12/26/2025
លេខាធិការដ្ឋាន នៃ អង្គការ សមាគមខ្មែរកម្ពុជាក្រោម ដែលមានសមាជិកចំនួន ៩ ដឹកនាំដោយ លោក សឺន យឿង ប្រធានប្រតិបត្តិសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ និងព្រះសង្ឃវត្តសាមគ្គីរង្សី ព្រមទាំងសមាជិក សមាជិកា បាននាំយកអំណោយរបស់សប្បុរសជន ដើម្បីជូនដល់ជនភៀសសឹក ចំនួន ៣០ គ្រួសារ និងព្រះសង្ឃចំនួន ១០៣ អង្គ គង់នៅវត្តព្រះពុទ្ធានារាម ហៅវត្តខ្សាច់ស ស្ថិតនៅភូមស្ទឹងឆាយ ឃុំបឹងព្រាវ ស្រុកស្រែអំបិល ខេត្តកោះកុង។
អំណោយសម្រាប់ជនភៀសសឹក រួមមាន ថវិកា គ្រឿងឧបភោគ-បរិភោគ និងសម្ភារៈប្រើប្រាស់ប្រគេនដល់ព្រះសង្ឃ និងជូនជនភៀសសឹក ដែលកំពុងរងផលប៉ះពាល់ពីការឈ្លានពានរបស់ទាហានថៃ។ អំណោយទាំងនោះ ក្នុង ១ គ្រួសារ ទទួលបាន ថវិកា ២០,០០០រៀល, អង្ករ ១០ គីឡូក្រាម, កញ្ចប់សម្ភារប្រើប្រាស់-គ្រឿងឧបភោគ-បរិគោគ ចំនួន ១ កញ្ចប់, ត្រីខកំប៉ុង ១ យួរ (១០ កំប៉ុង), មី ១ កេស (៥០ កញ្ចប់), ពងមាន់ ១០ គ្រាប់ និងសម្លៀកបំពាក់ ១ កញ្ចប់។
ចំណែកអំណោយសម្រាប់ប្រគេនព្រះសង្ឃ រួមមាន អង្ករមួយតោន, ត្រីខកំប៉ុង ១ កេស (១០០ កំប៉ុង), មី ១០ កេស, ទឹកសុទ្ធ ១០ កេស, ពងមាន់ ៩០០ គ្រាប់, នំប៉័ង ៣០០ ដើម, ថវិកា ១ អង្គ ២០,០០០រៀល និងឧបត្ថម្ភវត្តសម្រាប់ធ្វើចង្ហាន់ ១ លានរៀល។
