09/18/2026
Cilaaloo Media : Ibsa ABO-WBO irraa kenname
Waraanni Bilisummaa Oromoo ABO-WBOn, WBOn gamtaa Tsimdoo jedhamu keessa hin jiru, garuu walta'insa humnoota siyaasaa Mootummaa Biltsiginnaa mormani keessa jira jedhe.
ABO-WBO’n ibsa baase keessatti qabxiilee sadii dhimma Wallaggaa, dhimma Tsimdoo fi dhimma ummata Siviilii hidhachiisuu irratti xiyyeefate jira.
WBOn dhimma Wallaggaa yoo ibsu “akkuma waggota lamaan darban irra deddeebiin ibsaa turre, humni “Fannoo Wallaggaa” ofiin jechuun Wallagga keessa socho’u, humna badiinsaa Oromoo ajjeesuun beekamu, kan Biltsiginnaan ijaartee, hidhachiiftee Oromoo irratti gadhiifte ta’uu ammas irra deebinee mirkaneessina” jedhe.
Gareen kun hanga waraanni naannoo Amaaraa eegalutti, ifaan qaama milishaa Bilxiginnaa ture kan jedhe ABO-WBO’n, Waraanni naanno Amaaraa erga eegalee booda, milishaa Bilxiginnaa keessaa baafame jedhe.
Bilxiginnaan garuu garee badii kana gargaaruu hin dhiifne. Humnoota Oromiyaa meeshaa hidhachiiftee garee kanatti erga bobbaaftee booda, dhukaasa otoo hin baniin humnoonni Oromiyaa meeshaa isaanii garee kanaaf dhiisanii duubatti akka baqatan ajajaa turte jedhe.
Ibsichi itti fufuun odeeffannoo keessaa dabarsitee kennuun, gareen kun qarshii fi meeshaa waraanaa akka saamu gargaaraa turte. Kunis sababa lamaaf jedhe.
“Tokko, gareen kun ilmaan Oromoo akka ajjeesu, qe’ee Oromoo akka mancaasu dhaabattee ilaalti yookan al-kallattiin ajaja dabarsiti. Du’aa fi manca’uu Oromoo kana ammoo, Oromoon wareegamee akka barcuma ishee tiksuuf itti gargaaramuu barbaaddi. Lammata, ummanni fi humnooti saboota lamaanii wal qoccoluu dhiisanii, Biltsiginnaa irratti akka hin xiyyeeffanneef, marammartoo wal fixuu fi gumaa baafannaa keessa akka jiraatu barbaaddi” jechuun ibsee jira.
Osoo Bilxiginnaan harka irra qabuu baattee, gareen farra Oromoo fi kan gargaarsa kamuu Oromoo irraa hin arganne, uummata keenya gidduu jiraachuu hin danda’u ture jechuun eere.
Faannoon laga gamaa, kaayyoo Biltsiginnaa kana osoo sirnaan hin xiinxaliin, humna hidhatee fi afaan ishee dubbatu ta’uu isa qofa argitee waliin dhaabachuu filatte. Kun doggoggora siyaasaa guddaa, kan WBO biratti fudhatama tokkollee hin qabne dha jedhe.
Xiyyeefannaa isaa itti aanuun Gamtaa Tsimdoo jedhamu ilaalchisee wanti afuurfamu hedduun dhugaa irraa waan fagaate. WBOn gamtaa Tsimdoo jedhamu keessa hin jiru, dhimma kanas itti dhiyeenyaan hin hordofu jechuun ibse.
WBO’n itti fufuun Haa ta’u malee wal-ta’insi humnota Biltsiginnaa mormanii kan WBOn qooda keessaa qabuu fi kan humnoota biyyattii baha hanga dhihatti, kaabaa hanga kibbaatti hirmaachise, marii gara xumuraa irra gahee jira jedhe.
Wal-ta’insi kun dhimmoota lama irratti hundaa’e. Tokko, humnoonni Biltsiginnaa lolan wal qocollaa bukkee dhiisanii qaama ummattoota keenya balleessuuf dhama’u irratti akka fulleffatanii fi lammaffaa, waltajjii mootummaa cehumsaa kan gaaffileen ummatoota biyyattii hunduu, hirmaannaa kallattii ummatotaatiin itti furaman, qopheessuu dha. Wal-ta’insi kun wal ta’insa dubbi ijoo siyaasaa (substantive political questions) osoo hin taane, wal ta’insa deemsaa (procedural consensus) jechuun ibsee jira.
WBO’n qabxii 3ffaa ibsa isaa keessatti eereen ummata Sivilii hidhachiisuu Biltsiginnaa jechuun, “Ummanni keenya balaa kamirrayyuu of ittisuuf hidhachuun mirga isaati” jedhe.
Haa ta’utii, deemsi Biltsiginnaa Oromoon balaa isatti dhufe akka ofirraa ittisuuf osoo hin taane, saboboota lamaafi. Tokko, Oromoon barcuma ishee tiksuuf akka qoraan ta’uuf bal’inaan hojjechaa jirti. Yaaliin Biltsiginnaa hunduu Oromoo jalatti dhokachuudha. Ummanni keenya of haa ittisu. Biltsiginnaan of dandeessee haa loltu jechuun ibsee jira.
Lammata, yakkoota waggootan saddet darban hojjette ummata keenya irratti haqachuuf yaalaa jiraachuu argaa jirra. Kana hubachuun ummanni keenya maatii fi qe’ee ofii ittisuu bira darbee Biltsiginnaa waliin dhaabbachuun barcuma kufaa jiru tiksuuf aarsaa diinaaf kaffaluu akkasumas yakka Biltsiginnaa ofitti fudhachuu ta’uu hubachuun, walta’insa waraana isaa, WBO, waliin qabu jabeessee akka itti fufu dhaamna jedhe.
