12/12/2025
Prokuroria pranë Gjykatës së Shkallës së Parë të Juridiksionit të Përgjithshëm Shkodër ka përfunduar hetimet dhe ka dërguar për gjykim një punonjës policie, kryeinspektorin e IMT-së dhe dy inspektorë të tjerë të këtij institucioni në Bashkinë Vau-Dejës. Ata akuzohen për veprat penale “Shpërdorim detyre” dhe “Moskallëzim krimi”, të parashikuara nga nenet 248 dhe 300 të Kodit Penal.
Hetimet u zhvilluan në kuadër të procedimit penal nr. 457 të vitit 2025, nisur nga materiali i referuar nga Agjencia e Mbikëqyrjes Policore. Sipas Prokurorisë, nga hetimet ka rezultuar se më 9 prill 2025, në fshatrat Pistull dhe Paçram të Njësisë Administrative Hajmel, disa shtetas po kryenin ndërtime pa leje dhe se këto ndërtime po favorizoheshin nga punonjës të policisë dhe inspektorë të IMT-së në Vau-Dejës.
Prokuroria thotë se provat e mbledhura gjatë hetimit konfirmuan elementët e veprave penale dhe në përfundim janë marrë të pandehur:
A.D., punonjës i Policisë së Shtetit, me detyrë ndihmës specialist i policimit në komunitet pranë Komisariatit të Policisë Vau-Dejës. Ai akuzohet për “Moskallëzim krimi” dhe “Shpërdorim detyre”, si dhe për rrethana rënduese sipas nenit 50 të Kodit Penal. Masa e sigurisë e caktuar ndaj tij është “Detyrim për t’u paraqitur në policinë gjyqësore”.
M.L., kryeinspektor pranë IMT-së në Bashkinë Vau-Dejës, akuzohet për “Moskallëzim krimi” dhe “Shpërdorim detyre”, me rrethana rënduese sipas nenit 50 të Kodit Penal. Edhe ndaj tij është caktuar masa “Detyrim për t’u paraqitur”.
J.H., inspektore në IMT Vau-Dejës, akuzohet për të njëjtat vepra penale dhe përballet me të njëjtën masë sigurie.
D.Ll., inspektor i IMT-së në Vau-Dejës, akuzohet gjithashtu për “Moskallëzim krimi” dhe “Shpërdorim detyre”, nën masën “Detyrim për t’u paraqitur”.
B.D., akuzohet për veprën penale “Veprime që pengojnë zbulimin e së vërtetës”, parashikuar nga neni 301 i Kodit Penal.
Prokuroria Shkodër thekson se çështja i është dërguar tashmë gjykatës, ndërsa hetimet kanë konfirmuar se zyrtarët e dyshuar kanë lejuar ose kanë favorizuar ndërtimet pa leje në zonën e Vau-Dejës.
