08/12/2025
"Frè m ak sè m yo, map lage kè m la paske mwen bouke…
Mwen se yon fanm ki travay di, mwen pa mande pyès moun yon goud pou viv. Men depi 3 lane mwen ap viv ak gran sè m nan menm kay, se tankou m ap viv ak yon lènmi. Li pa travay, men li konn tout sa ki antre ak sa ki soti nan lavi m. Chak fwa mwen achte yon bagay pou tèt mwen, li di se gaspiye m ap gaspiye kòb.
Si yon zanmi pase vin pran mwen, li ap gade nan fenèt, li pran foto machin nan, li voye nan group fanmi kòm si m ap fè bagay kache. Lè mwen pran ti plezi m, li fache, li boude, li pa pale avè m pandan semèn. Li menm rive di manman nou li pè pou m "fè wont fanmi an". Men lè se li menm k ap soti, k ap retounen 11h lannuit, pèsonn pa ka di anyen.
Kisa ki pi fè m mal? Li konn leve vwa li sou mwen, li jwe viktim nan je lòt moun, e yo tout kwè li paske li gen lang dous. E mwen menm, yo fè m pase pou fi ki gen move konpòtman…
Frè m ak sè m yo, si se te nou nan plas mwen, èske nou t ap kontinye viv ak li pou lapè fanmi an, oswa nou t ap kite kay la pou sove tèt nou? Paske m santi, swa m kite, swa m pral pèdi tèt mwen!"
