11/23/2025
ប្តីចាក់សម្លាប់ប្រពន្ធ រួចគេចខ្លួនបាត់បាត់ តែប៉ូលិសចំណាយពេលជាង៣ម៉ោងឃាត់ខ្លួនវិញបានដើម្បីចាត់ការតាមច្បាប់
ព្រះសីហនុ៖ កម្លាំងនគរបាលខេត្តព្រះសីហនុបានទទួលព័ត៌មានអំពីករណី “ឃាតកម្ម” ដ៏រន្ធត់មួយ បុរសម្នាក់ ប្រើកាំបិតចុងស្រួចចាក់ទៅលើប្រពន្ធរបស់ខ្លួន បណ្ដាលឲ្យស្លាប់ភ្លាមៗ នៅម្តុំផ្ទះពស់ចាស់ ក្នុងភូមិ៣ សង្កាត់៣ ក្រុង-ខេត្តព្រះសីហនុ រួចរត់គេចខ្លួនចេញពីទីតាំងកើតហេតុបាត់ស្រមោល ដែលបានកើតឡើងនៅវេលាម៉ោង ២០និង០០នាទី នាថ្ងៃទី២២ ខែវិច្ឆិកា ឆ្នាំ២០២៥
ក្រោមការណែនាំ និងអនុសាសន៍ពីថ្នាក់ដឹកនាំរបស់ នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ឯក ស រដ្ឋា អគ្គស្នងការរង និងស្នងការនគរបាលខេត្តព្រះសីហនុ កម្លាំងស៊ើបអង្កេតបានចាប់ផ្តើមស្រាវជ្រាវភ្លាមៗករណីឃាតកម្មនេះ។
លោកឧត្តមសេនីយ៍ត្រី ណុប បញ្ញា ស្នងការរង ទទួលផែនការងារនគរបាលព្រហ្មទណ្ឌ បានដឹកនាំកម្លាំងជំនាញ សហការជាមួយកម្លាំងអធិការដ្ឋាននគរបាលក្រុងព្រះសីហនុ និងកម្លាំងអធិការដ្ឋានក្រុងកំពង់សោម ដើម្បីតាមស្វែងរកជនសង្ស័យដែលសម្លាប់ប្រពន្ធ។ ការស្រាវជ្រាវប្រកបដោយការយកចិត្តទុកដាក់ និងការចុះតាមដានជាបន្តបន្ទាប់អស់រយៈពេលជាង ៣ម៉ោង ប៉ូលិសឃាត់ខ្លួនជនសង្ស័យ នៅម៉ោង ២៣និង១៥នាទី នៅត្រង់ចំណុច មុខរោងចក្រតំបន់សេដ្ឋកិច្ចពិសេស សង្កាត់បិតត្រាំង ក្រុងកំពង់សោម។
ក្នុងប្រតិបត្តិការនេះ វត្ថុតាងដែលសមត្ថកិច្ចចាប់យកបានរួមមាន ទូរស័ព្ទដៃម៉ាក VIVO ពណ៌ខៀវ ០១ គ្រឿង, កាំបិតចុងស្រួច ០១ ដើម, ម៉ូតូ VIVA ពណ៌ខ្មៅ ស្លាកលេខ ភ្នំពេញ 1C-7405, អត្តសញ្ញាណប័ណ្ណ ០១ សន្លឹកនិងអាវក្រៅដៃវែងពណ៌ខ្មៅ។
បច្ចុប្បន្ននេះ កម្លាំងជំនាញព្រហ្មទណ្ឌកំពុងបន្តស៊ើបអង្កេត និងរៀបចំនីតិវិធីស្របច្បាប់សម្រាប់ដំណើរការក្នុងសំណុំរឿងឃាតកម្មនេះ៕
