04/15/2026
AYITI-MIZIK: POPOLO MAS VOCAL AK ATRÒS RANN OMAJ AK MANMAN YO AK YON NOUVO HIT KI AP SOTI 1ER ME
Pa Valentin Kerlin – RADIO TÉLÉ VAL INTER
Sèn mizikal ayisyèn nan sou pwen resevwa yon gwo kolaborasyon ant de atis ki deja fè non yo byen sonnen nan HDMI an : Popolo Mas Vocal ak Atròs.
Nan nouvo pwojè sa a, yo mete tèt ansanm pou rann yon bèl omaj ak tout manman an Ayiti kou aletranje.
Popolo Mas Vocal, ki se chantè gwoup Anbyans, epi ansyen manm Dakò #1, kontinye ap make tras li nan mizik la. Apre li te fin briye pandan kanaval 2025 nan Fò Libète, kote li te soti chanpyon, atis la montre li toujou sou menm liy siksè a ak nouvo travay sa a.
Pou kolaborasyon sa a, li chwazi travay ak Atròs, youn nan figi enpòtan nan rap ayisyen an, ki soti nan gwoup Rockfam, yon gwoup ki deja bay anpil hit epi ki gen yon stil ki byen angaje. Melanj stil mizikal sa yo anonse yon mizik ki rich e ki gen anpil emosyon.
Chante sa a mete an avan valè ak enpòtans manman yo nan sosyete a. Li gen pou sòti ofisyèlman 1er me 2026 a midi egzakt, yon moman ki gen anpil sans pou selebre ak onore fanm ki bay lavi.
Fanatik yo deja ap tann mizik sa a ak anpil enpasyans, paske li sanble gen tout engredyan pou li tounen yon gwo hit.
Pou moun ki pa vle rate okenn detay, yo ka deja kòmanse swiv chanèl YouTube atis la kote videyo ofisyèl la ap disponib :
👉 https://youtube.com/?si=R0iVuGDsUc0CBswE
Avèk kolaborasyon sa a, Popolo Mas Vocal ak Atròs pwouve ankò yo gen kapasite pou kreye mizik ki pa sèlman fè moun danse, men ki touche kè moun tou.
Popolo Mass Vocal Ofisyèl
Popolo
