Border News Agency, 626 Eldrid Drive, Silver Spring, MD (2025)

12/31/2025

"ပြည်သိမ်းတိုက်ပွဲတွေမှာအားလုံးသူစုစည်းပါဝင်ရမယ်။''

12/31/2025

သံတောင်ကြီးမှာ စစ်ကော်မရှင်လက်နက်ကြီးပစ်ခတ်လို့ ကိုယ်ဝန်ဆောင်အမျိုးသမီးတဦး ဒဏ်ရာရ

Border News Agency
သံတောင်ကြီး၊ ဒီဇင်ဘာ ၃၁။

ကော်သူးလေအုပ်ချုပ်နယ်မြေ၊ တောင်ငူခရိုင်၊ သံတောင်ကြီးမြို့မှာ စစ်ကော်မရှင်တပ် လက်နက်ကြီးပစ်ခတ်လို့ ကိုယ်ဝန်ဆောင်အမျိုးသမီးတဦး ဒဏ်ရာရသွားတယ်လို့ ကရင်အမျိုးသားအစည်းအရုံး - တောင်ငူခရိုင်မှ ဒီဇင်ဘာလ ၃၁ ရက်၊ ဒီနေ့ထုတ်ပြန်ပါတယ်။

အဲဒီသံတောင်ကြီးမြို့၊ အမှတ် ၁ ရပ်ကွက် ချီးလာဖလောခီးသို့ ဒီဇင်ဘာလ ၂၇ ရက်နေ့က စစ်ကော်မရှင်တပ်ရဲ့ ဘုရင့်နောင်တပ်မြို့မှ လက်နက်ကြီးပစ်ခတ်ခဲ့တယ်လို့ ဆိုပါတယ်။

အဲဒီလို အရပ်သားတွေအပေါ် ရည်ရွယ်ချက်ရှိရှိပစ်မှတ်ထား လက်နက်ကြီးပစ်ခတ်ခဲ့တာကြောင့် လစေ့ကိုယ်ဝန်ဆောင်အမျိုးသမီး ဒဏ်ရာရသွားခဲ့တယ်လို့ ဆိုပါတယ်။

အဲဒီသံတောင်ကြီးမြို့၊ အမှတ် ၁ ရပ်ကွက် မှ ဦးစောသာဒူးရဲ့ သမီး အသက်သုံးဆယ်နှစ်နှစ်အရွယ် နော်လားမေဖော မှာ ဒဏ်ရာရသွားတယ်လို့ ဆိုပါတယ်။

စစ်ကော်မရှင်တပ်ဟာ သံတောင်ကြီးမြို့မှာ ရွေးကောက်ပွဲပြုလုပ်ခဲ့ရာ မဲပုံးတွေကို ခလရ - ၁၂၄ တပ်နဲ့ တိုက်ခိုက်ရေးကျောင်း ၂ နေရာမှာ တပ်နဲ့ ဝန်ထမ်းတွေသာမဲပေးနိုင်ခဲ့ပြီး ဒေသခံပြည်သူတွေ တဦးမှမဲမပေးခဲ့ဘူးလို့လည်း ဆိုပါတယ်။

အဲဒါကြောင့် သံတောင်ကြီးမြို့မှာ ရွေးကောက်ပွဲကာလအတွင်း လက်နက်ကြီးပစ်ခတ်တာတွေ၊ လက်နက်ငယ်တွေနဲ့ ပစ်ခတ်တာတွေကြောင့် ပြည်သူတွေစိုးရိမ်ကြောက်ရွံ့မှုတွေနဲ့ သွားလာနေကြရတယ်လို့ ဆိုပါတယ်။

ဓာတ်ပုံ - ကရင်အမျိုးသားအစည်းအရုံး - တောင်ငူခရိုင်

Website - https://burmese.bnanews.net/news/16298/

#ကော်သူးလေ #တောင်ငူခရိုင် #သံတောင်ကြီး #စစ်ကော်မရှင် #လက်နက်ကြီး

12/31/2025

"ရခိုင်ပြည်သူတွေ အရမ်းဒုက္ခရောက်နေကြပါတယ်။''

12/31/2025

လူသားချင်းစာနာမှု အကူအညီတွေပေးကြဖို့ နိုင်ငံတကာကို ပြည်သူတွေတောင်းဆို

Border News Agency
သံတွဲ၊ ဒီဇင်ဘာ ၃၁။

ကမ္ဘ့ာကုလသမဂ္ဂအပါအဝင် နိုင်ငံတကာအသိုင်းအဝိုင်းတွေဟာ လူသားချင်းစာနာမှုအကျပ်အတည်းကို မျက်ကွယ်မပြုဘဲ အရေးယူဆောင်ရွက်ပေးကြဖို့ အာရက္ခပြည်သူတွေနဲ့အတူ အာရက္ခပြည်သူ့တော်လှန်ရေးအစိုးရက တောင်းဆိုလိုက်ပါတယ်။

အဲဒီတောင်းဆိုမှုကို အာရက္ခပြည်သူ့တော်လှန်ရေးအစိုးရရဲ့ လူသားချင်းစာနာထောက်ထားရေးနဲ့ ပူးပေါင်းဆောင်ရွက်ရေးရုံး (HDCO) က ဒီဇင်ဘာလ ၃၀ ရက်နေ့၊ မနေ့က ထုတ်ပြန်တောင်းဆိုလိုက်ပါတယ်။

အာရက္ခဒေသကို စစ်ကော်မရှင်တပ် လေကြောင်းတိုက်ခိုက်တာတွေကို စနစ်တကျဆက်တိုက် ပိုပြီးပြင်းထန်စွာအရှိန်မြှင့်လုပ်ဆောင်နေပြီး အရပ်သားပြည်သူတွေ နေထိုင်ရာနေရာတွေကို တိုက်ရိုက်ပစ်မှတ်ထားတိုက်ခိုက်နေတယ်လို့ ဆိုပါတယ်။

အဲဒီလိုလုပ်ရပ်တွေဟာ သီးခြားဖြစ်စဉ်တခုမဟုတ်ဘဲ အစီအစဉ်ချထားပြီး ထပ်တလဲလဲကျူးလွန်နေတဲ့ တိုက်ခိုက်မှုတွေဖြစ်ပြီး အပြစ်မဲ့ပြည်သူတွေရဲ့အသက်၊ လုံခြုံမှုနဲ့ အိုးအိမ်တွေကို ပြင်းထန်စွာခြိမ်းခြောက်ဖျက်ဆီးနေတဲ့ လူသားချင်းစာနာမှု အကျပ်အတည်းဖြစ်တယ်လို့ ဆိုပါတယ်။

အဲဒီသံတွဲခရိုင်၊ ငပလီမြို့၊ လင်းသာရပ်ကွက်နဲ့ ကျင်းကန်ကြီးရွာကို ဒီဇင်ဘာလ ၂၉ ရက်နေ့က စစ်ကော်မရှင်တပ် လေကြောင်းမှနှစ်ကြိမ်ထိ ပေါင်ငါးရာဗုံးလေးလုံးနဲ့ တိုက်ခိုက်ခဲ့ပါတယ်။

အဲဒီလိုလေကြောင်းတိုက်ခိုက်လို့ အသက်သုံးနှစ်အရွယ် ကလေးငယ်တဦးအပါအဝင် ပြည်သူကိုးဦးသေဆုံးခဲ့ပြီး ဆယ့်လေးဦးဒဏ်ရာရသွားသလို လူနေအိမ်နှစ်ဆယ့်သုံးလုံး မီးလောင်ပျက်စီးဆုံးရှုံးခဲ့ပါတယ်။

အဲဒီအပြင် သံတွဲမြို့နယ်၊ ရွာရှည်ကျေးရွာကို ဒီဇင်ဘာလ ၂၈ ရက်နေ့ကလည်း စစ်ကော်မရှင်တပ် လေကြောင်းတိုက်ခိုက်ခဲ့တာကြောင့် အသက်ငါးဆယ့်ငါးနှစ်အရွယ် အမျိုးသမီးတဦးသေဆုံးခဲ့ပါတယ်။

စစ်ကော်မရှင်တပ်ဟာ နိုင်ငံတကာလူသားချင်းစာနာထောက်ထားမှုဆိုင်ရာ အကူအညီပေးရေးတွေကို တားဆီးကန့်သတ်ထားသလို ကုန်စည်စီးဆင်းမှုတွေ၊ ကုန်းလမ်း၊ ရေလမ်းတွေကိုလည်း ပိတ်ဆို့ထားပါတယ်။

အဲဒါကြောင့် အာရက္ခပြည်သူတွေဟာ နိုင်ငံတကာလူသားချင်းစာနာထောက်ထားမှုဆိုင်ရာ အကူအညီတွေမရကြတာမို့ အကျပ်အတည်းတွေနဲ့ ရင်ဆိုင်နေကြရပါတယ်။

(ဓာတ်ပုံ - ငပလီမြို့နယ်ကို ဒီဇင်ဘာလ ၂၉ ရက်နေ့က၊ စစ်ကော်မရှင်တပ် လေကြောင်းတိုက်ခိုက်လို့ မီးလောင်နေပုံ / APM)

Website - https://burmese.bnanews.net/news/16294/

#ကမ္ဘ့ာကုလသမဂ္ဂ #နိုင်ငံတကာ #လူသားချင်းစာနာမှု #အာရက္ခပြည်သူ #တောင်းဆို

12/31/2025

"လူငယ်တွေမှာရွေးချယ်စရာတွေနည်းနေပါတယ်။''

12/31/2025

တော်လှန်ရေးအတွက် ကူညီထောက်ပံ့သူတွေကို ချင်းညီနောင်ကျေးဇူးတင်

Border News Agenchy
မတူပီ၊ ဒီဇင်ဘာ ၃၁။

တော်လှန်ရေးအတွက် အစဉ်တစိုက်ထောက်ပံ့ကူညီပေးခဲ့ကြတဲ့ ရက္ခိုင်အမျိုးသားအဖွဲ့ချုပ်/အာရက္ခတပ်တော်အပါအဝင် ထောက်ပံ့ကူညီသူအားလုံးကို ကျေးဇူးတင်တယ်လို့ ချင်းညီနောင်က ဆိုပါတယ်။

အဲဒီချင်းညီနောင်(Chin Brotherhood) ဖွဲ့စည်းတည်ထောင်တဲ့ နှစ်နှစ်ပြည့်ကို ဒီဇင်ဘာလ ၃၀ ရက်နေ့ကပြုလုပ်ခဲ့ပြီး ခုလိုကျေးဇူးတင်စကားပြောလိုက်တာပါ။

အဲဒီချင်းညီနောင်ရဲ့နှစ်နှစ်တာတော်လှန်ရေးကာလတွေမှာ ကူညီထောက်ပံ့ပေးကြတဲ့ ရက္ခိုင်အမျိုးသားအဖွဲ့ချုပ်/အာရက္ခတပ်တော်အပါအဝင် တော်လှန်ရေးမဟာမိတ်တွေနဲ့နိုင်ငံတကာမှ တော်လှန်ပြည်သူတွေအားလုံးကို လှိုက်လှိုက်လှဲလှဲကျေးဇူးတင် လေးစားဂုဏ်ပြုမှတ်တမ်းတင်တယ်လို့ဆိုပါတယ်။

အဲဒီချင်းညီနောင်ဟာ ပြည်သူလူထုရဲ့ထောက်ခံမှုနဲ့ မဟာမိတ်တွေရဲ့ထောက်ပံ့ကူညီမှုနဲ့ မတူပီမြို့နယ်၊ မင်းတပ်မြို့နယ်၊ ကန်ပက်လက်မြို့နယ်၊ ဖလမ်းမြို့နယ်၊ မရာဒေသနဲ့ဒိုင်ရ်ဒေသတွေမှာ စစ်ကော်မရှင်တပ်ကင်းစင်အောင်မောင်းထုတ်နိုင်ခဲ့တယ်လို့ဆိုပါတယ်။

နောက်ပြီး တီးတိန်မြို့နယ်နဲ့ ချင်းပြည်တခုလုံးကို စစ်ကော်မရှင်တပ်ကင်းစင်စေဖို့ဆက်ကြိုးစားသွားမယ်လို့ဆိုပါတယ်။

Website - https://burmese.bnanews.net/news/16290/

#တော်လှန်ရေး #အာရက္ခတပ်တော် #ထောက်ပံ့ကူညီ #ချင်းညီနောင်

12/31/2025

"အနောက်တံခါးကိုပိတ်ပြီးရိုးလမ်းကိုပိတ်ထားခဲ့တယ်။''

12/31/2025

ပြည်သူ့ကာကွယ်ရေးတပ်မတော်ရဲ့အခြေခံစစ်ပညာသင်တန်းဆင်းပွဲ (ဓာတ်ပုံသတင်း)

Border News Agency
ပဲခူး၊ ဒီဇင်ဘာ ၃၁။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနရဲ့ ပြည်သူ့ကာကွယ်ရေးတပ်မတော်၊ အထူးတိုင်းစစ်ဌာန၊ အမှတ် ၃၆ နည်းဗျူဟာ၊ P29909 Southern Eagle PDF တပ်ရင်းမှာ သင်တန်းဆင်းပွဲပြုလုပ်ခဲ့ပါတယ်။

အဲဒီအမှတ် ၃၆ နည်းဗျူဟာ၊ P29909 Southern Eagle PDF တပ်ရင်းရဲ့ စွန်မင်း အပတ်စဉ် ၇ အခြေခံ စစ်ပညာသင်တန်းဆင်းပွဲကို အထူးတိုင်းစစ်ဌာန‌ တနေရာမှာပြုလုပ်ခဲ့တယ်လို့ဆိုပါတယ်။

နွေဦးတော်လှန်ရေးရဲ့အောင်ပွဲခြေလှမ်းတွေကို အရှိန်အဟုန်မြှင့်တင်နိုင်ဖို့အတွက် စိတ်ဓာတ်ခိုင်မာပြီး တိုင်းပြည်အတွက် ပေးဆပ်လိုတဲ့လူငယ်တွေကို သင်တန်းသားသစ်အဖြစ်ခေါ်ယူနေပါတယ်။

Photo-p29909တပ်ရင်း

Website - https://burmese.bnanews.net/news/16268/

#အမျိုးသားညီညွတ်ရေးအစိုးရ #ပြည်သူ့ကာကွယ်ရေးတပ်မတော် #အထူးတိုင်းစစ်ဌာန #သင်တန်းဆင်းပွဲ

12/31/2025

"အုပ်ချုပ်သူအဆက်ဆက်လူမျိုးရေးပဋိပက္ခတွေဖန်တီးခဲ့ကြတယ်။''

12/30/2025

ဆောထိမှာ စစ်ကော်မရှင်တပ် လက်နက်ကြီးပစ်ခတ်လို့ အရပ်သားတဦးဒဏ်ရာရ

Border News Agency
ဆောထိ၊ ဒီဇင်ဘာ ၃၀။

ကော်သူးလေအုပ်ချုပ်နယ်မြေ၊ ခလယ်လွီထူခရိုင်၊ ဆောထိမြို့နယ်မှာ စစ်ကော်မရှင်တပ် လက်နက်ကြီးပစ်ခတ်လို့ အရပ်သားတဦးဒဏ်ရာရသွားတယ်လို့ ကရင်အမျိုးသားအစည်းအရုံးမှ ဒီဇင်ဘာလ ၃၀ ရက်၊ ဒီနေ့ထုတ်ပြန်ပါတယ်။

အဲဒီဆောထိမြို့နယ်၊ သံဆိပ်ရွာမကျေးရွာကို ဒီဇင်ဘာလ ၂၄ ရက်၊ မနက် ၁၁နာရီ ၃၀ မိနစ်ခန့်အချိန်က စစ်ကော်မရှင်တပ်ရဲ့ ၈၁ မမ လက်နက်ကြီးသုံးလုံး ပစ်ခတ်ခဲ့တယ်လို့ ဆိုပါတယ်။

အဲဒီလိုပစ်ခတ်ခဲ့တာကြောင့် အသက်ခြောက်ဆယ့်ကိုးနှစ်အရွယ် ဦးအောင်ကြည်ထိခိုက်ဒဏ်ရာရသွားခဲ့ပါတယ်။

အဲဒီအပြင် ဒီဇင်ဘာလ ၂၆ ရက်နေ့ကလည်း စစ်ကော်မရှင်တပ်မှ သံဆိပ်ရွာမကျေးရွာသားတွေဖြစ်တဲ့ မသီသီထွေး၊ မောင်ဇင်မင်းဦး၊ ဦးမောင်စိန်၊ ကိုရဲထွေးတို့ လေးဦးကို အကြောင်းမဲ့ဖမ်းဆီးသွားခဲ့တယ်လို့ ဆိုပါတယ်။

အဲဒီဖမ်းဆီးသွားသူတွေထဲမှ ဦးမောင်စိန်နဲ့ ကိုရဲထွေးရဲ့လက်ကို ဓားနဲ့မွှန်းတာတွေလုပ်ခဲ့တယ်လို့လည်း ဆိုပါတယ်။

ဓာတ်ပုံ - ကရင်အမျိုးသားအစည်းအရုံး

Website - https://burmese.bnanews.net/news/16263/

#ကော်သူးလေ #ခလယ်လွီထူခရိုင် #ဆောထိမြို့ #စစ်ကော်မရှင် #လက်နက်ကြီး

12/30/2025

ငပလီကို စစ်ကော်မရှင်တပ် လေကြောင်းတိုက်ခိုက်မှု ကိုးဦးသေဆုံး

Border News Agency
သံတွဲ၊ ဒီဇင်ဘာ ၃၀။

အာရက္ခတပ်တော်ထိန်းချုပ်ထားတဲ့ သံတွဲမြို့နယ်၊ ငပလီမြို့ကို စစ်ကော်မရှင်တပ် လေကြောင်းတိုက်ခိုက်လို့ အရပ်သားသေဆုံးသူကိုးဦးသေဆုံးခဲ့ပြီး ဆယ့်လေးဦး ဒဏ်ရာရသွားခဲ့ပါတယ်။

အဲဒီငပလီမြို့ကို ဒီဇင်ဘာလ ၂၉ ရက်၊ ညနေ ၈ နာရီအချိန်ခန့်က စစ်ကော်မရှင်တပ် လေကြောင်းတိုက်ခိုက်ခဲ့တာကြောင့် ကလေး လေးဦးအပါအဝင် အရပ်သားကိုးဦးသေဆုံးခဲ့ပြီး ဆယ့်လေးဦးဒဏ်ရာရသွားခဲ့ပါတယ်။

အဲဒီငပလီမြို့၊ လင်းသာရပ်ကွက်၊ ကျင်းကန်ကြီးရွာမှ အသက်လေးနှစ်အရွယ် မနွယ်နွယ်မျိုး၊ အသက်ဆယ်နှစ်အရွယ် မောင်လှထွန်းနိုင်၊ အသက်ဆယ့်နှစ်နှစ်အရွယ် မောင်သက်နိုင်ထွန်း၊ အသက်ဆယ့်ငါးနှစ်အရွယ် မောင်သက်နိုင်ဦး၊ အသက်နှစ်ဆယ့်သုံးနှစ်အရွယ် မနွယ်နီဦး၊ အသက်သုံးဆယ့်သုံးနှစ်အရွယ် မဝင်းဝင်းရွှေ၊ အသက်သုံးဆယ့်ငါးနှစ်အရွယ် ဦးတင်မြင့်၊ အသက်သုံးဆယ့်ငါးနှစ်အရွယ် ဒေါ်သောင်းမော်၊ အသက်သုံးဆယ့်ခြောက်နှစ်အရွယ် ဦးစိုးကျော်ဝင်းတို့ သေဆုံးခဲ့ကြပါတယ်။

အဲဒီအပြင် အသက်ဆယ့်သုံးနှစ်အရွယ် မောင်ထွန်းထွန်းဝင်း၊ အသက်နှစ်ဆယ်အရွယ် ကိုကျော်ဝင်းနိုင်၊ အသက်ငါးဆယ့်ခြောက်နှစ်အရွယ် ဦးဝင်းနိုင်၊ အသက်သုံးဆယ့်တနှစ်အရွယ် ဦးမောင်မောင်နိုင်၊ အသက်သုံးဆယ့်ငါးနှစ်အရွယ် ဦးမောင်ငို၊ အသက်လေးဆယ့်ရှစ်နှစ်အရွယ် ဦးကိုလင်း၊ အသက်သုံးဆယ့်ခုနှစ်နှစ်အရွယ် ဦးဖိုးဝင်း၊ အသက်နှစ်ဆယ့်ခြောက်နှစ်အရွယ် ကိုအေးမင်းထွန်း၊ အသက်လေးဆယ့်ခြောက်နှစ်အရွယ် ဦးမောင်သာဖြူ၊ အသက်လေးဆယ်အရွယ် ဦးအုန်းကျော်မြင့်၊ အသက်သုံးဆယ့်တနှစ်အရွယ် ဒေါ်ဝင်းဝင်းဇော်၊ အသက်လေးဆယ့်ရှစ်နှစ်အရွယ် ဒေါ်ပပလင်း၊ အသက်ခြောက်ဆယ့်သုံးနှစ်အရွယ် ဒေါ်ပုံချီ၊ အသက်ရှစ်ဆယ့်တနှစ်အရွယ် ဒေါ်မတင် တို့ဒဏ်ရာရသွားခဲ့ပါတယ်။

စစ်ကော်မရှင်တပ်ဟာ သံတွဲမြို့နယ်၊ ငပလီမြို့၊ လင်းသာရပ်ကွက်၊ ကျင်းကန်ကြီးရွာကို ရွယ်ရည်ချက်ရှိရှိ လေကြောင်းတိုက်ခိုက်ခဲ့တာကြောင့် အရပ်သားတွေ သေဆုံး၊ ဒဏ်ရာရသွားခဲ့ကြတာလို့ ဒေသခံတွေကဆိုကြပါတယ်။

အဲဒီဒဏ်ရာရသူတွေထဲမှာ ဒဏ်ရာပြင်းထန်သူတွေပါတာကြောင့် သေဆုံးမှုတွေ ထပ်တိုးလာနိုင်တယ်လို့ ဒေသခံတွေကဆိုကြပါတယ်။

အဲဒီအပြင် လူနေအိမ်ဆယ့်နှစ်ဆောင် မီးလောင်ပျက်စီးသွားတယ်လို့ ဆိုပါတယ်။

အဲဒီသံတွဲမြို့နယ်၊ ရပ်ရှည်ရွာကို ဒီဇင်ဘာလ ၂၅ ရက်နေ့ကလည်း စစ်ကော်မရှင်တပ် လေကြောင်းတိုက်ခိုက်လို့ အမျိုးသမီးတဦးသေဆုံး ခဲ့ပါတယ်။

စစ်ကော်မရှင်တပ်ဟာ အာရက္ခတပ်တော် ထိန်းချုပ်နယ်မြေတွေအပါအဝင် သူတို့ထိန်းချုပ်ထားဆဲဖြစ်တဲ့ မြို့နယ်တွေရှိ ပြည်သူတွေကို နေ့စဥ်ပစ်မှတ်ထား တိုက်ခိုက်နေတာကြောင့် အပြစ်မဲ့အရပ်သားတွေ အစုလိုက်အပြုံလိုက် သေဆုံး၊ ဒဏ်ရာရနေကြပါတယ်။

အဲဒါကြောင့် အာရက္ခဒေသအတွင်းနေ မိဘပြည်သူတွေလည်း စစ်ကော်မရှင်တပ်ရဲ့ လေကြောင်း၊ ရေကြောင်း၊ လက်နက်ကြီး၊ ဒရုန်းတွေတိုက်ခိုက်မှုရန်ကို အရင်ထက် ပိုမိုသတိထားကြဖို့ စစ်ရေးသတိအပြည့်အဝ နေ့ ၊ ညအချိန်မရွေးသတိရှိကြဖို့ အာရက္ခတပ်တော်က အထူးအသိပေး တိုက်တွန်းထားပါတယ်။

Photo - APM

Website - https://burmese.bnanews.net/news/16259/

#သံတွဲမြို့ #ငပလီမြို့ #စစ်ကော်မရှင် #လေကြောင်းတိုက်ခိုက်

12/30/2025

တော်လှန်ရေးတပ်တွေ စစ်ရေးအရှိန်မြှင့်သွားမယ်

Border News Agency
စစ်ကိုင်း၊ ဒီဇင်ဘာ ၃၀။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော်၊ အမှတ် ၁ စစ်ဒေသ၊ တမူးခရိုင်အမှတ် ၂ တပ်ရင်းက စစ်ရေးအရှိန်မြင့်သွားမယ်လို့ ဒီဇင်ဘာလ ၂၉ ရက်၊ မနေ့က အသိပေးထုတ်ပြန်ပါတယ်။

အဲဒီတမူခရိုင် အမှတ် ၂ တပ်ရင်းရဲ့ တပ်ရင်းလုပ်ငန်းညှိနှိုင်းအစည်းအဝေး၊ ဒုတိယအကြိမ်အစည်းအဝေးကို ဒီဇင်ဘာလ ၂၉ ရက်နေ့ကပြုလုပ်ခဲ့ရာ စစ်ရေးအရှိန်မြှင့်တင်ဖို့ အတွက်ညှိနှိုင်းဆွေးနွေးခဲ့ကြတယ်လို့ ဆိုပါတယ်။

အဲဒီဆွေးနွေးပွဲကို ရှေ့တန်းစစ်မြေပြင်မှာ တာဝန်ထမ်းဆောင်နေတဲ့ စစ်မြေပြင်တပ်မှူးတွေ၊ လက်နက်ကြီးအဖွဲ့၊ တပ်ရင်းဆေးတပ်ဖွဲ့၊ တပ်ရင်းရုံးအဖွဲ့နဲ့သက်ဆိုင်ရာအရာ
ရှိတွေ တက်‌ရောက်ခဲ့ကြတယ်လို့ဆိုပါတယ်။

အဲဒီလိုဆွေးနွေးရာမှာ တိုက်စွမ်းရည်၊ အုပ်ချုပ်ရေးစွမ်းရည်၊ စည်းရုံးရေးစွမ်းရည်တွေမြှင့်တင်ပြီး တော်လှန်ရေးနဲ့ပန်းတိုင်မရောက်မခြင်း ကြိုးစားဆောင်ရွက်သွားမယ်လို့ဆိုပါတယ်။

အဲဒီအပြင် ပြည်သူကိုဗဟိုပြုပြီး ပြည်သူယုံကြည်ကိုးစားထိုက်တဲ့ ပြည်သူ့စစ်သားတွေဖြစ်အောင် ကြိုးစားသွားမယ်လို့ တမူးခရိုင်အမှတ်၂ တပ်ရင်းက အသိပေးထားပါတယ်။

ဓာတ်ပုံ-တမူးခရိုင်အမှတ်၂ တပ်ရင်း

Website - https://burmese.bnanews.net/news/16255/

#အမျိုးသားညီညွတ်ရေးအစိုးရ #ကာကွယ်ရေးဝန်ကြီးဌာန #ပြည်သူ့ကာကွယ်ရေးတပ်မတော်

Border News Agency

12/31/2025

12/31/2025

12/31/2025

12/31/2025

12/31/2025

12/31/2025

12/31/2025

12/31/2025

12/31/2025

12/30/2025

12/30/2025

12/30/2025

Address

Telephone

Website

Alerts

Shortcuts

Share

Category