယောက်အနေနဲ့ ဒီနိုင်ငံမှာ အလုပ်အကိုင်အခွင့်အရေး မျှော်လင့်ချက်တွေနဲ့ ပြန်လာဖြစ်ခဲ့တယ်။ ဒါကြောင့်မို့လို့ ကျွန်တော်လည်း သူ့အနေနဲ့ ဒီအာဏာသိမ်းမှုမတိုင် လူငယ်ဘဝဖြတ်သန်းမှုတွေကို ကျွန်တော်နဲ့အတူ စကားစမြည်ပြောဖြစ်တာလေးပါ။ ကြည့်ရှုခံစားပေးကြပါလို့ တိုက်တွန်းလိုက်ပါတယ်။

06/26/2025

ဒီနေ့ ကျွန်တော်တို့ ဝါလက်လှေမှာ လိုက်မယ့် အကိုတယောက်နဲ့ မိတ်ဆက်ပေးချင်ပါတယ်။ သူကတော့ ကိုညီပါ။ နယ်မြို့လေးကနေ အိမ်ပြေးဘဝနဲ့ ရန်ကုန်မှာ အလုပ်မျိုးစုံလုပ်၊ ထိုင်းထဲကိုရောက်ပြီး ထိုင်းမှာ (၁၀) နှစ်တာ နေရာမျိုးစုံရောက် (ငါးဖမ်းလှေမှာလည်း ရောင်းစားခံရ) ပြီး ၂၀၁၅ မှ မြန်မာနိုင်ငံကို ပြန်လာဖြစ်တယ်။ ကိုယ့်အိမ် ကိုယ့်မြေကို လွမ်းတဲ့စိတ်ရော အသွင်ကူးပြောင်းရေးကာလ မျှော်လင့်ချက်ရောပေါ့ဗျာ။ ကဲ ဒီအာဏာသိမ်းမှုမတိုင်ခင်က သူ့ဘဝအကြောင်းတွေကို ဝါလက်လှေပေါ်မှာ စကားစမြည်ပြောဖြစ်တာလေးတွေ ဖော်ပြပေးပါမယ်။ အိမ်ပြေးတယောက်ရဲ့ ဒဏ္ဍာရီတစ်ပုဒ်ကို ခံစားရမှာပါ။

Wah Latt

08/11/2025

08/09/2025

07/30/2025

07/26/2025

07/24/2025

07/15/2025

07/04/2025

07/01/2025

06/29/2025

06/28/2025

06/27/2025

06/26/2025

Address

Website

Alerts

Shortcuts

Share

Category