10/18/2024
Ou pase
Men zèv ou rete
Takou flè sou lantiraj de bò chimen
Ki mennen lavyè kat chimn
Ou pase
Men vwa w rete nan wout la
Se tankou 1804 se te yè
Tankou bri jwè bank domino ki te devan lakay la
Se tankou bri gadyè pi wo nan kafou a
Ki kòk kap pran kou?
Kilès k ap deplumen?
Pa gen lank ase pou ekri listwa.
Ou pase vre papa?
Di m ki kote ou te mete flanbo a
Wi sila ou te di w ap lage nan chanm poudriyè
Nan tou fènwa fò lakrèt apyewo
Di m ki kote ou te jete bwa a
M a relimen l ankò,
Mwen gen alimèt kounye a.
Ou pase vit papa.
Men siyati a rete nan san nou
Li pa ale, li pa vle ale,
Ou pase, depi lè a tan an ap trepase
Ki kote ou te kite kouwòn nan
E Chapo a kilès ki te prete l?
Nou pa bezwen testaman poun reklame l.
Di m, kiyès ou te bay dwa pou separe tè
Nan lakou pa bò isit
Ou pase tankou yon fèy twonpèt
Van pote jete lòtbò nan koulin
Kou yon Kout zèklè mwa dawout
Ki kote w tonbe
Ki pyebwa ki boule
O, gade mezami!
Se Jaden an ki fè sann
Ou pase, Kou vant pase nan listwa
Tout lari a sal, pèsòn paka kenbe kanson
Devan kalte nouvèl vèvenn sa
Nou kriye tout nan zòtèy
Ou pase
Hmm ou pase
Tout rèv ti nèg ki te chifonnen
Ou pase hmmm, ou pase vre,
Ou pase
Fabien L.F
