06/21/2026
អាជ្ញាធរវៀតណាមចាប់ខ្លួនសកម្មជនខ្មែរក្រោមវ័យ ៧២ឆ្នាំ ម្នាក់ទៀត
--- អត្ថបទៈ ស៊ឺន ចែងចើន
អាជ្ញាធរវៀតណាម បានចាប់ខ្លួនសកម្មជនសិទ្ធិមនុស្សខ្មែរក្រោម លោកស្រី ចូវ ធី ទៀង (Châu Thị Thiện) អាយុ ៧២ ឆ្នាំ នៅទីក្រុងព្រែកឫស្សី (Cần Thơ) កាលពីថ្ងៃទី ១៩ ខែមិថុនា ដោយមិនទាន់បញ្ជាក់ពីបទចោទប្រកាន់ជាផ្លូវការណាមួយនៅឡើយ ។ ករណីនេះ បានបង្កការព្រួយបារម្ភជាថ្មីពីសំណាក់អង្គការ សង្គមស៊ីវិលខ្មែរកម្ពុជាក្រោម និងសហព័ន្ធខ្មែរកម្ពុជាក្រោម ដែលតាមដានស្ថានភាពសិទ្ធិមនុស្ស នៅដែនដីកម្ពុជាក្រោម ។
អង្គការសិទ្ធិមនុស្សខ្មែរកម្ពុជាក្រោម និងសហព័ន្ធខ្មែរកម្ពុជាក្រោម ចាត់ទុកការចាប់ខ្លួននេះ ថា ជាផ្នែកមួយនៃការបន្តបង្ក្រាបលើសកម្មជន ដែលធ្វើការងារផ្នែកសិទ្ធិមនុស្ស សេរីភាពសាសនា និងការផ្សព្វផ្សាយព័ត៌មានអំពីការរំលោភសិទ្ធិជនជាតិដើមខ្មែរក្រោម ។ អង្គការទាំងនេះ អះអាងថា អាជ្ញាធរវៀតណាមបានប្រើប្រាស់មាត្រា ៣៣១ នៃក្រមព្រហ្មទណ្ឌ ដើម្បីចោទប្រកាន់ និងឃុំខ្លួនសកម្មជនខ្មែរក្រោមជាបន្តបន្ទាប់ ក្នុងរយៈពេលប៉ុន្មានឆ្នាំចុងក្រោយនេះ ។
លោកស្រី ចូវ ធី ទៀង គឺជាសកម្មជនខ្មែរក្រោមទី ១៩ ដែលត្រូវបានអាជ្ញាធរវៀតណាមចាប់ខ្លួនចាប់តាំងពីដើមឆ្នាំ ២០២៣ មក ។ អ្នកតាមដានសិទ្ធិមនុស្សនៃអង្គការ សង្គមស៊ីវិលខ្មែរកម្ពុជាក្រោម និងសហព័ន្ធខ្មែរកម្ពុជាក្រោម យល់ថា ករណីរបស់លោកស្រី ចូវ ធី ទៀង អាចប្រឈមនឹងបទចោទ ដូចសកម្មជនខ្មែរក្រោមដទៃទៀត ដែលត្រូវបានចោទពីបទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ បំពានលើផលប្រយោជន៍រដ្ឋ» ។
គិតមកទល់ពេលនេះ សកម្មជនខ្មែរក្រោម និងព្រះសង្ឃចំនួន ១១អង្គ និងរូប កំពុងជាប់ឃុំ រួមមាន លោក តោ ហ្វាង ចឿង, លោក ថាច់ កឿង, លោក យ័ញ មិញ ក្វាង, ព្រះតេជព្រះគុណ ថាច់ ចន្ទតារា, លោក គឹម ឃីម, ព្រះតេជព្រះគុណ យឿង ខាយ, ព្រះតេជព្រះគុណ គឹម សំរិន្ទ, លោក ថាច់ ង៉ា, លោក ថាច់ ស្វឹងដុង, លោកស្រី ថាច់ ធី វ៉ារី និងលោក ថាច់ ចាន់ត្រា ។ ចំណែកសកម្មជន និងព្រះសង្ឃ ៧ អង្គ និងរូបផ្សេងទៀត ត្រូវបានដោះលែងវិញ បន្ទាប់ពីជាប់ឃុំក្រោមបទចោទដូចគ្នា ។
ក្រុមអង្គការការពារសិទ្ធិមនុស្សខ្មែរកម្ពុជាក្រោម ចាត់ទុកថា ការចាប់ខ្លួនសកម្មជនជាបន្តបន្ទាប់នេះ ឆ្លុះបញ្ចាំងពីការរឹតត្បិតកាន់តែខ្លាំងលើសិទ្ធិ និងសេរីភាពជាមូលដ្ឋានរបស់ពលរដ្ឋខ្មែរក្រោម ខណៈសហគមន៍អន្តរជាតិកំពុងបន្តឃ្លាំមើល និងបង្ហាញក្តីបារម្ភចំពោះស្ថានភាពសិទ្ធិមនុស្ស នៅកម្ពុជាក្រោម ៕
🔎តាមដានព័ត៌មានពីស្ដីពីដែនដីកម្ពុជាក្រោមពីយើងខ្ញុំតាមរយៈ៖
✅ Kampuchea Krom TV
✅ The Prey Nokor News
✅ Voice of Kampuchea Krom - VOKK
