01/05/2026
Reshjet e dendura zbulojnë dështimet infrastrukturore në Plavë–Guci
Reshjet e pandërprera atmosferike që prej tri ditësh kanë përfshirë Plavën dhe Gucinë, po nxjerrin në pah problemet serioze infrastrukturore te reja e te vjetra, veçanërisht në rrjetin rrugor. Përrenjtë që vërshojnë sa herë ka reshje të dendura, po dëshmojnë mangësitë e theksuara në projektim dhe zbatim të infrastrukturës rrugore.
Një shembull konkret është segmenti rrugor Guci–Vuthaj, konkretisht para mbërritjes te Shkëmbi i Qosajve, ku nuk është paraparë asnjë gyp apo kanal për përcjelljen e ujërave të rrëmbyeshme. Si pasojë, uji derdhet drejtpërdrejt mbi rrugë, duke dëmtuar asfaltin e ri – një rrugë e përfunduar vetëm disa javë më parë dhe ende e painauguruar.
Pamjet në terren tregojnë qartë se asfalti i sapo shtruar po dëmtohet nga vërshimet, çka ngrit pikëpyetje serioze mbi cilësinë e punimeve dhe përgjegjësinë institucionale. A ka pasur mbikëqyrje profesionale ky projekt? A është punuar sipas standardeve teknike, apo thjesht është ndjekur një trase pa analiza hidrologjike dhe pa studim real të terrenit?
Në vend që infrastruktura të ndërtohet për t’i rezistuar kushteve natyrore, duket se është lënë në mëshirë të reshjeve, me pasoja të drejtpërdrejta për buxhetin publik dhe sigurinë e qytetarëve. Asfalti i zi nuk mund të shërbejë si mbulesë për mangësitë teknike dhe abuzimin me fondet publike.
Institucionet përgjegjëse duhet të japin sqarime të menjëhershme dhe të mbajnë përgjegjësi për projektet që realizohen pa standarde, sepse çdo investim i tillë, i dëmtuar pas reshjeve të para, është dështim i hapur dhe i papranueshëm.
Video / Dëshmi nga terreni: Kelmend Ahmetaj
