08/14/2026
‎Hayyuu biyyaaf bu’aa guddaa buusanii, kanneen galanni isaanii sirriitti hin faarfamne
‎BAATUU— Hagayya 8/2018 A.L.I.
‎Mana Barumsaa Sadarkaa 2ffaa Baatuu keessatti gaggeessaa mana barumsaa ta’uun kan tajaajilanii fi barnoota Baayoloojii karaa addaa fi hawwataa ta’een barsiisaa turan, barsiisaa bara sanaa beekamaa, barattoota isaanii jaalalaan kan qabatan, nama qajeelfamaa fi sirna jaallatu, akkasumas naamusa cimaadhaan beekaman Barsiisaa Mabraatuu Boogaalee Dibaabaa, barsiisaa fuula kanaa har’aa galateeffatamaa fi nama dhalootaaf bu’aa guddaa buuse, gabaabinaan isin yaadachiisna.
‎
‎Barsiisaa Mabraatuu Boogaalee, bara 1980moota fi 1990moota irraa eegalee Mana Barumsaa Sadarkaa 2ffaa Baattuu (Ziway) keessatti gaggeessaa mana barumsaa ta’uun tajaajilaniiru. Isaan nama sammuu bal’aa fi hubannoo gadi fagoo qabu, bara warqee sana keessatti mallattoo isaanii sammuu fi qalbii dhalootaa irratti kan kaa’an, barsiisaa ajaa’ibaa fi hogganaa gaarii turan.
‎
‎Barattoota hunda biratti naamusa addaa fi akka abbaa isaanii kabajamaa fi sodaatamaa turan. Kennaa barsiisummaa addaa kan qaban, nama amala gaarii fi eenyummaa guutuu qabu turan.
‎
‎Har’a biyya isaanii Itoophiyaa keessatti, keessumaa magaalaa Baattuu keessatti, dameewwan hojii gara garaa irratti bobba’anii kan argaman, akkasumas addunyaa irratti akka urjii ifanii mul’atan hayyoota hedduu horachuun gahee olaanaa kan taphatan, hayyuu beekamaa, nama gadi of qabu, amala gaarii qabu, nama hojii isaa irratti mul’isu, barsiisaa hubataa fi barattoota hedduu biratti jaallatamaa fi kabajamaa ta’an Barsiisaa Mabraatuu Boogaalee Dibaabaa ti.
‎
‎Isaan bara jireenya isaanii keessatti barsiisummaa isaanii amanamummaa fi kutannoodhaan raawwatanii, yeroo ammaa sooramaa irra jiru. Ifa beekumsaa ta’anii, ijoollee hedduu beekumsaan horatanii, ogummaa fi beekumsa isaanii biyya isaanii Itoophiyaa tajaajiluuf oolchanii, garuu hanga har’aatti galanni isaanii sirriitti hin faarfamne. Kanaafuu, Barsiisaa Mabraatuu Boogaalee Dibaabaa hayyoota biyyaaf bu’aa guddaa buusan keessaa tokko, akkasumas nama duraa ti.
‎
‎Seenaa isaanii irraa akka hubannutti, Mana Barumsaa Sadarkaa 2ffaa Baatuu (Ziway) qofa osoo hin taane, yeroo booda Kolleejjii Teknikaa fi Ogummaa Baatuu keessatti waggoota muraasaaf Diinii ta’uunis tajaajilaniiru. Yeroo kolleejjicha keessatti turanitti, hoggansa cimaa, hojii irratti cichoomina, dandeettii bulchiinsaa addaa fi muuxannoo hoggansaa isaanii fayyadamuun hawaasa kolleejjichaa waliin hojii gaarii hojjetanii, Diinii jaallatamaa fi galateeffatamaa turan.
‎
‎Dhumarrattis, muuxannoo hojii fi hoggansaa isaanii irraa ka’uun Waajjira Geejjibaa Bulchiinsa Magaalaa Baatuu keessatti itti gaafatamaa ta’anii ramadamanii hojjetanii turuu galmee dhuunfaa isaanii irraa hubachuun danda’ameera. Nama baadiyyaa irraa kaasee hanga magaalaatti beekamaa fi muuxannoo bal’aa qabu waan ta’aniif, hojii isaanitti kenname hunda milkaa’inaan raawwatanii, hoggansa gaarii, amanamummaa fi dhugaan tajaajilanii, amma immoo sooramaa irra jiru.
‎
‎Isin barattoonni isaan barsiisan, kanaaf ragaa dha!!!
‎
‎Barsiisaa keenya jaallatamaa Mabraatuu Boogaalee Dibaabaaf jaalala fi kabaja qabdan ibsaaf!
‎
‎Addunyaa kana irratti dhalootaan hojii gaarii hojjatanii, qalbii fi yaada dhalootaa keessatti maqaa gaariin yaadatamuun, dhugumaan eebba guddaa dha!
‎
‎Barsiisaa Asnaaqee Dachaasaa
‎(Baatuu — Itoophiyaa)
