11/07/2025
"ကင်တက်ကီပြည်နယ် UPS ကုန်တင်လေယာဥ်ပျက်ကျမှု သေဆုံးသူ ၁၂ ဦးအထိ တိုးလာ” (ဖတ်) - နွေဦးမွန်
အင်္ဂါနေ့ညနေက ကင်တပ်ကီပြည်နယ်၊ လူးဝစ်ဗီးလ် Louisville မြို့လေဆိပ် အတက်မှာ ပျက်ကျခဲ့တဲ့ UPS ကုန်တင်လေယာဉ် ပျက်ကျမှုမှာ သေဆုံးသူ အနည်းဆုံး ၁၂ ဦးအထိ တိုးလာပြီး ဒါဇင်ကျော် ဒဏ်ရာရရှိခဲ့ပါတယ်။
လေကြောင်းကျွမ်းကျင်သူတွေကတော့ လေယာဉ်ပျံတက်ချိန် အင်ဂျင်တစ်လုံး ချို့ယွင်းပြီး နောက်တစ်လုံးလည်း ထိခိုက်ပျက်စီးခဲ့ရတယ်လို့ ယုံကြည်ကြပါတယ်။
လေယာဉ်ပျက်ကျရခြင်းအကြောင်းရင်းကိုတော့ ရှင်းရှင်းလင်းလင်း မသိရသေးပါဘူး။ ရုပ်သံမှတ်တမ်းတွေမှာတော့ လေယာဉ်ပျံတက်ဖို့ ကြိုးစားနေစဉ်မှာပဲ လေယာဉ်ဘယ်ဘက်အတောင်ပံတစ်ဖက် မီးလောင်နေတာကို မြင်ရပါတယ်။ အဲဒီမီးကနေ လေယာဉ်တစင်းလုံးကို ပျံ့နှံ့ပြီး ပေါက်ကွဲခဲ့တာ ဖြစ်နိုင်သလို၊ လေယာဉ်နဲ့ မြေပြင်ပေါ်က တခုခုနဲ့ တိုက်မိပြီး မီးလောင်ခဲ့တာလည်း ဖြစ်နိုင်ပါတယ်။
ဒီလေယာဥ်ပျက်ကျမှုကို စုံစမ်းစစ်ဆေးနေတဲ့ အမေရိကန်သယ်ယူပို့ဆောင်ရေးဘေးကင်းရေးဘုတ်အဖွဲ့ (NTSB) ကတော့ လေဆိပ်က CCTV မှတ်တမ်းတွေကို ရယူနိုင်ခဲ့ပြီး အဲဒီမှတ်တမ်းတွေမှာ လေယာဉ်ပျံတက်နေစဉ် ဘယ်ဘက်အင်ဂျင်က အတောင်ပံကနေ ပြုတ်ကျသွားတာကို တွေ့ရတယ်လို့ ဆိုပါတယ်။
NTSB အရာရှိ တော့ အင်မန်း Todd Inman ကတော့ လေယာဉ်မှူးအသံဖမ်းစက်နဲ့ လေယာဥ် ပျံသန်းမှုမှတ်တမ်းတင်စက် (Black Box) တို့ကိုလည်း အပျက်အစီးတွေကြားကနေ ပြန်လည်ရှာဖွေတွေ့ရှိခဲ့ပြီလို့ ပြောပါတယ်။
ထင်ရှားမှုတစ်ခုကတော့ ဒီ MD-11 ဂျက်လေယာဉ်ပေါ်မှာ လေယာဥ်ဆီဂါလံ ၃၈,၀၀၀ (လီတာ ၁၄၄,၀၀၀) ဖြည့်ထားပြီး ပေါက်ကွဲမီးလောင်မှု ပိုမိုပြင်းထန်ခဲ့ပါတယ်။ မီးတောက်တွေဟာ လေယာဉ်ပြေးလမ်းအပြင်ဘက်က အဆောက်အအုံတွေကိုပါ အလျင်အမြန်ကူးစက်သွားပြီး နာရီပေါင်းများစွာကြာအောင် လောင်ကျွမ်းနေခဲ့တာပါ။
ဒီ လူးဝစ်ဗီးလ် မိုဟာမက်အလီ နိုင်ငံတကာလေဆိပ်ဟာ UPS အမြန်ချောပို့လုပ်ငန်းရဲ့ ကုန်ပစ္စည်းဖြန့်ဖြူးရေးဗဟိုဌာနအဖြစ် အသုံးပြုပါတယ်။ အခုပျက်ကျခဲ့တဲ့ လေယာဥ်ခရီးစဉ်အမှတ် ၂၉၇၆ ဟာလည်း ဟာဝိုင်အီပြည်နယ် ဟိုနိုလူလူမြို့ကို မိုင်ပေါင်း ၄,၃၀၀ ခရီးစဥ်ကို ပျံသန်းဖို့ ဖြစ်ပါတယ်။
ဒေသစံတော်ချိန် ညနေ ၅ နာရီ ၁၅ မိနစ်လောက်မှာ လေယာဉ်ပြေးလမ်းကနေ အရှိန်စယူခဲ့ပြီး လေယာဥ်အရှိန်နှုန်း တစ်နာရီကို ၂၁၄ မိုင်အထိ ရောက်ရှိခဲ့တာကို Flight Rader 24 ဝက်ဆိုက်ဒ်မှာ ဖော်ပြပါတယ်။
ကုန်တင်လေယာဥ်ဟာ အမြင့်ပေ ၁၇၅ ပေအထိ တက်နိုင်ခဲ့ပြီး လေယာဉ်ကွင်း ခြံစည်းရိုးအကျော် လေဆိပ်အပြင်ဘက်က အဆောက်အအုံနဲ့ ခြံဝန်းတွေပေါ်ကို ပျက်ကြခဲ့တာလို့ လေယာဥ်ဘေးကင်းလုံခြုံရေးဘုတ်အဖွဲက ဆိုပါတယ်။
ကိုနိုင်(မိုးမခ)နဲ့ Radio NUG အဖွဲ့သားများတင်ဆက်ပါသည်
