07/09/2025
Pas 25 vitesh në shërbim të pandërprerë të komunitetit shqiptaro-amerikan, ALBTVUSA vijon me ritme të reja dhe ide novatore, duke sjellë për shikuesit dhe dëgjuesit kudo në botë emisionin e 53-të në historinë e tij POTCASTIN ALBTVUSA.
Gjatë këtij çerek shekulli, ALBTVUSA ka ideuar dhe realizuar 52 emisione të ndryshme, të ndërtuara me kujdes dhe pasion, duke iu përgjigjur nevojave, interesave dhe shtresave të shumta të komunitetit shqiptar në diasporë. Sot, ky televizion sjell një format modern dhe ndërveprues: PODCASTIN ALBTVUSA një hapësirë bashkëkohore komunikimi, reflektimi dhe ndërgjegjësimi.
PODCASTI ALBTVUSA do të jetë një zë i ri, por me rrënjë të thella në historinë dhe misionin e televizionit tonë një dritare e re për të nxjerrë në pah njerëz të zakonshëm me histori të jashtëzakonshme, për të ruajtur gjuhën, identitetin, kulturën dhe për të forcuar lidhjet brenda komunitetit tonë shqiptar në Amerikë dhe më gjerë.
Episodi i parë: Një nisje me dinjitet dhe vlerë
Episodi i parë i podcastit u realizua nga drejtori i ALBTVUSA, z. Gani Vila, i cili ftoi në studio një figurë shumëdimensionale të komunitetit tonë: z. Fran Gjoka biznesmen i suksesshëm, këngëtar i dashur për publikun, humanist i përkushtuar dhe atdhetar me kontribute të vyera në ruajtjen e kulturës shqiptare.
Që në fëmijëri, z. Fran Gjoka ka qenë i lidhur ngushtë me artin dhe kulturën, duke marrë pjesë në aktivitete artistike dhe duke e bërë këngën shqiptare një pjesë të pandashme të jetës së tij. Në këtë episod të parë, ai ndau me publikun kujtime të rralla, përvoja të vyera dhe projekte të mëdha që lidhen me komunitetin, kulturën dhe trashëgiminë tonë kombëtare.
Për ALBTVUSA është nder dhe privilegj që ky podcast të hapet me një personalitet si z. Fran Gjoka, i cili përfaqëson një shembull frymëzues të suksesit, modestisë dhe përkushtimit ndaj kombit.
Një ekip i përkushtuar, një zë i vetëm: ALBTVUSA PODCAST
Podcasti do të vijojë me shumë episode interesante, të realizuara nga një ekip i përzgjedhur gazetarësh me përvojë dhe pasion, secili me një qasje unike por të bashkuar në misionin e përbashkët: të sjellin zërin e komunitetit në çdo shtëpi shqiptare.
Gazetarët që do të jenë pjesë e PODCASTIT ALBTVUSA janë:
Gani Vila
Rafael Floqi
Jola Rexho
Brikena Hoxhalli
Lidia Balaj
Fran Gjoka
Ky ekip përfaqëson zërat e ndryshëm të komunitetit nga diaspora e hershme deri te gjeneratat e reja duke sjellë një mozaik të pasur temash, personalitetesh dhe përmbajtjesh.
