10/24/2024
𞤊𞤓𞤂𞤇𞤉 𞤉 𞤁𞤉𞤏𞤉 𞤃𞤓𞤐
𞤊𞤵𞤤𞤩𞤫 𞤩𞤫𞤲 𞤫 𞤯𞤵𞥅𞤯𞤵𞤣𞤫 𞤥𞤵𞤲⹁ 𞤩𞤵𞤪𞤵𞤩𞤫 𞤫 𞤸𞤫𞥅𞤱𞤵𞤣𞤫 𞤩𞤫𞤲 𞤳𞤮 𞤶𞤵𞤤𞤩𞤫 (𞤭𞤧𞤤𞤢𞥄𞤥). 𞤑𞤮 𞤴𞤢𞤱𞤼𞤭 𞤯𞤮𞤲⹁ 𞤲𞤮 𞤱𞤮𞥅𞤣𞤭 𞤧𞤫𞥅𞤯𞤢 𞤫 𞤬𞤵𞤤𞤩𞤫 𞤩𞤫𞤲 𞤶𞤮𞤳𞥆𞤵𞤩𞤫 𞤤𞤢𞥄𞤱𞤭 𞤺𞤮𞥅⹁ 𞤱𞤢𞤲𞤮 𞤳𞤪𞤭𞤧𞤼𞤢𞤲𞤭𞤴𞤢𞥄𞤺𞤢𞤤⹁ 𞤑𞤢𞤥𞤭𞤼𞤭𞤴𞤢𞥄𞤺𞤢𞤤 𞤫 𞤤𞤢𞥄𞤱𞤭 𞤢𞤪𞤢𞤲𞤭 𞤯𞤭 𞤩𞤫 𞤼𞤢𞤱𞤪𞤵𞤲𞤮𞥅 𞤢𞤣𞤭𞥅𞤩𞤫 𞤩𞤫.
𞤊𞤓𞤂𞤇𞤉 𞤔𞤓𞤂𞤇𞤉 𞤇𞤉𞤐 (𞤋𞤅𞤂𞤀𞥄𞤃)
𞤐𞤮 𞤸𞤮𞤤𞥆𞤭𞤪𞤯𞤫𞤲 𞤲𞤮𞤲 𞤧𞤫𞤲𞤺𞤮 𞤣𞤮𞤱 𞤯𞤮𞥅⹁ 𞤫 𞤬𞤵𞤤𞤩𞤫 𞤩𞤫𞤲 𞤳𞤮 𞤶𞤵𞤤𞤩𞤫 (𞤭𞤧𞤤𞤢𞥄𞤥) 𞤩𞤫𞤲 𞤩𞤵𞤪𞤭 𞤯𞤵𞥅𞤯𞤵𞤣𞤫. 𞤇𞤫𞥅 𞤯𞤮𞥅 𞤫 𞤳𞤢𞤤𞤢 𞤺𞤮𞤤𞥆𞤢𞤤 𞤲'𞤺𞤢𞤤 𞤩𞤫 𞤺𞤮𞤤𞥆𞤢𞤼𞤢 𞤳𞤮 𞤫 𞤭𞤧𞤤𞤢𞥄𞤥 𞤩𞤫 𞤬𞤭𞤼𞤮𞤼𞤮𞥅⹁ 𞤯𞤵𞤲 𞤴𞤫𞤸𞤭𞥅 𞤸𞤢𞥄 𞤸𞤢𞤪𞤢 𞤩𞤫 𞤢𞤲𞤣𞤭𞤼𞤭𞤪𞤼𞤫 𞤳𞤢⹁ 𞤣𞤭𞥅𞤲𞤢 𞤳𞤢𞤲 𞤸𞤢𞤴 𞤶𞤭𞤤𞥆𞤮𞤲𞤣𞤭𞤪𞤭𞥅 𞤫 𞤲𞤢𞥄𞤥𞤵𞥅𞤶𞤭 𞤥𞤢𞤩𞥆𞤫 𞤯𞤭𞤲.
𞤊𞤵𞤤𞤩𞤫 𞤩𞤫𞤲 𞤳𞤮 𞤥𞤢𞤪𞤲𞤮𞥅𞤩𞤫 𞤶𞤭𞤳𞥆𞤵𞤶𞤭 𞤭𞤧𞤤𞤢𞥄𞤥 𞤢𞤣𞤮 𞤳𞤢 𞤢𞤪𞤵𞤣𞤫⹁ 𞤳𞤮 𞤯𞤵𞤲 𞤱𞤢𞤯𞤭 𞤭𞤧𞤤𞤢𞥄𞤥 𞤢𞤪𞤵 𞤼𞤵𞤲 𞤩𞤫 𞤶𞤢𞤩𞤭 𞤧𞤢𞤦𞤵 𞤼𞤢𞤱𞤭 𞤶𞤭𞤳𞥆𞤵𞥅𞤶𞤭 𞤥𞤢𞤩𞥆𞤫 𞤯𞤭𞤲 𞤲𞤮 𞤴𞤢𞤸𞤣𞤭 𞤫 𞤥𞤢𞤳𞥆𞤢.
𞤊𞤵𞤤𞤩𞤫 𞤩𞤫𞤲 𞤲𞤮 𞤼𞤢𞤱𞤢𞥄 𞤫 𞤧𞤢𞥄𞤳𞤭𞤼𞤵𞤺𞤮𞤤 𞤣𞤭𞥅𞤲𞤢 𞤭𞤧𞤤𞤢𞥄𞤥 𞤫 𞤲𞤣𞤫𞤪 𞤀𞤬𞤪𞤭𞤳. 𞤏𞤢𞤲𞤮 𞤬𞤵𞥅𞤼𞤢𞥄𞤶𞤭 𞤥𞤢𞤤𞥆𞤢 𞤷𞤢𞤫 (𞤊𞤵𞥅𞤼𞤢 𞤔𞤢𞤤𞤮𞥅 ⹁ 𞤊𞤵𞥅𞤼𞤢 𞤚𞤮𞥅𞤪𞤮𞥅⹁ 𞤃𞤢𞥄𞤧𞤭𞤲𞤢⹁ 𞤧𞤮𞤳𞤮𞤼𞤮⹁ 𞤀𞤣𞤢𞤥𞤢𞤱𞤢𞥄...) 𞤥𞤢𞤩𞥆𞤫 𞤯𞤫𞤲 𞤱𞤢𞤯𞤭𞥅 𞤸𞤢𞤪𞤫 𞤯𞤵𞥅𞤯𞤵𞤯𞤫 𞤲𞤮 𞤣𞤭𞥅𞤲𞤢 𞤳𞤢𞤲 𞤻𞤭𞥅𞤩𞤭𞤪𞤢. 𞤅𞤭 𞤬𞤫𞤰𞥆𞤭𞥅 𞤯𞤮𞤲 𞤥𞤢𞤱𞤲𞤩𞤫 𞤥𞤫𞤫𞤲 𞤢𞤪𞤢𞤲𞤩𞤫 𞤩𞤫𞤲 𞤱𞤢𞤲𞤮 𞤀𞤤𞤬𞤢𞥄 𞤋𞤦𞤪𞤢𞥄𞤸𞤭𞤥 𞤧𞤢𞤥𞤦𞤫𞥅𞤺𞤵 𞤱𞤢𞤯𞤵𞤲𞤮 𞤼𞤮𞤪𞤢𞥄𞤪𞤫 𞤀𞤤𞤤𞤢 𞤣𞤵𞥅𞤩𞤭 𞥗⹁ 𞤤𞤫𞤦𞥆𞤭 𞥗 𞤫 𞤦𞤢𞤤𞤯𞤫 𞥗 𞤳𞤢 𞤬𞤫𞤤𞥆𞤮 𞤸𞤫𞤤𞤢𞥄𞤴𞤢𞥄 𞤬𞤭𞥅 𞤲𞤮 𞤭𞤧𞤤𞤢𞥄𞤥 𞤫 𞤲𞤺𞤢𞤤𞤵 𞤼𞤢𞤦𞤭𞤼𞤭𞤪𞤢 𞤫 𞤲𞤮𞤳𞥆𞤵 𞤳𞤢𞤤𞤢 𞤳𞤢 𞤨𞤵𞤤𞥆𞤮 𞤱𞤮𞤲𞤭. 𞤊𞤵𞤤𞤩𞤫 𞤲𞤮 𞤥𞤢𞤪𞤭 𞤷𞤫𞤪𞤲𞤮𞥅𞤩𞤫 𞤰𞤫𞤤𞥆𞤭𞤼𞤭𞥅𞤩𞤫 𞤧𞤫𞥅𞤣𞤭𞤼𞤢𞤲𞤢𞥄𞤩𞤫 𞤫 𞤱𞤭𞤲𞤣𞤫𞤪𞤫 𞤲𞤣𞤫𞤲.
𞤊𞤓𞤂𞤇𞤉 𞤑𞤈𞤋𞤅𞤚𞤋𞤐𞤀𞥄𞤇𞤉
𞤐𞤮 𞤢𞤲𞤣𞤢𞥄 𞤯𞤵𞥅𞤯𞤢𞥄⹁ 𞤳𞤮𞤲𞤮 𞤩𞤢𞤴 𞤤𞤫𞤻𞤮𞤤 𞤫 𞤣𞤭𞥅𞤲𞤢 𞤲𞤮 𞤧𞤫𞤪𞤼𞤭⹁ 𞤥𞤢𞥄𞤯𞤵𞤲 𞤲𞤮𞤲 𞤱𞤭𞤫𞤼𞤫𞤲𞤮 𞤳𞤢𞤤𞤢 𞤨𞤵𞤤𞥆𞤮 𞤳𞤮 𞤶𞤵𞤤𞤯𞤮 (𞤭𞤧𞤤𞤢𞥄𞤥). 𞤉 𞤬𞤵𞤤𞤩𞤫 𞤩𞤫𞤲⹁ 𞤯𞤫𞤲 𞤥𞤢𞤪𞤭 𞤫 𞤲𞤮𞤳𞥆𞤫𞥅𞤤𞤭 𞤫 𞤲𞤣𞤫𞤪 𞤀𞤬𞤪𞤭𞤳 𞤳𞤪𞤭𞤧𞤼𞤭𞤲𞤢𞥄𞤩𞤫 𞤱𞤢𞤲𞤮 𞤐𞤢𞤶𞤮𞤪𞤭𞤴𞤢𞥄⹁ 𞤑𞤢𞤥𞤫𞤪𞤵𞤲 𞤫 𞤅𞤢𞤲𞤼𞤪 𞤀𞤬𞤪𞤭𞤳. 𞤇𞤫𞥅 𞤬𞤮𞤱 𞤳𞤮 𞤧𞤢𞤦𞤵 𞤭𞤥𞥆𞤭𞤲𞤢𞥄𞤩𞤫 (𞤨𞤮𞤪𞤼𞤮𞥅𞤩𞤫) 𞤳𞤪𞤭𞤧𞤼𞤭𞤲𞤢𞥄𞤩𞤫 𞤢𞤪𞤵𞤲𞤮𞥅𞤩𞤫 𞤫 𞤯𞤭𞤲 𞤲𞤮𞤳𞥆𞤵𞥅𞤶𞤭 𞤲𞤢𞥄𞤣𞤭𞤩𞤫 𞤳𞤪𞤭𞤧𞤼𞤭𞤲𞤭𞤴𞤢𞥄𞤺𞤢𞤤.
𞤑𞤮 𞤢𞤣𞤭𞥅 𞤳𞤮𞤲 𞤨𞤮𞤪𞤼𞤮𞥅𞤩𞤫 𞤩𞤫𞤲 𞤢𞤪𞤵𞤲𞤮 𞤼𞤢𞤸𞤮 𞤶𞤢𞤲𞤺𞤭 𞤲𞤢𞥄𞤥𞤵𞥅𞤶𞤭 𞤥𞤢𞤩𞥆𞤫 𞤯𞤭𞤲 𞤧𞤭 𞤲𞤢𞥄𞤣𞤭𞤩𞤫 𞤫 𞤲'𞤺𞤮𞤤 𞤤𞤢𞥄𞤱𞤮𞤤. 𞤇𞤫 𞤢𞤪𞤣𞤭 𞤱𞤮𞤲𞤣𞤫𞤥𞤢 𞤢𞤲𞥆𞤢𞤦𞤢𞥄𞤩𞤫 𞤩𞤵𞤪𞤵𞤩𞤫 𞤩𞤫𞤲 𞤳𞤮 𞤢𞤴𞤲𞤮𞥅𞤩𞤫⹁ 𞤬𞤵𞤤𞤩𞤫 𞤩𞤫𞤲 𞤤𞤫 𞤳𞤮 𞤯𞤵𞤲 𞤶𞤮𞤳𞥆𞤭 ⹁ 𞤯𞤵𞤲 𞤸𞤮𞤤𞥆𞤭 𞤫 𞤱𞤭𞤢 𞤥𞤢𞤩𞥆𞤫 𞤳𞤮 𞤱𞤵𞤪𞤼𞤢𞤲𞤫𞥅𞤣𞤫 𞤼𞤵𞤲⹁ 𞤳𞤮 𞤫 𞤤𞤢𞥄𞤱𞤮𞤤 𞤲𞤫𞤤𞤢𞥄𞤩𞤫 𞤶𞤮𞥅𞤥𞤭 𞤩𞤫 𞤱𞤮𞤲𞤭. 𞤇𞤫𞤲 𞤨𞤮𞤪𞤼𞤮𞥅𞤩𞤫 𞤢𞤪𞤵𞤲𞤮𞥅𞤩𞤫 𞤱𞤢𞤲𞤮 𞤳𞤢𞤥𞤫𞤪𞤵𞤲 𞤫 𞤴𞤫𞤪𞤵 𞤶𞤮𞤺𞤮𞤪𞤭 𞤬𞤵𞤤𞤩𞤫 𞤩𞤫 𞤩𞤫 𞤲𞤢𞥄𞤣𞤭 𞤩𞤫𞤲 𞤱𞤢 𞤲𞤫𞥅𞤲𞤫 𞤺𞤮𞥅𞤼𞤮𞥅𞤩𞤫 𞤥𞤢𞤩𞥆𞤫 𞤩𞤫𞤲.
𞤇𞤫𞥅 𞤬𞤵𞤤𞤩𞤫 𞤯𞤮𞥅 𞤳𞤮 𞤳𞤪𞤭𞤧𞤼𞤭𞤲𞤢𞥄𞤩𞤫 𞤳𞤮𞤲𞤮 𞤩𞤫 𞤼𞤫𞤪𞤼𞤢𞥄𞤳𞤭 𞤨𞤵𞤤𞤢𞥄𞤳𞤵 𞤲𞤺𞤵𞤲. 𞤑𞤢𞤲𞤩𞤫 𞤫 𞤶𞤵𞤤𞤩𞤫 𞤩𞤫𞤲 𞤱𞤮𞤲𞤣𞤫 𞤩𞤫 𞤱𞤫𞤤𞤣𞤭⹁ 𞤱𞤮𞤲𞤣𞤫 𞤳𞤢𞤣𞤭 𞤸𞤢𞤪𞤢 𞤩𞤫 𞤬𞤮𞤼𞥆𞤢𞥄 𞤼𞤫𞤲𞤼𞤭𞤲𞤭𞥅 𞤧𞤭 𞤢𞤪𞤭𞥅 𞤺𞤮𞤤𞥆𞤢𞤤 𞤲𞤺𞤢𞤤 𞤩𞤫 𞤳𞤢𞤬𞤭⹁ 𞤥𞤮 𞤦𞤫𞥅 𞤸𞤢𞤩𞥆𞤭𞤼𞤮𞤼𞤮 𞤻𞤢𞥄𞤱𞤭𞤪𞤢𞤴 𞤣𞤭𞥅𞤲𞤢 𞤥𞤵𞤲.
𞤊𞤓𞤂𞤇𞤉 𞤑𞤀𞤃𞤋𞤚𞤋𞥅𞤇𞤉
𞤖𞤢𞤲𞤣𞤫 𞤲𞤮 𞤱𞤮𞥅𞤣𞤭 𞤫 𞤬𞤫𞤣𞥆𞤫 𞤬𞤵𞤤𞤩𞤫 𞤶𞤮𞤳𞥆𞤵𞤩𞤫 𞤤𞤢𞥄𞤱𞤮𞤤 𞤑𞤢𞤥𞤭𞤼. 𞤑𞤢𞤥𞤭𞤼𞤭𞥅𞤩𞤫 𞤩𞤫𞤲 𞤬𞤭𞥅 𞤩𞤫 𞤢𞤲𞤣𞤢𞥄 𞤩𞤫𞤲⹁ 𞤩𞤫𞥅 𞤱𞤮𞤲𞤢𞥄 𞤶𞤵𞤤𞤩𞤫 𞤱𞤮𞤲𞤢𞥄 𞤳𞤪𞤭𞤧𞤼𞤭𞤲𞤢𞥄𞤩𞤫 𞤳𞤮 𞤬𞤫𞤣𞥆𞤫 𞤱𞤮𞤲𞤣𞤫 𞤫 𞤲𞤮𞤣𞥆𞤵𞤣𞤫 𞤲𞤮 𞤩𞤢𞤤𞤫𞥅𞤩𞤫 𞤩𞤫𞤲 𞤬𞤮𞤱 𞤢𞤪𞤼𞤭𞤪𞤢 𞤫 𞤳𞤮 𞤫𞥁𞤭𞤨𞤼𞤵𞤲𞤢𞥄𞤩𞤫 𞤩𞤢𞤤𞤫𞥅𞤩𞤫 𞤢𞤪𞤢𞤲𞤩𞤫 𞤩𞤫𞤲 𞤪𞤫𞤱𞤢𞤴𞤲𞤮𞥅 𞤥𞤢𞥄 𞤱𞤵𞥅𞤪𞤭𞤪𞤲𞤮𞥅 𞤲𞤮𞤲.
𞤉 𞤱𞤭𞤢 𞤳𞤢𞤥𞤭𞤼𞤭𞥅𞤩𞤫 𞤩𞤫𞤲 𞤳𞤮 𞤀𞤬𞤪𞤭𞤳 𞤱𞤮𞤲𞤭 𞤦𞤢𞥄𞤦𞤢 𞤫 𞤲𞤫𞥅𞤲𞤫 𞤣𞤭𞥅𞤲𞤢𞤶𞤭 𞤯𞤭𞤲 𞤬𞤮𞤱 𞤫 𞤺𞤢𞤲𞤣𞤫 𞤯𞤫𞤲 𞤬𞤮𞤱. 𞤏𞤮𞤲𞤣𞤫 𞤨𞤮𞤪𞤼𞤮 𞤫 𞤢𞥄𞤪𞤢𞤦𞤵 𞤱𞤵𞤶𞥆𞤵 𞤺𞤢𞤲𞤣𞤫 𞤯𞤫𞤲⹁ 𞤱𞤢𞤴𞤤𞤭 𞤨𞤭𞥅𞤶𞤭 𞤸𞤫𞥅𞤱𞤵𞤯𞤭⹁ 𞤱𞤢𞤲𞤮 𞤳𞤢𞤤𞤢 𞤳𞤮 𞤴𞤫𞤱𞤼𞤢𞥄 𞤬𞤭𞥅 𞤲'𞤺𞤮𞤪𞤺𞤵 𞤩𞤢𞤤𞤫𞥅𞤶𞤮⹁ 𞤩𞤫 𞤱𞤢𞤼𞥆𞤢 𞤭𞤲𞤣𞤫 𞤨𞤮𞤪𞤼𞤮𞥅𞤶𞤮. 𞤖𞤢𞤪𞤢 𞤤𞤫 𞤩𞤵𞤪𞤵𞤩𞤫 𞤫 𞤸𞤫𞥅𞤱𞤵𞤣𞤫 𞤫 𞤥𞤢𞤩𞥆𞤫 𞤳𞤮 𞤉𞥁𞤭𞤨𞤼𞤵 𞤶𞤢𞤲𞤺𞤭. 𞤏𞤢𞤲𞤮 𞤻𞤢𞤤𞤯𞤭𞤥𞤫𞤪𞥇𞤫 𞤳𞤢𞤥𞤭𞤼𞤭𞥅𞤩𞤫 𞤩𞤫𞤲 𞤲𞤮 𞤴𞤢𞤱𞤼𞤭 𞤣𞤵𞥅𞤩𞤭 𞥖.𞥐𞥐𞥐.𞥐𞥐𞥐.
𞤑𞤢𞤥𞤭𞤼𞤭𞥅𞤩𞤫 𞤩𞤫𞤲 𞤲𞤮 𞤥𞤢𞤪𞤭 𞤲𞤶𞤵𞤩𞥆𞤵𞤣𞤭 𞤱𞤭𞤲𞤣𞤫𞤪𞤫𞤴𞤢𞤲𞤳𞤮𞥅𞤪𞤭⹁ 𞤩𞤫 𞤥𞤢𞤪𞤭 𞤶𞤵𞤤𞤣𞤫𞥅𞤶𞤫⹁ 𞤩𞤫 𞤥𞤢𞤪𞤭 𞤲𞤮 𞤩𞤫 𞤶𞤵𞥅𞤤𞤭𞤪𞤼𞤢... 𞤃𞤢𞥄𞤲𞤣𞤫 𞤤𞤢𞥄𞤱𞤮𞤤 𞤥𞤢𞤩𞥆𞤫 𞤳𞤮 𞤀𞤐𞤑. 𞤇𞤫 𞤬𞤮𞤼𞥆𞤢𞤲𞤭 𞤳𞤮 𞤧𞤢𞤦𞤵 𞤲𞤶𞤢𞤺𞥆𞤵 𞤨𞤮𞤪𞤼𞤮𞥅𞤩𞤫 𞤩𞤫𞤲 𞤫 𞤥𞤢𞤷𞥆𞤢𞤺𞤢𞥄𞤳𞤵 𞤳𞤮 𞤩𞤫 𞤣𞤫𞤱𞤼𞤭 𞤳𞤮𞤲 𞤫 𞤩𞤢𞤤𞤫𞥅𞤩𞤫 𞤩𞤫𞤲 𞤯𞤢𞤲𞥆𞤭𞤲𞤭 𞤺𞤢𞤲𞤣𞤫⹁ 𞤷𞤮𞤧𞤢𞥄𞤲𞤫𞥅𞤶𞤭 𞤫 𞤣𞤭𞥅𞤲𞤢 𞤩𞤢𞤤𞤫𞥅𞤩𞤫 𞤩𞤫𞤲.
𞤊𞤓𞤂𞤇𞤉 𞤖𞤋𞤍𞥆𞤀𞤂𞤀𞥄𞤏𞤋𞥅𞤇𞤉 𞤃𞤀𞥄 𞤑𞤓𞤂𞥆𞤋𞤐𞤑𞤌𞥅𞤇𞤉 (𞤀𞤐𞤋𞤃𞤋𞤅𞤚)
𞤑𞤮 𞤢𞤣𞤭𞥅 𞤢𞤪𞤵𞤺𞤮𞤤 𞤣𞤭𞥅𞤲𞤢 𞤭𞤧𞤤𞤢𞥄𞤥 𞤥𞤢𞥄 𞤳𞤪𞤭𞤧𞤼𞤭𞤲𞤭𞤴𞤢𞥄𞤺𞤢𞤤 𞤬𞤵𞤤𞤩𞤫 𞤩𞤫𞤲 𞤲𞤮 𞤱𞤮𞥅𞤣𞤵𞤲𞤮𞥅 𞤳𞤮 𞤶𞤮𞤳𞥆𞤭⹁ 𞤱𞤢𞤲𞤮 𞤶𞤮𞥅𞤨𞤮𞤪𞤢𞤺𞤮𞤤 𞤳𞤮 𞤶𞤮𞥅𞤥𞤭𞤪𞤢𞥄𞤯𞤮 𞤮𞤲 𞤼𞤢𞤺𞤭 𞤳𞤮𞤲 𞤩𞤢𞤲𞤺𞤭𞤲𞤢 𞤣𞤫𞤱𞤢𞤤 𞤥𞤢𞤩𞥆𞤫 𞤫 𞤥𞤢𞤳𞥆𞤮. 𞤐𞤢𞥄 𞤬𞤭𞥅 𞤩𞤫 𞤪𞤫𞤱𞤢𞤴𞤲𞤮 𞤨𞤭𞥅𞤶𞤭 𞤯𞤭𞤲 𞤳𞤮𞤲 𞤩𞤫 𞤱𞤢𞤯𞤢𞤴𞤲𞤮𞤯𞤭 𞤪𞤫𞤱𞤪𞤵𞤺𞤢𞤤 𞤲𞤮 𞤸𞤫𞤱𞤼𞤭𞤪𞤢 𞤼𞤢𞤺𞤵𞤯𞤮 𞤮𞤲 𞤼𞤭𞤺𞤭. 𞤑𞤮𞤲𞤮 𞤢𞤲𞤺𞤢𞤤 𞤱𞤭𞤯𞤢𞤺𞤮𞤤 𞤬𞤵𞤤𞤩𞤫 𞤩𞤫𞤲⹁ 𞤩𞤫 𞤼𞤮𞥅𞤻𞤭𞤪𞤭𞤩𞤫 𞤪𞥇𞤫𞤱𞤵𞤺𞤮𞤤 𞤳𞤵𞤤𞥆𞤫. 𞤍𞤵𞤲 𞤱𞤮𞤲𞤢𞥄 𞤺𞤮𞥅𞤲𞤺𞤢 𞤧𞤢𞤦𞤵 𞤧𞤭 𞤢 𞤶𞤢𞤲𞤺𞤭𞥅 𞤲𞤮 𞤬𞤵𞤤𞤩𞤫 𞤩𞤫𞤲 𞤬𞤭𞤤𞥆𞤮𞤪𞤭 𞤲𞤮𞤲 𞤬𞤭𞥅 𞤼𞤢𞤺𞤫𞤲𞤳𞤢𞥄𞤳𞤵 (𞤳𞤮𞤧𞤥𞤮𞤺𞤮𞤲𞤭𞥅) 𞤲𞤺𞤵𞤲 𞤢 𞤢𞤲𞤣𞤢𞤴 𞤩𞤫 𞤱𞤮𞥅𞤼𞤭𞤲𞤯𞤭𞤲𞥆𞤵𞤲𞤮𞥅 𞤼𞤢𞤺𞤵𞤯𞤮 𞤮𞤲⹁ 𞤩𞤫 𞤢𞤲𞤣𞤭 𞤳𞤢𞤣𞤭 𞤥𞤮 𞤼𞤢𞤺𞤭 𞤼𞤢𞤺𞤵𞥅𞤶𞤭 𞤯𞤭 𞤮 𞤭𞤥𞥆𞤭𞤲𞤼𞤢.... 𞤖𞤢𞤲𞤣𞤫 𞤩𞤫𞥅 𞤯𞤵𞥅𞤯𞤢 𞤳𞤢 𞤬𞤵𞤤𞤩𞤫 𞤩𞤫𞤲.
◾ 𞤅𞤢𞤦𞤵 𞤱𞤵𞥅𞤪𞤭𞤣𞤵𞤺𞤮𞤤 𞤬𞤵𞤤𞤩𞤫 𞤩𞤫𞤲 𞤫 𞤢𞤲𞥆𞤢𞤢𞥄𞤩𞤫 𞤭𞤱𞤣𞤭 𞤋𞤧𞤪𞤢𞥄𞤭𞥅𞤤𞤢𞥄 𞤲𞤮 𞤫 𞤬𞤭𞤤𞥆𞤢𞤴𞤫𞥅𞤶𞤭 𞤴𞤫𞤱𞤼𞤵𞤯𞤭 𞤬𞤭𞥅 𞤱𞤮𞥅𞤣𞤫𞥅𞤣𞤫 𞤷𞤢𞥄𞤥𞤢𞤼𞤮𞤴 𞤬𞤵𞤤𞤩𞤫 𞤟𞤭𞤣𞤢𞤲𞤳𞤮𞥅𞤩𞤫. 𞤑𞤮𞤲𞤮 𞤲𞤣𞤫 𞤼𞤢𞤱𞤲𞤮𞥅 𞤧𞤫𞥅𞤣𞤫𞥅 𞤱𞤮𞥅𞤣𞤫𞥅𞤣𞤫 𞤥𞤢𞤩𞥆𞤫 𞤸𞤢𞤲𞤣𞤫 𞤱𞤫𞤤𞤢𞥄 𞤸𞤫𞤩𞤮⹁ 𞤯𞤫𞤲 𞤱𞤭𞤢 𞤩𞤫 𞤯𞤵𞥅𞤯𞤢𞥄⹁ 𞤥𞤢𞥄 𞤸𞤢𞤪𞤢 𞤩𞤫 𞤢𞤤𞤢𞥄 𞤬𞤫𞤱. 𞤑𞤮𞤲𞤮 𞤥𞤢𞥄 𞤩𞤫𞤴𞤣𞤫𞤲 𞤱𞤭𞤯𞤢𞤺𞤮𞤤.
𞥟 𞤖𞤌𞤂 𞤑𞤌 𞤇𞤉𞥅 𞤊𞤓𞤂𞤇𞤉 𞤍𞤌𞥅 𞤊𞤌𞤏 𞤑𞤀𞤊𞤋 ؟
𞤊𞤭𞥅 𞤳𞤢𞤤𞤢 𞤳𞤮 𞤶𞤵𞤤𞤩𞤫 𞤩𞤫𞤲 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤫 𞤬𞤵𞤤𞤩𞤫 𞤩𞤫𞤲 𞤯𞤵𞤲 𞤭𞤼𞥆𞤢𞥄𞤤𞤭 𞤩𞤫 𞤱𞤮𞤲𞤢𞥄 𞤯𞤵𞤲 𞤩𞤫𞤲 𞤤𞤫𞤻𞤮𞤤 𞤲𞤺𞤮𞤤⹁ 𞤯𞤵𞤲 𞤸𞤮𞤤𞥆𞤭 𞤧𞤫𞤪𞤼𞤵𞤺𞤢𞤤 𞤸𞤢𞤳𞥆𞤵𞤲𞤣𞤫 𞤤𞤫𞤻𞤮𞤤 𞤫 𞤣𞤭𞥅𞤲𞤢. 𞤇𞤫𞥅 𞤬𞤮𞤱 𞤲𞤮𞤲 𞤫 𞤧𞤫𞤪𞤼𞤵𞤺𞤮𞤤 𞤥𞤵𞤲 𞤳𞤢 𞤣𞤭𞥅𞤲𞤢 𞤲𞤮 𞤱𞤮𞥅𞤣𞤭 𞤳𞤮 𞤩𞤫 𞤳𞤢𞤬𞤭. 𞥟 𞤍𞤵𞤲 𞤳𞤮 𞤸𞤮𞤲𞤯𞤵𞤲 ؟ 𞤳𞤮 𞤆𞤓𞤂𞤀𞥄𞤑𞤓.
𞤆𞤵𞤤𞥆𞤮 𞤲𞤮 𞤮 𞤱𞤢𞤭 𞤱𞤮𞥅⹁ 𞤳𞤢 𞤮 𞤭𞤱𞤪𞤭 𞤱𞤮𞥅⹁ 𞤳𞤮 𞤮 𞤶𞤮𞤳𞥆𞤭 𞤱𞤮𞥅 𞤳𞤮 𞤳𞤢 𞤧𞤵𞥅𞤣𞤵 𞤨𞤵𞤤𞤢𞥄𞤳𞤵 𞤩𞤫 𞤬𞤮𞤱 𞤩𞤫 𞤪𞤵𞤼𞥆𞤮𞤼𞤮𞥅. 𞤑𞤢 𞤧𞤵𞥅𞤣𞤵 𞤦𞤢𞥄𞤦𞤢. 𞤍𞤫𞤲 𞤺𞤢𞤴𞤲𞤭𞤼𞤮𞤪𞤢 𞤢𞤲𞤣𞤭𞤲𞤼𞤭𞤲𞤵𞤺𞤮𞤤 𞤧𞤭 𞤴𞤭𞤥𞤩𞤫 𞤯𞤵𞥅𞤯𞤭𞥅 𞤩𞤫 𞤯𞤵𞥅𞤯𞤢𞤴 𞤲𞤮𞥅𞤲𞤫𞥅.
𞤅𞤢𞥄𞤪𞤢 𞤁𞤫𞤦𞤫𞤲 ✍️
#
