Blueink Publishing

10/03/2025

Teleha #27

Ha rakhali a fihla mane ntlong eo esaleng ba koalla Michi teng, a hla a rohakana a sa le kantle ha a bona lemati le sohlamane ho se ho koetse ka lesenke.

"Ho etsahala eng moo, Mofiti?" a botsa e mong oa linokoane tseo tse neng li setse li katile Michi h**e a se ke a baleha joaloka Liopelo.

Ba ne ba mo tseba h**e ha a halefile o tlapunya rosoroso. Ba hla ba chechella morao. A ba sheba hape. A re, "Ke re na lemati la ka le robiloe ke eng? Mabota aka ha a fihla moo a tlo reng ha a bona mosoahla oo o le koetseng ka ona? Hona e kae chelete ea matsitsi aa ao esaleng ke e-ba siko moo?"

Ba halikisa mahlo batho. Ba ne ba e-s'o mo bolelle h**e Liopelo o thobile. Ba ne ba entse meraela h**e bohle bao e leng mabota a bona ha a ka bona Liopelo a tle a ba bolelle joale ke mona rakhali o se a le teng eo Liopelo a ntse a sa bonahale le seporo.

Mofiti a ingoaea sefahlehong. Ho tsoa ntho e kang phoofo kaha a ne a tsoile ntho e kang lekhoekhoe e bileng e foforehang ha e ngoauoa.

Rakhali a mo re pha! ka mpama. Mofiti a tsilatsila ha a tlameha ho baleha kaha a tseba h**e e tla ba o sentse mosebetsi.

A omana hape, "Ke re na le e kae chelete?" A leba ka phaposing eo ho sebeletsoang ka teng. Mofiti a mo eta kapele. A re, "Limamzo, se ka kena ba ntse ba hlapa."

Rakhali a mo sheba a hla a bona h**e taba e teng. A re, "Sutha mona ke batla ho bona bana bana ba khaitselo eaka."

Mofiti a hana ho sutha. Rakhali a mo thula feela. Mofiti a thekesela eaba rakhali a kena. A fumana e le Michi feela. A hla a tseba h**e e sa tla ke ebe Liopelo o nyametse. A be a se a letsetsa lepolesa leo a le patalang h**e le thole ha a etsa mesebetsi ena e soto. Eo a hlalosa ha ho so be le motho ea fihlileng sepoleseng a tlil'o tlaleha h**e o ne a hoebisoa ka ’mele.

Ache a utloa a sehoa ke mala rakhali. A lula betheng moo a ipotsa na ebe Liopelo o kae hona na ebe o ntse a sa nye matsete ho mapolesa ao rakhali a sa a feng tjotjo.

10/01/2025

Teleha #26

Ke mathile ebile ke potile ka nqa eane ea Ha-Ramokhele hoba ntlo eno eo re ne re koeteletsoe teng e mono Motse-mocha ona oa ha motho a ea Thabana-Morena. Ke ne ke ntse ke hetla ke qoaea batho hoba kea tseba rakhali le banna bano ba likoeta ba ke ke ba ntlohella feela. Joale kaha ntlokholo ea sepolesa koano Mafeteng e-ea tena e hole koaa pel'a selikoa-likoa sa makoloi, ke ne ke batla ke hlaee mane moo e ne e le chankaneng ebe ke se ke lelemella ho ea kena sepoleseng. Leha ka tseleng ena ea makoloi ea Ha-Ramokhele ho se sephethephethe empa likoloi tsa maphele tsona li ne li le ’maloa. Li ne li nsitisa ho matha hantle hoba baqhobi ba tsona ha ba shebe moo ba tsamaeang.

Ke ile ka li feta ke tsamaea kapele, li letsa lihutara ba mpotsa na ke ea palama. Ka utloa ke se ke arabile e mong ntho esele. Athe o tla paka hona ka tseleng. Moleko oo o tla ho ’na. Ka matha empa oa nqhautsa.

"He uena ngoan'a Ha-Ramokhele, le tloaetse h**e motho ha a le botsa potso e bonolo ebe le araba serao. Ke tlo u tlapentla h**e u soabe. Ke tlo etsa mohlala la uena." Ha a ntse a rialo o nshobile la liaparo, o ntse a ntsukutla ekare ke tla tleloa ke molikoalikoane hoba ke ntse ke lapile ebile le lithethefatsi tsane tseo banna bane ba likoeta ba nkentileng ka tsona li ntse li so tsoe hantle ’meleng oa ka.

Ka lla ha ke bona h**e o feela a batla ho nterapa. Ka re, "Ha ke motho oa Ha-Ramokhele hle, abuti. Ke kopa u ntlohele ke tsietsing. Bophelo ba ausi oa ka bo kotsing a ka ’na a bolaoa. Ke ea sepoleseng," ke se ke ntse ke rapela.

A nyehlisa matsoho a hae molaleng oa ka. A ncheba hantle. A re, "Ke ea u tseba. Ke u tsebella mane maheising."

Ka utloa a mpuela ntho tseo ke sa li tsebeng, ka tsamaea. Empa a tla kamor'aka. A re, "U kuena. Nkile ka u reka. Feela u ne u se ntho esele joaloka Michi. Ngoan'eo oa motho eo banna! Ntho ke re e batlile e nhlalisa mosali. Ke ne ke se ke mo reka boisu bo b**g le bo b**g." A sheba mokhupi oa baqhobi o ne o re shebile. A re, "Kuena eane ke eena. Lea e tlohella, bo-ntate? Ha re e potetseng ka lifateng."

Ha a rialo ka re kea matha empa ba nseohela kaofela. Ka bona ke lieha ho kena ’mileng oane o eang Mohale's Hoek h**e ke itahlele ka teng ke fihle ka nqa eane eo e leng sepoleseng.

Ka tloseletsa empa ka khoptjoa ka shapana koana. Eane a le kapele a nqhautsa. A njara. Eaba ha ke sa tseba. Ke bone ba se ba nakhotsa sebakeng, eka ke bolo ea likatana. Meleko eo! Leha ke lla ba se ke ba nkhauhela. Ho feta moo ba nkenya ka boting ea lephele hoba ba ne ba tla ho ea imenyenya ka ’na ka morung.

09/26/2025

Teleha #25

Ha re se re itela tlala, ke ha banna bana ba shebana eba ho ba ho tsoa a le mong. Ka ’na ka sheba na nka tsoa joang mona feela enoa o ne a tiisitse lifahleho ho bonahala ha a je mosha.

"Joale u pataloa bokae?" ka botsa ke re ke etse moqoqo.

A ncheba feela. Ausi a ntonela mahlo h**e ke thole re se ke ra tloha re khakhathoa.

Ka re, "Ene u apere bokate e ntle."

Monna enoa a ncheba ntho esele. Ka se ke ka nyahama. Ka bua hape, "Joale uena ha u ke u rate ho roba monakeli le rona?"

Ka bona a bonya. Ka cho ka re ke mo fumane.

Ka phethoha betheng mona ka sheba ka ho ho eena. Ka bona a ea monyako. Ausi a nrobela leihlo. Ka mo supisa h**e re tlameha ho baleha mona le eena a tsebe ho ea bona ngaka. Leqeba lena la hae le ntse le petla ha le emise ho tsoa mali. Joale ha ho masela a mang ao re ka tlamisang leqeba leo ka lona. Le ntse le sa hlatsuoe ke h**e ke sono ka eena. O se a itiisitse feela hoba a le moholo.

Monna enoa a notlela ka thata monyako. Ha a qeta a tla a hona betheng mona. Ke ne ke sa tsotelle letho ke batla ho pholoha. Ha a hloella, ausi a hula linotlolo. Ka nyaroha hoba ke nahana h**e o utloile. Ausi a nsupisa h**e ke hle ke mo phopholetse h**e a nolofale.

Ka tsoela pele ke se ke tatasela h**e leano la rona le sebetse. Ausi a nsupisa h**e o se a li nkile kaofela. Joale bothata ea e-ba h**e o tla ea joang monyako.

"Nhloelle, babe," o rialo eena monna enoa. Ka etsa joalo ke phothasela.

Ausi a nanya ho ea monyako. A bula. Ka bona enoa a ntse a ile le khongoana holimo a sa bone h**e ausi o se a butse. Ausi a thetha seohlola.

Ha ke mo sheba le monna enoa a mo sheba. Eaba o se a mpetsetsa koana a ema a tatile leba monyako.

Ka nka setulo sa benche ka mo hetlemola a sa shebile ausi. A thekesela. Ka tsoa empa a hula ausi a mo kenya kahare ha ’na ke chopotse.

09/24/2025

Teleha #24

Ha ke phaphama, ke ipone ke se ke le betheng, ke hlobolisitsoe ebile ho bonahala h**e ho na le seo ke se entsoeng. Ke ile ka leka ho theoha bethe. Empa ka utloa ’mele oa ka o hana, ho le bohloko hohle.

Ka iqamaka, ka bona h**e sephakeng mona ke maqeba-qeba ekare ke ne ke ntse ke entoa hangata feela. E le h**e e sa le ke fihla mona ba nkemeletse ka liente. Ke ne ke nkha habohloko ho paka h**e ebile matsatsi-tsatsi ke le mona ke sa hlapisoe ebile ke sa je. Ke ha mala aka a lla.

Ka sheba ka tlung ka mona, ka bona e le phapusi eo ke sa e tsebeng. E le bethe le ho kang mabone a laetileng a shakhalitse. Ntle le moo ho ne ho le liipone hohle maboteng, ke ipona hohle moo ke shebang teng. Ka utloa ke seoa ke letsoalo joale. Bothata ke sitoa le ho ema h**e ke balehe kaha ke se ke hlaphohetsoe. Ho ea hlaka h**e h**e ba nhoebise ka ’mele ba hloka ha ke tarakane hlooho.

Moo ke ntseng ke loha leano la ho tsoa mona liheleng, lemati le ile la buleha. Hoa kena monna a qhoba ausi.

"Ausi!" ka rialo ke maketse.

Monna e mong a kena a tatile, a fihla a nhoahlatsa ka mpama. Hoa re ke khorohe feela ka sitoa hoba ke se na matla.

Ha ke sheba ausi ka bona a tlamisitsoe hlooho ena ka lesela la maqeba ebile le mo koetse le le phatla h**e le koale tsebe eane ea hae. Ehlile e ne e khaotsoe!

"Liopelo, u batla eng moo?" a mpotsa. Le eena a hoahlatsoa ka mpama. Ka utloa ke thonkheha. Feela ho se seo nka se etsang.

09/19/2025

Teleha #23

A ema rakhali, a tla ho ’na ke bona eka o tlo mbabola ka mpama, ka checha. A ema a nsupa ka monoana. "Hlapa re tsamaee." A bula mokotla oa hae oo a fihlileng ka ona. A honyolla mese ena e kang eo ausi a e aparang le meriri ea makhooa. A re, "Khoesa liaparo tsena. Ke na le lebota la ka."

Ka emella thokoana ka re, "Rakhali, u tlo nketsa koena le ’na? Ha u ua khotsofala ke ho sotla ausi? Hona o kae?"

"Ha ke tsebe na o kae ke ka hona ke reng uena u ee u koale sebaka sa hae."

"Kea mapoleseng," ka rialo ke mathela monyako. Athe rakhali o se a nqhaolitse, a nsuthumeletsa leboteng. Ka fihla ka le thula ka hlooho. Ka utloa eka ho lla manyenenyene ka hloohong eaka ka mona. Ebile ke se ke tsekela eka ha ke sa nka hantle tjena.

Ke sa leka ho sisinya hlooho h**e ke tle ke leke ho baleha, mohala oa rakhali oa lla. A o araba. "O kae? Le mo rutile motloang oa p**a? Michi ke satane eaka basali. Eseng he le khaole e ’ngoe tsebe a tle a hlaphoheloe. Ha ke utloe na a ka tla utsoetsa 'client' chelete ebe o nahana h**e o tla phonyoha liatleng tsa ka! Lekhale! Ke mo kenya mejo hanong eena o tlo nteboha ka khahlakhahla ea mantle!"

Ke ne ke se ke hlaphohetsoe, ke maketse na ’m'e enoa ke motho oa mofuta ofe. Eare re le bana ba abuti'ae ebe o tlo re fetola likoena!

Ha qeta ho bua a ncheba. "Ha re ee uena. Koloi e teng kantle ka mona haeba u nahana ho ntlala matsoho. U tlameha ho sebetsa mahala h**e u patale molato oa ausi'ao."

Ra leba monyako ke nahanne h**e ke tla tlatsa lerata kantle ka mane batho ba malaeneng ba tle ba nthusetse. Ke utloa ke sehoa ke letsoalo. Ekare ’m'e enoa o kotsi.

Ha re tsoa feela ka utloa matsoho a nkapa, ka re ke tla ithotlolla, eaba le leng le nkoetse molomo. Ka bona selopo se se se nkoahela sefahleho eba ho ba lefifi. Nengneng ka utloa ente e kena sephakeng mona eaba ke phetho. Ha ke sa tseba ho etsahetse eng.

09/19/2025

This book presents the students with the widest range of topics which, by and large will expose them to the everyday vagaries that characterize and/or typifies real estate. Real Estate-it could be the most profitable investment you ever make. Unlike stocks and bonds, there is only so much of it to go around.

Here is 👇

Https://www.amazon.com/dp/B0DYV77X9S

This book presents the students with the widest range of topics which, by and large will expose them to the everyday vagaries that characterize and/or typifies real estate. Real Estate-it could be the most profitable investment you ever make. Unlike stocks and bonds, there is only so much of it t...

09/17/2025

Teleha #22

Ke ile ka leba monyako ha rakhali a nka ’mopo a khotla tsebe eno ka bona e thothomela ebile e phetha ka bona h**e e ntse e roetse lesale. Ene lesale lena kea le tseba ke la ausi.

"Jo!" ke se ke hoelehelitse ke lla hoba joale kea ipotsa na ha e le moo tsebe ea hae e le ee eena a le re sa tsebe moo a leng hona teng na ebe o sa phela.

"Thola, ngoan'aka, thola. Le ’na kea thothomela ke letsoalo empa ha re se ke ra iketsa bahetene, ra fela pelo re e-s'o be le bonnete ba h**e efela e le tsebe Michi ena."

Ka iphumola likeleli, ka re, "Le uena ua le tseba lebitso leo?"

Rakhali a inama. A re, "U se ke be ua bolella mang kapa mang taba eo ke tlo u bolella eona. Ebile koala monyako."

Ka utloa ke tleloa le letsoalo feela ka koala ka ba ka tlo lula pel'a rakhali.

A beha letsoho la hae lehetleng la ka. A inama ka hla ka bona ha a sesefatsa mahlo h**e taba e teng mona. Rakhali kea mo tseba o ne a tlamehile h**e ebe o halefile hampe hona joale e seng ebe o theotse maikutlo tjena.

"Ausi'ao o kentsoe ke ’na lenakeng."

Ka raoha. Ka utloa eka nka betsa rakhali ka mpama. Kea kholoa o ile a mpala hoba ke bone a se a eme ka maoto, a se a perekeletse le lebota. A re, "U tlo thola tu! Hona ke lekunutu. Liopelo, bophelo bo thata. Ke qalile ke sebetsa likichini le ’na feela chelete ea teng e ne e sa lekane mabaka aka. ka qetella ke re ke batle motho ke koale palo. Athe palo ha e tlo koaleha, ke iphumana ke se ke itse tloara! kahar'a mosebetsi oa ho rekisa ’mele. Ha ke thabele taba ena ho hang feela ntlo eo eo le lulang ho eona moo hae, kea chelete tsa mosebetsi ono oa ka. Ke ne ke sebeletsa hae. Ke khathetse ke le holisitse. Abuti ha a e-s'o sebeletse le ka mohla hoba ke ne ke le monna oa ha hae mono."

"Rakhali!" ka ne ke se na mantsoe ke sa tsebe ke reng ha ho le tjena. ’M'e enoa ke tseba e le nese koana sepetlele Bolonfanteng. Ebile le linepe tsa hae a apere junufomo ea manese li manehiloe heso leboteng!

09/17/2025

It lies in wait for them.
Grab my first here

https://www.amazon.com/dp/B0BNN111XJ

When police officer Peter Moloi picks a fight with a deranged serial killer, civillians suffer a terrible fate. Instead of money, the police count dead bodies.

09/07/2025

Teleha #21

Ke koetse mohala ka pelo e bohloko ka utloa re le bana ba sa tsotelleng. Bao batsoali ba sa ikotleng sefuba ka bona. Ke h**e re fetoa ke baahisane ba rona bao bana ba bona ba ba sebeletsang. Chehe hle!

Feela h**e ebe re mona hase h**e rea iketsa. Le rona re lekile kahohle ho leka bophelo empa ba re tontontša ho fihlela ausi a fetoha koena. Che ’na ka itšebeletsa makichining moo le teng ho ileng hoa e-ba bosula. Joale ntho e bohloko ke ho se bolelle batsoali ’nete. Ra bua leshano la h**e re pasitse sekolong. Ke ne ke leke ho etsa thuto ka ngollano feela hlooho ea hana hoba kelello e se e imetsoe ke bothata ba bophelo.

"Liopelo! Hae uena!" Ke se ke nyaroha ha ke utloa lentsoe monyako oa lelaene. Ka iphumola likeleli ka hetla.

E ne e le rakhali oa ka ea lulang Litšoeneng hona hae koana.

"Ke eng ha ntlo e le lehaha tje, ngoan'a khaitseli eaka?" o se a kene a qamaka.

Ke sitoa le ho bua. Ka lla hape. A tla a mpha 'hug'. Ka buela sefubeng sa hae. "Ho manekeneke, rakhali. Ke fumana ho le tjena ho thoe batho bao ausi a ba nketseng banna ke bona ba nkileng thepa joale ausi o nyametse ke sitoa le ho ea sepoleseng."

"Jehofa! E le h**e joale o kopana kae le banna feela a sebetsa bankeng?"

Ka tona mahlo kaha nke ke ka bua ’nete. Ka re, "Ere ke u etsetse lijo." Ka leba moo e ne e le mohaoloaneng, ka kupolla lipitsa. Ka tlohela sekoahelo ha ke tlotlela holimo. Ka pitseng e ne e le tsebe ea motho, e lutse holim'a papa.

09/05/2025

Teleha #20

Ke ile ka kena ka tlung, ka hla ka bona ntlo e le lehaha. Chehe! Ka nako eo ke ne ke beile chelete eaka tlas'a materase a bethe. Ke h**e ba e nkeletse le eona. Hoja ke ne ke tseba moo ke tla ba batlela teng.

Ke ile ka ntša mohala ka letsetsa hae. Mohlomong ausi o balehetse teng.

"Jo Liopelo ngoan'aka!" ’m'e a rialo hang feela ha a araba mohala. "Le ipata h**e uena le ausi'ao. Kapa le se le rutehile joale le bona re se na thuso le se le re hlokela nako?"

"Che ’m'e. Ha ho joalo," ke se ke tšaba ho bua litaba.

"Ho joang sekolong moo u sebetsang. Ho thoe le ruta marabele, ke utloile ho buuoa lioaeleseng mona ho thoe bana ba otla matichere. Ngoan'aka, u be seli mosali. Be, ka batla ke lebala, o se a fumane nyollelo ea moputso moo bankeng, ausi'ao?"

Jo! Ka utloa ke sa tsebe ke tla reng.

A phetha hape, "Ke hloka le tle mona ke tlo etsa mokete oa likapeso. Esale le nka mangolo. Batho ha ba kholoe h**e le rutehile. Hape ha le sebeletse hae. Re sotlehile le ntat'a lona feela re le rutile ka lichelete tsa ho qetela."

Likhapha tsa tšoloha marameng aka. Mona o bua ’nete, ha re romele, ha re tle hae. Ka baka la ho tšaba batho ba tsebang re sebetsa mesebetsi e hantle feela e le leshano. Ke h**e re batho feela tjena hoba re ntse re phefumoloha.

Ebe re tlo tsoa joang ha ho le tje?

09/03/2025

Teleha #19

Ke ile mosebetsing feela ntse ke otsela hoba ke sa ka bo hlotha. Ka tinare keha ke ikopa h**e ke chaise kapele ka le reng kea kula. Mong'aka a se ke e-ba le khang. Ke ile malaeneng ha ausi moo esale ke sala teng. Ka hla ka makala na likharetene li kae. Ka atamela monyako. Ka bona h**e ho koetse ka senotlolo se mona se bitsoang mpone-ke-ile. Ebe molato? Joale ha ke na le nomoro ea mong'a setentše h**e nka botsa na ho etsahala eng.
Ka utloa ke se na matla ka lula fatše

Lemati la boahisaneng la buleha. Kaha batho ba mona ha kea ba tloaela ka se botse.

"Haebo, uena ausi'ao o tla bolaoa ke batho," a rialo mosali enoa.

"Ka eng?" Ke botsa ebile ke eme ka maoto.

"Ho fihlile basali ba bane ba re ba tlo nka thepa eo ba tsebang banna ba bona ba e reketse eo ausi'ao. Joale ke sitiloe ha ka le joetsa. Ausi'ao o sele hampe. O ne a re o tla nka monna oaka ha ke mo khalemella bootsoa."

Jehofa! Ka botsa ke tenehile. "U tseba moo nka ba fumanang teng? Ba tlameha ba nkeletse le chelete eaka."

"Che. Ha ke ba tsebe. Ke h**e u ee mapoleseng. Haeba le teng u tla thusoa. Ausi'ao o ne a a roahake hampe."

Jo! Ka sala ke maketse joale.

09/02/2025

Teleha #18

Re fihlile mono Ha-Ramokhele. Keha e le mane ngakeng eo ausi a kile a nkisa teng. Ke sa makala. Ngoanana enoa eena a hana ho kena le rona, a re o kolota ngaka eo. Re ile ra theoha le Thapelo, ra ea monyako. Ha re kena feela, ra hahlameloa ke monko oa meriana. Ra qhoeloa feela ra iteta sefuba.

"Le batla eng moo?" ho botsa lentsoe le letenya le kharuma ka lefifi lena le ka serutheng se ka ’na sa re oela holimo.

Ka bua, "Ke tlo botsa na ausi o kae. Ke ’na Liopelo."

Ngaka eena ea khantša kerese. Ra bona h**e ka mona ekare ka hokong ea likolobe. Ho ne ho le bohlasoa ebile eka ho na le ntho tse lomang. Athe fatše mona ho ne ho peperane ke ipotsa na monna eo ha a re batho ba mo lilele ke eng.

"Ha a eo ausi'ao mona," a rialo monna eo. "Ene ha u mo fumana u hle u mo fe molaetsa oa h**e a tsebe ke tlil'o mo bolaea. Ha ke etsoe thelelisane. A ke ke a nkolota chelete e ngata hakaana ebe o nyamela feela."

Ra shebana le Thapelo. Ka botsa, "Joale o folile ha ke utloile h**e o-oa kula?"

Monna enoa a re rao! "Tsoang pele ke le fetola litonki!"

Ka re ke sa ema a theole bohale empa Thapelo a nkhulela ntle. Ka tsoa maoto a le boima. Joale ha le moo a le sioa ke ne ke sa tsebe na ke etse eng. Kapa ke letsetse hae? Feela ha ke tlil'o bolaea batsoali ka pelo! Empa joale le teng nke ke ka thola matsatsi-tsatsi ausi a nyametse.

"O ee a ee kae ha a le siko moo?" Thapelo a mpotsa.

"Ha ke tsebe kannete. Hantle motho eno o taba li ngata hampe hoba o phelela leshano hape. Ke h**e ha ke sa tseba ’na. E se ebile e le kameso ha ke e-s'o robale ka nako eo kea theohela ka hora ea botšelela!"