https://www.facebook.com/194575012631106/

90 min corner

Home
United States
Village, FL
90 min corner

Football article and analysis

11/13/2025

ကျောနံပါတ် ၉ ပြတ်လပ်မှု
▪ 90minCorner

ဒီတပတ် International break အတွက် တူချယ်ရွေးချယ်ထားတဲ့ လူစာရင်းမယ် တိုက်စစ်မှုးစစ်စစ်ဆိုလို့ ဟယ်ရီကိန်းတစ်ယောက်သာ ပါဝင်နေခဲ့တယ်။ အိုလေဝက်ကင်း၊ ဆိုလန်ကီတို့မှာ ဒဏ်ရာပြဿနာတချို့ရှိနေပြီး ဒီလက်ကလည်း နှစ်လလောက်နားလိုက်ရတဲ့ တံကောက်ကြောဒဏ်ရာကနေ သက်သာခါစလို့ တူချယ်က ရှင်းပြပါတယ်။ ရက်ရှ်ဖို့ဒ်၊ ဖိုဒန်၊ ဂေါ်ဒွန်၊ ဘိုဝင်တို့လို Versatile forward တွေပါဝင်ခဲ့တာကြောင့် အထောင်တိုက်စစ်နေရာမှာ ကစားနိုင်သူတွေရှိပေမယ့် ကျောနံပါတ် ၉ စစ်စစ်အဖြစ် အသင်းခေါင်းဆောင်ဟယ်ရီကိန်းတစ်ယောက်ကိုသာ အားကိုးရမယ့်အနေအထားပဲ။ အထက်မှာဆိုခဲ့တဲ့ တိုက်စစ်မှုးသုံးယောက်က ကိန်းအတွက် Back-up option အဖြစ် ရှိနေပေမယ့် သူတို့ရဲ့ အရည်အသွေးက အပြည့်အဝယုံကြည်စိတ်ချရရဲ့လား အာမခံချက်ရှိမနေခဲ့သလို အခြားရွေးချယ်စရာလည်း နည်းပါးလွန်းတာကို မြင်တွေ့ နိုင်ပါတယ်။ ဒီရာသီပရီးမီးယားလိဂ်မှာ အင်္ဂလိပ်တိုက်စစ်မှုး ၈ ယောက်သာ ကစားခွင့်ရထားပြီး အားလုံးထဲမှာ ဒီလက်တစ်ယောက်ပဲ ၂၆ နှစ်အောက်ဖြစ်တယ်။ ပြီးခဲ့တဲ့နွေမှာ အင်္ဂလန်ယူ-၂၁ က ယူရိုချန်ပီယံဖြစ်ခဲ့ပေမယ့် တိုက်စစ်မှုးစစ်စစ်ဆိုလို့ လက်ရှိ စတုတ်စီးတီးမှာ အငှားကစားနေတဲ့ မန်စီးတီးအကယ်ဒမီထွက် ဒီဗင်မူဘာမာတစ်ယောက်သာ ပါဝင်ခဲ့တယ်။ အင်္ဂလန်ဟာ ဟယ်ရီကိန်းအလွန်မှာ တိုက်စစ်မှုးမျိုးဆက်ပြတ်တောက်ခြင်းနဲ့ အလွန်နီးစပ်တဲ့ အခြေအနေကို ရင်ဆိုင်ရတော့မလိုဖြစ်နေခဲ့တယ်။ ဘာကြောင့်လဲ။

ဒီရာသီ အင်္ဂလိပ်တိုက်စစ်မှုးတွေထဲမှာ ပရီးမီးယားလိဂ် သွင်းဂိုးတစ်ဂိုးထက်ပိုရထားတာဆိုလို့ ၃၅ နှစ်အရွယ်ဒန်နီဝဲလ်ဘက် (၆ ဂိုး) နဲ့ ၃၃ နှစ်အရွယ် ကလမ်ဝီလ်ဆင် (၂ ဂိုး) တို့ပဲရှိနေပါတယ်။ တူချယ် တကြိမ်ရွေးခဲ့ဖူးတဲ့ အိုင်ဗန်တိုနေးကတော့ ဆော်ဒီလိဂ်မှာ ၁၁ ဂိုးအထိ ရထားတာကို မြင်ရမယ်။ တိုနေးက ဆီနီဂေါနဲ့ခြေစမ်းပွဲမှာ မိနစ်အနည်းငယ်သာ ကစားခွင့်ရခဲ့ပြီး ဒီနောက်ပိုင်းထပ်ရွေးချယ်မခံရတော့ဘူး။ အင်္ဂလန်မှာ ကျောနံပါတ် ၉ တွေ အားနည်းပြတ်တောက်လာခဲ့တဲ့ Trend က ခုမှမဟုတ်ပဲ ဖြည်းဖြည်းချင်းရုပ်လုံးပေါ်လာနေခဲ့တာ ကြာပါပြီ။ ပြီးခဲ့တဲ့ရာသီမှာ ပရီးမီးယားလိဂ်သွင်းဂိုး Double digit ကိုရောက်တာဆိုလို့ ဝက်ကင်း (၁၆ဂိုး)၊ ဒီလက် (၁၂ဂိုး)၊ ဝဲလ်ဘတ် (၁၀ဂိုး)တို့ပဲရှိခဲ့တယ်။ ၁၉၉၂-၉၃ ရာသီမှာ သွင်းဂိုး ၁၀ ဂိုးအမှတ်ကို ကျော်ဖြတ်နိုင်တဲ့ အင်္ဂလိပ်တိုက်စစ်မှုးအယောက် ၂၀ အထိ ရှိခဲ့တာနဲ့ နှိုင်းယှဥ်ကြည့်လို့ရမယ်။ ပြီးခဲ့တဲ့ရာသီ အင်္ဂလန်ကျောနံပါတ် ၉ တွေသွင်းတဲ့ဂိုးအရေအတွက် ၆၇ ဂိုးသာရှိခဲ့ပြီး ၂၀၂၀-၂၁ ရာသီကထက် တဝက်လောက်လျော့ကျသွားတာပါ။ လက်ရှိရာသီမှာ စုစုပေါင်း ၁၁ ဂိုးသာရထားပြီး ဒီနှုန်းထားအတိုင်းဆိုရင် ရာသီကုန်တဲ့အခါ ဂိုး ၄၀ ပြည့်ဖို့တောင် မလွယ်ဘူးပေါ့။ လွန်ခဲ့တဲ့နှစ် ၃၀ ကိုပြန်သွားကြည့်လိုက်ရင် ၁၉၉၃-၉၄ ရာသီမှာ အင်ဒီကိုးလ်က ၃၄ ဂိုးနဲ့ ရွှေဖိနပ်ဆုရှင်ဖြစ်ခဲ့တယ်။ နောက်တစ်ရာသီမှာ အလန်ရှီးယားက ဒီစံချိန်ကိုအမှီလိုက်တယ်။ အဲ့ဒီတုန်းက တစ်ရာသီလုံး ၄၂ ပွဲကစားရတာပါ ။

နော်ဝစ်ချ်၊ ဘလက်ဘန်းတို့မှာ ဂိုးတွေဆက်တိုက်သွင်းယူခဲ့တဲ့ တိုက်စစ်မှုးဟောင်းခရစ်ဆက်တန်က သူတို့ခေတ်ရဲ့ ကြွယ်ဝခဲ့တဲ့ အင်္ဂလန်တိုက်စစ်အရင်းအမြစ်တွေအကြောင်း အလန်ရှီးယား၊ ရော်ဘီဖောင်လာ၊ လက်စ်ဖာဒီနန်၊ အီယန်ရိုက်၊ အင်ဒီကိုးလ်၊ တက်ဒီရှရင်ဂမ်တို့နဲ့ ဥပမာပေးခဲ့တယ်။ ၁၉၉၈ ကမ္ဘာ့ဖလားမတိုင်ခင်မှာ မိုက်ကယ်အိုဝင်တောက်ပလာခဲ့ပြီး လက်ရွေးစင်အသင်းအတွက် ခြားနားတဲ့ တိုက်စစ်ပရိုဖိုင်များစွာ ရွေးချယ်စရာအသင့်ရှိနေခဲ့တယ်။ ခရစ်ဆက်တန်နဲ့အတူ SAS တိုက်စစ်အတွဲကို ပုံဖော်ခဲ့တဲ့ အလန်ရှီးယားက မော်ဒန်ဘောလုံးရဲ့ Tactical shift ဟာ လူငယ်တွေကို တိုက်စစ်မှုးတစ်ယောက်လိုကစားဖို့ မရွေးချယ်စေတော့တဲ့ အကြောင်းအရင်းတစ်ခုလို့ မှတ်ချက်ပြုတယ်။ ဘောလုံးကိုပိုကိုင်ကစားလာကြတဲ့ ဒီဘက်နေ့တွေမှာ ကစားကွက်ထဲ သိပ်ဝင်မပါရတဲ့ Traditional striker တစ်ယောက်လို ဘယ်သူမှ မကစားချင်ကြတော့တာမျိုးဖြစ်နိုင်တယ်လို့ သူကဆိုတယ်။ ၄-၄-၂ ကစားကွက်နဲ့ တိုက်စစ်မှုးနှစ်ယောက် အထောင်ထားကစားကြတဲ့ဟန်ဟာ အတိတ်မှာ ကျန်ရစ်ခဲ့တယ်။ ဂိုးသွင်းဖို့အတွက် Traditional targetman တစ်ယောက်တည်းအပေါ် မှီခိုနေဖို့မလိုတော့ပဲ တောင်ပံလူတွေက ဒီတာဝန်ကို ခွဲဝေယူလာနိုင်ကြတယ်။ ရက်ရှ်ဖို့ဒ်၊ ဆာကာတို့လို Goal scoring Winger တွေထွက်ပေါ်လာတယ်။ မိုက်ကယ်အိုဝင်က သူ့အရပ်အမောင်း၊ ကစားဟန်အရ ဒီခေတ်မှာသာဆိုရင် တောင်ပံပဲထွက်ပြီးကစားရဖို့ရှိတယ်လို့ ဖာဒီနန်နဲ့ Podcast မှာ ပြောခဲ့တယ် ။

တိုက်စစ်မှုးနှစ်ယောက်တွဲကစားရတဲ့ပုံစံကို မြင်ရဖို့မရှိတော့ဘူးထင်တယ်လို့ သူကဆက်ပြောတယ်။ အင်္ဂလန်မှာ ၁၉၉၀ ခေတ်ရဲ့တိုက်စစ်မှုးတွေ အဆက်မပြတ်ထွက်ပေါ်နေခဲ့ပေမယ့် အားလုံးက လက်ရွေးစင်အသင်းအတွက် အားကိုးခဲ့ရတာတော့မဟုတ်ဘူး။ လက်စ်ဖာဒီနန်ဆိုရင် လက်ရွေးစင်အသင်းအတွက် ၁၇ ပွဲသာ ကစားခဲ့ရတယ်။ ရော်ဘီဖောင်လာက ဒီအရေအတွက်ထက် နည်းနည်းပဲပိုတယ်။ ခရစ်ဆက်တန်က နည်းပြဂလင်းဟော်ဒယ်နဲ့ မပြေလည်မှုတွေကြောင့် လက်ရွေးစင်အသင်းကို ကျောခိုင်းခဲ့ရတယ်။ အလန်ရှီးယားရဲ့ ပွဲထွက်နေရာကို စိန်ခေါ်နိုင်သူ မရှိခဲ့ဘူးလို့ ဆိုကောင်းဆိုနိုင်ပါလိမ့်မယ်။ ဒါပေမယ့် ရွေးချယ်စရာတွေ ကြွယ်ဝနေခဲ့တာကိုတော့ ငြင်းလို့မရ။ ဒီအင်္ဂလိပ်တိုက်စစ်မှုးတွေအားလုံးဟာ ကိုယ်စီကလပ်တွေရဲ့ အဓိကဂိုးသွင်းစက်တွေဖြစ်ခဲ့ကြပြီး ပွဲထွက်ခွင့်အတွက် ပူစရာမလိုခဲ့တဲ့ အခြေအနေပေါ့။ လက်ရှိမှာတော့ ဒီရာသီ ပရီးမီးယားလိဂ်သုံးပွဲထက်ပိုကစားထားတာ ဝဲလ်ဘတ်၊ ဝက်ကင်းနဲ့ ကဲလ်ဗက်လီဝင်တို့ပဲရှိပါတယ်။ ဆိုလန်ကီ၊ အန်ကတ်တီယာတို့က တစ်ပွဲမှ ပွဲထွက်ခွင့်မရသေးဘူး။ Traditional Big Six ကလပ်တွေမှာ တိုက်စစ်လိုင်းကို ရှေ့ဆုံးကဦးဆောင်နေတဲ့ အင်္ဂလိပ်တိုက်စစ်မှုးတစ်ယောက်မှ ရှိမနေခဲ့ဘူး။ တနိုင်ငံလုံးအတိုင်းအတာနဲ့ အကယ်ဒမီတွေမှာ ကျောနံပါတ် ၉ စစ်စစ်ကစားသမားတွေကို မွေးထုတ်ပေးဖို့ ပြင်ဆင်သင့်တဲ့အချိန်ကိုရောက်လာပြီထင်တယ်။ မတော်တဆများ ကမ္ဘာ့ဖလားမတိုင်မီ ဟယ်ရီကိန်းသာ ဒဏ်ရာရသွားခဲ့ရင် သောမက်တူချယ်အတွက် အလွန်စိုးရိမ်စရာကောင်းတဲ့ အခြေအနေမျိုးဖြစ်လာပါလိမ့်မယ်။ တိုက်စစ်မှုးစစ်စစ်တွေရှားပါးပြတ်လပ်ခြင်းဟာ အင်္ဂလန်ရဲ့ 'Football is coming home' ကမ္ဘာ့ဖလားအိပ်မက်ကို နှောက်ယှက်သွားဦးမလား ဆက်လက်စောင့်ကြည့်ရပါဦးမယ်..။

Ref: The great number nine decline - where have England's strikers gone? ( BBC )

11/10/2025

ဒိုကူလေယာဥ်ဟာ
Auto-pilot စနစ် ပွင့်သွားပြီဆို..
▪ 90minCorner

အရင်ဆုံးဝန်ခံချင်တာက ဒါဟာ Hater တစ်ယောက်ရေးတဲ့စာပါ။ ကျွန်တော်က ဒိုကူကို တစ်စက်ကလေးမှခံစားလို့မရခဲ့ဘူး။ တစ်ဦးချင်းဖြတ်ကျော်မှုတွေဘယ်လောက်ကောင်းကောင်း Final delivery က ဗရမ်းဗတာဖြစ်နေမှတော့ ဘာသွားသုံးစားရတော့မလဲပေါ့။ Signature move တကွက်တည်းနဲ့ One-dimensional winger လို့ အမြဲမြင်ခဲ့တယ်။ သူ့ကို သဘောကျပါတယ်ဆိုတဲ့ ပရိသတ်တချို့ကိုရော ဒီလောက်ထိသည်းခံနေရာပေးထားတဲ့ ဂွာဒီယိုလာကိုပါ နားမလည်နိုင်ဖြစ်ခဲ့တယ်။ Decision making ကိုရောက်ရင် ထင်ရာစိုင်းချင်လာတဲ့ ဖြစ်ကတတ်ဆန်းအပြုအမှုတွေကို စိတ်ကုန်နေခဲ့တယ်။ သူ့ ရည်ရွယ်ရာမဲ့ဖြတ်တင်ဘောတွေ၊ အလေအလွင့်တွေ.. ဒီကောင်လေး ဒါထက်မပိုနိုင်တော့ပါဘူးကွာလို့ ထင်ခဲ့တယ်။ ဒီတိုင်းထပ်တူခံစားခဲ့ရတဲ့ ဒမ်ဘီလီကမှ သူ့ထက်အများကြီးအဆင့်ပိုမြင့်သေးတယ်လို့ တွေးခဲ့တယ်။ နောက်တော့ ဒမ်ဘီလီလည်း သူ့ဘဝရဲ့ တည်ငြိမ်ရင့်ကျက်မှုကို ရှာတွေ့ ပြီး ဘလွန်းဒေါပိုင်ရှင်ဖြစ်လာတယ်။ ဒိုကူက ဒမ်ဘီလီလိုပဲ မကြာသေးခင်ကမှ ချစ်သူနဲ့ လက်ထပ်ခဲ့တယ်။ ယောကျာ်းတွေရဲ့ဘဝမှာ ချစ်ခြင်းမေတ္တာနဲ့ ကိုယ်ပိုင်အသိုက်အမြုံဟာ ဘယ်လောက်ထိအရေးကြီးသလဲ ကိုယ်ဆက်တွေးနေမိတယ်။ ထားပါ.. ဒါက တစ်ပိုင်း။ ဒီရာသီအစမှာ ဒိုကူက သိသိသာသာကြီးကိုပြောင်းလဲသွားတာ။ ရှေ့ပွဲတွေမှာကတည်းက သတိထားမိလာပြီး သူ့ကိုစောင့်ကြည့်ချင်သလိုလိုတွေ ဘာတွေဖြစ်လာတယ်။ မနေ့ညက လီဗာပူးလ်နဲ့ပွဲမှာတော့ မန်စီးတီးကစားသမားဘဝ အကောင်းဆုံးပါဖော့မန့်ကို ဂွာဒီယိုလာရဲ့ ပွဲတစ်ထောင်ပြည့်၊ သူ့ရဲ့ပွဲတစ်ရာပြည့်မှာ လှပစွာခင်းကျင်းသွားခဲ့တယ်။

လီဗာပူးလ်ရဲ့ ညာခြမ်းဟာ ပြိုင်ဘက်တွေအတွက် ပစ်မှတ်ထားချင်စရာဖြစ်နေခဲ့တာ ဘယ်လောက်ကြာပြီလဲ။ ဒီရာသီ အာနေးဆလော့ရဲ့အသင်းကို ထိုးနှက်ဖို့၊ သူတို့ရဲ့ အားနည်းချက်တွေကို အသုံးချဖို့ နည်းလမ်းတွေထဲမှာ အမြင့်ဘောတွေ၊ သူတို့ခံစစ်ကို ဆွဲချဲ့ဖို့ ကြိုးစားပုံတွေ၊ Transition တွေ.. ပြီးရင် ခံစစ်တာဝန်ကို မေ့ထားလို့ရတဲ့ ဆာလာရဲ့နောက်က နေရာလွတ်ကျယ်။ ချဲလ်ဆီးကလည်း ဒီအပိုင်းကို အသုံးချဖို့ ကြိုးစားခဲ့တာပဲ။ မန်စီးတီးရဲ့ တိုက်စစ်ဆင်မှုတွေမှာ တဝက်ကျော်က လီဗာပူးလ်ခံစစ်ညာခြမ်းကိုပဲ ဦးတည်ခဲ့တယ်။ ဆာလာရဲ့ ခံစစ်တာဝန်ကို လျော့ချခဲ့တာဟာ ဒီရာသီမှမဟုတ်ပါဘူး။ ပြီးခဲ့တဲ့ရာသီကတည်းက ဒီအတိုင်းကစားပြီး ချန်ပီယံဖြစ်ခဲ့ဖူးတာပဲ။ ခုကျမှ ဘာလို့ထူးနေလဲဆိုတော့ လီဗာပူးလ်ရဲ့ ညာခြမ်းမှာ ပြောင်းလဲသွားတဲ့၊ မတည်ငြိမ်တော့တဲ့ အရွေ့တွေ ရှိနေခဲ့တာကိုး။ တစ်သင်းလုံးရဲ့ စုဖွဲ့ ရွေ့လျားမှုဟာ ပြီးခဲ့တဲ့ရာသီကလို ဟန်ချက်မျိုး၊ ရစ်သမ်မျိုးရှိမနေသလို RCB ကိုနာတေးရဲ့ Form ကလည်း အရင်လိုစိတ်မချရတော့ဘူး။ ဒီပွဲမတိုင်ခင်မှာ လီဗာပူးလ်က အက်စ်တွန်ဗီလာ၊ ရီးယဲလ်တို့ကို အသပ်ရပ်ဆုံးရင်ဆိုင်သွားနိုင်ခဲ့တာပါ။ ပြဿနာက ဒီပွဲမှာ အဲ့ဒီနှစ်ပွဲလို Intensity မျိုး Aggression မျိုးကို မပြနိုင်ခဲ့ဘူး။ Out of possession မှာရော ဘောလုံးကိုင်ထားချိန်မှာပါ လူံလောက်တဲ့ အမြန်နှုန်း၊ တိကျမှုမျိုးမရှိခဲ့တာကို မြင်ရတယ်။ မန်စီးတီးက ဘက်ပေါင်းစုံ ထောင့်စေ့နေတဲ့ပါဖော့မန့်ကို ပြသခဲ့ချိန်မှာ လီဗာပူးလ်ကတော့ ပွဲချိန်အတွင်း သူတို့ရဲ့ အားနည်းချက်တွေကို ပြင်ဆင်ဖို့မတတ်နိုင်ခဲ့ဘူး။ ဗန်ဒိုက်ရဲ့ ဂိုးသာရရင် Game ရဲ့ Momentum က ပြောင်းလဲသွားနိုင်တယ်ဆိုပေမယ့် လီဗာပူးလ်ဟာ ဒီပွဲကို ထိုက်ထိုက်တန်တန် ရှုံးနိမ့်သွားခဲ့တာပါ။ မန်စီးတီးရဲ့ နိုင်လိုစိတ်နဲ့ တိကျတဲ့ Gameplan ကို ဘယ်လိုမှမယှဥ်နိုင်ခဲ့ဘူး ။

တောင်ပံမှာပွဲထွက်လာတဲ့ ဒိုကူ၊ ချာကီတို့ရဲ့ Narrow positioning က လိီဗာပူးလ်ရဲ့လိုင်းတွေကြားမှာ Overload တွေဖြစ်ပေါ်စေခဲ့ပြီး Fullback တွေဟာ သူတို့တာဝန်ယူရမယ့် တောင်ပံလူတွေနောက်ပဲလိုက်သွားရမလို၊ ကိုယ့်ဇုန်မှာကိုယ်ပဲ ဆက်ရှိနေရတော့မလို ဝေဝါးသွားစေခဲ့တယ်။ ဖိုဒန်၊ ချာကီတို့က ဒီလို Pocket of space တွေထဲ သက်တောင့်သက်သာလှုပ်ရှားနိုင်သူတွေဖြစ်ပြီး လီဗာပူးလ်ကွင်းလယ် Engine room ဟာ ဒါကိုရပ်တန့်ဖို့အတွက် မတတ်နိုင်ခဲ့ဘူး။ နီကိုဂွန်ဇာလက်ဇ် သိပ်'ငြိမ်' လွန်းခဲ့တာကြောင့်လည်း ပါတယ်။ ဒိုကူ၊ ချာကီတို့ အတွင်းဝင်လာချိန် Flank တွေမှာ ပေါ်လာတဲ့ နေရာလွတ်ထဲ အိုရွိုင်လေ၊ နူနက်စ်တို့က ပြေးတက်ဖို့ အမြဲအဆင်သင့်ဖြစ်နေကြတယ်။ လီဗာပူးလ်ဟာ မန်စီးတီးကွင်းဘက်ခြမ်းမှာပဲ ဘောလုံးကိုပြန်ရယူဖို့ ဖိအားပေးရင်း လွတ်ထွက်သွားတဲ့ အကြိမ်တိုင်း အန္တရာယ်များတဲ့ တိုက်စစ်လမ်းကြောင်းတွေကို ခွင့်ပြုခဲ့ရတယ်။ ဒိုကူ၊ ချာကီတို့က အတွင်းကိုဝင်လာလိုက်၊ Width holder အဖြစ်ကစားလိုက် အလျဥ်းသင့်သလို ချိန်ညှိလှုပ်ရှားသွားကြတယ်။ ဒိုကူကတော့ ဒီနေ့ပွဲရဲ့ ခြွင်းချက်မရှိ သူရဲကောင်းပါပဲ။ ဘောလုံးကိုင်ထားရင်း ဖြည်းဖြည်းမှန်မှန်ရွေ့နေတဲ့ မန်စီးတီးရဲ့ ပုံဖော်မှုဟာ ဒိုကူဆီရောက်ရင် ချက်ချင်းအရှိန်တင်ပြီးသားဖြစ်သွားတယ်။ တစ်ဦးချင်းဖြတ်ကျော်မှုတွေမှာ ဒိုကူက ပါရမီပါပြီးသားပါ။ ဒီအပိုင်းတွေက သူ့အတွက် သိပ်မခက်ဘူး။ တိုးတက်လာတဲ့အပိုင်းက ဘယ်အချိန်မှာ ဆွဲတက်သွားရမလဲ၊ ဘယ်အချိန်မှာ ဘောလုံးကို လွှတ်ရမလဲ.. ဒီလိုရွေးချယ်မှုကဏ္ဍတွေ။ ဆာလာပြန်ဆင်းမလာတဲ့ ဘရက်ဒ်လေအတွက်တော့ အိပ်မက်ဆိုးညပါပဲ။ တစ်ဦးချင်းတွေမှာ ဒိုကူကို မနည်းလိုက်ထိန်းနေရသလို အိုရွိုင်လေတက်လာရင်လည်း အာရုံစိုက်ရသေးတယ်။ ဘရက်ဒ်လေကို ဘယ်လိုရွေးချယ်ရမလဲ ဗျာများသွားအောင် အကြိမ်ကြိမ်ဖိအားပေးနိုင်ခဲ့တာက မန်စီးတီးရဲ့နည်းဗျူဟာပိုင်းအောင်မြင်မှုပါပဲ။ ဘရက်ဒ်လေ-ကိုနာတေးတို့ရဲ့ မပြတ်သားမှုကနေ ဒိုကူက ပင်နယ်တီရအောင် လှုပ်ရှားသွားတယ်။ Dribble completed ၇ ကြိမ်၊ Duel won ၁၁ ကြိမ်၊ Fouls won ၄ ကြိမ်၊ ပြိုင်ဘက်ဧရိယာထဲ ထိချက် ၁၁ ကြိမ်၊ ဂိုးပေါက်ကန်ချက် ၃ ကြိမ်၊ အခွင့်အရေးဖန်တီးမှု ၃ ကြိမ်.. ဒီမှတ်တမ်းတွေအားလုံးက နှစ်ဘက်အသင်းသားတွေအားလုံးထဲ အမြင့်ဆုံးဖြစ်ခဲ့တယ်။ ဒီလို လှုပ်ရှားသက်ဝင်နေတဲ့ မမေ့နိုင်စရာ Virtuoso performance ကို လှပတဲ့ ဧရိယာပြင်ကန်ချက်၊ အနိုင်သေချာသွားစေတဲ့သွင်းဂိုးနဲ့ အနားကွပ်ပိတ်သိမ်းသွားခဲ့တော့ အီးတီဟက်ပရိသတ်တွေအတွက် အတိုင်းထက်အလွန်ပေါ့။ End product တွေကို ခုလိုမြင်တွေ့ လာရတာဟာ ဒိုကူရဲ့ Career မှာ Elite winger တစ်ယောက်ဖြစ်လာဖို့ ပထမဆုံးခြေလှမ်းတွေလား။ မန်စီးတီးတိုက်စစ်ကစားသမားတွေအတွက် ဟာလန်းဆီက သွင်းဂိုးတာဝန်ကို ခွဲဝေယူဖို့ တောင်းဆိုလာကြချိန်မှာ ချိန်သားကိုက်လား။ တည်ငြိမ်စပြုလာတဲ့ အသင်းရဲ့ ဘောလုံးရာသီအတွက် အချိုးအကွေ့လို ဖြစ်သွားစေမယ့် အပေါင်းလက္ခဏာများလား ။ ဆက်သွားပါဦး ကိုယ့်ဆရာ ။ Character development ဆိုတာ ရုပ်ရှင်တွေရဲ့စိတ်ဝင်စားစရာအကောင်းဆုံးအပိုင်းမဟုတ်လား ..။

11/09/2025

ယူနိုက်တက်က အမော်ရင်လက်ထက် ပထမဆုံးအကြိမ် ပရီးမီးယားလိဂ် ၅ ပွဲဆက် ရှုံးပွဲမရှိတဲ့ မှတ်တမ်းကို ပိုင်ဆိုင်သွားတယ်။ ပြီးခဲ့တဲ့ရာသီမှာ ရလဒ်မကောင်းခဲ့တဲ့ နော်တင်ဟမ်ဖောရက်စ်၊ စပါးတို့နဲ့ အဝေးကွင်းပွဲစဥ်တွေမှာ ဆက်တိုက်ရမှတ်တွေ စုဆောင်းထားနိုင်ခဲ့တာပါပဲ။ နိုင်သာနိုင်ခဲ့ရင် အမှတ်ပေးဇယားဒုတိယနေရာမှာ ယာယီရပ်တည်ခွင့်ရဦးမယ်ဆိုပေမယ့် ဒီအခွင့်အရေးကို ဒုတိယပိုင်းမှာ လက်လွှတ်ရတော့မလိုဖြစ်ခဲ့တယ်။ ဖောရက်စ်နဲ့ပွဲကပုံစံအတိုင်း ဒုတိယပိုင်းမှာ ပြိုင်ဘက်က ပွဲကိုအရှိန်တင်လာတဲ့အခါ ယူနိုက်တက်ဟာ ထိန်းချုပ်ဖို့ ရုန်းကန်နေရဆဲဆိုတာမြင်ရတယ်။ နှစ်သင်းစလုံးက ဘောလုံးပိုင်ဆိုင်မှု နိမ့်တဲ့ပွဲတွေမှာ ပိုအားကောင်းကြတဲ့အသင်းတွေဖြစ်ပြီး Low block ကိုဖြေရှင်းတဲ့အပိုင်းမှာ ယူနိုက်တက်က ပိုသက်တောင့်သက်သာဖြစ်တာကို တွေ့ ရမယ်။ ဦးဆောင်ဂိုးတွေရတဲ့အခါ ပွဲကို အပြီးဖြတ်ရမယ့်အပိုင်းမှာတော့ နှစ်သင်းစလုံး ကိုယ်စီအားနည်းချက်တွေရှိနေတုန်းပဲ။ နောက်ထပ်အားမရတဲ့အပိုင်းက အမော်ရင်ဟာ ပြိုင်ဘက်တွေထက် ရုပ်ပိုင်း၊ စိတ်ပိုင်းပိုအနားရထားတဲ့ လန်းဆန်းနေမယ့် သူ့အသင်းသားတွေကို ဘာလို့ခုထက်ပိုမမောင်းရသလဲဆိုတာပါပဲ။ တစ်ပတ်တစ်ပွဲနှုန်းကို Intensity အပြည့် ပွဲချိန်ပြည့်ရုန်းနိုင်ရင် ခုထက်အများကြီးပိုကောင်းမယ်လို့ထင်တယ် ။

ပွဲရဲ့အဖွင့်က အတော်ပဲ ပျင်းဖို့ကောင်းပါတယ်။ အိမ်ကွင်းနောက်ဆုံး ၁၉ ပွဲမှာ ၃ ပွဲသာနိုင်ထားတဲ့အသင်းနဲ့ အဝေးကွင်းနောက်ဆုံး ၂၅ ပွဲမှာ ၅ ပွဲသာနိုင်ထားတဲ့အသင်းနှစ်သင်းတွေ့တာကိုး။ နှစ်ဘက်စလုံးက Out of possession မှာပဲ ပိုကျစ်လစ်နေသလား၊ ဘောလုံးကိုင်ထားချိန်မှာပဲ စိတ်ကူးစိတ်သန်းကင်းမဲ့နေသလား၊ ဒါမှမဟုတ် နှစ်မျိုးစလုံးလား။ လျော့တိလျော့ရဲထိချက်တွေ၊ ပေးပို့ပုံအမှား၊ နားလည်မှုအလွဲတွေ၊ မပျက်သင့်ပဲ ပျက်နေတဲ့ ဘောလုံးတွေနဲ့ လုံးလည်ခြာလည်လိုက်နေတာကို မြင်ရမယ်။ ပွဲချိန်နာရီဝက်အရောက်မှာ နှစ်သင်းပေါင်း ပြိုင်ဘက်ဧရိယာထဲ ဘောလုံးထိချက်က သုံးကြိမ်ပဲရှိသေးတယ်။ ဒီအခြေအနေကို အာမက်ဒီယာလိုရဲ့ဖြတ်တင်ဘော၊ အမ်ဘူမိုရဲ့ ခေါင်းတိုက်ချက်ကနေ ပွဲကို လှုပ်နှိုးခဲ့တယ်။ စပါးရဲ့တုံ့ပြန်ပုံကတော့ ပထမပိုင်းတစ်ပိုင်းလုံး အားရစရာမရှိခဲ့သလို ပရိသတ်တွေရဲ့သည်းခံနိုင်စွမ်းကို စမ်းသပ်နေသလိုရှိခဲ့တယ်။ သောမဖရန့်ခ်က ပရိသတ်တွေအတွက် သူ့ကွင်းလယ်အထိုင်ကိုဖျက်ပြီး တိုက်စစ်အသားပေးဟန် ခင်းကျင်းခဲ့ပေမယ့် ဒဏ်ရာပြဿနာတွေရှိနေတဲ့ သူ့တိုက်စစ်အစုအဖွဲ့က အားနည်းချက်တွေနဲ့ပဲ။ ဒုတိယပိုင်းမှာ မူအာနီကိုထုတ်ပြီး အိုဒိုဗာ့ကို ထည့်လိုက်တဲ့ ဆုံးဖြတ်ချက်ကမှန်ကန်ပါတယ်။ စပါးက ပိုကောင်းတဲ့ တိုက်ရည်ခိုက်ရည်၊ ပိုပြင်းထန်တဲ့ Energy ကို ပြသခဲ့တယ်။ ယူနိုက်တက်က ဒီလိုအခြေအနေတွေကို တုံ့ပြန်ရာမှာ အသင်းလိုက်အနေနဲ့ ခုထက်ပိုပါးနပ်ဖို့၊ တည်ငြိမ်ဖို့လိုနေတုန်းပဲ။ စပါးရဲ့ ချေပဂိုးမတိုင်ခင်မှာ လန်မန်းက အရေးပါတဲ့ ကာကွယ်မှုနှစ်ကြိမ် ပြုလုပ်ခဲ့သေးတယ်။ စပါးရဲ့ လူစားဝင်ကစားသမားအိုဒိုဗာ့က အသင်းရဲ့သွင်းဂိုးနှစ်ဂိုးစလုံးမှာ ပါဝင်ပက်သက်ခဲ့တယ်။ ဇာဗီဆိုင်မွန်ကိုတော့ ခုချိန်ထိ အသင်းမှားပြီးရောက်လာတဲ့ ကစားသမားတစ်ယောက်လို ခံစားနေရတုန်းပဲ။ သူလှုပ်ရှားသမျှတွေက အရာမထင်၊ ဘောလုံးကို လွှတ်ရတော့မယ့်အချိန်တွေမှာ သူ့အသင်းဖော်တွေက ရောက်ရမယ့်နေရာလွတ်ဆီမရောက် တိုင်မင်လွဲနေခဲ့တယ်။

ထားပါ။ ပွဲအကြောင်းက နည်းဗျူဟာရှုထောင့်မှာ ထူးထူးခြားခြားပြောစရာအများကြီးရှိမနေဘူး။ ရစ်ချာလီဆန်ရဲ့ အနိုင်ဂိုးဟာ ပွဲရဲ့အဆုံးသတ်လို့ထင်လိုက်ရပေမယ့် စပါးကလည်း Bottle job မှာ တဖက်ကမ်းခတ်နေပြန်ရော။ ပွဲရဲ့နောက်ဆုံးမိနစ်တွေမှာ ဆက်စ်ကိုဒဏ်ရာရသွားတာကြောင့် ယူနိုက်တက်က တစ်ယောက်လျော့အနေအထား ကစားခဲ့ရပေမယ့် အဖိုးတန်ချေပဂိုးကို မရမကပြန်ရှာဖွေသွားနိုင်ခဲ့တယ်။ ဒီလို လက်ထဲကလွတ်ထွက်သွားတဲ့ Game တွေရဲ့ အစကို ပြန်ရှာဖွေဆုပ်ကိုင်ဖို့ကြိုးစားရမှာတော့ ယူနိုက်တက်ရဲ့ Mentality ဟာ သိသိသာသာတိုးတက်လာတာကို မြင်ရတယ်။ ဂိုးသမားလန်မန်း ထောင့်ကန်ဘောမှာ ရှေ့တက်လာခဲ့တာက ဒီလစ်အတွက် မထင်မှတ်ပဲ အခွင့်အရေးကောင်းတစ်ခုဖြစ်လာတယ်။ လူကပ်ထားတဲ့ဘရန်နန်ဂျွန်ဆင်ကို လန်မန်းကို အသုံးချလှည့်စားပြီး လွတ်လွတ်ကျွတ်ကျွတ် ခေါင်းတိုက်ခွင့်ကို ယူသွားတယ်။ ဘရူနိုရဲ့ အဲ့ဒီထောင့်ကန်ဘောလို Far post ကို ကွက်တိရိုက်တင်နိုင်တဲ့ Set-piece taker တွေပိုင်ဆိုင်ထားတဲ့အသင်းတိုင်းဟာ ထောင့်ကန်ဘောတွေကိုအသုံးချနိုင်ဖို့ ဖြစ်နိုင်ချေပိုမြင့်ပါလိမ့်မယ်။ ဒီလစ်အကြောင်း ပြောမယ်လုပ်ရင်း ပျိုးနေတာ အတော်လေး စာက ရှည်သွားတယ်။ ဒီရာသီ ပရီးမီးယားလိဂ် ပွဲစဥ်မိနစ်တိုင်းကို ကစားထားတဲ့နယ်သာလန်နောက်ခံလူက အမော်ရင်အတွက် အလွန်အားကိုးရတဲ့ အဓိကအစိတ်အပိုင်းတစ်ခုဖြစ်လာတယ်။ Old-school Centreback တစ်ယောက်လို သူ့ကစားဟန်က Last ditch tackle တွေအတွက် အမြဲအဆင်သင့်ရှိနေတတ်သလို အမြင့်ဘောတွေ၊ ခံစစ်လိုင်းကနေ Jump out လုပ်တာတွေမှာ ပိုပြီးတိုင်မင်ကိုက်လာတာကို မြင်ရတယ်။ ပွဲအစမှာ Right centreback အဖြစ်ကစားခဲ့ပြီး မက်ဂွိုင်းယားထွက်သွားတော့ ခံစစ်သုံးယောက်တန်းရဲ့အတွင်းနေရာကို ဝင်တယ်။ Touch map ကိုကြည့်ရင် ခံစစ်ဇုန်အနှံ့ သူ့ခြေရာတွေထပ်နေတာကို မြင်ရမှာဖြစ်ပြီး ပြိုင်ဘက်ဧရိယာထဲ တစ်ကြိမ်တည်းသောထိချက်က အဖိုးတန်ချေပဂိုးဖြစ်ခဲ့တယ်။ ဆယ်ကျော်သက်အရွယ်မှာပဲ အိုင်းယက်စ်အသင်းခေါင်းဆောင်ဖြစ်ခဲ့သူရဲ့ ကစားသမားဘဝဟာ ထင်မှတ်မထားလောက်အောင် နိမ့်မြင့်တက်ကျတွေများလွန်းခဲ့တယ်။ ဂျူဗီ၊ ဘိုင်ယန်ပရိသတ်တွေရဲ့ သူ့အပေါ်အမြင်ဟာ နှစ်ခြမ်းကွဲနေလိမ့်မယ်။ ယူနိုက်တက်မှာလည်း ပရီးမီးယားလိဂ် သမိုင်းတလျှောက် အဆိုးရွားဆုံးရာသီမှ ရောက်လာခဲ့သူဆိုတော့ ဓားခုတ်ရာလက်ဝင်လျှိုမိသလိုအဖြစ်မျိုးပဲ။ ခုတော့ တဖြည်းဖြည်း သူ့ကိုယ်ပိုင်ဟန်နဲ့ ယုံကြည်မှုကို ပြန်ရှာတွေ့လာပြီထင်တယ်။ အမော်ရင်က ဗဟိုခံစစ်မှုးတွေကို အပြောင်းအလဲလုပ်လေ့ရှိပေမယ့် ဒီလစ်ကိုတော့ Untouchable လို့ သဘောထားနေသလား။ တကယ်ပဲ သူဟာ ဒီလိုယုံကြည်ကိုးစားမှုမျိုးနဲ့ထိုက်တန်ရဲ့လား။ ရင့်ကျက်တည်ငြိမ်ခြင်းကို အသက်အရွယ်နဲ့အတူ တဖြည်းဖြည်း တည်ဆောက်လာနိုင်ပြီလား။ အနိုင်သုံးမှတ်မရလိုက်ပေမယ့် နောက်ဆုံးမိနစ်အထိ တိုက်ပွဲဝင်နိုင်စွမ်းကို ထပ်မံပြသနိုင်ခဲ့တဲ့ သရဲနီတို့အတွက် ဒီလစ်ရဲ့ စွမ်းဆောင်ရည်ဟာ ဆက်ပြီးအားကိုးနေရဦးမယ်ဆိုတာ အသေအချာပါပဲ..။

11/07/2025

နွေလွင်ပြင်ကို ဖြတ်ကျော်လာတဲ့
မိုးပြာလေညင်း
▪ 90minCorner

ပွဲစကတည်းက ဖိုဒန်ရဲ့ ကန်ချက်တွေဟာ ဒေါ့မွန်ဂိုးသမားဂရီဂေါ်ကိုဘယ်ကို အဆက်မပြတ်ခြိမ်းခြောက်နေခဲ့တာပဲ။ ပထမဆုံးကန်ချက်တကြိမ်ကနေ လျှံထွက်လာတာကို ဆယ်ဗင်ညို ပိတ်သွင်းပုံက ဂိုးပေါက်နဲ့လွဲချော်သွားခဲ့တယ်။ ဖိုဒန်ကို ကြည့်ရတာ ယုံကြည်မှုအပြည့်ရှိနေပုံရပြီး သူ့ကန်ချက်၊ သူ့အန္တရာယ်ရှိမှုကို ပြိုင်ဘက်တွေရဲ့ အတွေးထဲ စောစောစီးစီး ရိုက်သွင်းပေးထားနိုင်တာမြင်ရ။ တတိယအကြိမ်မြောက် ဂိုးပေါက်ကို ခြိမ်းခြောက်ဖို့ ကြိုးစားရမှာတော့ ဖိုဒန်ရဲ့ Low driven shot ကို ကိုဘယ် ကာကွယ်ဖို့ မဖြစ်နိုင်တော့ဘူး။ ရိုင်းဒါးဆီက ဘောလုံးကိုလက်ခံတယ်။ Half-turn တွေဟာ ဖိုဒန်လို Pocket of space တွေမှာ လှုပ်ရှားသူတွေ မဖြစ်မနေ လိုအပ်တဲ့ Skillset ပဲ။ ဒီထဲမှာမှ ဘောလုံးကို ထိန်းရင်း ခန္ဓာကိုယ်ကို ဖွင့်ပုံ၊ လှည့်ထွက်ပုံ၊ ညင်သာတဲ့ရွေ့လျားမှုဟာ တိုက်စစ်လမ်းကြောင်းအသစ်တွေ ဒါမှမဟုတ် ကိုယ်တိုင်ခြိမ်းခြောက်ဖို့အတွက် စက္ကန့်ပိုင်းအတွင်း အဆင်သင့်ဖြစ်သွားပုံ။ ကိုယ့်ဆရာဟာ ဘောလုံးကို အပျော်တမ်းကစားသူပဲဖြစ်ဖြစ် ဖိုဒန်ရဲ့ Half-turn တွေကို သတိထားစောင့်ကြည့်စေချင်တယ်။ သိပ်ကိုသပ်ရပ်တယ်။ ညက်ညောတယ်။ ဘောလုံးကိုတချက်ထိန်းရင် တချိန်တည်းမှာလှည့်ထွက်၊ နောက်တချက်ထပ်ထိ ရှေ့ကိုနည်းနည်းထုတ်၊ အဝေးတိုင်ထောင့်အောက်ခြေကို သပ်သပ်ရပ်ရပ်အဆုံးသတ်သွားခဲ့တယ်။ အပေါ်ထောင့်ထဲ ကန်တဲ့ ကန်ချက်တွေထက် ဒီလိုကန်ချက်တွေက ဂိုးသမားတွေအတွက် ပိုခက်ခဲတတ်တယ်။

ဒီပွဲမှာ ဧရိယာအပြင်ဘက်က နှစ်ဂိုးသွင်းယူပြီးတဲ့နောက် ၂၀၂၃-၂၄ ရာသီအစကနေ စ,ရေတွက်ရင် ပရီးမီးယားလိဂ်ကစားသမားတွေထဲ Outside the box သွင်းဂိုးအများဆုံးပလေယာဖြစ်လာတယ်။ ဧရိယာအပြင်ကနေ ဒီကာလအတွင်း ၁၁ ဂိုးအထိ သွင်းယူထားတယ်။ ၂၀၂၃-၂၄ မှာ ပြိုင်ပွဲစုံသွင်းဂိုး ၂၇ ဂိုးအထိ ရောက်ခဲ့တဲ့ PFA တစ်နှစ်တာအကောင်းဆုံးဆုရှင်ဟာ ပြီးခဲ့တဲ့ရာသီမှာ ခြေလှမ်းတွေအနည်းငယ်လေးလံသွားခဲ့ပေမယ့် သူ့ 'မှော်'ကို တဖြည်းဖြည်းပြန်ရလာတာမြင်ရတယ်။ ရုပ်ပိုင်း၊ စိတ်ပိုင်းဆိုင်ရာ အခက်အခဲတွေကို ရင်ဆိုင်ကျော်လွှားခဲ့ပြီးတဲ့နောက်မှာ ဖိုဒန်ရဲ့ အပြုံးတွေ ပြန်ပြီးတောက်ပအသက်ဝင်လာခဲ့တယ်။ ' ဖီးလ် ပြန်လာပြီ' လို့ ဂွာဒီယိုလာက ပွဲပြီးအင်တာဗျူးမှာ ပြောတယ်။ " ဒီလိုဂိုးတွေ သူ့ဆီကနေ ဘယ်နှခေါက်လောက်မြင်ရပြီးပြီလဲ။ ဒီလိုကန်ချက်တွေအတွက် သူယုံကြည်မှုအပြည့်ပြန်ဖြစ်လာတာကို ကျွန်တော်ကြိုဆိုပါတယ်။ အားထည့်ကန်ရတဲ့ ကန်ချက်မျိုးမဟုတ်ပဲ ဂိုးတိုင်ခြေကိုချိန်ရွယ်ပြီး တိတိကျကျအဆုံးသတ်ရသလိုမျိုး၊ ဂိုးပိုက်နဲ့ အပေးအယူလုပ်ရသလိုမျိုး သိပ်လှတဲ့အဆုံးသတ်တွေပဲ " တဲ့။ ၂၀၂၃ ဒီဇင်ဘာနဲ့ ၂၀၂၄ မေလကြားမှာ အဝေးကန်ချက်တွေနဲ့ ၈ ဂိုးသွင်းယူခဲ့တယ်။ ရီးယဲလ်ဘက်ကို သွင်းတဲ့ဂိုး၊ ဆုဖလားကိုကိုင်မြှောက်မယ့် နောက်ဆုံးနေ့မှာ သွင်းတဲ့ဂိုးတွေဟာ ဖိုဒန်ရဲ့ သင်္ကေတလို။

ပုံစံတူသွင်းဂိုးနှစ်ဂိုးသွင်းခဲ့တဲ့ ဖိုဒန်ရဲ့ ပါဖော့မန့်မှာ မြင်ရတဲ့နောက်တစ်ချက်က သူနဲ့ဟာလန်းကြားက နားလည်မှု၊ ချိတ်ဆက်မှု။ ဟာလန်းလိုတိုက်စစ်မှုးတစ်ယောက်ကိုရင်ဆိုင်ရတဲ့အခါ ဘယ်လိုပြိုင်ဘက်နောက်ခံလူမဆ်ို သူ့ကိုပဲ ပိုအာရုံစိုက်ရမှာပဲ။ ဒါကသဘာဝပဲ။ ဆိုတော့ ဟာလန်းရဲ့ အရွေ့တချို့ကနေ ပေါ်လာတဲ့ နေရာလွတ်တွေမှာ ဖိုဒန်က အရိပ်လို လှုပ်ရှားပါတယ်။ Traditional တိုက်စစ်မှုးနှစ်ယောက်ပုံစံမျိုးမဟုတ်ပေမယ့် Final 3rd မှာ နီးနီးကပ်ကပ်အလုပ်လုပ်ကြတဲ့ သူတို့ပုံစံက တကယ့် တိုက်စစ် Partnership လို ရုပ်လုံးကြွနေတာကို မြင်ရတယ်။ ဒေါ့မွန်နဲ့ပွဲက အဖွင့်ဂိုးမှာ နီကိုဂွန်ဇာလက်ဇ်ဆီက ဘောလုံးကို ရိုင်းဒါးလက်ခံတယ်။ ဆယ်ဗင်ညိုက Width holder အဖြစ် Touchline နားမှာ ရှိနေတယ်။ ဒီမှာတခုဖြတ်ပြီးပြောချင်တာက မန်စီးတီးရဲ့ Ball circulation တွေဟာ အရင်လို လေးနေ အီနေတာမျိုးမရှိတော့ပဲ တဖြည်းဖြည်းပိုပြီး သွက်လက်တာကို မြင်နေရပြီထင်တယ်။ ရိုင်းဒါးက ဖိုဒန်ကို ပေးလိုက်ချိန်မှာ ဟာလန်းက စပြီးရွေ့တယ်။ ရှလော့တာဘက်၊ အန်တွမ်တို့က ဘောလုံးကိုကြည့်နေရင်းပဲ ဟာလန်းဆီကို အာရုံပိုရောက်သွားတယ်။ ဒီစက္ကန့်ပိုင်းအတွင်းရတဲ့ အခွင့်အရေးကို ဖိုဒန်က ချက်ချင်းပဲ ခပ်မြန်မြန်အသုံးချသွားတယ်။ ဒီလိုသူတို့ကြားက တယ်လီပသီကို ပွဲအများစုမှာ မြင်တွေ့လာရတယ်။ ဖိုဒန်အတွက် ဆွဲတက်လာဖို့ ဒါမှမဟုတ် ပိုပြီးလွတ်လွတ်လပ်လပ်လှုပ်ရှားခွင့်ရဖို့ ဟာလန်းက ခံစစ်မှုးတွေကို Drag လုပ်သွားတယ်။ ဟာလန်းကို ကစားကွက်ထဲသိပ်ဝင်ပါလေ့မရှိတဲ့ တိုက်စစ်မှုးလို့ မြင်နေရင် ဒီလို ကစားကွက်အတွက် အရေးပါတဲ့၊ တကိုယ်ကောင်းမဆန်တဲ့ Subtle movement တွေရဲ့ တန်ဖိုးကိုသတိရစေချင်တယ် ။

ဟာလန်းနဲ့ ဖိုဒန်ကြားက Chemistry ဟာ မန်စီးတီးတိုက်စစ်ရဲ့ အဓိက အစိိတ်အပိုင်းဖြစ်လာပြီး ဒိုကူရဲ့ တစ်ဦးချင်းဖြတ်ကျော်နိုင်စွမ်း၊ ရိုင်းဒါးရဲ့ ညက်ညောတဲ့ အနီးကပ်တွဲလုံးတွေ၊ ညာခြမ်းမှာ ချာကီရဲ့ အရည်အသွေး.. ဒါတွေကို ပေါင်းထည့်လိုက်ရင် တဖြည်းဖြည်းပို Fluid ဖြစ်လာမယ့် တိုက်စစ်ဟာ ဟာလန်းတစ်ယောက်ရဲ့ သွင်းဂိုးတွေအပေါ် မှီခိုနေရခြင်းကို လျှော့ချပေးနိုင်မယ်လို့ ယူဆနိုင်တယ်။ ဆယ်ဗင်ညိုကို အားမရပေမယ့် ဒေါ့မွန်နဲ့ပွဲ ပထမပိုင်းမှာတော့ တော်တော်လေးလှုပ်နိုင်တာမြင်ရတယ်။ အားရစရာအကောင်းဆုံးကတော့ ဖိုဒန်ခုလို ယုံကြည်မှုအပြည့်၊ တက်ကြွမှုအပြည့် ပြန်ဖြစ်လာတာပါပဲ။ နာပိုလီနဲ့ပွဲက ဟာလန်းအတွက် ဖန်တီးပေးသွားပုံ၊ ဒေါ့မွန်နဲ့ပွဲက ဒုတိယဂိုးတွေမှာ Tight space တွေထဲ အချိန်၊နေရာလွတ်အနည်းငယ်ရရုံနဲ့ ပြိုင်ဘက်ကို အငိုက်မိသွားစေမယ့်လှုပ်ရှားမှုတွေနဲ့ ဖိုဒန်အစစ်ကို ပြန်မြင်ရတယ်။ မကြာသေးခင်ကပဲ သောမက်တူချယ်က လာမယ့် International break အတွက် အင်္ဂလန်လူစာရင်းကို ကြေငြာသွားတော့ ဖိုဒန်ရဲ့ နာမည် တကျော့ပြန်ပါဝင်လာတယ်။ လွန်ခဲ့တဲ့တစ်နှစ်ကျော်က PFA တစ်နှစ်တာအကောင်းဆုံးဆုရှင်တစ်ယောက် လက်ရွေးစင်အသင်းဆီပြန်ရောက်လာဖို့ ကြိုးစားလိုက်ရတယ်ဆိုတာ တမျိုးဖြစ်နေနိုင်ပေမယ့် ဖိုဒန်ဟာ ဒီနေရာကိုပြန်ရောက်ဖို့ တကယ်ပဲအပြင်းအထန်အလုပ်လုပ်ခဲ့ရပါတယ်။ ဒါပေမယ့် ဒီမှာပဲရပ်သွားလို့မရသေး။ ဖိုဒန်နဲ့အတူ ဘယ်လင်ဟမ်လည်း ပြန်ပါလာတယ်။ တူချယ်ရဲ့ Number 10 position အတွက် ဆက်ပြီးတိုက်ပွဲဝင်ရဦးမယ့်အဓိပ္ပါယ်ပေါ့။ သူတို့ဝေးနေချိန်မှာ တူချယ်ဆီက ယုံကြည်မှုကိုယူထားနိုင်တဲ့ မော်ဂန်ရော်ဂျာစ်၊ အစ်ဇီးတို့လည်း ရှိနေသေးတယ်မဟုတ်လား။ ဘာပဲဖြစ်ဖြစ် ဒီလို Form မျိုး၊ စွမ်းဆောင်ရည်မျိုးတွေနဲ့ဆိုရင် ဖိုဒန်ရဲ့အရည်အသွေးဟာ ချန်ထားလို့မရမယ့် တူချယ်အတွက် ခေါင်းခဲစရာကိစ္စတစ်ခုဖြစ်လာမှာ အသေအချာပါပဲ။ မန်စီးတီးရဲ့ မတင်တကျဘောလုံးရာသီအတွက်လည်း ဖိုဒန်ကိုပြန်ရလိုက်ခြင်းဟာ အချိုးအကွေ့တစ်ခုဖြစ်လာပါလိမ့်မယ်..။

10/31/2025

ရူဘန်အမော်ရင် တစ်နှစ်တာ
▪ 90minCorner

ဆာဂျင်ရက်ကလစ်ဖ်၊ CEO အိုမာဘရာဒါနဲ့ နည်းစနစ်ဒါရိုက်တာဂျေဆန်ဝီးလ်ကောက်တို့အတွက် သူတို့ရဲ့လက်ထက် ပထမဆုံးတရားဝင်နည်းပြတစ်ယောက်ကို ခန့်အပ်တဲ့ ခြေလှမ်းမှာစတင်ခဲ့တယ်။ ဆာအဲလက်စ်နောက်ပိုင်း အထည်ကြီးပျက်ဘဝရောက်လာတဲ့ယူနိုက်တက်ကို ဝယ်ယူခဲ့ပြီးနောက်မှာ ရက်ကလစ်ဖ်နဲ့ INEOS က ပြုပြင်ပြောင်းလဲမှုများစွာ ပုံဖော်ခဲ့ကြတယ်။ အသင်းရဲ့ လေ့ကျင့်ရေးကွင်း၊ အသုံးအဆောင်တွေကနေ ဝန်ထမ်းအရေအတွက်၊ ဖွဲ့စည်းပုံတွေအထိ ချဥ်းကပ်ပြင်ဆင်ခဲ့ကြပေမယ့် ဘောလုံးအသင်းတစ်သင်းမှာ အရေးအကြီးဆုံးနဲ့ အထင်ရှားဆုံးက ကွင်းတွင်းရလဒ်တွေကို လက်တွေ့ ပြောင်းလဲပြနိုင်ဖို့ပဲမဟုတ်လား။ ဒီမှာ ရူဘန်အမော်ရင်ကို သူတို့တညီတညွတ်တည်းရွေးချယ်ခဲ့ကြတယ်။ ပေါ်တူဂီလိဂ်မှာ ဘင်ဖီကာ၊ ပေါ်တိုတို့ရဲ့ ကြီးစိုးမှုကို ရပ်တန့်ရင်း စပို့တင်းလစ္စဘွန်းရဲ့တကျော့ပြန်ရွှေရောင်နေ့ရက်တွေကို ထုဆစ်နေခဲ့သူဟာ ဥရောပထိပ်တန်းအသင်းကြီးတွေရဲ့ ရေဒါအောက် ရောက်နေခဲ့တာပေါ့။ လီဗာပူးလ်၊ စပါးတို့ရဲ့ လျာထားစာရင်းထဲလည်း အမော်ရင်ရဲ့နာမည် ပါဝင်ခဲ့တယ်။ တချိန်တည်းမှာ ပေါ်တူဂီလိဂ်ရဲ့အဆင့်အတန်းနဲ့ ဘင်ဖီကာ၊ ပေါ်တိုတို့ရဲ့ ကျဆင်းမှုတွေ ပြီးတော့ နည်းဗျူဟာတစ်ခုတည်းအပေါ် အလွန်အကျွံမှီခိုမှုတွေ.. စသဖြင့် Red flag တချို့ကို ထောက်ပြသူတွေလည်းရှိခဲ့တာပဲ။ ဒါပေမယ့် ရက်ကလစ်ဖ်၊ အိုမာဘရာဒါနဲ့ ဝီးလ်ကောက်တို့က အမော်ရင်ကို ယုံယုံကြည်ကြည်ရွေးချယ်ခဲ့ကြတယ်။

ဒီမှာ ယူနိုက်တက်ရဲ့ အားကစားဒါရိုက်တာဟောင်းဒန်အက်ရှ်ဝေါ့သ်ကတော့ အမော်ရင်ကို ကြိုဆိုသူတွေထဲမပါဝင်ခဲ့ဘူးလို့ သတင်းတွေက ဖော်ပြခဲ့တယ်။ အက်ရှ်ဝေါ့သ်က အမော်ရင်ရောက်လာပြီးမရှေးမနှောင်း ဒီဇင်ဘာမှာ ယူနိုက်တက်ရာထူးကနေ ထွက်ခွာသွားပြီး ခုဆိုရင် FA မှာ အလုပ်ပြန်လုပ်နေပြီ။ ယူနိုက်တက်နဲ့ နီးစပ်သူတွေက ဒီဖြစ်ရပ်နှစ်ခုဟာ ဆက်စပ်မှုရှိမနေဘူးလို့လည်း ဆိုကြတယ်။ ၂၀၂၄ နွေရာသီမှာ တန်ဟက်ဂ်ကိုဆက်ထားဖို့ဆုံးဖြတ်ခဲ့ကြတာလည်း အက်ရှ်ဝေါ့သ်တစ်ယောက်တည်းရဲ့ အပြစ်မဟုတ်ပါဘူး။ ဒါပေမယ့် သူက အမော်ရင်လို နာမည်ရခါစ နည်းပြတစ်ယောက်ထက် ပရီးမီးယားလိဂ် အတွေ့ အကြုံရှိပြီးသား နည်းပြတစ်ယောက်ကို ပိုလိုချင်ခဲ့တယ်။ အက်ရှ်ဝေါ့သ်ရဲ့ Short list မှာ အက်ဒီဟောင်း၊ ဂရေဟမ်ပေါ်တာနဲ့ သောမက်ဖရန့်ခ်တို့ပါဝင်ခဲ့တယ်။ ရက်ကလစ်ဖ်တို့က ဒီစာရင်းကို စိတ်တိုင်းမကျပါဘူး။ အက်ဒီဟောင်းကို ခေါ်ဖို့ဆိုတာ လွယ်မယ့်ကိစ္စမဟုတ်မှန်း သဘောပေါက်ထားခဲ့ပြီးသားကိုး။ ဒီလိုနဲ့ တဖြည်းဖြည်း ထိပ်သီးခေါင်းဆောင်တွေရဲ့ ယုံကြည်မှုနဲ့ ဝေးကွာလာတဲ့ အက်ရှ်ဝေါ့သ်ဟာ အသင်းကနေ ထွက်ခွာသွားရတယ်။ နွေရာသီမှာ တန်ဟက်ဂ်ကိုဆက်ထားဖို့ဆုံးဖြတ်ခဲ့တဲ့ အသင်းက လျော်ကြေးပေးပြီးထုတ်ပယ်လိုက်ရတယ်။ အမော်ရင်က ရာသီတဝက်တပျက်မှာ မလာချင်ပေမယ့် ရောက်လာတယ်။ ဒီလိုအဆင့်မှာ ဒီလိုဖိအားတွေကို ရင်ဆိုင်ဖို့ဆိုတာ လူငယ်နည်းပြတစ်ယောက်အတွက် မလွယ်ကူတဲ့ကိစ္စပါပဲ။ ရလဒ်ပိုင်းဟာလည်း မတည်ငြိမ်ခဲ့တဲ့အပြင် ထင်ထားတာထက်တောင် ပိုဆိုးရွားနေတာကို မြင်ခဲ့ရတယ်။ ယူနိုက်တက်ပွဲတွေမှာ Director box ထဲ လှမ်းကြည့်တဲ့အခါ သက်ပြင်းအကြိမ်ကြိမ်ချနေရတဲ့ တာဝန်ရှိသူတွေကိုပဲ မြင်ရတယ်။ ဒီလိုနဲ့ ရုန်းရင်းကန်ရင်း ပရီးမီးယားလိဂ်သမိုင်းတလျှောက် အဆိုးရွားဆုံးရပ်တည်မှုနဲ့ ရာသီသိမ်းခဲ့ပြီးနောက်မှာ အမော်ရင်ရဲ့ယူနိုက်တက်ခရီးဟာ တစ်နှစ်တင်းတင်းပြည့်သွားခဲ့တယ်။ ဒီမှတ်တိုင်အကြောင်းမေးတော့ 'စိတ်လှုပ်ရှားခရီးစဥ်တစ်ခုပါပဲ' လို့ အမော်ရင်က အပြုံးနဲ့ ဖြေသွားခဲ့တယ်။ လက်ရှိအချိန်မှာ သူပြုံးနေနိုင်ပေမယ့် ဖြတ်သန်းခဲ့သမျှ မလွယ်ကူခဲ့ပါဘူး။

၂၀၁၃ မှာ ဆာအဲလက်စ်ထွက်ခွာသွားပြီးနောက်မှာ ရူဘန်အမော်ရင်က ၆ ယောက်မြောက် Permanent manager ဖြစ်တယ်။ Interim manager အဖြစ် ရန်းညက်က တစ်ရာသီကိုင်တွယ်ခဲ့ပြီး Caretaker တွေအဖြစ် ရွိုင်ယန်ဂစ်၊ ကာရစ်၊ နစ္စတယ်ရွိုင်းတို့လည်း ယာယီတာဝန်ယူပေးခဲ့ကြတယ်။ ဒီနည်းပြတွေထဲမှာ အမော်ရင်က ယာယီနည်းပြဖြစ်တဲ့ ရန်းညက်ပြီးရင် Win rate အနိမ့်ဆုံးဖြစ်နေတယ်။ ပြိုင်ပွဲစုံ ၅၂ ပွဲမှာ ၂၁ ပွဲသာနိုင်ခဲ့တယ်။ ပရီးမီးယားလိဂ် ၃၆ ပွဲမှာ ၁၂ ပွဲသာ အနိုင်ရခဲ့ပြီး ၁၇ ပွဲအထိ ရှုံးခဲ့တယ်။ တစ်ပွဲကို ၁.၁၉ မှတ်ပဲရတယ်ဆိုတဲ့ နှုန်းထားက ပရီးမီးယားလိဂ်ခေတ်ယူနိုက်တက်နည်းပြတွေထဲ အနည်းဆုံးဖြစ်နေတယ်။ ဒုတိယကမ္ဘာစစ်ပြီးကတည်းက ယူနိုက်တက်နည်းပြတွေထဲ ရှုံးပွဲရာခိုင်နှုန်းအမြင့်ဆုံးလည်း ဖြစ်တယ်။ အသင်းငယ်၊ အသင်းလတ်မရွေး အိမ်ကွင်း၊ အဝေးကွင်းမရွေး အစိုးမရတဲ့ ယူနိုက်တက်ကို ရင်တထိတ်ထိတ်ထိုင်ကြည့်နေခဲ့ရတယ်။ ပရီးမီးယားလိဂ်နှစ်ပွဲဆက်နိုင်တာတောင် တစ်နှစ်ပြည့်ခါနီးမှ သူ့ပိုင်ဆိုင်ခွင့်ရတဲ့မှတ်တမ်းပါ။ ယူရိုပါလိဂ်ဖိုင်နယ်ရောက်ခဲ့ပေမယ့် ဆုဖလားတွေနဲ့ ဝေးကွာနေကျစပါးကို အရေးနိမ့်ပြီး ချန်ပီယံလိဂ်ဝင်ခွင့်လမ်းကြောင်းကိုပါ ဆုံးရှုံးသွားခဲ့တယ်။ ဒီလိုအခြေအနေဆိုးတွေကြားမှာ အသင်းကြီးတွေချင်းမထင်မှတ်ပဲရတဲ့ ရလဒ်ကောင်းတချို့ကလွဲရင် ယူနိုက်တက်ရဲ့ အမော်ရင်နေ့ရက်တွေဟာ အတက်အကျကြမ်းခဲ့တယ်။ ဒါပေမယ့် ရက်ကလစ်ဖ်ဦးဆောင်တဲ့ ဘုတ်အဖွဲ့က ယူနိုက်တက်ဒီဘက်နှစ်တွေမှာ လုပ်မိနေကျ ပရောဂျက်ကိုတစ်ကပြန်စရတဲ့အဖြစ်မျိုး မကြုံမိစေဖို့ ဆုံးဖြတ်ထားကြတယ်။

အမော်ရင်ဟာ ယူနိုက်တက်နည်းပြအဖြစ် ဆက်ရှိနေဦးမှာဖြစ်သလို အာတေတာ-အာဆင်နယ်တို့နဲ့တောင် ရက်ကလစ်ဖ်က နှိုင်းယှဥ်ပြသွားသေးတယ်။ အနည်းဆုံး သုံးနှစ်အချိန်ပေးမယ်လို့လည်း အတည်ပြုသွားခဲ့တယ်။ ဒီလိုစကားတွေကို အမော်ရင် ခုလို သုံးပွဲဆက်နိုင်ပွဲမယူနိုင်သေးခင်ကတည်းက ရက်ကလစ်ဖ်နဲ့တာဝန်ရှိသူတွေ အကြိမ်ကြိမ်ပြောခဲ့တာပါ။ ဂရင်းစ်ဘီကိုရှုံးတဲ့ပွဲဟာ အမော်ရင်အတွက် Rock bottom ဖြစ်ခဲ့မယ်ထင်တယ်။ ဖိအားတွေကို စိတ်ကုန်လာသလိုမျိုး သူ့ရဲ့ Body language နဲ့ စကားလုံးတချို့ကို မြင်ရပေမယ့် အမော်ရင်က ဒီအသင်းမှာ ရှိခွင့်ရတာဟာ ဘဝရဲ့ဂုဏ်ယူစရာတွေထဲ တစ်ခုလို့ ပြောသွားတယ်။ ရက်ကလစ်ဖ်ပြောသလို ဘောလုံးမှာ ဘာကိုမှကြိုတွက်ထားဖို့မလွယ်ဘူးလို့ ပြောသွားတယ်။ အမော်ရင်က ဒီလိုနိမ့်မြင့်တက်ကျကာလတွေမှာ သူ့ကစားကွက်အပေါ် သစ္စာခိုင်မြဲခဲ့တယ်။ နည်းပြကိုပဲ ပြောင်းရင်ပြောင်းလိုက်၊ သူ့ 'မူ'ကိုတော့ မပြောင်းနိုင်ဘူးလို့ ခေါင်းမာမာဆိုခဲ့တယ်။ ကွန်ညာ၊ အမ်ဘူမိုနဲ့အတူ အမော်ရင်ရဲ့ ၃-၄-၃ ဟာ တကယ်ပဲအသက်ဝင်ခဲ့ပြီလား တွေးစရာဖြစ်လာတဲ့အထိ ရလဒ်တွေ ဆက်တိုက်ကောင်းလာတယ်။ ဆန်းဒါးလန်း၊ လီဗာပူးလ်၊ ဘရိုက်တန်တို့ကို ဆက်တိုက်အနိုင်ယူထားတယ်။ ကြည့်လိုက်တိုင်း သက်ပြင်းမောနဲ့ ခေါင်းငိုက်စိုက်မြင်ရနေကျ အမော်ရင်ရဲ့ Body language ဟာ အရင်ကထက် ပိုပေါ့ပါးလာတယ်။ လက်ရှိပုံစံအတိုင်း ဆက်သွားမယ်ဆိုရင် သူ့ရဲ့ ခေါင်းမာခဲ့ပုံကို အမွှန်းတင်တဲ့ဆောင်းပါးမျိုးတွေတောင် မြင်လာရနိုင်ပါသေးတယ်။ အမော်ရင် ကိုင်တွယ်ခဲ့ပုံတွေထဲ အဝတ်လဲခန်းထဲလှိုက်စားနေတဲ့ Bad apple တွေကို ရှင်းထုတ်ခဲ့ပုံဟာ ရှေ့နည်းပြတွေမလုပ်နိုင်ခဲ့တာအရာဖြစ်တယ်။ ဒီမှာ အကယ်ဒမီထွက်တွေကို အလုံအလောက်အခွင့်အရေးသိပ်မပေးနိုင်တာ၊ မိန်းနူးအခြေအနေ အသင်းကထွက်ဖို့ နီးစပ်သွားခဲ့တာ.. စသဖြင့် အားမရစရာတွေလည်း ရှိခဲ့တယ်။ ဘယ်လိုပဲဖြစ်ဖြစ် တစ်နှစ်ပြည့်ချိန်မှာတော့ အိုးထရက်ဖို့ဒ်ရဲ့လေထုဟာ ကြည်လင်သန့်စင်စ,ပြုလာခဲ့ပြီလား။ ကြုံခဲ့သမျှ False dawn တွေကို ချန်ထားခဲ့ပြီး တကယ့် မနက်ခင်းနေရောင်ခြည်စစ်စစ်ကို ထိတွေ့ ခွင့်ရမှာ သေချာပြီလား ။ ဘုတ်အဖွဲ့ရဲ့ အမော်ရင်အပေါ် ဆက်လက်ယုံကြည်မှုဟာ မှန်ကန်ရဲ့လား။ နှစ်နှစ်ပြည့်ချိန်မှာရော ခုလိုဆောင်းပါးမျိုး အမော်ရင်အတွက် ထပ်ရေးခွင့်ရဦးမလား.. ပိတ်ကားပေါ်မှာ ဆက်ပြီးစောင့်ကြည့်သွားရဦးမှာဖြစ်ကြောင်းပါ.. ။

10/28/2025

ဘုန်းမောက် လျှောက်တဲ့လမ်း
▪ 90minCorner

ပရီးမီးယားလိဂ်ကလပ်တွေထဲ ပျင်းဖို့ကောင်းတာက ဘုန်းမောက်၊ ဘန်လေတို့ဖြစ်မယ်လို့ ကိုယ်အမြဲတွေးခဲ့တယ်။ သမားရိုးကျအင်္ဂလိပ်နာမည်တွေရယ်၊ ဆွဲဆောင်မှုသိပ်မရှိတဲ့ကစားဟန်၊ တန်းတက်လိုက် ပြန်ဆင်းသွားလိုက် သံသရာလည်နေတတ်တာရယ်၊ ရင်ခုန်စရာ စောင့်ကြည့်ချင်စရာကစားသမား မယ်မယ်ရရမရှိတာရယ်.. စသဖြင့် ဒီအသင်းတွေမှာ ကစားရတာ ငြီးငွေ့ဖို့ကောင်းတယ်လို့ ထင်ခဲ့တာပါပဲ။ ဒီအမြင်ကို ဘုန်းမောက်က ဒီဘက်နှစ်တွေမှာ ပြောင်းလဲပစ်နိုင်ခဲ့ပြီလို့ ဝန်ခံရမယ်။ စပိန်လူမျိုးနည်းပြအီယာအိုလာရဲ့ ဦးဆောင်မှုအောက်မှာ နည်းဗျူဟာပိုင်းအရ စောင့်ကြည့်ချင်စရာ အသင်းတစ်သင်းဖြစ်လာတယ်။ ရလဒ်ကောင်းတွေဆက်တိုက်ရယူရင်း ဥရောပဝင်ခွင့်ကို ချိန်ရွယ်လာနိုင်တဲ့အထိ အားကောင်းသန်မာလာတယ်။ သာမန်ရွက်ကြမ်းရည်ကြိုကစားသမားတွေနဲ့ပဲ လည်ပတ်နေတဲ့အသင်းဟာ ရီးယဲလ်၊ ပီအက်စ်ဂျီ၊ လီဗာပူးလ်တို့လိုထိပ်တန်းကလပ်တွေနဲ့ တိုက်ရိုက်အပြောင်းအရွှေ့တွေ ရှိလာတယ်။ ကစားသမားအဝင်အထွက်တွေကို ထိန်းချုပ်ချိန်ညှိတဲ့မော်ဒယ်က ထိရောက်အလုပ်ဖြစ်လာခဲ့ပြီး ပြီးခဲ့တဲ့ရာသီ ခံစစ်တန်းတစ်လုံးနီးပါးရောင်းထုတ်ခဲ့ရတဲ့ ဘုန်းမောက်ဟာ သူတို့ဟန်ချက်ကို ဆက်ထိန်းထားနိုင်ခဲ့တယ်။ ပွဲစဥ် ၉ အပြီးမှာ အမှတ်ပေးဇယားရဲ့ ဒုတိယနေရာ မှာ ရပ်တည်နေပုံက အခန့်သားပဲ။ ဒါဟာ ဘုန်းမောက်လျှောက်နေတဲ့လမ်းပဲဖြစ်တယ်။

ဘုန်းမောက်က နွေရာသီမှာ ကစားသမားရောင်းထုတ်မှုတွေကနေ ပေါင်သန်း ၂၀၀ ဝန်းကျင်ရှာဖွေနိုင်ခဲ့တယ်။ ဟောက်ဆန်၊ ဇာဘာညီ၊ ကာကက်ဇ် ခံစစ်မှုးသုံးယောက်အတွက်တင်ပဲ ပေါင်သန်း ၁၅၀ ဝန်းကျင်ရတယ်။ ဆင်နစ်စတာရာ၊ ဖီးလစ်ဘလင်း၊ မာ့ခ်ထရေဗာတို့ကို ရောင်းထုတ်ခဲ့တယ်။ ကစားသမားသစ်တွေအတွက် ပေါင်သန်း ၁၀၀ ကျော်ပဲ ပြန်သုံးခဲ့တာဆိုတော့ အမြတ်တောင်ထွက်နေသေးတယ်။ ဘုန်းမောက်က ကစားသမား ၃၊ ၄ ယောက်သာ အများဆုံးရောင်းချဖို့ရည်ရွယ်ခဲ့ပြီး အသင်းရဲ့ဖောင်ဒေးရှင်းကို အပြောင်းအလဲများစွာ ပြုလုပ်ဖို့ မလိုဘူးလို့ တွက်ဆထားပြီးသား။ စပါး၊ ယူနိုက်တက်တို့ရဲ့ ဆီမီညိုအတွက် ပေါင်သန်း ၅၀ တန်ကမ်းလှမ်းမှုကို ငြင်းပယ်ခဲ့တယ်။ ပရီးမီးယားလိဂ်ရဲ့ Consistent အဖြစ်ဆုံး Performer တွေထဲက တစ်ယောက်ကို အသင်းမှာဆက်ထိန်းထားနိုင်ခဲ့တဲ့အပြင် စာချုပ်သစ်ကိုပါလက်မှတ်ရေးထိုးဖို့ စည်းရုံးသွားနိုင်ခဲ့တယ်။ ဒီစာချုပ်သစ်ဟာ ဆီမီညိုအတွက် အတားအဆီးဖြစ်နေမှာမဟုတ်ပဲ အသင်းသစ်တွေဆီက လုံလောက်တဲ့ကမ်းလှမ်းမှုရောက်လာတဲ့အခါ ထွက်ခွာခွင့်ပြုမယ်ဆိုတဲ့ သဘောတူညီမှုမျိုးပါဝင်နေတယ်။ ဘာပဲဖြစ်ဖြစ် ဒီလိုကစားသမားမျိုးက နောက်ထပ်တစ်ရာသီဆက်နေဖို့ဆုံးဖြတ်ခဲ့တာနဲ့တင် ဘုန်းမောက်ရဲ့ပရောဂျက်အပေါ် ကစားသမားတွေရဲ့ သက်ဝင်ယုံကြည်မှုကို မြင်နိုင်ပါလိမ့်မယ်။ ထရေဗန်နီယာအတွက် အဲဗာတန်၊ ဝက်စ်ဟမ်းတို့ရဲ့ ချဥ်းကပ်မှုကို ပယ်ချတယ်။ ဒေးဗစ်ဘရွတ်ခ်အတွက် ပဲလေ့စ်က ပေါင် ၈ သန်းနဲ့ကမ်းလှမ်းပေမယ့် ဆီမီညိုလိုပဲ ကစားသမားကိုယ်တိုင် အသင်းနဲ့စာချုပ်သစ်ကိုသာ ရွေးချယ်သွားတယ်။ ကလွိုက်ဗက်အတွက် လေဗာကူဆင်ရဲ့ပေါင် ၂၆ သန်းကိုလည်း ချက်ချင်းငြင်းဆိုခဲ့ပါတယ်။ ခံစစ်နေရာတွေကလွဲရင် ဘုန်းမောက်ဟာ သူတို့ရဲ့အစုအဖွဲ့ကိုဆက်ထိန်းထားနိုင်ခဲ့တာ တွေ့ ရပါလိမ့်မယ် ။

အီယာအိုလာက အပြောင်းအရွှေ့ကာလအစောပိုင်းမှာ အနည်းငယ်လေးလံနေတဲ့ ခြေလှမ်းတွေအပေါ် သိပ်အားမရတဲ့အကြောင်း ထုတ်ပြောခဲ့ဖူးပေမယ့် လိုအပ်နေတဲ့နေရာတွေကို အချိန်မှီဖြည့်တင်းနိုင်ခဲ့တာ အားရစရာကောင်းပါတယ်။ ကာကက်ဇ်ရဲ့နေရာအတွက် ရန်းနက်စ်ဘယ်နောက်ခံလူထရူဖက်ကို စောစောစီးစီးချဥ်းကပ်ခဲ့ပြီး ပေါင် ၁၄.၄ သန်းနဲ့ အပြီးသတ်ခေါ်ယူတယ်။ ချဲလ်ဆီးကနေ အငှားလာကစားတဲ့ ကီပါကို အပြီးသတ်စာချုပ်နဲ့ ကမ်းလှမ်းခဲ့ပေမယ့် ကစားသမားက အာဆင်နယ်ကိုရွေးခဲ့တော့ ချဲလ်ဆီးဂိုးသမားပက်ထရိုဗစ်ကို ပြန်ပြီးအားဖြည့်ထားတယ်။ အဓိက,ကစားသမားတွေ စောစောစီးစီးထွက်သွားကြပေမယ့် ဘုန်းမောက်က Panic buying တွေလုပ်မယ့်အစားဖြည်းဖြည်းမှန်မှန်ပဲ လှုပ်ရှားသွားတယ်။ ဧပြီလထဲမှာ စတင်ခဲ့တဲ့ လိုင်လီနောက်ခံလူဒီယာကီတီ အပြောင်းအရွှေ့ကို စိတ်ရှည်လက်ရှည်ဆွေးနွေးခဲ့တယ်။ ပေါင် ၃၄.၆ သန်းဟာ သူတို့ကြိုတင်တွက်ဆထားတာထက်ပိုများနေပေမယ့် ပြိုင်ဘက်တွေလည်းရှိလာတော့ လိုက်လျောလိုက်ရတယ်။ ဒါက ဇာဘာညီအပြောင်းအရွှေ့ကရတာနဲ့တင် ပြန်ကာမိပြီးသားပါ။ အူတာရာအတွက် ပေါင်သန်း ၄၀ စျေးခေါ်ထားခဲ့ပြီး ဘရန်းဖို့ဒ်က ဒီအတိုင်းတကယ်ကမ်းလှမ်းဖို့ရောက်လာခဲ့တာလည်း အံဝင်ခွင်ကျဖြစ်သွားတယ်။ လေဗာကူဆင်ရဲ့ အက်ဒ်လီ (ပေါင် ၁၈.၂၅ သန်း)၊ ဘန်ဒုတ်ခ် (ပေါင် ၂၆သန်း) တို့ကို ခေါ်ထားပြီးချိန်မှာ အူတာရာကြောင့် ငွေပြန်ပေါ်လာတယ်။ အားလုံးဟာ စီစဥ်ထားခဲ့ပြီးသားသလိုမျိုး ဘုန်းမောက်ရဲ့ Squad depth ကို ပြန်လည်ဖြည့်တင်းတည်ဆောက်ခဲ့ပုံက တည်ငြိမ်လွန်းရဲ့။ အခြားကလပ်တွေလို Co-owner တွေ၊ Head of Recruiment တွေ၊ အားကစားဒါရိုက်တာတွေမရှိတဲ့ ဘုန်းမောက်ရဲ့ အပြောင်းအရွှေ့တွေကို အသင်းပိုင်ရှင်ဘီလ်ဖိုလေ၊ President of football operations တီယာဂိုပင်တို၊ နည်းစနစ်ဒါရိုက်တာဆိုင်မွန်ဖရန်ဆစ်၊ နည်းပြအီယာအိုလာတို့ပဲ တိုင်ပင်ဆုံးဖြတ်ကြတယ်။ ကြယ်ပွင့်တွေကို အသင်းမှာ ဆက်ထိန်းထားဖို့မဖြစ်နိုင်ပေမယ့် လူစာရင်းမှာ ပြန်ပြီးရင်းနှီးမြှုပ်နှံဖို့ ပြင်ဆင်တဲ့ မော်ဒယ်က အလုပ်ဖြစ်နေတာမြင်တွေ့ ရပါတယ် ။

လူငယ်တွေအတွက်၊ သူတို့ခြေစွမ်းကိုပရီးမီးယားလိဂ်မှာ သက်သေပြချင်တဲ့ ရွက်ပုန်းသီးပါရမီရှင်တွေအတွက် ဘုန်းမောက်ဟာ Perfect platform ဖြစ်လာတယ်။ ဒီလို စနစ်တကျသွားနေတဲ့လမ်းမှာ ရလဒ်ကောင်းတွေကိုပါ အဆက်မပြတ်ပုံဖော်နေတာဟာ တကယ်ချီးကျူးဖို့ကောင်းတယ်။ အထူးသဖြင့် အီယာအိုလာပဲ။ သူ့အသင်းရဲ့ Identity ဖြစ်တဲ့ High-intensity, High-pressing ဟာ ဆက်ပြီး အသက်ဝင်နေတုန်းပဲ။ ကစားသမားသစ်တွေဟာ သူ့ရဲ့စနစ်ထဲမှာ ခပ်လွယ်လွယ်ပျော်ဝင်အသားကျသွားကြတယ်။ ၂၃ နှစ်အရွယ် ထရူဖက်က ကာကက်ဇ်လိုပဲ ကြံ့ခိုင်မှု၊ လုပ်အားနှုန်း၊ အတက်အဆင်းပြောစရာမလိုတဲ့ Fullback တစ်ယောက်၊ ကောင်းမွန်တဲ့ အားဖြည့်မှုဆိုတာ သက်သေပြနေတယ်။ ဒီရာသီ ပရီးမီးယားလိဂ် မိနစ်တိုင်းကို ကစားထားတယ်။ ဒီယာကီတီက ဘုန်းမောက်ရဲ့ Press ကိုဖောက်ထွက်ဖို့ ပြိုင်ဘက်တွေတိုက်ရိုက်ကန်တင်ပေးလိုက်တဲ့ Long ball တွေကို ဒိုင်ခံဖြေရှင်းနေတယ်။ Aerial duel win rate ၇၂.၆ % ဆိုတာ အားရစရာပဲ။ ဆန်နီဆီ၊ အသစ်ရောက်လာတဲ့ မီလိုစဗယ်ဂျီဗစ်တို့နဲ့အတူ ဘုန်းမောက်ရဲ့ဗဟိုခံစစ်နေရာက တည်ငြိမ်သွားတယ်။ ၄-၂-၃-၁ အထိုင်ကို ဆက်သုံးထားတဲ့ ဘုန်းမောက်ရဲ့ အဆက်မပြတ် Pressing ကို မြင်တွေ့ရဆဲဖြစ်ပြီး ပြီးခဲ့တဲ့ရာသီကအတိုင်း PPDA (passes allowed per defensive action), Ball recovery, Turnover စတဲ့အပိုင်းတွေမှာ လိဂ်ကို ဦးဆောင်ထားဆဲပဲ။ Transition နဲ့ High turnover တွေကို အသုံးချရာမှာ ဘုန်းမောက်က အပိုင်နိုင်ဆုံးအသင်းလို့တောင်ဆိုနိုင်လိမ့်မယ်။ ဒီအတွက် ဆီမီညိုက အခရာကျတယ်။ အီယာအိုလာ နည်းပြဘဝတလျှောက်ရှာဖွေနေခဲ့တဲ့ ပရိုဖိုင်လို့ ဆိုနိုင်မလား။ Dribbling ability , တစ်ဦးချင်းဖြတ်ကျော်နိုင်စွမ်းနဲ့ လျင်မြန်သပ်ရပ်လွန်းတဲ့ Decision-making process တွေက ဘုန်းမောက်ရဲ့ verticality ကို ပိုပြီးအားကောင်းလာစေတယ်။ ဘယ်ညာနှစ်ဖက်စလုံးကျွမ်းကျွမ်းကျင်ကျင်သုံးနိုင်တာကြောင့်ထိန်းချုပ်ရခက်တယ်။ ဒီရာသီ ၆ ဂိုးကို ဘယ်၊ညာ သုံးဂိုးစီသွင်းထားတယ်။ ဟာလန်းပြီးရင် ဂိုးအများဆုံးသွင်းထားသူဖြစ်တယ်။ ဆီမီညိုနဲ့အတူ ဘုန်းမောက်အရွေ့တွေက တရိပ်ရိပ်ပြေးနေတယ်။ အီယာအိုလာ ဒီကိုစရောက်လာစဥ်က အခက်အခဲတွေ၊ မရေရာမှုတွေကြုံခဲ့ရတာကို ပရိသတ်တွေမေ့သွားလောက်ရောပေါ့။ နှစ်ရာသီဆက်စံချိန်တင်ရမှတ်တွေစုဆောင်းပေးခဲ့သူဟာ ဒီရာသီအတွက် ပိုကောင်းတဲ့အလားအလာတွေကို ပိုင်ဆိုင်ထားခဲ့ပြီ။ ဒီလောက်ထိ စွမ်းဆောင်ပြနေမှတော့ နည်းပြရော ကစားသမားတွေကိုပါ ဘုန်းမောက်ဟာ အချိန်မရွေးလက်လွှတ်ရနိုင်သေးတာပါပဲ။ ဒါပေမယ့် သူတို့ဟာ ဖြစ်နိုင်ချေတိုင်းအတွက် အစီအစဥ်တွေကြိုတင်ရှိနေခဲ့ပြီးသားဖြစ်မယ်လို့ ကိုယ်တွေးတတ်လာခဲ့တယ်..။

Address

Village, FL
795128

Website

facebook.com

Alerts

Be the first to know and let us send you an email when 90 min corner posts news and promotions. Your email address will not be used for any other purpose, and you can unsubscribe at any time.

Shortcuts

Want your business to be the top-listed Media Company in Village?