11/18/2025
ချင်းပူးပေါင်းတပ်ဖွဲ့နဲ့ စကမတပ် အကြားတိုက်ပွဲအတွင်း စကမ ဗိုလ်မှူး၊ ဗိုလ်ကြီးအဆင့်အပါအ၀င် အင်အား ၁၀၀ ခန့်ကို ချင်းပူးပေါင်းတပ်ချေမှူန်း
ချင်းဂျာနယ်၊ နိုဝင်ဘာလ ၁၈ ရက်
ချင်းပြည်နယ်၊ ဖလမ်းမြို့နယ်၊ တီးတိန်မြို့နယ်၊ကလေးမြို့နယ်နှင့် ဂန့်ဂေါ်မြို့နယ်တို့တွင် ချင်းပူးပေါင်းတပ်ဖွဲ့နှင့် စစ်ကော်မရှင် (စကမ) တပ်အကြား တိုက်ပွဲဖြစ်ပွားလျက်ရှိပြီး စကမ ဖက်တပ်ဖက်မှ ဗိုလ်မှူး၊ဗိုလ်ကြီး အဆင့် အရာရှိများ အပါအဝင် ရန်သူအင်အား ၁၀၀ ခန့်ကို ချေမှုန်းနိုင်ခဲ့ကြောင်း ချင်းလဲန်းအစိုးရ၊ ကာကွယ်ရေးဝန်ကြီးဌာနက သတင်းထုတ်ပြန်ပါတယ်။
ချင်းပြည်အစိုးရ၊ ကာကွယ်ရေးဝန်ကြီးဌာနအောက်တွင်ရှိ ချင်းအမျိုးသားတပ်မတော်နှင့် ဒေသန္တရကာကွယ်ရေးတပ်ဖွဲ့များဖြင့် ဖွဲ့စည်းထားသော ချင်းလဲန်အစိုးရတပ်ဖွဲ့ရဲ့ စစ်ကြောင်း (၁)ဟာ ကလေးမြို့နှင့် ဂန့်ဂေါမြို့အကြားတွင် မိတ်ဖက် Vakok PDF အပါအဝင် ကျောင်းသားတပ်မတော် (ABSDF) ၊ PDF ခရိုင်တပ်ရင်းများ၊ ပကဖများ၊ Yaw Defense Force (YDF) စသည့် မဟာမိတ်အဖွဲ့များနှင့် လက်တွဲပြီး စကမတပ်ကို တိုက်ခိုက်နေပါတယ်။
စကမမှ နိုဝင်ဘာလ ၆ ရက်တွင် တိုက်လေယာဉ် ဖြင့် လေးကြိမ်၊ နိုဝင်ဘာလ ၁၄ ရက်တွင် ခုနှစ်ကြိမ်၊ Y-12 ဖြင့် တစ်ကြိမ်၊ နိုဝင်ဘာလ ၁၅ ရက်တွင် နှစ်ကြိမ်၊ နိုဝင်ဘာလ ၁၆ ရက်တွင် နှစ်ကြိမ်၊ Y-12 ဖြင့် ဗုံးအလုံး ၅၀ ခန့်၊ နိုဝင်ဘာလ ၁၇ ရက်တွင် ၄ ကြိမ် လေကြောင်းတိုက်ခိုက်မှုများ အပြင်းအထန် ပြုလုပ်ခဲ့ပါသည်။
ချင်းလဲန်းအစိုးရတပ်ဖွဲ့ရဲ့ စစ်ကြောင်း (၂) လည်း ဖလမ်းမြို့နှင့်ဝေဘူလမြို့အကြားတွင်လည်းကောင်း၊ တီးတိန်မြို့နှင့်ခိုင်ကမ်းမြို့အကြားတွင်လည်းကောင်း Chin National Defense Force (CNDF) ၊ PDF Zoland စသည့် မိတ်ဖက်အဖွဲ့များနှင့် လက်တွဲပြီး စစ်ကောင်စီတပ်ကို တိုက်ခိုက်နေတယ်လို့ သိရပါတယ်။
ရန်သူစကမမှ နိုဝင်ဘာလ ၁၇ ရက်တွင် တိုက်လေယာဉ်ဖြင့် နှစ်ကြိမ်၊ Y-12 ဖြင့် တစ်ကြိမ် လေကြောင်းတိုက်ခိုက်မှုများ ပြုလုပ်ခဲ့ပါတယ်။
စကမဖက်မှ လေယာဉ်နှင့် ဒရုန်းတို့ကို အားပြုပြီး အပြင်းအထန်တိုက်ခိုက်နေသော်လည်း ချင်းလဲန်အစိုးရတပ်ဖွဲ့နှင့် မဟာမိတ်အဖွဲ့များဟာ ဗိုလ်မှူး၊ ဗိုလ်ကြီးအဆင့်ရှိ စကမ အရာရှိများ အပါအဝင် ရန်သူအင်အား ၁၀၀ ခန့်ကို ချေမှုန်းနိုင်ခဲ့သည့်အပြင် စစ်သုံ့ပန်းတစ်ချို့ကိုလည်းဖမ်းဆီးရမိပြီး လက်နက်ခဲယမ်းများလည်း သိမ်းဆည်းနိုင်ခဲ့တယ်လို့ ချင်းလဲန်းအစိုရ၊ ကာကွယ်ရေးဝန်ကြီးဌာနက သတင်းထုတ်ပြန်ပါတယ်။
