08/08/2025
Shqipëria ka nevojë për një të djathtë reale, partnere me republikanët amerikanë – tani, jo nesër
Nga Ajet Delaj, New York
Ka një përpjekje nga e djathta reale dhe antikomuniste në Shqipëri – që në fakt janë një dhe e njëjta gjë – për të artikuluar mundësinë e ngritjes së një të djathte të vërtetë, që shpesh ngatërrohet me Partinë Demokratike.
Këto përpjekje më shtynë të shkruaj këtë reflektim publik, sepse besoj se ka ardhur koha të flasim hapur, në dritën e zhvillimeve politike në Europë dhe doktrinës së Presidentit Trump për aleatët e Amerikës në kontinent, të shpalosur këtë pranverë në Mynih nga Zëvendëspresidenti J.D. Vance.
Shqipëria ka nevojë për një të djathtë të vërtetë, të bazuar në vlerat konservatore të republikanëve amerikanë – tani, jo nesër.
Fatkeqësia më e madhe e Shqipërisë dhe shqiptarëve në këto 35 vite ka qenë mungesa e një të djathte reale. Si pasojë, vendi është sunduar nga një regjim hibrid, i cili nuk ka pasur asgjë të përbashkët me standardet e një qeverisjeje demokratike dhe pluraliste.
Që nga fillimi i pluralizmit, e ashtuquajtura Parti Demokratike ka qenë e uzurpuar nga ish-komunistët dhe më pas nga trashëgimtarët e tyre.
Ata jo vetëm që nuk ndërtuan të djathtën, por e përdhosën atë.
Partia Demokratike ka bërë aleanca me individë të ekstremit të majtë, si Xhuvani, Ilir Meta, madje edhe me figura që përfaqësojnë trashëgiminë më të errët të komunizmit, si Hysni Milloshi. Sot, ajo është zyrtarisht në aleancë me Ilir Metën, i cili ndodhet në burg për korrupsion galopant.
A ka të djathtë në këtë panoramë politike në Shqipëri? JO.
Të pretendosh se do ta ringresh të djathtën me Sali Berishën – të dërguarin e Ramiz Alisë në lëvizjen studentore të vitit 1990, të diktatorit të fundit komunist në Shqipëri – është njësoj si të përpiqesh të ringjallësh Partinë e Punës me shoqatat enveriste të vitit 1991.
Kjo është një absurditet historik.
Për ta konfirmuar këtë, mjafton të kujtojmë se ku ndodheshin më 8 dhjetor 1990 – kohë kur nisi lëvizja studentore – gjithë establishmenti politik i ashtuquajtur i majtë dhe i djathtë që ka sunduar Shqipërinë në 35 vitet e fundit:
Të gjithë ishin të dërguar nga regjimi komunist në Perëndim, në një kohë kur për qytetarët e zakonshëm çdo tentativë për të kaluar kufirin dënohej me plumb nga ushtarët e diktaturës.
Koha nuk pret.
Është urgjente që një grup nga e djathta historike dhe të përndjekurit e regjimit komunist të organizohen, fillimisht përmes një platforme online, duke kërkuar në mënyrë të natyrshme ndihmën dhe mbështetjen e aleatëve tanë strategjikë – Shteteve të Bashkuara të Amerikës.
Kostoja për ngritjen e kësaj platforme është modeste – rreth $10,000 – dhe mund të fillojë me vetë-regjistrimin e anëtarëve, bazuar në dokumentet personale të qytetarëve shqiptarë, brenda dhe jashtë vendit.
Më pas, duhet paraqitur një program që mbështetet fuqimisht në liritë dhe të drejtat themelore të njeriut në planin e brendshëm, dhe në partneritetin strategjik me SHBA-në në planin ndërkombëtar.
Rrjeti i strukturave duhet të ndërtohet nga poshtë: nga lagjja, fshati, qyteti – në Shqipëri dhe në diasporë – duke marrë shembull nga përvoja amerikane e përzgjedhjes së kandidaturave dhe funksionimit të Partisë Republikane.
Kjo nuk është vetëm një ide apo thirrje: është një emergjencë kombëtare.
Fatkeqësisht, sot Shqipëria është e papërfaqësuar në tryezën e aleatëve tanë historikë – konservatorët amerikanë të President Trump.
E majta globaliste e Edi Ramës ka përfunduar ciklin e saj, ndërkohë që bashkëpunëtorët e saj në Washington po presin radhën për t’u përballur me drejtësinë.
Ndërkohë, e djathta – e kapur peng nga z. Berisha – nuk përfaqëson më asnjë vlerë konservatore që mund ta lidhë Shqipërinë me administratën e President Trump apo me ndonjë qasje serioze të djathtë në Perëndim.
Shqiptarët janë sot pa zë, pa zëdhënës dhe pa përfaqësim real në spektrin e djathtë politik perëndimor.
Kush e quan veten patriot, kush e do Shqipërinë, duhet të ngrihet sot për të shpëtuar vendin nga agjendat globaliste dhe neokomuniste që synojnë shpopullimin e vendit.
Koha është tani. E djathta duhet të themelohet. Shqipëria ka nevojë për pluralizëm të vërtetë dhe për demokraci funksionale, sepse mungesa e një të djathte reale për 35 vjet ka sjellë kapjen e shtetit, korrupsionin e skajshëm dhe kthimin e Shqipërisë në nyje të trafikut ndërkombëtar.
Duke qenë se Shqipëria është një vend strategjik për interesat amerikane në juglindje të Europës, dhe duke qenë se populli shqiptar është ndër më proamerikanët në botë, i bëj thirrje administratës së Presidentit Trump që të ndihmojë shqiptarët të shkëputen nga agjendat globaliste – ku i ka futur trashëgimia komuniste në aleancë me rrjetin Soros dhe ekstremistët e majtë në SHBA.
Hapësirat e kombit shqiptar në Ballkanin Perëndimor janë të begata, dhe bashkëpunimi i shqiptarëve me kombin amerikan është jetik për të dyja palët. Kjo aleancë nuk është vetëm çështje ndjenjash – por interes strategjik, sipas vizionit dhe misionit të Presidentit Trump për ta bërë Amerikën të madhe sërish.
Prandaj besoj se Amerika e President Trump do t’i ndihmojë sërish shqiptarët, ashtu siç ka bërë që nga koha e Presidentit Wilson. Por edhe ne shqiptarët duhet të bëjmë “detyrat e shtëpisë” për ta realizuar këtë aleancë të madhe dhe jetike për të ardhmen tonë.
