06/08/2025
Xaflad Lagu Dhiirrigelinayo Akhriska oo Lagu Qabtay Magaalada Ceerigaabo.
Ceerigaabo, 5-kii June 2025 – Naadiga Akhriska, Qoraalka iyo Dhaqanka ee Anfac oo ka howlgala magaalada Ceerigaabo, ayaa si guul leh u qabtay xaflad ballaadhan oo lagu dhiirrigelinayo akhriska, taas oo lagu qabtay Maktabadda Dadwaynaha Ee ANFAC. Ujeeddada xafladdan ayaa ahayd kor u qaadidda dhaqanka akhriska, wacyigelinta bulshada, iyo kobcinta xiisaha qoraalka iyo dhaqanka dhallinyarada deegaanka.
Xafladda waxaa ka soo qayb galay marti sharaf kala duwan oo ay ka mid ahaayeen masuuliyiin ka tirsan xukuumadda Jamhuuriyadda Somaliland, oo uu horkacayay Agaasimaha Guud ee Wasaaradda Horumarinta Caafimaadka, Dr. Axmed Maxamuud Jaamac, iyo madax kale , qaar ka mid ah culimada deegaanka laga qadariyo, Madaxda Shirkadaha, Madaxda Jaamacadaha,Warbaahinta,Aqoonyahan, iyo xubno ka socday qaybaha kala duwan ee bulshada rayidka ah sida ; Dhallinyarada, Macallimiinta iyo Ardayda.
Masuuliyiinta xukuumadda ayaa bogaadiyay dedaalka Naadiga Anfac ee horumarinta aqoonta iyo kobcinta maskaxda dhalinyarada. Waxay ballanqaadeen inay si dhow ula shaqayn doonaan Naadiga si loo sii xoojiyo barnaamijyada la xidhiidha akhriska iyo wacyigelinta bulshada.
Culimada iyo odayaasha dhaqanka ayaa iyana tilmaamay muhiimadda uu akhrisku leeyahay, iyaga oo xusay in horumarka qofka iyo bulshada uu ka bilaabmo akhris joogto ah iyo faham suuban oo ku saleysan diin iyo dhaqan.
Intii ay xafladdu socotay, waxaa la qabtay bandhigyo buugaag ah, suugaan ku saabsan muhiimadda akhriska, iyo doodo dhalinyaradu kaga arrinsanayeen sidii wax-akhrisku uga mid noqon lahaa nolol maalmeedka bulshada reer Sanaag.
Xubnaha Naadiga Anfac ayaa uga mahadceliyay dhammaan dadkii kasoo qayb galay xafladda iyo kuwa taageeray, iyaga oo xusay inay sii wadi doonaan hawlaha kor loogu qaadayo akhriska iyo dhaqanka wanaagsan ee bulshada.
DHAMMAAD.