11/07/2025
ကော့ကရိတ်တိုက်ပွဲတွင် အကြမ်းဖက်စစ်တပ်ဘက်မှ ၁၅ ဦးထက်မနည်း သေဆုံးဟုဆို
နိုဝင်ဘာ ၇၊ ၂၀၂၅
ကရင်ပြည်နယ်၊ ကော့ကရိတ်မြို့ကို စစ်ကြောင်းထိုးလာတဲ့ အကြမ်းဖက်စစ်တပ်နဲ့ တော်လှန်ရေးပူးပေါင်းတပ်တို့ ထိတွေ့တိုက်ပွဲ ဖြစ်ပွားရာ စစ်တပ်ဘက်က အနည်ဆုံး ၁၅ဦး သေဆုံးပြီး လက်နက်တချို့လည်း သိမ်းဆည်းရရှိခဲ့တယ်လို့ မြေပြင်သတင်းရင်းမြစ်တွေထံက သိရပါတယ်။
နိုဝင်ဘာလ ၇ ရက် ဒီမနက်အစောပိုင်းမှာ ကော့ကရိတ်ကို မြေပြင်စစ်ကြောင်းထိုးလာတဲ့ စစ်ကော်မရှင် တပ်တွေနဲ့ တော်လှန်ရေးတပ်တို့ ကော့ကရိတ်မြို့နယ်၊ ထိဖိုးစံနဲ့ ဖိဖာလဲကြား ကြက်မောက်ခြံမှာ တိုက်ပွဲ ပြင်းထန်ခဲ့တယ်လို့ သိရပါတယ်။
“မနေ့ကလည်း တနေကုန်ပစ်တယ်…. ဒီနေ့လည်း တမနက်လုံးပစ်တယ်။ ၁၀ နာရီ ၁၁ နာရီလောက်မှ ရှင်းလင်းရေးသွားလုပ်ရတယ်” လို့ မြေပြင်ရဲဘော်တယောက်က မောင်းကို ပြောပါတယ်။
အဆိုပါ တိုက်ပွဲမှာ စစ်တပ်ဘက်က ၁၅ယောက်ထက်မနည်း သေဆုံးခဲ့ပြီး သေနတ် ၅လက်ကိုလည်း တော်လှန်ရေးတပ်ဖွဲ့တွေ သိမ်းဆည်းရရှိခဲ့တယ်လို့ သိရပါတယ်။
အဆိုပါ တိုက်ခိုက်မှုကို KNLA တပ်မဟာ ၁၊ တပ်မဟာ ၃၊ တပ်မဟာ ၇ နဲ့ ကလိုထူးဝါးဗျူဟာ စစ်ကြောင်းတွေအပါအဝင် တော်လှန်ရေးတပ်ဖွဲ့တွေ ပူးပေါင်းတိုက်ခိုက်ခဲ့တာ ဖြစ်တယ်လို့ သိရပါတယ်။
ပြီးခဲ့တဲ့ နိုဝင်ဘာ ၁ရက်နေ့ မနက်အစောပိုင်းကလည်း ကော့ကရိတ်ကို မြေပြင်စစ်ကြောင်းထိုးလာတဲ့ စစ်ကော်မရှင်တပ်တွေ ထိဖိုးစံ နေရာအရောက်မှာ တော်လှန်ရေးပူးပေါင်းတပ်တွေနဲ့ ထိပ်တိုက်တိုးပြီး တိုက်ပွဲဖြစ်ပွားခဲ့ပါသေးတယ်။ အဲဒီတိုက်ပွဲမှာလည်း စစ်ကော်မရှင်တပ်သား အလောင်း ၈လောင်းနဲ့ လက်နက်တချို့ကို တော်လှန်ရေးတပ်ဖွဲ့တွေ သိမ်းဆည်းရမိခဲ့တယ်လို့ သိရပါတယ်။
“သူတို့ စစ်ကြောင်းထိုးလာနေတာ နိုဝင်ဘာ ၁ရက်နေ့ကတည်းက အခုထိ ထိဖိုးစံကို သူတို့ မကျော်နိုင်သေးဘူး။ ပြန်လန်လန်သွားတယ်” လို့ မြေပြင်ရဲဘော်က ပြောခဲ့ပါတယ်။
ပုံစာ - အကြမ်းဖက်စစ်တပ်ထံမှ သိမ်းဆည်းရရှိသည့် လက်နက်အချို့ (ပေးပို့)
