https://www.youtube.com/c/RN05channel

RN05, St. Louis, MO (2026)

06/04/2026

ይድረስ ለ Moges Zewdu Teshome እዉነቱን ከተነጋገርን ዘመኑ እንዳልከዉ የዳግማዊ ግራኝ አህመድ ቢሆን ኖሮ #አርሲም ሆነ #አክሱም ፣ ሆነ #መስጂድ ፣ #ክርስትያኑም ሆነ #ሙስሊሙ ምዕመን ደህንነታቸው በተጠበቀ ነበር፡፡ ይህንን የምንለው በስሜት ሳይሆን በመረጃ ነው፡፡ ባይሆን ዘመኑ የ #አጼዎቹ አይነት ሆኖ እንደሁ መርምር!
አብዛኞቹ የኢትዮጵያ ኤሊቶች ምንም ሞደሬት ቢመስሉም የከፋ እለት ከተለመደው የልምድ አስተሳሰብ መላቀቅና ሚዛን መጠበቅ እጅግ ያዳግታቸዋል፡፡ ለዚህም ልዩ ኮርስ መዉሰድ ሳይጠበቅባቸው አይቀርም!

እናንተስ ሃሳብ ምን ይመስላል?? ?
የእናንተን እይታ በኮመንት መስጫው ላይ አጋሩን!
=============
ለተጨማሪ መረጃ ቴሌግራማችንን ተቀላቀሉ
https://t.me/RNZeroFive
ፍትህ ለ ፣ ፍትህ ለ ፍትህ

06/04/2026

🚩 የመሪዎች መራቅ እና የህዝብ እምባ፡ ከአርሲው ግፍ በስተጀርባ ያለው የፖለቲካ ትዝብት!
~~~~~~

"የአርሲን ግፍ ማንም ፈጸመው ማን እንዲጣራ አዘው በዚህ ሰአት ጠቅላይ ሚንስትር አብይ አህመድ ህዝባቸውን ለማጽናናት አርሲ መታየት ነበረባቸው! ግን እንኳን እሳቸው ምክትሎቻቸውም ሆኑ ሰልስቶቻቸው አልተገኙም፡፡ የመጡ ሰሞን በየቀየው ለቅሶ ሲደርሱ ያየን መስሎን! የሰለጠነ መንግስት ግለሰቦች ላይ ሳይሆን ህዝብ ተኮር አደጋ ሲደርስ ቦታው ላይ ቀድሞ ይገኛል፡፡ አደጋው ከደረሰበት ህዝብም ጋር ይወያያል፡፡"

ይህ ማህበራዊ ሚዲያ ላይ የሚንሸራሸር እውነት፣ ዛሬ በሀገራችን ኢትዮጵያ ያለውን የመንግስት እና የህዝብ ግንኙነት መከፋፈል ፍንትው አድርጎ የሚያሳይ ትልቅ ትዝብት ነው። በአርሲ ንጹሃን ዜጎች በማንነታቸው እና በሃይማኖታቸው ምክንያት እጅግ ዘግናኝ በሆነ መልኩ ሲገደሉ፣ የመንግስት ከፍተኛ አመራሮች ዝምታን መምረጣቸው ወይም በቦታው ተገኝተው ህዝቡን አለማጽናናታቸው ትልቅ የታሪክ ጠባሳ ነው።

1. የሰለጠነ መንግስት መገለጫ፡ በጭንቅ ቀን ቀድሞ መገኘት
በፖለቲካ ሳይንስ እና በመልካም አስተዳደር መርህ፣ የአንድ መንግስት ህጋዊነት (Legitimacy) የሚለካው ህዝብ አደጋ ላይ ሲወድቅ በሚያሳየው አፋጣኝ ምላሽ ነው። የሰለጠነ መንግስት መሪዎች ህዝብ ተኮር አደጋዎች፣ የተፈጥሮ አደጋም ሆነ የሽብር ጥቃት ሲደርስ ቀድመው ቦታው ላይ ይገኛሉ። ይህንን የሚያደርጉት ለፖለቲካ ፍጆታ ብቻ ሳይሆን፦

👉የህዝብን ስነ-ልቦናዊ ስብራት ለመጠገን፦ መሪው አብሮኝ አለቀሰ ማለት ህዝቡ የተረሳና ኦናነት እንደማይሰማው ያደርጋል።

👉ፍትህ ለማረጋገጥ፦ በቦታው ተገኝቶ ወንጀለኞች እንደሚቀጡ ቃል መግባት ለተጎጂዎች ትልቅ መጽናኛ ነው።

2. አለምአቀፍ ፋክቶች እና ማሳያዎችን (Global Examples)
በአለም ታሪክ መሪዎች ለህዝባቸው ያላቸውን አጋርነት በችግር ቀን እንዴት እንዳሳዩ ጥቂት ምሳሌዎችን እንመልከት፦

👉የኒውዚላንድ ጠቅላይ ሚኒስትር ጃሲንዳ አርደርን (እ.ኤ.አ 2019)፦ በክራይስትቸርች መስጊዶች ላይ የሽብር ጥቃት ደርሶ 51 ሙስሊሞች ሲገደሉ፣ ጠቅላይ ሚኒስትሯ በሰዓታት ውስጥ ጥቁር ሂጃብ ለብሳ ከተጎጂዎች ጎን ቆማለች። እምባዋን እየጠረገች ቤተሰቦቻቸውን አቅፋ አጽናንታለች። ይህ ተግባሯ በሃገሯና በአለም አቀፍ ደረጃ የመሪነት ተምሳሌት አድርጓታል።

👉የአሜሪካ ፕሬዝዳንቶች ተሞክሮ፦ በአሜሪካ የጅምላ ተኩስ (Mass Shootings) ወይም እንደ ካትሪና ያሉ አውሎ ነፋሶች ሲከሰቱ፣ ፕሬዝዳንቱ (ኦባማ፣ ባይደንም ሆኑ ሌሎች) ወዲያውኑ ስራቸውን አቋርጠው ወደ ስፍራው ያመራሉ። የተጎጂዎችን እጅ ይይዛሉ፣ አብረው ያለቅሳሉ።

👉የፈረንሳዩ ኢማኑኤል ማክሮን፦ በፈረንሳይ የሽብር ጥቃት በደረሰ ቁጥር ማክሮን በቀጥታ ጥቃቱ ወደተፈጸመበት ቦታ በመሄድ ከህዝቡና ከፀጥታ አካላት ጋር በመቆም አጋርነታቸውን ሲያሳዩ በተደጋጋሚ ታይተዋል።

3. የሀገር ውስጥ ታሪካዊ ማሳያዎች (Historical Contrast)
ወደ ሀገራችን ስንመጣ፣ የወቅቱ መሪዎች የመጡ ሰሞን ያሳዩት የነበረው "ህዝባዊነት" እና ዛሬ የመጡበት ደረጃ እጅግ የሚራራቅ ሆኗል፦

👉የመጡ ሰሞን የነበረው ለቅሶና ጉብኝት፦ ጠቅላይ ሚኒስትር አብይ አህመድ ወደ ስልጣን በረገጡ ማግስት በኦሮሚያ፣ በአማራ፣ በሶማሌ እና በደቡብ ክልሎች እየተዘዋወሩ ከህዝብ ጋር ይመክሩ፣ ሲያዝኑ አብረው ያዝኑ ነበር። ያ አቀራረብ በህዝብ ዘንድ ትልቅ ተስፋን ጥሎ ነበር።

👉የዛሬው እውነታ፦ ዛሬ ግን በአርሲ፣ በወለጋ፣ በፋኖ እና በመንግስት ጦርነት ምክንያት በአማራ ክልል፣ እንዲሁም በተለያዩ የሀገሪቱ ክፍሎች ንጹሃን በየቀኑ ሲረግፉ፣ መሪዎች በቤተመንግስት ውስጥ የአትክልት ስራና የፓርክ ምርቃትን ሲያከናውኑ ይታያሉ። ይህም "ህዝቡ እያለቀሰ መሪው ይደሰታል" የሚል አደገኛ የፖለቲካ ትረካ እንዲሰፍን አድርጓል።

4. "ግለሰብ ተኮር" እና "ህዝብ ተኮር" አደጋዎች
የወቅቱ መንግስት ትኩረት "ግለሰቦች ላይ ሳይሆን ህዝብ ተኮር አደጋ ላይ" መሆን ነበረበት። በአሁኑ ወቅት የአንድ ባለስልጣን ዘመድ ወይም ታዋቂ ግለሰብ ላይ አደጋ ሲደርስ መንግስታዊ መግለጫዎች ይዥጎደጎዳሉ፣ ለቅሶ ይደረሳል። ነገር ግን በመቶዎች የሚቆጠሩ ምስኪን ገበሬዎች፣ እናቶችና ህጻናት በአርሲ ምድር በገጀራና በጥይት ሲጨፈጨፉ አፋጣኝ የሀዘን መግለጫ እንኳን አለመስጠት፣ ታሪካዊ ትዝብትና የታሪክ ተጠያቂነትን ያመጣል።

ማጠቃለያ
---
መሪነት በሰላም ጊዜ ሪቫን መቁረጥና ፎቶ መነሳት ብቻ አይደለም። እውነተኛ መሪነት የሚፈተነው ህዝብ በሚያለቅስበት የጭንቅ ሰዓት ነው። በአርሲ የደረሰው ግፍ የኢትዮጵያ ህዝብ የጋራ እምባ ነው። በዚህ ሰዓት ጠቅላይ ሚኒስትሩም ሆኑ ከፍተኛ ምክትሎቻቸው በቦታው ተገኝተው የህዝቡን እምባ አለማበሳቸው፣ በመንግስትና በህዝብ መካከል ያለው ማህበራዊ ውል (Social Contract) ምን ያህል እንደፈረሰ ማሳያ ነው።

የሰለጠነ መንግስት ከህንጻዎችና ከፓርኮች በፊት ለሰው ልጅ ህይወትና ክብር ቅድሚያ ይሰጣል። የወገኖቻችን ደም በከንቱ አይፍሰስ፤ ለተጎጂዎች መጽናናትን፣ ለሀገራችን ሰላምን ይስጥልን!
እናንተስ ሃሳብ ምን ይመስላል?? ?
የእናንተን እይታ በኮመንት መስጫው ላይ አጋሩን!
=============
ለተጨማሪ መረጃ ቴሌግራማችንን ተቀላቀሉ
https://t.me/RNZeroFive
#አርሲ #ኢትዮጵያ #ፍትህ

06/03/2026

የመንግስት ዋና ኃላፊነት የዜጎቹን ደህንነት መጠበቅ ከሆነ ቢያንስ ይህንን በተደጋጋሚ ማድረግ አልቻሉምና ስልጣናቸዉን ሊለቁ አልያም ሊጠየቁ ይገባል!

06/03/2026

~ 3ቱን ጥያቄዎች በመመለስ ይሳተፉ! ~
~~~~~~~
1- በደርግ, በኢህአዴግ እና በብልፅግና ዘመን ምርጫ ለሀገራችን ያመጣው ለዉጥና ፋይዳ ምንድን ነው?

2- ምርጫ ባይኖርስ ሀገራችንና ህዝባችን ምን የተለየ ነገር ይቀርባቸዋል ብለው ያስባሉ?

3.ሀገራችን ዉስጥ አሁን በደረስንበት ፖለቲካዊ እድገት የሀገራችንን መንግስታት የምናፀናበት ወይንም የምንቀያይርበት ደረጃ ላይ እንገኛለን ብለው ያስባሉን? እንዴት ?

05/27/2026

#በአፓርታይዷ #አክሱም #ከተማ ኢድ አልተሰገደም! ይህ ለመጅሊሱ ምኑ ነው??
~~~~~~~~~~
"የትግራይ ክልል እስልምና ጉዳይ ምክር ቤት ዋና ጸሐፊ ሀጅ መሀመድ ካሕሳይ አግላዩና ጨቋኙ አዲሱ የአክሱም ከተማ ስያሜ ተቀባይነት እንደሌለው እና ሙስሊሙ እንደሚታገልበት ገልጸዋል። ይህን ያሉት በመቐለ ህዝበ ሙስሊሙ የዒድ ሰላቱን ለመስገድ በተሰበሰበት ወቅት ነው። በአክሱም ለመጀመሪያ ጊዜ በዛሬው ዕለት የዒድ ሰላት አልተሰገደም። ሙስሊሙ የቁም እስረኛ ሁኖ በቤቱ አሳልፏል።" ትግራይ ሙስሊም ሚድያ እንደዘገበው
የፌደራል መጅሉሱ ገፅ ግን Ethiopian Islamic Affairs Supreme Council በበኩሉ እንደተለመደው "የእድ አል አድሃ በዓል በመላው ሀገሪቱ በድምቀት እየየከበረ ይገኛል " ሲል ዘግቧል:: ይህ ማለት መጅልሱ #በአፓርታይዷ #አክሱም #ከተማ ሊሆን ስለሚችለው ነገር ቅድመ ጥረትም ሆነ ቅድመ ግንዛቤ የለዉም የሚለዉን ያሲዛል :: አልያም" መላ ሀገሪቱ" ማለት በመጅልሱ ካርታ መሰረት ከየት እስከየት ነው የሚለዉን ጥያቄ እንድናነሳ ያስገድደናል!

ለነገሩ የኢትዮጵያ የመንግስት ሚድያዎችም አክሱም አጀንዳ እንዳይሆን ቶሎ ብለው #መቀሌ ላይ ስለመሰገዱ በመዘገብ ለኢትዮጵያ ህዝብ ነግረዋል !! የመንግስት " መላ ሀገሪቱ " የተሰኘው ካርታ በዚህ ኬዝ ቢያንስ እስከ መቀሌ ይደርሳል:, የመጅሊሱስ?
በስትራቴጅና በልምድ አልያም በደመነፍስ የሚሰሩ ስራዎች ልዩነታቸው ግልፅ ነው! ለማለት ነው :: ይሄው ነው!"

05/26/2026

⭐🌙⭐🌙⭐🌙⭐🌙⭐🌙⭐
ወድ ተከታታዮቻችን - ኢድ ሙባረክ - እንኳን አደረሳችሁ
⭐🌙⭐🌙⭐🌙⭐🌙⭐🌙⭐

እንኳን ለዒድ አል-አድሐ በዓል
አደረሳችሁ!
ይህ በዓል የኡማው አንድነት
የሚጠናከርበት፣ በአጠቃላይም ህዝባችን
በፍቅርና በሰላም የሚኖርበት
እንዲሆን ምኞታችን ነው።

🔺 መልካም የዒድ በዓል ይሁንላችሁ!🔺

05/24/2026

📌 ከመደጋገፍ ወደ መጠላለፍ፡ የጀመዓዎች አላማና- የመበስበስ ሚስጥር
♦️♦️♦️

በአንድ ሀገር ውስጥ የሙስሊሙን መንፈሳዊ፣ ማህበራዊና ኢኮኖሚያዊ ለውጦችን ለማምጣት የሚቋቋሙ ጀመዓዎች መነሻ ራዕይ የተቀደሰ መሆኑ እሙን ነው። አብዛኞቹ የሚቋቋሙት የአማኙን እውቀት ለማሳደግ偏 ስነ ምግባሩን ለማነፅ፣ ህይወቱን ለማሻሻል እንዲሁም በሚኖሩበት ሀገር ፍትህን ለማስፈን እና ወደ እድገት ማማ ለማውጣት በማለም ነው።
ሆኖም ግን፣ በታሪክም ሆነ በወቅታዊ ተጨባጭ ሁኔታዎች በተደጋጋሚ የሚታይ አንድ አሳዛኝ እውነት አለ፦ ሙስሊሙን ኡማ በሁለንተናዊ መልኩ ለማሳደግ የተነሱ ጀመዓዎች፣ በሂደት ፊታቸውን ወደ እርስ በእርስ ፍጅትና ጠላትነት ያዞራሉ። በውስጣቸው ያሉ ታላላቅ ምሁራን፣ ኡስታዞችና ሸኾች ከኢስላማዊ ማንነት ይልቅ ለቡድናዊ ማንነታቸውና ጥቅማቸው ጥብቅና ሲቆሙ ይታያሉ።
እነዚህ የለውጥ መሳርያ መሆን የነበረባቸው ጀመዓዎች ራሳቸው የችግሩ አካል የሚሆኑበት “ቡድናዊ ስብራት” ለምን ይከሰታል? ምክንያቶቹን እና መውጫ መንገዶቹን (በአላህ ፍቃድ) በዚህ አጭር ፅሁፍ በዚህ ዘርፍ ተመራማሪ ለሆኑ ሙስሊም ምሁራን መነሻ ሃሳብ ይሆን ዘንድ ካሳለፍኩት ትንሽዬ የዳዕዋ ስራ ተሞክሮዬ በመነሳት ለመዳሰስ እሞክራለሁ።
1️⃣ የቀልብ መቆሸሽ እና የጀመዓ ህልውና አባዜ
በየትኛውም ጀመዓ ውስጥ የኒያ (የግብ) መቀየር የጀመዓው "እጅ እጅ ማለት" ዋናው መንስኤ ነው። የትኛውም ጀመዓ ሲቋቋም “ኢስላምንና ሙስሊሙን ኡማ መኻደም" ዋና ግቡ መሆኑ ግልፅ ነው። ነገር ግን ጀመዓው አድጎ የራሱ መዋቅር፣ በጀት፣ ቢሮክራሲ እና የስልጣን ተዋረድ ሲኖረው፣ የውስጥ አባላቱ ትኩረት (ኒያ) ሳይታወቃቸው ይለወጣል።
ዋናው ትኩረት ኢስላምን መኻደም መሆኑ ቀርቶ “ጀመዓውን ማቆየት፣ ሰፊ ገቢ (በጀት) ማግኘት፣ ተደራሽነትን ማስፋት እና ከሁሉም ጀመዓዎች የበላይ መሆን እንዲሁም መጅሊስን የመሰሉ ህዝባዊ ተቋማትን መቆጣጠር” ይሆናል። በዚህ ጊዜ ጀመዓው ራሱን እንደ አንድ ኢስላማዊ ጀመዓ ሳይሆን ራሱ ኢስላምና የኢስላም ብቸኛ ተወካይ አድርጎ ማየት ይጀምራል። ከእሱ ውጭ ያሉ ተመሳሳይ አላማ ይዘው የተነሱ ጀመዓዎች ደግሞ እንደ አጋር ሳይሆን፣ የህልውና እና የጥቅም ተቀናቃኝ (ወይም ጠላት) ተደርገው መወሰድ ይጀምራሉ። ለጥቆ የሚከሰተውን ሙሲባ መመልከት የሚችል ሁሉ በገሀዱ አለም እየተመለከተው ስለሆነ፣ እዚህ ጋር መዘርዘሩ የተከበረውን አንባቢዬን ጊዜ በማቃጠል አላህ ፊት እንዳልጠይቅ እሰጋለሁ።
2️⃣ “እኛ እና እነሱ”፦ የቡድን ጭፍንነት ስነ-ልቦና
የሰው ልጅ ስነ-ልቦና በቡድን የመደራጀት እና ለገዛ ቡድኑ የማድላት ተፈጥሯዊ ዝንባሌ አለው። በጀመዓዎች ወይም በቡድኖች ውስጥ ያሉ አክቲቪስቶች፣ ምሁራንና ኡስታዞች አብዛኛውን ጊዜያቸውን፣ ጉልበታቸውን እና ማህበራዊ ህይወታቸውን የሚያሳልፉት በጀመዓው መዋቅር ውስጥ ነው። ይህም “እኛ” (የእኛ ጀመዓ አባላት) እና “እነሱ” (ከእኛ ውጭ ያሉ ጀመዓዎች) የሚል አደገኛ ስነ-ልቦናዊ ክፍፍል ይፈጥራል።
በዚህ ሂደት ውስጥ የጋራ ኢስላማዊ ማንነት ይደበዝዝና ቡድናዊ ማንነት ይገዝፋል። ምሁራንና ኡስታዞች ከኢስላም ይልቅ ለጀመዓው ባላቸው ታማኝነት መለካት ይጀምራሉ። የዚህ ስነ-ልቦና አደገኛው ጎን፣ ሌላው ጀመዓ የሚያደርገው እንቅስቃሴ ለኢስላምና ለሙስሊሙ ኡማ የሚጠቅም ቢሆን እንኳን “ከእነሱ” የመጣ ስላልሆነ ብቻ ውድቅ የማድረግ ወይም የማጠልሸት ዝንባሌ መፈጠሩ ነው። የዚህንም ተጨባጭ ውጤት ለተከበረው አንባቢዬ እተዋለሁ።
3️⃣ የፊክራ አክራሪነት
ጀመዓዎች ወይም ቡድኖች የራሳቸው የሆነ መርሃ-ግብር እና ርዕዮተ-ዓለም አላቸው። በውስጣቸው ያሉ ምሁራንና ኡስታዞች ይህንን መርሃ-ግብር ብቸኛው “ሙስሉሙን ኡማ ማዳኛ መንገድ” አድርገው የመውሰድ አዝማሚያ ያሳያሉ። ይህ ሲሆን የሚከተሉት ችግሮች ይከሰታሉ፦
~ የሃሳብ መድረቅ፦ ከራሳቸው መስመር ውጭ ያሉ አማራጭ መንገዶችንና የተሻሉ ሃሳቦችን ማስተናገድ ያቅታቸዋል።

~ የባለቤትነት ሽሚያ፦ “ሙስሊሙ ኡማ ሊድን የሚችለው በእኛ መንገድ ብቻ ነው” የሚለው እምነት፣ ሌላውን አካል እንደ አጋዥ ሳይሆን ኡማውን ወደ ተሳሳተ አቅጣጫ እንደሚመራ የኢስላም ጠላት አድርጎ የመፈረጅ አባዜን ይወልዳል። ይህ ጭፍንነት በመልካም "ኒያ" የተነሱ ጀመዓዎችን እርስ በእርስ እንዲፋለሙ እና የሞት ሽረት ጠላትነት ውስጥ ይከታቸዋል።
4️⃣ የአመራሩ ጥቅምና ስጋት
የጀመዓው አመራር ነገሮችን በቁርኣንና ሐዲስ መነፅር ከመመልከት ይልቅ ከጀመዓ ጥቅም አንፃር የመመልከቱ ምክንያት የግል ጥቅምን እና ዝናን አስጠብቆ የመጓዝ አባዜ ነው። በብዙ ጀመዓዎችና ስብስቦች ውስጥ ከፊት የመሆን፣ የእውቅና፣ የዝና፣ የጥቅማጥቅም ዋስትና መስፈርቱ “ለስብስቡ ወይም ለጀመዓው መስመር ታማኝ መሆን” እንጂ “ለእውነትና ለፍትሕ መቆም” አይደለም።
አንድ ሙስሊም ምሁር ለሙስሊሙ ኡማ ይበጃል ብሎ የጀመዓውን ስህተት በግልጽ ከተናገረ፣ ከጥቅማጥቅም መገለል ብቻ ሳይሆን እንደ ከሃዲ ሊቆጠር ይችላል። ይህ ፍርሃት ሙስሊም ምሁራን የህሊና ነጻነታቸውን አጥተው የጀመዓው አስፈጻሚ እና የጭፍን ትረካዎች ጠበቃ እንዲሆኑ ያስገድዳቸዋል።
💡 መደምደሚያ እና መውጫ መንገድ
~~~~~~~
ሙስሊሙን ኡማ ለመኻደም ጀመዓ ወይም ቡድን ወይም ድርጅት ማቋቋም እጅግ አስፈላጊ መሣሪያ መሆኑ እሙን ነው። ነገር ግን መሣሪያው ራሱ ግብ መሆን የጀመረ ዕለት አደጋው የከፋ ይሆናል። ታዲያ እነዚህ በንፁህ ኒያ የተመሰረቱ ጀመዓዎች (ተብሊግ፣ ኢኽዋን፣ ሰለፊ፣ ሱፊ…) ሙስሊሙን ከማገልገል ወጥተው ወደ መጠላለፍ እንዳይገቡ የሚከተሉት የመከላከያ መንገዶች ያስፈልጋሉ፦

📌 ኢስላማዊ የጋራ እሴቶች የበላይነት፦ ከማንኛውም ጀመዓ ወይም ስብስብ በላይ የሆኑ፣ ሁሉም የሚስማማባቸው ደማቅ ቀይ መስመሮች እና ኢስላማዊ የጋራ እሴቶች መጠበቅ የነፍስ ወከፍም የጋራ ግዴታችን በመሆኑ አላህ የሰጠንን አቅም ሁሉ በመጠቀም ልንጠብቃቸው ይገባል።

📌 ቀጣይነት ያለው ራስን መፈተሽ፦ ኢስላማዊ ጀመዓዎችና ድርጅቶች “መጀመሪያ የተነሱበትን አላማ እያገለገሉ ነው ወይስ ሌላ አላማ?” የሚለውን በገለልተኛ አካል በየወቅቱ መገምገም አለባቸው።

📌 የምሁራን የህሊና ነጻነት መከበር፦ በጀመዓዎች ወይም በስብስቦች ውስጥ ያሉ ሙስሊም ምሁራንና ኡስታዞች በነጻነት የተለየ ሃሳብ የሚያራምዱበት እና ጀመዓቸውን የሚተቹበት (Self-criticism) ባህል መገንባት አለበት።

ጀመዓ የለውጥ “መሳሪያ” እንጂ የለውጡ “መጨረሻ” አለመሆኑን ማመን ተገቢ ነው። በጥቃቅንና አነስተኛ ማንነት ተጠምቆ ትልቁን ኢስላማዊ ማንነት መሸርሸር እጅግ ግዙፍ ኃጢአት መሆኑ ፈፅሞ ሊዘነጋ አይገባም። በዚህ አይነቱ በሽታ የተጠቃ ጀመዓ፣ ከዚህ በሽታ እስካልተፈወሰ ድረስ፣ ጀመዓው የቱንም ያህል ኢስላምንና ሙስሊሙን ኡማ ያገለገለ ቢመስልም፣ አንድ ቤት እየገነባ፥ ሙሉ ከተማ እያፈረሰ መሆኑ ሊታወቅ ይገባል።

♥️ የመጨረሻ መልዕክቴ‼️
የምንወዳችሁና የምናከብራችሁ ተሰሚነት ያላችሁ ኡስታዞችና መሻኢኾች! በቡድንተኛነት ልክፍት የተመቱ ጀመዓዎችን የማከም ስራችሁን አትዘንጉ። ከበሽታቸው የማይፈወሱ የመሆናቸው ምልክቶች ከታያችሁ ወይም የማከሙ አቅም የለንም ካላችሁ ደግሞ መነካካቱን አቁሙ። እባካችሁ እናንተ ተመታችሁ፣ ሚስኪኑን ኡማ አታስመቱት። ኡማው በስንቱ ይመታ?!

በዐቂዳው ተመታ!

በአኽላቁ ተመታ!

በገንዘቡ ተመታ!

በቤተሰቡ ተመታ!

በልጆቹ ተመታ!

የመጣ ሁሉ እንደ ትራፊክ ፖሊስ ዳር እያስያዘ ይቀጣዋል! ብቻ (አልሃምዱሊላህ) አዛኙ ጌታችን አላህ አለን! የእሱ ውሳኔ ከሁሉም ውሳኔ በላይ ነው። የቀልባችንን ንፅህና በመልካም ንግግራችንና ተግባራችን መጠበቁ ላይ ይርዳን እንጂ፥ እሱ የተበዳዮች ወኪል ነው፤ ከምንፈራው ነገር ሁሉ ይጠብቀናል፣ የምንመኘውንም መልካም ነገር ሁሉ ይሰጠናል። ኢንሻአላህ!
እናንተስ ሃሳብ ምን ይመስላል?? ?
የእናንተን እይታ በኮመንት መስጫው ላይ አጋሩን!
=============
ለተጨማሪ መረጃ ቴሌግራማችንን ተቀላቀሉ
https://t.me/RNZeroFive

05/23/2026

~የአቡ ፍርድስ ማስታወሻ እና ራድዮ ነጋሺ ትዝታዎች !❤️🙏
~ የእህቶቻችን እና ወንድሞች የዋትሳብ ትግል ድምፅ ሲታወስ!❤️🙏
~~~~~~~ #አቡፍርደዉስ እንደፃፈው

ራድዮ ነጋሺ፦ ከማይክሮፎን ባሻገር የተገነባው የ20 ዓመታት ሕያው ማኅበረሰብ እና ታሪካዊ ገድል
በሳውዲ ዓረቢያ የስደት ቆይታዬ ወቅት በጋዜጠኝነት ያሳለፍኳቸው ዓመታት እና ከራድዮ ነጋሺ (Radio Negashi) ጋር የነበረኝ ትስስር በሕይወቴ ውስጥ እጅግ ጥልቅና የማይረሳ ትዝታን ጥሎ ያለፈ ትልቅ የታሪኬ ምዕራፍ ነው።
ራድዮ ነጋሺ የሙስሊሙ ማኅበረሰብ ድምፅ ሆኖ ሲነሳ "ከድምጻችን ይሰማ" ታሪካዊ ንቅናቄ አስር ዓመታት ቀድሞ ነበር። ከስዊድን (ስቶክሆልም) እየተቀነባበረ በየሳምንቱ ማክሰኞ ማክሰኞ ወደ አድማጮቹ የሚደርሰው ይህ ጣቢያ፣ ለሁለት አስርተ ዓመታት (ለ20 ዓመታት) ሙሉ ለሕዝቡ ተደራሽ በመሆን ታላቅ መንፈሳዊና ማኅበራዊ አገልግሎት አበርክቷል።
እኔ ይህንን ተቋም በአድማጭነት አውቀውና እወደው የነበረ ቢሆንም፣ በባልደረባነት የተቀላቀልኩት ግን ጣቢያው ከተመሠረተ ከ10 ዓመታት በኋላ—ያንን ታላቅና ታሪካዊ የ"ድምጻችን ይሰማ" የመብት ትግል ተከትሎ ነበር። ራድዮ ነጋሺ በወቅቱ የሕዝቡን ብሶትና የትግሉን እንቅስቃሴ በአግባቡ በማስተጋባት ረገድ ግንባር ቀደም የነበረ እውነተኛ የሕዝብ ልሳን ነበር። እኔ ጣቢያውን ከተቀላቀልኩ በኋላ፣ ተቋሙ ከወትሮው የሚዲያ አሠራር ወጣ ባለ መልኩ ቴክኖሎጂን በመጠቀም በዓለም ዙሪያ ያሉ ሙስሊሞችን ልብ ያገናኘባቸውና አዳዲስ አብዮቶችን የፈጠረባቸው ድንቅ ማኅበረሰባዊ ተግባራት ተጀመሩ
1. የዕለት ተዕለት የመጽሐፍ ትረካዎች በዋትስአፕ (WhatsApp)
ሚዲያው ከሳምንታዊ ከአየር ሰዓት በተጨማሪ በዋትሳብ ወደ እያንዳንዱ ሰው ስልክ ዘልቆ መግባት የቻለበት አንዱ ትልቅ ስኬት በዋትስአፕ የተጀመረው መድረክ ነበር። በየዕለቱ በርካታ እህቶችና ወንድሞች ድምፃቸውንና ጊዜያቸውን መሥዋዕት በማድረግ፣ ጠቃሚ ኢስላማዊና ማኅበራዊ መጻሕፍትን በድምፅ እየተረኩ ለሺዎች ያደርሱ ነበር።
ይህ ጥረት ስደት ላይ ሆኖ መጻሕፍትን ለማግኘትና ለማንበብ ጊዜና ዕድሉ ለሌላቸው ወገኖች ትልቅ የእውቀት አምባ መሆን ችሎ ነበር።
2. የዙም (Zoom) ስቱዲዮ የጋዜጠኝነት ሥልጠናዎች
ተቋሙ ትግሉን በእውቀትና በጋዜጠኝነት ስነ ምግባር የታነፀ ትግል እንዲሆን ለማድረግ ስልጠና መስጠት ግድ ነበር ።
አዳዲስ አቅሞችን የሚፈጥር ማዕከልም ነበር በዘርፉ በሳልና ስመ-ጥር በሆኑ የሚዲያ ጋዜጠኝነት ባለሙያዎች አማካኝነት፣ በዙም ስቱዲዮ (Zoom Studio) አማካኝነት ጥራት ያላቸው የጋዜጠኝነት ሥልጠናዎች በየጊዜው ይሰጡ ነበር። ይህ ሥልጠና ከማንበብና ማዳመጥ ወደ ተግባር የተሻገሩ፣ እንደ እኔ ያሉ በርካታ አድማጮችን ወደ ንቁ የሚዲያ ባልደረባነትና የሕዝብ ድምፅነት ያሻገረ የዕውቀት ብርሃን ነበር።
3.አቡ ሾዎ በሚል ዓለም አቀፍ የግጥም ውድድሮች እና የኪነ-ጥበብ መነቃቃት
ራድዮ ነጋሺ የኪነ-ጥበብና የስነ-ጽሑፍ ማዕከልም ነበር። በዓለም ዙሪያ በሚገኙ ሙስሊም ገጣሚዎች መካከል በየጊዜው ታላላቅ የግጥም ውድድሮችን ያዘጋጅ ነበር። ይህ መድረክ በርካታ ድንቅና ስውር ተሰጥኦ ያላቸውን ገጣሚዎች ለዓለም ያስተዋወቀ ከመሆኑም በላይ፣ ለደረጃው የሚመጥኑ ማበረታቻዎችንና ሽልማቶችን በማበርከት በዓይነቱ ብቸኛና አርአያ የሚሆን የሚዲያ ተግባር ነበረው።
4. የልበ ብርሃን ድምፅ፦ ማየት ለተሳናቸው ወገኖች የተደረገ ተደራሽነት
ከሁሉ በላይ የራድዮ ነጋሺን የሰብአዊነት ልክ የሚያሳየው ማየት ለተሳናቸው ሙስሊም እህቶችና ወንድሞች ያደረገው ልዩ ድጋፍ ነው። የዕውቀት ብርሃን ለሁሉም እኩል መድረስ አለበት በሚል እምነት፣ የተለያዩ ኢስላማዊ መጽሔቶችንና ጽሑፎችን በድምፅ በመተረክና በማዘጋጀት እውቀቱ በቀላሉ እንዲደርሳቸው ይደረግ ነበር። ይህ ተግባር በጨለማ ውስጥ ላሉ ወገኖች የእውቀትና የእምነት ብርሃን የፈነጠቀ፣ ታላቅ የበጎ አድራጎት ገድል ነበር።
ከስቶክሆልም ማክሰኞ ማክሰኞ ይተላለፍ ከነበረው የ20 ዓመታት ታሪክ ጀምሮ፣ በ"ድምጻችን ይሰማ" ወቅት የነበረው ግንባር ቀደም ተጋድሎ፣ ከዚያም በዋትስአፕ፣ በዙምና በሰብአዊ ተግባራት የዘለቀው የራድዮ ነጋሺ ጉዞ ቀላል የሚባል ታሪክ አይደለም። እኔም መጀመሪያ በአድማጭነት፣ በኋላም በትግሉ ማግስት በታሪካዊ አጋጣሚ የሥራው ባልደረባ በመሆን ያሳለፍኳቸው የሳውዲ የኑሮ ዓመታት ዛሬም ድረስ በኩራትና በትዝታ የምመለከተው ታላቅ የሕይወቴ አሻራ ነው።

05/22/2026

📌 ማንም ይሁን ማን በስህተቱ ልክ **ብቻ** ይተቻል፣ ተጠያቂም ይሆናል!
~~~~~~~~
✍️
አንድ ማህበረሰብ ጤናማ በሆነ መልኩ ሊገነባ የሚችለው፣ የማህበረሰቡ አባላት በሙሉ የሚመሩበት እኩል የሥነ-ምግባርና የህግ ሚዛን ሲኖር ብቻ ነው። ከእነዚህ መሰረታዊ መርሆች መካከል ዋነኛው፦ ማንም ይሁን ማን ከተሳሳተ በስህተቱ ልክ ብቻ ሊገሰፅና ተጠያቂ ሊሆን ይገባል የሚለው ነው።
🔹 ኃላፊነት፣ ግልፅነትና ተጠያቂነት የአንድ የበሰለ ማህበረሰብ መገለጫዎች ናቸው።
🔹 ስህተት በዘር፣ በሃይማኖት ወይም በስልጣን ደረጃ ታይቶ አይመዘንም።
🔹 ግለሰቡ የቱንም ያህል ተሰሚነትና ዝና ይኑረው—ኡስታዝም ይሁን ፈላስፋ፣ ወይንም ተራ አማኝ—በሰራው ጥፋት ልክ ብቻ ተጠያቂ መሆኑን ፈፅሞ ልንዘነጋው አይገባም።
🔍 በሰሞኑ አጀንዳዎች ዙሪያ...
ሰሙኑን አንድ ኡስታዝ "አላህ በህልሜ አናገረኝ" ሲሉ፣ ሌላኛው ፈላስፋ ደግሞ "ሙስሊምም ክርስቲያንም አይደለሁም" ማለቱ በማህበራዊ ሚዲያ ሲዘዋወር ሰንብቷል።
እነዚህን እጅግ አወዛጋቢ መልዕክቶች አብዛኛው ሙስሊም ማህበረሰብ አጨብጭቦ ከመቀበል ይልቅ፣ ከግለሰቦቹ ዝናና ማእረግ በላይ ለእምነቱ እውነት በመቆም ይህንን ስህተት ለማረም በገባው መጠን ሲረባረብ ታይቷል-ይህም አስደሳች ግብረ-መልስ ነበር ባይ ነኝ!
"የግለሰቦች ክብር ሁሌም መጠበቅ አለበት!" የሚለው መርህ የማይናወጥ አቋማችን ቢሆንም፣ የእምነታችንን አጥር ለመናድ መሞከር ግን በፍጹም የማይደፈር ደማቅ ቀይ መስመር ነው! 🛑
💡 ከተሰጡት ማብራሪያዎች ምን እንረዳለን?
የኡስታዙ ማብራሪያ፦ በማህረሰባችን ትችትና ወቀሳ ምክንያት ከላይ የጠቀስነው ኡስታዝ "አላህ አናገረኝ" ያለዉን -ለማስተላለፍ የፈለጉት "ኢልሃም" (ጌታዬ አሳወቀኝ) ማለታቸው እንደሆነ በመግለጽ፣ በተደበሰበሰ መልኩም ቢሆን ስህተታቸውን አምነዋል። አልሃምዱሊላህ! ነገር ግን "አላህ በህልሜ አናገረኝ" የሚለው ቃል ራሱ አደብ ማጣት መሆኑ ሊሰመርበት ይገባል።
የፈላስፋው ማብራሪያ፦ "ሙስሊምም፣ ክርስቲያንም አይደለሁም" ያለው ፈላስፋ ደግሞ "በቃል እንጂ በተግባር ሙስሊም አይደለሁም" ለማለት የፈለገ አስመስሎ ረዥም ንግግር አድርጓል። አልሃምዱሊላህ! ይሁን እንጂ፣ ጉዳዩ እሱ እንደሚለው ስለ ተግባር ከሆነ "በተግባር ሙስሊምም ክርስቲያንም አይደለሁም" ማለት ጨርሶ ስሜት አይሰጥም። ቢያንስ "ክርስቲያን" የሚለውን ቃል ሳይጨምር "ሙስሊም አይደለሁም" ቢል ኖሮ ምን ማለቱ እንደሆነ መገመት ይቻል ነበር።
✊ የማህበረሰባችን ንቃትና የተገኘው ትምህርት
ታዳጊው ትውልድ ፈጣሪውን (አላህን) እንዳይዳፈር እንዲሁም የክህደትን ቃላት ከአንደበት ማውጣት በዋዛ እንዳይመለከት የተደረገው ርብርብ እጅግ የሚያስመሰግን ነው። ይህ እንቅስቃሴ የማህበረሰባችንን ጤናማ እድገትና "ሁሉም ሰው በእኩል ደረጃ ተጠያቂ ነው" የሚለውን የእስልምና እሴት በተግባር ያሳየ ነው።
ይህንን ንቁ ትውልድ ላሳየኸኝ፣ ኡስታዙንና ፈላስፋውንም በጓሮ በር ወደ ሀቁ ለመለስካቸው አምላኬ የዘላለም ክብርና ምስጋና ይገባህ! አልሃምዱሊላህ! 🤲
⚠️ አንድ ማሳሰቢያ፦
ምክንያታችን ምንም ይሁን ምን፣ ለጉዳዩ ሊሰጠው ከሚገባው ክብደት ለማሳነስም ይሁን ለማጋነን የምንሞክር ሰዎች አላህን እንፍራ! ለማለት እወዳለሁ፡፡
ሁላችንም ተሳሳች ነንና- የተሳሳተ ሰው በተሳሳተው ልክ የመጠየቅ ልምድ ሲዳብር፤ ፍርሃት ሳይሆን መከባበር፣ መበቀል ሳይሆን መተራረም የሰፈነበት ጠንካራ ማህበረሰብ መገንባት ይቻላልና።
እናንተስ ሃሳብ ምን ይመስላል?? ?
የእናንተን እይታ በኮመንት መስጫው ላይ አጋሩን! 👇
=============
ለተጨማሪ መረጃ ቴሌግራማችንን ተቀላቀሉ
https://t.me/RNZeroFive See less See less

#ተጠያቂነት #እኩልነት

RN05

06/04/2026

06/04/2026

06/03/2026

06/03/2026

05/27/2026

05/26/2026

05/24/2026

05/23/2026

05/22/2026

Address

Telephone

Website

Alerts

Contact The Business

Shortcuts

Share

Category