09/09/2026
Ayiti/Politik : KOWÒT PATRIYOTIK mande verifikasyon sou itilizasyon sipoze done elektè yo
Pòtoprens, 9 septanm 2026 — Pati politik KOWÒT PATRIYOTIK leve vwa li sou kredibilite pwosesis elektoral la. Nan yon kominike ki date 7 septanm 2026, pati a mande Konsèy Elektoral Pwovizwa (KEP) pou l verifye enfòmasyon ki fè konnen nimewo idantifikasyon inik (NIU/NINU) kèk sitwayen ta kapab itilize san konsantman yo pou konstitye lis manm kèk platfòm politik.
Dapre KOWÒT PATRIYOTIK, si akizasyon sa yo ta konfime, sitiyasyon an ta reprezante yon vyolasyon grav sou dwa ak konsantman sitwayen yo, pandan li kapab mete an kesyon entegrite pwosesis elektoral la ak egalite ki dwe egziste ant diferan aktè politik yo.
Pati a mande KEP a mete sou pye yon verifikasyon endepandan, kontradiktwa ak transparan sou lis manm ki konsène yo. Li mande tou pou sitwayen yo kapab konnen si non yo oswa done idantifikasyon yo parèt sou lis afilyasyon politik san otorizasyon yo.
KOWÒT PATRIYOTIK swete gen yon mekanis ki senp epi aksesib pou pèmèt nenpòt sitwayen konteste yon afilyasyon li pa rekonèt. Pati a mande KEP a tou pou idantifye sous done yo, fason yo te kolekte yo, sikwi yo te suiv pou transmèt yo ansanm ak kondisyon kote enfòmasyon NIU/NINU yo ta itilize.
Nan ka kote yon ankèt ta etabli egzistans irègilatite oswa enfraksyon, pati a mande pou dosye yo voye bay otorite jidisyè ki konsène yo pou responsab yo kapab reponn devan lalwa.
Yon pwoblèm ki depase lis manm yo
Pou KOWÒT PATRIYOTIK, dosye a pa dwe konsidere kòm yon senp pwoblèm administratif. Pati a mete kesyon an nan yon kontèks pi laj kote peyi a ap fè fas ak yon sitiyasyon politik ak sekirite ki toujou frajil.
Li site, pami lòt bagay, agravasyon ensekirite a, feblès otorite Leta yo, pwoblèm sèvis piblik esansyèl yo ak kriz konfyans ki afekte enstitisyon yo.
Nan analiz pati a, kondisyon ki nesesè pou òganize eleksyon lib, onèt, enklizif ak kredib yo poko reyini ase. KOWÒT PATRIYOTIK estime kesyon an pa sèlman konsène regilarite lis manm kèk estrikti politik, men li touche kapasite tout pwosesis elektoral la pou garanti yon ekspresyon lib ak otantik volonte pèp la.
Apèl pou yon “sursot nasyonal”
KOWÒT PATRIYOTIK lanse tou yon apèl bay sosyete sivil la, òganizasyon politik yo, konfesyon relijye yo, sektè prive a, dyaspora a ak tout sitwayen yo pou yo mete tèt yo ansanm sou sa li konsidere kòm kèk priyorite nasyonal.
Pati a mande pou otorite Leta yo retabli prezans yo sou tout teritwa nasyonal la, pou sèvis piblik esansyèl yo reprann fonksyònman yo epi pou souverènte peyi a pwoteje.
Li mande tou pou endepandans sistèm jidisyè a ranfòse, pou lit kont enpinite a kontinye, pou sekirite moun ak byen garanti, epi pou kreye kondisyon ki nesesè pou eleksyon kredib kapab fèt.
Avètisman sou yon nouvo kriz lejitimite
Nan pati kominike a li rele « Mise en garde », KOWÒT PATRIYOTIK avèti yon pwosesis elektoral ki ta fèt san ase garanti sou libète, entegrite ak transparans kapab agrave kriz konfyans ki deja egziste a.
Pati a estime demokrasi a pa kapab chita sou itilizasyon prezime idantite sitwayen yo san konesans yo, sou ensekirite jeneralize oswa sou enstitisyon ki gen lejitimite yo konteste.
KOWÒT PATRIYOTIK lanse konsa yon apèl pou plis vijilans ak responsabilite kolektif. Pou pati a, moman an mande « lucidité, courage et un véritable sursaut national » pou rekonstwi yon Leta ayisyen ki lejitim, demokratik, souvren, pwoteksyonè epi ki respekte prensip Leta de dwa.
« KOWÒT LA DEVAN, PÈP LA DÈYÈ », se mesaj pati a mete kòm konklizyon kominike li a.
