18/07/2025
Mareykanka ayaa ansixiyay sharciga Genius Act oo nidaaminaya lacagaha dhijitaalka ah, gaar ahaan stablecoins, kuwaas oo looga baahan yahay in lagu daboolo kaydyo halis yar leh. Sharciga waxaa taageeray labada xisbi, waxaana la filayaa in Madaxweyne Trump uu saxiixo. Taageerayaashu waxay sheegayaan inuu horumarin keeni doono, halka mucaaradku ka digayaan khatar dhaqaale iyo ilaalin la’aan. Labo sharci kale oo la xiriira crypto ayaa maray Aqalka Wakiilada, iyadoo Trump sidoo kale diyaarinayo amar oggolaanaya in lacagaha hawlgabka lagu maalgeliyo crypto iyo dahab. Bitcoin ayaa gaaray in ka badan $120,000.
AQRISO WARKAN OO FAAH-FAAHSAN:
Mareykanka ayaa meel mariyay sharci weyn oo qaran ah oo ku saabsan lacagaha loo yaqaan 'cryptocurrency', taasoo calaamad u ah horumar muhiim ah oo ku yimid warshadaha lacagaha dhijitaalka ah. Sharcigan, oo loo yaqaan Genius Act, waxa uu dhisayaa qaab nidaamin ah oo loogu talagalay stablecoins kuwaasoo ah lacagaha dhijitaalka ah ee ay gadaal ka joogaan hantiyo lagu kalsoon yahay sida doolarka Mareykanka. Sharcigu wuxuu farayaa in stablecoins-ka si buuxda loogu daboolo kaydyo halis yar leh.
Sharcigan waxaa taageeray xildhibaanada Jamhuuriga iyo qaar ka mid ah Dimuqraadiyiinta, waxaana la filayaa in Madaxweyne Donald Trump uu saxiixi doono si uu u noqdo sharci, iyadoo uu Trump ka leexday aragtidii h**e ee uu ku ahaa mid ka shaki qaba crypto una rogay taageere, arrintaasoo lala xiriiriyay dano siyaasadeed iyo ganacsi.
Taageerayaasha sharciga ayaa sheegaya in uu caddeyn iyo hal-abuurnimo hor leh u keenayo warshadaha, halka dhaleeceeyeyaashu ay ka digeen inuu sababi karo halis dhaqaale oo cusub isla markaana aanu siinayn dadweynaha ilaalin ku filan.
Kooxaha u dooda macaamiisha ayaa kasoo horjeestay sharcigan, iyagoo ku doodaya in uu sharciyeynayo hantida dhijitaalka ah ee halista leh isla markaana u oggolaanayo shirkadaha teknolojiyadda inay u dhaqmaan si la mid ah bangiyada iyagoo aan si buuxda loo kormeerin.
Inkasta oo cabashooyinka jira, haddana sharcigu wuu ka gudbay labada aqal ee Kongareeska.
Laba sharci oo kale oo la xiriira lacagaha dhijitaalka ah mid ka hortagaya abuurista lacag dhexe oo dhijitaal ah oo uu leeyahay Bangiga Dhexe ee Mareykanka, iyo mid kale oo nidaaminaya hantida guud ee crypto ayaa la ansixiyay Aqalka Wakiilada, waxaana hadda la horgeynayaa Aqalka Senate-ka, inkastoo falanqeeyayaashu ay ka shaki qabaan inay sii gudbaan.
Dhanka kale, warar ayaa sheegaya in Trump uu diyaarinayo amar madaxweyne oo oggolaanaya in lacagaha hawlgabka lagu maalgashan karo hantida gaarka ah sida crypto iyo dahabka. Qiimaha Bitcoin ayaa dhawaan gaaray heerkii ugu sarreeyay, isagoo ka badan $120,000.
Galsan TV
