08/31/2026
English for Success (8) - အောင်မြင်လိုသူတိုင်းအတွက် အင်္ဂလိပ်စာ (၈)
- By Prof; Myo Kyaw Myint
ယခုလတွင် အောင်မြင်လိုသူတိုင်း သိထားသင့်သည့် ဝေါဟာရနှစ်ခုနှင့် ၎င်းဝေါဟာရတို့၏ ကွဲပြားခြားနားပုံလေးကို တင်ပြလိုပါသည်။ လူတိုင်းလိုလို သိကြသော Want နှင့် Need တို့၏ ကွဲပြားခြားနားပုံကို ရှင်းပြလိုပါသည်။ ဖော်ပြပါ ဝါကျလေးနှစ်ခုကို လေ့လာကြပါစို့။
I want to succeed.
I need to succeed.
want ဟု သုံးတတ်သူသည် အောင်မြင်ရင်လည်း အောင်မြင်မည်၊ မအောင်မြင်ချင်လည်း မအောင်မြင်မည်။ တနည်းအားဖြင့် A person who uses the expression, "I want to succeed" may or may not succeed. အဘယ်ကြောင့်ဆိုသော် want ဆိုသည်မှာ မိမိလိုချင်ခြင်းသာ ဖြစ်ပါသည်။ လူတိုင်းလိုလို "I want to succeed" ဟု ပြောတတ်ကြပါသည်။ အောင်မြင်ရန်လည်း ကြိုးစားတတ်ကြပါသည်။
"I want to be successful, I want to learn English, I want a higher salary, I want a house, I want a beautiful wife and children, I want to be the boss." စသဖြင့် want နှင့် တွဲ၍သုံးစွဲနေသရွေ့တော့ အောင်မြင်မှုရဖို့ မလွယ်ကူလှပါ။ ထို want နေရာ၌ need နှင့် အစားထိုးပြီး သုံးတတ်သည့် အလေ့အကျင့်လေး လုပ်ထားပါ။
Want ဆိုတာက ဆန္ဒရှိတာကို ဖော်ပြပါသည်။ အောင်မြင်လိုသော ဆန္ဒရှိရုံနှင့် အောင်မြင်မှု မရနိုင်ပါ။ need ဆိုတာက မဖြစ် ဖြစ်အောင် လုပ်ရမည်ဆိုသည့် အဓိပ္ပာယ် ရှိပါသည်။ အောင်ကို အောင်မြင်ရမည်ဟု အဓိပ္ပာယ်ရှိသဖြင့် အမှန်တကယ်ပင် အောင်မြင်ပါလိမ့်မည်။
ဆိုကြပါစို့။ စာဖတ်သူတစ်ယောက်သည် အရေးကြီးသော job interview တစ်ခုကို ဝင်ရတော့မည် ဆိုပါစို့။ interview မတိုင်မီ မိမိကိုယ်မိမိ "I really want that job, I want the position." စသဖြင့် ပြောဆိုနေပြီး လိုအပ်သလို ပြင်ဆင်သွားသော်လည်း အခြားသော interviewee များသည်လည်း ထိုအလုပ်ကို လိုချင်ကြမှာပါပဲ။ ဒီတော့ ထိုအလုပ်ရဖို့ဆိုတာ အင်္ဂလိပ်လိုတော့ Crapshoot ပေါ့နော်။ မြန်မာလိုတော့ ခေါင်းပန်းလှန်ရသလိုပေါ့။ ရချင်လည်း ရမည်၊ ရချင်မှလည်း ရမည်ပေါ့။
ဒါပေမဲ့ "I really need that job" လို့ ဆိုခဲ့ရင် ဒီအလုပ်ကို ရကိုရမှ ဖြစ်မှာဆိုတော့ သေသေချာချာ ပြင်ဆင်ပြီး interview မှာလည်း interviewer များ အထင်ကြီးအောင် ဖြေနိုင်မှာ သေချာပါတယ်။ need ဆိုတော့ ဒီအလုပ် မရလို့ မဖြစ်ဘူးပေါ့နော်။ မိမိရဲ့ အနာဂတ်အတွက်ရော၊ မိသားစုအတွက်ရော အမှန်တကယ် လိုအပ်နေပြီဆိုတော့ အစွမ်းကုန် ကြိုးစားမှာ သေချာတယ်။ ဒီတော့ အလုပ်ရဖို့ သေချာပြီပေါ့နော်။ ဘဝမှာ အမှန်တကယ် အောင်မြင်လိုသူဟာ want ဆိုတဲ့ စကားလုံးကို need ဆိုတဲ့ စကားလုံးနဲ့ အစားထိုးနိုင်ဖို့ လိုပါသည်။
မြန်မာအများစု မျက်စိလည်တတ်သေးတဲ့ စကားလုံးနှစ်ခု ရှိပါသေးသည်။ Reality နှင့် perception ဆိုတဲ့ ဝေါဟာရလေး နှစ်ခုပါ။ ဘဝမှာ အောင်မြင်လိုသူဟာ reality တစ်ခုတည်းကို အားကိုး၍ မရပါ။ perception ကိုပါ အရေးထားရန် လိုပါသည်။
စာရေးသူ ငယ်ငယ်က ပြောလေ့ရှိပါသည်။ "I know who I am. I don't worry about what others think of me." ပြောသည့်အတိုင်းလည်း ဖြစ်သလိုနေ ဖြစ်သလို ဝတ်စားတတ်ပါသည်။ ကိုယ်က ရိုးသားရင် ပြီးတာပဲ၊ အခြားသူများ ထင်ချင်တာ ထင်ကြပါစေလို့ စိတ်ထား ရှိခဲ့ဖူးပါသည်။
စင်စစ် ပြုပြင်ပေးမဲ့သူ မရှိခဲ့ရင် ယခုလိုဘဝမှာ အဆင်ပြေဖို့ မမြင်ပါ။ အလုပ်အကိုင်ကောင်းကောင်း ရဖို့ထားတော့ လူရာဝင်ဖို့တောင် မမြင်ပါ။ ကံကောင်းထောက်မ၍ တစ်နေ့မှာတော့ စာရေးသူတို့၏ ဆရာမကြီး ဒေါ် EJ Ignangyi က ခေါ်ပြီး ဆုံးမပါသည်။ Professor ကြီးဆိုတော့ English လိုပဲ ပြောပါသည်။
"Myo Kyaw, look at yourself and look at your friend, Glen. See how he dresses and how he handles himself. He looks dignified. He's a real gentleman. You need to be more like him."
ယနေ့ထိ မှတ်မိပါသေးသည်။ ရင်ထဲမှာ အောင့်သက်သက်ဖြစ်သွားခဲ့သော်လည်း ရိုသေရသူဆိုတော့ ဆရာမကြီး ဆုံးမသည့်အတိုင်း လိုက်နာခဲ့ရပါသည်။ သပ်သပ်ရပ်ရပ် ဝတ်ဆင်လာရပါသည်။ အပြောအဆို၊ အနေအထိုင်ကိုလည်း ဂရုစိုက်ပြီး ပြုပြင်လာရပါသည်။ ထို့ကြောင့်လည်း အထိုက်အလျောက် အောင်မြင်မှု ရခဲ့ပါသည်။ ဆရာမကြီးရဲ့ ကျေးဇူးကို မမေ့နိုင်ပါ။
ဒီနေရာမှာ -
• Reality is who you are, your character and your inner self.
• Perception is how others see you, depending on your personality and how you choose to present yourself.
အရေးကြီးသောကြောင့် ရှင်းပြပါရစေဦး။ အချို့လူများသည် သဘောကောင်းပါသည်။ တစ်ဖက်သားကို ကူညီလိုတတ်ပါသည်။ သို့သော် အပြုံးအရယ်ကင်းပြီး ခပ်တင်းတင်း မျက်နှာထားတတ်သူမို့ မာနကြီးသူလိုလို၊ စိတ်သဘောထား ပုပ်သူ (A mean person) ဟု အများက သိထားတတ်ပါသည်။ ဒီတော့ ပြုံးရယ်တတ်ဖို့ လိုပါသည်။ စိတ်ထဲမှာ သဘောကောင်းနေရုံနှင့် မလုံလောက်ပါ။
သိထားဖို့က -
"Perception is in many instances just as important as reality, and under some circumstances may be even more important."
စာရေးသူ တစ်ခါက ရေးဖူးသလိုပေါ့နော်။
"A smile can open many doors. A smile can make you seem confident and friendly even though inside you may be feeling insecure and shy. A smile can turn an enemy into a friend and a would-be assassin into a loyal follower who will follow you to death."
အရေးကြီးဆုံးကတော့ မိမိရဲ့ Reality နဲ့ သင့်တော်တဲ့ demeanor ရှိနေဖို့ပါပဲ။ မိန်းကလေးများအတွက် ပိုတောင် အရေးကြီးပါသေးတယ်။ ကိုယ်က ဣန္ဒြေရှင်တစ်ယောက် ဖြစ်ပါလျက်နဲ့ ခပ်ပေါ့ပေါ့၊ ခပ်ကဲကဲပုံစံ ပေါက်နေခဲ့ရင် လူများအထင်သေးတာ ခံရပါလိမ့်မယ်။
ဒီတော့ မိမိရဲ့ ဝေါဟာရများအနက်မှ want ဆိုတာကို need နဲ့ အစားထိုးပါ။ reality တွင်သာမက perception ကိုပါ အလေးထားပြီး ဂရုစိုက်ပါ။ သေချာ ပေါက်မြောက်အောင်မြင်လာပါလိမ့်မယ်လို့ ပြောရင်း နားပါဦးမည်။
