09/20/2026
ច្បាប់ហាម ប៉ុន្តែការអនុវត្តនៅឯណា? ជុំវិញករណីជនជាតិខ្មែរចូលលេងល្បែងមាន់ជល់ផ្ទាល់នៅកាស៊ីណូ V168 ព្រែកចាក ខេត្តកំពត
បេីទោះរដ្ឋាភិបាលបានដាក់ចេញវិធានការរឹតបន្តឹង និងគោលការណ៍ពាក់ព័ន្ធនឹងការគ្រប់គ្រងល្បែងស៊ីសង ដោយមានការកំណត់ច្បាប់ច្បាស់លាស់អំពីការអនុញ្ញាត និងការហាមឃាត់ចំពោះជនជាតិខ្មែរ ក៍កាសុីណូV168
បន្តការអនុញ្ញាតឱ្យជនជាតិខ្មែរឲ្យចូលទៅលេងល្បែងមាន់ជល់ផ្ទាល់ក្នុងកាស៊ីណូ V168 ព្រែកចាក ខេត្តកំពត តើការអនុវត្តនៅទីតាំងខាងលេីនេះស្របតាមច្បាប់ និងគោរពគោលការណ៍របស់រដ្ឋាភិបាលដែរឬទេ?ករណីនេះមិនមែនជាបញ្ហាតូចតាចដែលឯកឧត្តមអភិសតិបណ្តិត ស សុខា ឧបនាយករដ្ឋមន្រ្តីនិងជារដ្ឋមន្រ្តីក្រសួងមហាផ្ទៃមិនគួរមើលរំលងឡើយ ព្រោះវាពាក់ព័ន្ធដោយផ្ទាល់ទៅនឹងប្រសិទ្ធភាពនៃការអនុវត្តច្បាប់ តាមការសម្រេចរបស់រដ្ឋាភិបាល គឺជាគោលការណ៍ដែលរដ្ឋបាលថ្នាក់ក្រោមជាតិត្រូវអនុវត្ត ហើយមិនគួរមានការអនុវត្តខុសពីការកំណត់នោះទេ។
«នៅក្នុងការសម្រេចចិត្តរបស់រដ្ឋាភិបាល គឺមានចែងនូវចំណុចគោលៗសំខាន់ៗ ដែលរដ្ឋបាលថ្នាក់ក្រោមជាតិត្រូវអនុវត្តតាម។ អ៊ីចឹង មិនគួរមានអ្វីដែលត្រូវថា មិនគោរព ឬមិនអនុវត្តតាមការកំណត់នៃច្បាប់ទេ »។
បញ្ហាដែលគួរឱ្យព្រួយបារម្ភ គឺមិនមែនស្ថិតនៅត្រឹមការចេញបទបញ្ជា ឬសេចក្តីសម្រេចនោះទេ ប៉ុន្តែស្ថិតនៅលើការអនុវត្តជាក់ស្តែង ប៉ុន្តែការអនុវត្តមិនមានប្រសិទ្ធភាព នោះវានៅតែបង្កើតឱ្យមានចន្លោះប្រហោងនិងបទល្មេីសដដែលជាដដែល ។
ករណីនៅកាស៊ីណូ V168 ព្រែកចាក ខេត្តកំពត ក៏កំពុងចោទជាសំណួរទៅកាន់អាជ្ញាធរពាក់ព័ន្ធថា តើមានការត្រួតពិនិត្យជាក់ស្តែងដែរឬទេ? តើជនជាតិខ្មែរអាចចូលទៅក្នុងទីតាំងលេងល្បែងមាន់ជល់បានដោយរបៀបណា? ហើយប្រសិនបើមានការអនុញ្ញាត តើអ្នកណាជាអ្នកទទួលខុសត្រូវលើការអនុវត្ត?
សំណួរទាំងនេះ គួរត្រូវបានបំភ្លឺជាសាធារណៈ ដើម្បីឱ្យប្រជាពលរដ្ឋបានដឹងថា ការគ្រប់គ្រងល្បែងស៊ីសងនៅតាមកាស៊ីណូ ត្រូវបានអនុវត្តជាក់ស្តែងយ៉ាងដូចម្តេច។
ព្រោះច្បាប់ដែលមាននៅលើតែក្រដាស មិនអាចមានប្រសិទ្ធភាពបានទេ ប្រសិនបើការអនុវត្តច្បាប់នៅមូលដ្ឋានមិនត្រូវបានត្រួតពិនិត្យ និងអនុវត្តឱ្យបានម៉ឺងម៉ាត់។
ដូច្នេះ អ្វីដែលសាធារណជនចង់ឃើញ គឺការបញ្ជាក់ច្បាស់ពីអាជ្ញាធរពាក់ព័ន្ធថា ករណីជនជាតិខ្មែរចូលលេងល្បែងមាន់ជល់ផ្ទាល់នៅកាស៊ីណូ V168 ព្រែកចាក ខេត្តកំពតគឺជាការពិត ឬយ៉ាងណា ហើយប្រសិនបើជាការពិត តើមានវិធានការអ្វីខ្លះត្រូវបានចាត់ចែងចំពោះអ្នកពាក់ព័ន្ធ?
មកដល់ម៉ោងនេះនៅមិនទាន់មានការអនុវត្តច្បាប់ចំពោះកាសុីណូ V. 168 នៅឡេីយទេ សំខាន់ការសម្រេចរបស់រដ្ឋាភិបាលមិនមានប្រសិទ្ធិភាពដល់រដ្ឋបាលថ្នាក់ក្រោមជាតិក្នុងការអនុវត្តតាម៕
