https://www.facebook.com/194575012631106/

90 min corner

Home
United States
Village, FL
90 min corner

Football article and analysis

12/23/2025

ဒီခရစ္စမတ်မှာ နှင်းမိုးတွေ ပိုသည်းလာ
▪ 90minCorner

ဥရောပထိပ်တန်းလိဂ်ငါးခုအနက် ကျန်လိဂ်တွေဆောင်းခိုသွားချိန်မှာ ပရီးမီးယားလိဂ်ကတော့ ဆက်သွားနေဦးမယ်။ ဒီဇင်ဘာပွဲကျပ်ကာလဟာ AFCON ရိုက်ခတ်မှုနဲ့အတူ ကလပ်အသင်းတွေရဲ့ ဒဏ်ခံနိုင်စွမ်းကို စမ်းသပ်ဖို့ အဆင်သင့်ဖြစ်နေခဲ့တယ်။ ဆန်းဒါးလန်း၊ ဖူလ်ဟမ်၊ ယူနိုက်တက်၊ အဲဗာတန်တို့က AFCON အတွက် သူတို့ရဲ့ အဓိက,ကစားသမားတွေကို လက်လွှတ်ထားရပြီး အထိအနာဆုံးဖြစ်မယ့် အသင်းတွေလို့ သတ်မှတ်ထားနိုင်တယ်။ ဒီအချိန်မှာ Squad depth က စကားပြောလာပြီ။ ဘယ်အသင်းတွေက ဒီကာလမှာအခွင့်အရေးယူသွားမလဲဆိုတဲ့ မေးခွန်းက စိတ်ဝင်စားစရာပါပဲ။ ဒီမှာ ယူနိုက်တက်၊ လီဗာပူးလ်တို့က အမ်ဘူမို၊ မာဇရာဝီ၊ အာမက်ဒီယာလို၊ ဆာလာတို့ကို စေလွှတ်ထားရတဲ့အပြင် ဘရူနို၊ အီဆက်ခ်တို့ပါ ဒဏ်ရာကြုံသွားတော့ တစ်ပူပေါ်နှစ်ပူဆင့်သွားရတယ်။ ဘရူနိုက ဗီလာနဲ့ပွဲမှာ တံကောက်ကြောဒဏ်ရာရသွားခဲ့ပြီး အီဆက်ခ်ရဲ့ အခြေအနေက ပိုဆိုးပါတယ်။ စပါးနဲ့ပွဲမှာ အဖွင့်ဂိုးကို သွင်းယူပေးရင်း ဗန်ဒီဗန်ရဲ့ ဖျက်ထုတ်မှုကြောင့် ခြေကျင်းဝတ်အရိုးကျိုးသွားခဲ့တယ်။ ဒီမနက်အစောပိုင်းမှာ ခွဲစိတ်မှုခံယူခဲ့ရတယ်။ ယူနိုက်တက်ရဲ့ ကွင်းလယ်လိုအပ်ချက်ဟာ ထင်ရှားနေခဲ့ပြီးသားအခြေအနေမှာ အာနေးဆလော့အတွက် Attacking option တွေဟာလည်း လုံလောက်နေပြီးသားလို့ မဆိုနိုင်ဘူး။ ဒီတော့ ပိုကျပ်တည်းသွားစေတဲ့ ကံတရားရဲ့ကျီစယ်မှုမှာ ဒီနှစ်သင်း ဘယ်လိုတုံ့ပြန်ရှေ့ဆက်မလဲ၊ လစ်ဟသွားတဲ့ ကွက်လပ်တွေကို ဘယ်လိုဖြည့်မလဲ ဆန်းစစ်ကြည့်ရအောင်ပါ ။

ယူနိုက်တက်ဟာ တန်ဟက်ဂ်လက်ထက်ကနေစတင်ပြီး ပြောင်းရွှေ့ကြေးပေါင်သန်း ၉၀၀ ဝန်းကျင်အသုံးပြုခဲ့ပေမယ့် သူတို့ရဲ့ Recruiment တွေမှာ ကွင်းလယ်ပိုင်းကို လျစ်လျူရှုထားသလိုဖြစ်နေခဲ့တယ်။ အငှား၊ အလွတ်တွေကို ဖယ်လိုက်ရင် ဒီကာလအတွင်း ခေါ်ယူခဲ့တဲ့ကွင်းလယ်လူဆိုလို့ အူဂါတေနဲ့ ကတ်စီမီရိုပဲရှိမယ်။ ပြီးခဲ့တဲ့နွေမှာ အဲရစ်ဆင်ထွက်သွားတော့ စီနီယာကွင်းလယ်လူစစ်စစ် လေးယောက်သာကျန်ရစ်တယ်။ အမော်ရင်ရဲ့ System မှာ သိတဲ့အတိုင်း ကွင်းလယ်လူတွေအတွက် တောင်းဆိုမှုက အရမ်းများတယ်။ Ground coverage လုပ်ရတာ သိပ်များလွန်းသလို အသင်းရဲ့ဝင်ရိုးအဖြစ် ခံစစ်တိုက်စစ်ချိတ်ဆက်မှုတာဝန်တွေကို ယူရတယ်။ ကတ်စီမီရို-ဘရူနိုအတွဲကိုပဲ အမော်ရင်က ယုံတယ်။ ဘရူနိုကလည်း ဒဏ်ရာရခဲ့တော့ ပွဲတိုင်းနီးပါး ဝင်ကစားပေးနေရတယ်။ ယူနိုက်တက်ကစားသမားဘဝ ၆ နှစ်အတွင်း ဒဏ်ရာကြောင့် နှစ်ပွဲသာလွဲဖူးတဲ့ ဘရူနိုရဲ့ တံကောက်ကြောဝေဒနာက ဒီရာသီအတွက် အလွန်အရေးကြီးတဲ့ ကာလအပိုင်းအခြားကိုရောက်မှ တိုက်တိုက်ဆိုင်ဆိုင် လာဖြစ်တယ်။ ဒီလိုတွေဖြစ်လာနိုင်တာကို ကြိုတွေးခဲ့သင့်ပါရက် ကွင်းလယ်ကိုဖြည့်မယ့်အစား တိုက်စစ်ကစားသမားသုံးယောက်စာ ပေါင်သန်း ၂၀၀ သုံးသွားတဲ့ဆုံးဖြတ်ချက်ရဲ့နောက်ဆက်တွဲပါပဲ။ မကြာခင် ၃၄ နှစ်ပြည့်တော့မယ့် ကတ်စီမီရိုက တစ်ပတ်တစ်ပွဲနှုန်းသာ ကစားရချိန်မှာတောင်ပွဲချိန်ပြည့်ကစားဖို့ရုန်းကန်နေရတာဆိုတော့ အမော်ရင်အတွက် တကယ်ပဲခေါင်းခဲစရာဖြစ်လာတယ်။

အမော်ရင်က မိန်းနူး၊ အူဂါတေတို့ကို မယုံသလို လူငယ်တွေကိုလည်း မယုံဘူးဆိုပေမယ့် ဇန်နဝါရီမှာ ရေတိုအစားမှုအဖြစ် Panic buy တွေလုပ်မှာမဟုတ်ဘူးလို့ ပြောသွားတယ်။ ဘယ်လိုပဲဆိုဆို ဘရူနိုရဲ့ဒဏ်ရာက အသင်းပြောင်းဖို့ကြိုးစားနေတဲ့ မိန်းနူးအတွက် အတားအဆီးဖြစ်လာမှာတော့ သေချာသလောက်ပဲ။ ပွဲထွက်ခွင့် ၉ ကြိမ်မှာ နိုင်ပွဲတစ်ပွဲမှမရသေးတဲ့ အူဂါတေအတွက်ရော သူ့ယူနိုက်တက် Career ကို တကျော့ပြန်အသက်သွင်းဖို့ အခွင့်အရေးများလား။ ဆယ်ကျော်သက် ဂျက်ဖလက်ချာကို အားကိုးမလား။ ဒါမှမဟုတ် ဗီလာနဲ့ပွဲကလို လီဆန်ဒရိုမာတီနက်ဇ်ကိုပဲ ကွင်းလယ်မှာ ဆက်သုံးသွားမလား။ မခိုမကပ်လုပ်အားနှုန်းကို ဆက်တိုက်ပြသနေတဲ့ မေဆန်မောင့်ရဲ့ Tactical flexibility ကို အမော်ရင် ဖော်ထုတ်ရမယ့် အခိုက်အတန့်လား။ ယူနိုက်တက်ဟာ ဘရူနိုရဲ့တန်ဖိုးကို မရှိခါမှ ပိုသဘောပေါက်သွားနိုင်လိမ့်မယ်ထင်ပါတယ်။ လီဗာပူးလ်ရဲ့ တိုက်စစ်အခက်အခဲက အနည်းဆုံးတော့ ယူနိုက်တက် ရင်ဆိုင်ရမှာလောက် မဆိုးဘူး။ ဒါပေမယ့် ဗြိတိန်စံချိန်တင်ပြောင်းရွှေ့ကြေးပိုင်ရှင်ရဲ့ အန်ဖီးလ်အဖွင့်ဟာ ခလုတ်ကန်သင်းတွေ သိပ်များလွန်းနေခဲ့တာတော့ စိတ်မကောင်းစရာပေါ့။ ရာသီအဖွင့် ၁၆ ပွဲမှာ သုံးဂိုးသာရထားတဲ့ ဆွီဒင်တိုက်စစ်မှုးဟာ ရာသီကြိုလေ့ကျင့်ရေးအစီအစဥ်တွေလွဲချော်မှုရဲ့နောက်ဆက်တွဲအဖြစ် Match fitness, Rhythm ပျောက်ဆုံးမှုကို ရင်ဆိုင်နေရချိန်မှာ အခြေအနေကို ပြောင်းလဲနိုင်မယ့်အခိုက်အတန့်လေး လက်လွှတ်ဆုံးရှုံးလိုက်ရတယ်။ အာနေးဆလော့အတွက် ဖြေရှင်းရမယ့် နောက်ထပ်ပုစ္ဆာတစ်ပုဒ်လည်း ဖြစ်လာတယ်။ ဆာလာကို လက်လွှတ်ထားရပြီးသားတိုက်စစ်မှာ အီဆက်ခ်ပါ လနဲ့ချီ နားရဦးမှာကိုး။

လီဗာပူးလ်ရဲ့ ဇန်နဝါရီစီမံကိန်းက ဗဟိုခံစစ်နေရာအတွက် ခရစ္စတယ်ပဲလေ့စ်ရဲ့ မာ့ခ်ဂီဟီကို ချိန်ရွယ်ဖို့ ပိုဖြစ်သင့်တာပါ။ အီဆက်ခ်ဒဏ်ရာက ဒီ Plan ကို ပြောင်းလဲသွားစေမလား။ ဘုန်းမောက်ရဲ့ ဆီမီညိုကလည်း စျေးကွက်ထဲ Hot ဖြစ်လာဦးမယ်ဆိုတော့ စဥ်းစားစရာပါပဲ။ ဘက်ဂျက််လုံလောက်လို့ တကယ်သာ တိုက်စစ်ကိုဖြည့်မယ်ဆိုရင် Versatile wiger-like profile မျိုးကို ပိုဦးစားပေးသင့်တယ်။ လူးဝစ်ဒီယက်ဇ်နေရာကို မဖြည့်လိုက်တဲ့ ကွက်လပ်က Wide attacker နှစ်ယောက် ပုံမှန်ခြေစွမ်းအောက်ရောက်ချိန်မှာ သိသာလာခဲ့တယ်မဟုတ်လား။ အာနေးဆလော့က ဒီရာသီကိုအဖက်ဆည်ဖို့အတွက် စမ်းသပ်မှုမျိုးစုံပြုလုပ်နေခဲ့တာပါ။ ဒီမှာ ဇိုဘော့စလိုင်းကို ညာတောင်ပံမှာ သုံးတာ၊ Diamond Midfield ကို ခင်းကျင်းတာမျိုးတွေ မြင်လာရတယ်။ ကွင်းလယ်လူငါးယောက်လောက်အထိ အသုံးပြုတာက Build-up ကိုရော အသင်းရဲ့ Shape ကိုပါ တည်ငြိမ်လာစေခဲ့တာ တွေ့ ရတယ်။ တိုက်စစ်မှုးစစ်စစ်နေရာအတွက် အက်ကီတီကေ Fit ဖြစ်နေသရွေ့ အရမ်းစိုးရိမ်စရာတော့မရှိပေမယ့် သွင်းဂိုးတာဝန်တွေကိုသူတစ်ယောက်ပဲ ထမ်းထားရမယ်ဆိုတာမျိုးတော့ မလွယ်ပါဘူး။ ဂက်ပိုက နောက်နှစ်အစပိုင်းလောက်မှ ကစားနိုင်မယ်ထင်တယ်။ ခုလိုပဲ ကွင်းလယ်လူတွေကိုဖောဖောသီသီသုံးတာ ဒါမှမဟုတ် ချီရယ်ဆာ၊ အန်ဂါမိုဟာတို့ကို ပိုအခွင့်အရေးပေးတာမျိုးနဲ့ ဖြေရှင်းဖို့ ကြိုးစားရမှာပါပဲ။ ဆာလာ ပြန်ရောက်လာရင်၊ ဂက်ပိုဒဏ်ရာကသက်သာလာရင် ဆိုတဲ့အချိန်တွေမတိုင်ခင်မှာတော့ လီဗာပူးလ်အတွက် အနည်းငယ်ကျပ်တည်းသွားနိုင်တယ်။ ယူနိုက်တက် ဘရူနိုကို ဆုံးရှူံးရတာလောက် ဆိုးရွားနေတဲ့ ပြဿနာမျိုးတော့ မဟုတ်တာသေချာပါတယ်။ ဘယ်လိုပဲဖြစ်ဖြစ် နည်းပြနှစ်ယောက်အတွက် မဖိတ်ခေါ်ပဲရောက်လာတဲ့ ပုစ္ဆာတွေဟာ သူတို့ကို ခေါင်းစားဖို့ အသင့်ဖြစ်နေခဲ့ပါပြီ.. ။

12/19/2025

AFCON 2025 အတွက် မော်ရိုကို,ကို နိုင်ငံရိုးရာဝတ်စုံတွေနဲ့ ရောက်ရှိလာကြတဲ့ အာဖရိကန်အသင်းတချို့ကို ဖော်ပြပေးလိုက်ပါတယ် ။

12/13/2025

Don't sleep on these players ( 2 )
▪ ကီယာနန်ဂျူဗရီဟော

ဒီအစီအစဥ်မှာ ဒုတိယမြောက်အနေနဲ့ အဲဗာတန်ကွင်းလယ်လူဂျူဗရီဟောကို ရွေးချယ်ထားပါတယ်။ ဒီနေ့ညမှာ ဂျူဗရီဟောက အသင်းဟောင်းချဲလ်ဆီးရဲ့ အိမ်ကွင်းစတန်းဖို့ဒ်ဘရစ်ချ်ဆီ ချီတက်ရမယ့် တော်ဖီတွေကို ဦးဆောင်သွားဖို့ရှိနေခဲ့တယ်။ ဒီကစားသမားကို ကျွန်တော်က လက်စတာမှာကတည်းက သဘောကျခဲ့တာပါ။ မာရက်စ်ကာနဲ့အတူ ချန်ပီယံရှစ်ကို သိမ်းပိုက်ခဲ့တဲ့ရာသီမှာ မြေခွေးပြာတွေအတွက် ဂျူဗရီဟော-ဟယ်ရီဝင့်ခ် ကွင်းလယ်အတွဲက အဓိကဝင်ရိုးဖြစ်ခဲ့တယ်။ လက်စတာရဲ့ တစ်နှစ်တာအကောင်းဆုံးကစားသမားအဖြစ် ရွေးချယ်ခံခဲ့ရတဲ့ ဂျူဗရီဟောကို မာရက်စ်ကာက ချဲလ်ဆီးအထိ အတူခေါ်သွားတယ်။ ပုံမှန်အားဖြင့် ဒီလိုဆရာတပည့်တွေ အတွဲညီပြီဆိုရင် နေရာပေးကြတာများပေမယ့် ကြီးမားလွန်းတဲ့ချဲလ်ဆီးရဲ့ လူစာရင်းမှာ ဂျူဗရီဟောအတွက် နေရာမရှိခဲ့ဘူး။ သူ့ပုံစံက ဟယ်ရီဝင့်ခ်လို Holding 6 တစ်ယောက်နဲ့တွဲကစားရတဲ့ Number 8 role က အလိုက်ဖက်ဆုံးလို့ ထင်တယ်။ တိုက်စစ်လိုက်ပါပုံအားကောင်းတာကြောင့် Number 10 role ပုံစံမျိုးလည်း ကစားနိုင်တယ်။ 8 နဲ့ 10 ကြားက Hybrid style ဟာ မာရက်စ်ကာတည်ဆောက်တဲ့ချဲလ်ဆီးအခင်းအကျင်းမှာ နေရာမရနိုင်ခဲ့ဘူး။ ပြီးခဲ့တဲ့တစ်ရာသီလုံး ပရီးမီးယားလိဂ်တစ်ပွဲသာ ပွဲထွက်ခွင့်ရခဲ့ပြီး ကွန်းဖရင့်လိဂ်၊ ကာရာဘောင် ရှူံးထွက်ဖလားတွေမှာပဲ အချိန်ဖြုန်းနေခဲ့ရတယ်။ ကိုယ်သဘောကျဖူးတဲ့ ကစားသမားဆိုတော့ နှမြောတယ်။ လက်စတာက ပြောင်းသွားတဲ့ ဒရင့်ဝါးတားခြေရာများနင်းမလား စိုးရိမ်ခဲ့ရတယ် ။

သူ့အရည်အသွေးကို တီးခေါက်မိသူတွေထဲ ဒေးဗစ်မိုယက်စ်လည်းပါဝင်ခဲ့ပါတယ်။ အဲဗာတန်နည်းပြထိုင်ခုံကိုပြန်ရောက်လာပြီး ဆောင်းရာသီအပြောင်းအရွှေ့မှာ ဂျူဗရီဟောကို အငှားနဲ့ ခေါ်ဖို့ ကြိုးစားခဲ့သေးတယ်။ ချဲလ်ဆီးက Squad depth အတွက် လက်မလွှတ်ချင်ခဲ့လို့ ရာသီကုန်အထိ ဆက်ရှိခဲ့တာပါ။ ဒီလိုချောင်ထိုးခံထားရပေမယ့် ဂျူဗရီဟောက ပရိုပီသမှုကို ပြသခဲ့ပြီး အသင်းဖော်တွေ၊ နည်းပြအဖွဲ့ဝင်တွေ၊ ဝန်ထမ်းတွေအားလုံးနဲ့ ဆက်ဆံရေးကောင်းကို တည်ဆောက်ထားနိုင်ခဲ့တယ်။ ကမ္ဘာ့ကလပ်ဖလားရောက်တဲ့အထိ ချဲလ်ဆီးနဲ့အတူ ပါဝင်ခဲ့ပြီး ချန်ပီယံဆုဖလားကို ကိုင်မြှောက်နိုင်ခဲ့ပါသေးတယ်။ ဒီပြိုင်ပွဲပြီးမှ သူ့အနာဂတ်အတွက် စဥ်းစားဖို့အချိန်ရောက်လာ၊ လက်မလျှော့သေးတဲ့ ဒေးဗစ်မိုယက်စ်ရဲ့ ဖိတ်ခေါ်မှုကို လက်ခံခဲ့တာပါ။ မာရက်စ်ကာ တစ်ရာသီလုံး Team B မှာသာ ကစားခွင့်ပေးထားပေမယ့် တည်ငြိမ်ရင့်ကျက်စွာတုံ့ပြန်ခဲ့တဲ့ သူ့ Character ကို အဲဗာတန်ဘက်က သဘောကျခဲ့တယ်။ ပေါင် ၂၄ သန်း+ Adds on ၃ သန်းဆိုတာ ဒီကွင်းလယ်လူအတွက် Bargain price လို့ ဆိုနိုင်လိမ့်မယ်။ လူစာရင်းမှာအပြောင်းအလဲကြီးကြီးမားမားတွေ ပြုလုပ်ခဲ့တဲ့ အဲဗာတန်က အံဝင်ခွင်ကျဖြစ်ဖို့ အချိန်ယူရဦးမယ်လို့ တွေးခဲ့ကြတာပဲ။ ဒါပေမယ့် ဂျူဗရီဟော၊ အငှားရောက်လာတဲ့ ဂျက်ဂရေးလစ်ရှ်တို့နဲ့အတူ ကွင်းသစ် Era ကို ဖွင့်လှစ်တဲ့ အဲဗာတန်ရဲ့ ဘောလုံးရာသီက ရင်ခုန်စရာဖြစ်လာခဲ့တယ်။ ၂၀၁၈ နောက်ပိုင်း ပထမဆုံးဥရောပဝင်ခွင့်အတွက် ရေပန်းစားတဲ့ အခြေအနေမျိုးထိရောက်လာတယ်။

ဂျူဗရီဟောက ပရီးမီးယားလိဂ် ၁၅ ပွဲမှာ ၁၄ပွဲ ပွဲထွက်ခဲ့ပြီး အဝါကဒ် ငါးကဒ်ပြည့်သွားတဲ့တစ်ပွဲသာ လွဲထားတယ်။ ဂေးယီ-ဂျိမ်းစ်ဂါနာတို့ရဲ့ရှေ့မှာ ဂျူဗရီဟောက Number 10 role ပုံစံ တိုက်စစ်ကို ပုံဖော်ခွင့်ရတယ်။ လိုင်းတွေကြားမှာ နေရာယူပုံ၊ Tight space တွေထဲ သက်တောင့်သက်သာဖြစ်တဲ့ အရည်အသွေး၊ ပွဲကိုဖတ်ရှုနိုင်စွမ်း၊ လုပ်အားနှုန်း.. စသဖြင့် အဲဗာတန်တိုက်စစ်ရဲ့လမ်းကြောင်းတွေကို ဆက်တိုက်ရှာဖွေပေးနေတယ်။ ဂေးယီ ယူနိုက်တက်နဲ့ပွဲ တိုက်ရိုက်အနီကဒ်ထိသွားပြီးနောက်ပိုင်းပွဲတွေမှာ ဂျူဗရီဟောက Number 8 နေရာ ပြန်ရောက်သွားတယ်။ အယ်ကာရက်ဇ်ကို တိုက်စစ်မှုးရဲ့နောက်မှာထားတယ်။ ဂျူဗရီဟောက ဒီနေရာမှာလည်း အထိရောက်ဆုံးဖြစ်အောင် သပ်သပ်ရပ်ရပ်ကစားနိုင်တာတွေ့ ရတယ်။ ဂေးယီမရှိတဲ့ကွင်းလယ်လုပ်အားနှုန်း၊ ကြံ့ခိုင်မှု လျော့ကျသွားမလားဆိုတဲ့ သံသယတွေကို မှိန်ဖျော့သွားစေတယ်။ တာဝန်ယူစိတ်၊ ဦးဆောင်လိုစိတ်အပြည့်ရှိတဲ့ သူ့ Character က မိုယက်စ်ရဲ့ အဓိကစစ်သည်တော်တစ်ယောက်ဖြစ်လာစေခဲ့တာပါပဲ။ အထူးသဖြင့် Left inside channel တွေမှာ ဂရေးလစ်ရှ်နဲ့ နီးနီးကပ်ကပ်အလုပ်လုပ်ပုံက အဲဗာတန်တိုက်စစ်ကို ပုံဖော်တယ်။ ဂရေးလစ်ရှ်က Width ကိုယူတဲ့အခါ ဂျူဗရီဟောက Underlapping run တွေနဲ့ ဧရိယာထဲ ရွေ့လျားတယ်။ ဒီလို Underlapping run တွေ ဂျူဗရီဟောထက် ပိုပြီးပြုလုပ်ထားတာဆိုလို့ ဖောရက်စ်ရဲ့ အဲလိယော့အန်ဒါဆန်တစ်ယောက်ပဲရှိတယ်။ ဒီတွဲလုံးကနေ အဲဗာတန်ရတဲ့ အခွင့်အရေးတွေ ဘယ်နည်းပါ့မလဲ။ ဂျူဗရီဟောက ပရီးမီးယားလိဂ် ၁၄ ပွဲမှာ ၄ ဂိုးသွင်း+၂ ကြိမ်ဖန်တီးထားတယ်။

ပရီးမီးယားလိဂ်ရဲ့ Tackle won ၂၅ ကြိမ်အထက်၊ Possession won အကြိမ် ၅၀ အထက်၊ Duels won ၇၅ ကြိမ်အထက် ပြုလုပ်ထားတဲ့ ကွင်းလယ်လူနှစ်ယောက်ထဲက တစ်ယောက်ဖြစ်တယ်။ တိုက်စစ်ခံစစ် သမမျှတနေတဲ့ သူ့ Impact ကို မြင်ရမယ်။ ဒီနေ့ည စတန်းဖို့ဘရစ်ချ်မှာ သူအမြဲ အကောင်းဘက်ကချည်း မှတ်ချက်ပေးခဲ့တဲ့အသင်းဟောင်းကို ရင်ဆိုင်ရမယ်။ အဲဗာတန်က စတန်းဖို့ဘရစ်ချ်မှာ မနိုင်တာ နှစ် ၃၀ ပြည့်တော့မယ်။ ဂျူဗရီဟောက ၂၀၁၃ ကတည်းက မနိုင်တဲ့အိုးထရက်ဖို့ဒ်နိုင်ပွဲကိုရှာဖွေပေးခဲ့ပြီး ဒီတကြိမ်ရော သူရဲကောင်းဖြစ်ခွင့်ရဦးမလား။ အဲဗာတန်က နောက်ဆုံး ၅ ပွဲမှာ ၄ ပွဲနိုင်ထားတယ်။ မိုယက်စ်ကိုင်တွယ်ချိန်ကစလို့ အဝေးကွင်းရလဒ်အကောင်းဆုံးပရီးမီးယားလိဂ်ကလပ်ဖြစ်တယ်။ ချဲလ်ဆီးက လေးပွဲဆက်နိုင်ပွဲပျောက်မှုကို ရပ်တန့်ဖို့ ကြိုးစားရမယ်။ အဲဗာတန်အတွက် မလွယ်ကူတဲ့စမ်းသပ်မှုဖြစ်ပြီး မိုယက်စ်ဘက်မှာ ဂျူဗရီဟော၊ ဂရေးလစ်ရှ်၊ အန်ဒီယာရီတို့ရဲ့ အားနဲ့ တုံ့ပြန်ဖို့ ကြိုးစားရမယ်။ လက်ရှိပုံစံအတိုင်း Form အတိုင်းဆိုရင် ဂျူဗရီဟောဟာ တူချယ်ရဲ့ကမ္ဘာ့ဖလားလူစာရင်းမှာ ပါဝင်သင့်ပြီလားဆိုတဲ့ Debate တွေလည်း ထိုက်တန်စွာပေါ်ထွက်လာခဲ့တယ်။ အင်္ဂလန်ရဲ့ ကွင်းလယ်တိုက်စစ်အားသန်းကစားသမားအရင်းအမြစ်က ဝင်တိုးဖို့မလွယ်ပေမယ့် ဂျူဗရီဟောတစ်ယောက် သူ့အိပ်မက်ကိုမစွန့်လွှတ်ခဲ့။ အဲဗာတန်အသင်းဖော်ကိုးလ်မန်းကနေတစ်ဆင့်ဆက်သွယ်လာတဲ့ အိုင်ယာလန်ရဲ့ ကမ်းလှမ်းမှုကို ပယ်ချထားခဲ့တယ်။ အဖိုးအဖွားတွေဘက်ကနေ အိုင်ယာလန်သွေးပါပေမယ့် ဂျူဗရီဟောက သူမွေးဖွားကြီးပြင်းရာဒေသကိုပဲ ကိုယ်စားပြုချင်ပုံရတယ်။ သူ့ကြိုးစားအားထုတ်မှုတွေဟာ နေရာတစ်နေရာအတွက် လုံလောက်ပါ့မလား၊ အဲဗာတန်ရဲ့ အိပ်မက်လို ကွင်းသစ်နဲ့ပထမဆုံးရာသီကို ဆက်လက်သယ်ဆောင်သွားနိုင်မလား စောင့်ကြည့်ရပါဦးမယ်.. ။

12/11/2025

မာရက်စ်ကာရဲ့ Rotation ဟာ
အလုပ်ဖြစ်နေသေးရဲ့လား
▪ 90minCorner

ဘာစီလိုနာကို ဂိုးပြတ်အနိုင်ယူ၊ တစ်ယောက်လျော့အနေအထားမှာ အာဆင်နယ်ကို သရေကစားသွားတဲ့ ချဲလ်ဆီးရဲ့ အရှိန်က တမဟုတ်ချင်းပြန်ထိုးကျသွားတယ်။ လန်ဒန်ဒါဘီသရေပွဲကနေ အစပြုလို့ ပြိုင်ပွဲစုံလေးပွဲဆက်အမှတ်လျော့ခဲ့ခြင်းနဲ့အတူ တည်ငြိမ်စပြုလာတဲ့ သူတို့ရဲ့ဘောလုံးရာသီက ခန့်မှန်းမရခြင်းတွေဆီ ဦးတည်သွားခဲ့ပြန်တယ်။ လိဒ်စ်ယူနိုက်တက်ကို ရှုံးတဲ့ပွဲဟာ မာရက်စ်ကာအတွက် သံချောင်းခေါက်သံပဲ။ ဒါကို ပြုပြင်ဖို့ ကြိုးစားရင်းနဲ့ပဲ ဘုန်းမောက်ကို သရေကျတယ်။ ချန်ပီယံလိဂ်မှာ အတ္တလန်တာကို ထပ်ရှုံးတယ်။ မာရက်စ်ကာရဲ့ အသင်းဟာ ရလဒ်တွေကို ကာကွယ်ဖို့ မတတ်နိုင်သေးတာ၊ ရင့်ကျက်တည်ငြိမ်မှုအပိုင်းမှာ အားနည်းနေသေးတာတွေကို ဆက်မြင်ရတုန်းပဲ။ ပရီးမီးယားလိဂ်မှာက ကိုင်စီဒိုရဲ့ ပွဲပယ်ပြစ်ဒဏ်ကြောင့်လို့ ဆင်ခြေပေးလို့ရတယ်ထားဦးတော့ ချန်ပီယံလိဂ်မှာပါ ပုံစံကောင်းမပြနိုင်ခဲ့တာက သူတို့ရဲ့ လိုအပ်ချက်ကို ဖော်ပြနေတယ်။ နောက်တချက်က မန်စီးတီးကိုသရေကစားထားတဲ့ လိဒ်စ်ကလွဲရင် ဘုန်းမောက်၊ အတ္တလန်တာတို့က လက်ရှိမှာခြေအရမ်းငြိမ်နေတဲ့ အသင်းတွေမဟုတ်ဘူး။ ဒီတော့ ရလဒ်တွေက နှမြောဖို့ကောင်းတယ်။ ဘာကြောင့်များလဲ လေ့လာကြည့်တဲ့အခါ အချိန်တိုင်းပြောင်းလဲနေတဲ့ မာရက်စ်ကာရဲ့ပွဲထွက်လူစာရင်းနဲ့ Rotation policy ကို သွားတွေ့ ရတယ်။ ဒါကပဲ ချဲလ်ဆီးပရိသတ်အများစု အလိုမကျဖြစ်နေရတဲ့အရာလို့ ဆိုနိုင်မယ်ထင်တယ်။

မာရက်စ်ကာက ပြီးခဲ့တဲ့ရာသီမှာကတည်းက Rotation ကို စနစ်တကျဦးစားပေးကိုင်တွယ်ခဲ့တယ်။ ကွန်းဖရင့်လိဂ်မှာ ကိုယ့်ထက်အားနည်းတဲ့ ပြိုင်ဘက်အများစုဆိုတော့ စီနီယာတွေကို ရှုံးထွက်အဆင့်ရောက်မှ ထုတ်သုံးခွင့်ရခဲ့တယ်။ ကွန်းဖရင့်လိဂ်အောင်ပွဲ၊ ချန်ပီယံလိဂ်ဝင်ခွင့်အပြင် ကမ္ဘာ့ကလပ်ဖလားကိုပါ ထပ်ဆောင်းသိမ်းပိုက်သွားနိုင်ခဲ့တယ်။ ရာသီပိတ်ကာလတွေမှာ အဓိက,ကစားသမားတွေ Fresh ဖြစ်နေအောင် ပွဲချိန်မိနစ်တွေကို ချိန်ညှိနိုင်ခဲ့တဲ့ အကျိုးကျေးဇူးပဲ။ ဒဏ်ရာရလွယ်တဲ့ အသင်းခေါင်းဆောင်ရိစ်ဂျိမ်းစ် ပြီးခဲ့တဲ့ တစ်နှစ်ပတ်လုံး ကြံ့ခိုင်မှုအပြည့်ကစားနိုင်ခဲ့တာဟာ အကောင်းဆုံးဥပမာပဲ။ ပြီးခဲ့တဲ့ရာသီမှာ ချဲလ်ဆီးဟာ ကမ္ဘာ့ကလပ်ဖလားအထိ ပြိုင်ပွဲစုံ ၆၄ ပွဲအထိ ကစားခဲ့ရတာပါ။ ဒီရာသီမှာလည်းနောက်ဆုံးအဆင့်တွေအထိရောက်ရင် ပွဲအရေအတွက် ၆၀ ဝန်းကျင် ပြေးမလွတ်ဘူးပေါ့။ ဒီတော့ မာရက်စ်ကာက Rotation ကို ဆက်ပြီးသုံးရပါတယ်။ ခက်တာက ဒီတကြိမ်ဟာ ကွန်းဖရင့်လိဂ်မဟုတ်တော့အတွက် ရလဒ်ပိုင်းက သိသာလာခဲ့တယ်။ ကြားရက်ချန်ပီယံလိဂ်ပွဲစဥ်တွေနဲ့ ဒီဇင်ဘာပွဲကျပ်ကာလဟာ သူတို့ကို သင်ခန်းစာပေးဖို့ရောက်ရှိလာတယ်။ Rotation method ဟာ လက်ရှိကျပ်ညက်နေတဲ့ ပွဲစဥ်ဇယားတွေထဲ လူစာရင်းရဲ့ Workload ကို စီမံနိုင်ဖို့၊ ဒဏ်ရာပြဿနာတွေကို ရှောင်လွှဲနိုင်ဖို့ နည်းပြတိုင်းမဖြစ်မနေ အသုံးပြုလာရတဲ့ နည်းလမ်းတစ်ခုပဲ။ လက်ရှိ မာရက်စ်ကာကို ဝိုင်းပြီးထောက်ပြနေကြတာက ခုလိုအပြောင်းအလဲတွေအမြဲရှိနေတာဟာ အသင်းရဲ့တည်ငြိမ်မှုကို ထိခိုက်စေတဲ့အထိ သက်ရောက်လာခဲ့ပြီလားဆိုတာပါပဲ။ ရလဒ်တွေ ဆက်တိုက်ယိမ်းယိုင်လာတဲ့အခါ နည်းပြတွေရဲ့ ခန့်ခွဲမှုကို မေးခွန်းထုတ်ရတဲ့ သဘောပေါ့။ ဒီတော့ မာရက်စ်ကာလုပ်နေတဲ့ အပြောင်းအလဲတွေ ဘယ်လောက်ထိ များသလဲ ။

မာရက်စ်ကာက ဒီရာသီပြိုင်ပွဲစုံ ၂၃ ပွဲမှာ ပွဲထွက်လူစာရင်းကို ၁၁၉ ကြိမ်အပြောင်းအလဲလုပ်ခဲ့တယ်။ တစ်ပွဲပျမ်းမျှ ၅ ယောက်လောက်ပြောင်းနေတဲ့ သဘောမျိုး။ ဒီပမာဏက ပရီးမီးယားလိဂ်နည်းပြတွေထဲ အများဆုံးပါ။ ပွဲထွက်လူစာရင်းတင်လားဆိုတော့ မဟုတ်ဘူး။ မာရက်စ်ကာကပွဲအတွင်းမှာလည်း လူစားလဲမှုတွေဆက်တိုက်လုပ်တယ်။ အတ္တလန်တာကို ရှုံးတဲ့ပွဲမှာ ဒီရာသီ လူစားလဲမှုပေါင်း အကြိမ် ၁၀၀ ကျော်သွားပြီ။ ဒါက တစ်ပွဲပျမ်းမျှ ၄.၃၉ ယောက်နှုန်းဆိုတော့ ခွင့်ပြုထားတဲ့ ငါးယောက်စာလူစားလဲခွင့်ကို ပွဲတိုင်းအသုံးချသလို ဖြစ်နေမှာပါ။ ဒီလိုအပြောင်းအလဲတွေလုပ်ပြီး ရလဒ်ကောင်းတွေဆက်တိုက်ရယူနိုင်တယ်၊ ဝင်ကစားရသူတိုင်း အမြင့်ဆုံးပုံစံနဲ့ ကစားနိုင်တယ်ဆိုရင်တော့ မာရက်စ်ကာရဲ့ပေါ်လစီက Masterpiece ဖြစ်သွားမယ်။ ခုတော့ ပွဲထွက်သူတွေနဲ့ အရန်လူတွေကြား ခြားနားမှုတချို့ရှိနေတယ်။ တစ်ဦးချင်းရော စုဖွဲ့ကစားဟန်မှာရော။ ရလဒ်တွေကလည်း မတည်ငြိမ်ဆိုတော့ ပြောစရာဖြစ်လာခဲ့တယ်။ မာရက်စ်ကာအပြောင်းအလဲအနည်းဆုံးပြုလုပ်ခဲ့တာက ဘာစီလိုနာနဲ့ အာဆင်နယ်တို့ကို ဆက်တိုက်ရင်ဆိုင်ခဲ့ရတုန်းကပါ။ ပွဲထွက်လူစာရင်းကို တစ်နေရာသာ အပြောင်းအလဲလုပ်ခဲ့တယ်။ အာဆင်နယ်နဲ့ပွဲမှာ စောစောစီးစီးတစ်ယောက်လျော့သွားပေမယ့် လူစားလဲမှုနှစ်ကြိမ်ပဲ လုပ်ခဲ့တယ်။ ဒီနှစ်ပွဲစလုံးမှာ အသင်းရဲ့ ကစားဟန်ရော ရလဒ်ပိုင်းဟာ အားရစရာကောင်းခဲ့တယ်။ စုဖွဲ့လှုပ်ရှားပုံတွေက ဟန်ချက်ညီ ရုပ်လုံးကြွနေခဲ့တယ်။ ဒါဟာ အသင်းရဲ့ အကောင်းဆုံးပွဲထွက်လူစာရင်းလား၊ အသင့်တော်ဆုံး Line-up လားဆိုတာမျိုးတွေ တွေးမိစေခဲ့တယ်။ ဒါဟာ တိုက်ဆိုင်မှုမဟုတ်ပါဘူး။ ဒါပေမယ့်ဒီနောက်ပိုင်းမှာ မာရက်စ်ကာက သူ့ပေါ်လစီကို ပြန်သုံးခဲ့တာပါပဲ ။

နိုဝင်ဘာလထဲ ကာရာဘတ်နဲ့ သရေကျတဲ့ပွဲအပြီးမှာ ရွန်နေးက မာရက်စ်ကာရဲ့ လူထုတ်ပုံနဲ့ ပက်သက်ပြီး ကစားသမားတွေဟာ အပတ်တိုင်းကစားခွင့်ရချင်တဲ့အကြောင်း၊ တွဲကစားနေကျအသင်းဖော်တွေနဲ့မှ ပိုပြီးသက်တောင့်သက်သာဖြစ်တဲ့အကြောင်း ထောက်ပြခဲ့ဖူးတယ်။ နောက်ဆုံးကစားခဲ့တဲ့သုံးပွဲမှာ ပွဲထွက်လူစာရင်းကို အပြောင်းအလဲ ၁၆ ကြိမ်နဲ့အတူ လူစားလဲမှု ၁၂ ခုတိတိ ပြုလုပ်ခဲ့တယ်။ ရလဒ်တွေကတော့ သိတဲ့အတိုင်း အားရစရာမရှိခဲ့။ ဒီမှာ အပြောင်းအလဲတွေဆိုတာက တချို့ဟာ ဒဏ်ရာ၊ ပွဲပယ်ပြစ်ဒဏ်တွေကြောင့် မဖြစ်မနေ ပြုလုပ်ခဲ့ရတဲ့အပိုင်းတွေလည်း ရှိနေပါတယ်။ မာရက်စ်ကာကတော့ ဘုန်းမောက်နဲ့ပွဲကလူစာရင်းနဲ့ ယှဥ်ပြောရင်မှန်ပေမယ့် အတ္တလန်တာနဲ့ပွဲက ကစားသမား ၈ ယောက်၊ ၉ ယောက်လောက်ဟာ ဘာစီလိုနာ၊ အာဆင်နယ်တို့နဲ့ပွဲတွေမှာလည်း ကစားခဲ့သူတွေလို့ ဖြေရှင်းသွားတယ်။ ရတယ်။ နားလည်ရခက်တာက တချို့လူစားလဲမှုတွေ။ အဝါကဒ်ထိသွားတဲ့ ချာလိုဘတ်ကို ဖိုဖာနာနဲ့ ပထမပိုင်းအပြီးမှာ လူစားလဲတာက သဘာဝကျပါတယ်။ ဒီမှာလည်း ဖိုဖာနာကမျက်လုံးထိခိုက်မိသွားတာကြောင့် တိုဆင်နဲ့ ထပ်လဲရတယ်။ ၆၇ မိနစ်မှာ ပွဲပန်းနေတဲ့ အန်ဇိုကို လဲရတဲ့အခါ အန်ဒရေဆန်းတို့စ်ကိုသုံးမယ့်အစား ဂူစတိုကို ထည့်သွားတယ်။ ရိစ်ဂျိမ်း ကွင်းလယ်မှာရှိနေပြီးသားကို နောက်ထပ် Inverted fullback တစ်ယောက်ထပ်ထည့်လိုက်သလိုဖြစ်သွားတယ်။ အာချင်ပေါင်လေးကတော့ အားရစရာအပေါင်းလက္ခဏာအဖြစ် မြင်ရတယ်။ ပွဲက စီစဥ်ထားတဲ့အတိုင်းဖြစ်မလာတဲ့အခါ မာရက်စ်ကာရဲ့ လူစားလဲမှုတွေက တချို့အချိန်တွေမှာ နားလည်ရခက်နေတယ်။ အနည်းဆုံး ခံစစ်မှာတော့ တည်ငြိမ်တဲ့ အစုအဖွဲ့တစ်ခုကို ဖန်တီးထားနိုင်သင့်တယ်။ အပြောင်းအလဲတွေကို လျှော့ချသင့်တယ်။ အသင်းကြီးတွေနဲ့ ကစားတဲ့အခါ ပုံစံကောင်းပြနိုင်ပေမယ့် အမှတ်မလျော့သင့်တဲ့ပွဲတွေမှာ ခြေချော်လက်ချော်ဖြစ်တတ်တဲ့ အကျင့်ကို ပြင်သင့်တယ်။ ရာသီတိုင်းမှာ ကစားသမားအဝင်အထွက်တွေသိပ်ကြမ်းပေမယ့် လုံလောက်တဲ့ Squad depth ကို ပိုင်ဆိုင်မထားတာ နှမြောစရာပါပဲ။ မာရက်စ်ကာရဲ့ Rotation ဟာ လုပ်သင့်တဲ့အရာဆိုတာ မှန်ပေမယ့် တချို့အခြေအနေတွေမှာ ပြန်ပြီးချိန်ညှိသင့်နေပြီလို့ သုံးသပ်ရတော့မှာဖြစ်ကြောင်းပါ.. ။

12/06/2025

အူနိုင်းအမ်မရီက ပွဲချိန် ၈၇ မိနစ်မှာ မာတီကတ်ရှ်ရဲ့နေရာ ဘွန်ဒီယာကို ထည့်လိုက်တယ်။ နာကျင်အချိန်ပိုအထိ သူ့အသင်းသားတွေကို တိုက်စစ်ဆက်ဖွင့်ဖို့ အော်ဟစ်ညွှန်ကြားနေတယ်။ ပြိုင်ပွဲစုံနောက်ဆုံးအိမ်ကွင်း ၃၁ ပွဲမှာ တစ်ပွဲသာအရေးနိမ့်ထားတဲ့ မှတ်တမ်းကို ဗီလာပါ့ခ်ဟာ လွယ်လွယ်ရခဲ့တာမဟုတ်ကြောင်း နောက်တကြိမ်သက်သေပြခဲ့တာပါပဲ။ ပရီးမီးယားလိဂ် Big Six အပြင် ဘိုင်ယန်မြူးနစ်၊ ပီအက်စ်ဂျီတို့ကိုပါ အနိုင်ယူခဲ့တယ်။ နောက်ဆုံးပရီးမီးယားလိဂ် ၁၀ ပွဲမှာ ၉ ပွဲအနိုင်ယူထားတဲ့ ဗီလာက မန်စီးတီး မကန်ရသေးခင်အမှတ်ပေးဇယားရဲ့ ဒုတိယနေရာအထိ တက်လှမ်းလာခဲ့ပါတယ်။

12/06/2025

ဗီလာပါ့ခ်နှင်းမှုန်တွေကြား
ဆောင်းရိပ်ခိုပြီး ပြန်လာသူတွေ
▪ 90minCorner

အက်စတွန်ဗီလာရဲ့ ရာသီအဖွင့်ဟာ မရေရာခြင်းတွေသာ အုံ့ဆိုင်းနေခဲ့တယ်။ ချန်ပီယံလိဂ်ဝင်ခွင့်ကို ပွဲစဥ် ၃၈ ရောက်မှ ယူနိုက်တက်ကိုရှုံးပြီး ဂိုးကွာခြားချက်ကြောင့် လက်လွှတ်ခဲ့ရတာနဲ့ စ,တင်တယ်။ ရက်ရှ်ဖို့ဒ်၊ အဆန်စီယိုတို့လို High profile တွေရဲ့ လုပ်ခလစာပေးချေရခြင်းနဲ့အတူ ပိုကျပ်တည်းလာတဲ့ ဘဏ္ဍာရေးအကန့်အသတ်တွေနဲ့ စတင်တယ်။ PSR စည်းမျဥ်းတွေအောက် ဆက်လည်ပတ်ဖို့ရာ အသင်းရဲ့ငယ်မွေးခြံပေါက်ဂျေကော့ဘ်ရမ်ဆေးကို ရောင်းထုတ်ခဲ့ရခြင်းနဲ့ စတင်တယ်။ နွေရာသီတလျှောက်လုံး ကစားသမားသစ်ခေါ်ယူဖို့ဝေးလို့ အဓိကစီနီယာတွေဖြစ်တဲ့ မော်ဂန်ရော်ဂျာစ်၊ မက်ဂင်း၊ ဝက်ကင်း၊ အီမီမာတီနက်ဇ်တို့ရဲ့ မရေရာတဲ့အနာဂတ်တွေကို ရင်တမမစောင့်ကြည့်ရခြင်းနဲ့ ဖြတ်သန်းခဲ့ရတယ်။ အပြောင်းအရွှေ့ပိတ်ခါနီးမှ အားဖြည့်မှုအနည်းငယ်ပြုလုပ်နိုင်ခဲ့ပေမယ့် ယူရိုပါလိဂ်ဝင်ခွင့်အတူရတဲ့ နော်တင်ဟမ်ဖောရက်စ်ရဲ့ ပေါင်သန်း ၁၈၀ အသုံးစရိတ်နဲ့နှိုင်းယှဥ်ရဲ့ မပြောပလောက်တဲ့ ပမာဏသာဖြစ်ခဲ့တယ်။ ဒီလိုအခြေအနေတွေကို ဖြတ်သန်းရတဲ့အခါ ကစားသမားတွေရဲ့ဆာလောင်မှုလျော့ကျသွားတာ၊ ခံစားချက်တွေ လေးပင်နေခဲ့တာဟာ အံ့ဩနေစရာလိုသေးရဲ့လား။ အူနိုင်းအမ်မရီရဲ့ ဗီလာဟာ ရာသီအဖွင့်ပြိုင်ပွဲစုံ ၆ ပွဲ နိုင်ပွဲပျောက်ခဲ့သလို ပရီးမီးယားလိဂ်ပွဲစဥ် ၅ အရောက်မှာ ၃ မှတ်သာ ရသေးတယ်။ ကာရာဘောင်ဖလားက စောစောစီးစီးထွက်ခွာရတယ်။ ဒီအခြေအနေကို အမ်မရီပြောင်းလဲပစ်ခဲ့ပုံက သိပ်လှတယ် ။

တစ်ယောက်လျော့ဆန်းဒါးလန်းနဲ့ တစ်ဂိုးစီသရေကျသွားတဲ့ပွဲမှာ အမ်မရီက သူ့အသင်းသားတွေရဲ့ အားထုတ်မှုအပေါ် မေးခွန်းထုတ်ခဲ့ပြီး မလိုအပ်ပဲ ဖိအားတွေသိပ်များလွန်းနေပြီလို့ဆိုခဲ့တယ်။ ဒီနောက်ပိုင်းမှာ ဗီလာဟာ သိသိသာသာပြောင်းလဲသွားတယ်။ တိုက်စစ်ပိုင်းမှာ ဝက်ကင်းရဲ့ ဂိုးပေါက်ပျောက်ဆုံးမှု၊ ကွင်းလယ်နဲ့ တောင်ပံကစားသမားတွေရဲ့ ဖန်တီးနိုင်စွမ်းအားနည်းမှုတွေကို အသင်းလိုက်စုဖွဲ့ကစားဟန်နဲ့ ပြောင်းလဲဖာထေးလာနိုင်တယ်။ စိတ်ပိုင်း၊ ရုပ်ပိုင်းဆိုင်ရာပုံမှန်အောက်ရောက်နေပြီး Intensity သိသိသာသာလျော့ကျလာတဲ့အသင်းဟာ သူတို့ရဲ့ ဝိဥာဥ်ကို ပြန်ရှာတွေ့ လာတယ်။ ကွင်းလယ်မှာ အိုနာနာ၊ ကာမာရာတို့နဲ့ လူပြန်စုံလာကြောင့်လည်း ပါလိမ့်မယ်။ Pressing က တကျော့ပြန်အားကောင်းလာသလို ဘောလုံးကိုခပ်မြန်မြန်ရွေ့တာ၊ တိုက်စစ်လှုပ်ရှားမှုတွေ ခပ်သွက်သွက်ဖြစ်လာတာကို မြင်ရတယ်။ ရှေ့ရာသီတွေမှာ မြင်ရတဲ့ Free-flowing attacking level မျိုးပြန်မရောက်သေးပေမယ့် ဗီလာက နိုင်ပွဲတွေကို တစိုက်မတ်မတ်ပြန်လည်ရှာဖွေလာနိုင်ခဲ့တယ်။ နောက်ဆုံးပြိုင်ပွဲစုံ ၁၄ ပွဲမှာ ၁၂ ပွဲတိတိ အနိုင်ယူခဲ့ပြီး လီဗာပူးလ်ရယ်၊ ယူရိုပါလိဂ်တစ်ပွဲရယ်သာ ရှုံးခဲ့တယ်။ နောက်ဆုံးပရီးမီးယားလိဂ် ၁၀ ပွဲမှာ ၈ ပွဲအနိုင်ယူခဲ့၊ ၂၅ မှတ်အထိ စုဆောင်းနိုင်ခဲ့တာဟာ ဒီကာလအတွင်းအကောင်းဆုံးမှတ်တမ်းပဲ။ ပြီးခဲ့တဲ့ ၁၀ ပွဲမှာ သူတို့ထက်ဂိုးပိုသွင်းနိုင်တာ မန်စီးတီးပဲရှိ၊ ပေးဂိုးနည်းတာ အာဆင််နယ်ပဲရှိတဲ့အထိ တည်ငြိမ်ခဲ့တယ်။

အူနိုင်းအမ်မရီက အလွန်အပင်ပန်းခံနိုင်တဲ့ Workahlic နည်းပြတစ်ယောက်ဖြစ်ပြီး ညသန်းခေါင်ယံအထိ အိမ်မပြန်သေးပဲ သူ့ရုံးခန်းထဲ အလုပ်လုပ်နေတတ်တဲ့ သူမျိုး။ အသေးစိတ် Video analysis တွေနဲ့အတူ ကစားသမားတစ်ယောက်ချင်းစီကို မကြာခဏတွေ့ ဆုံဆွေးနွေးတယ်။ အဖြေရှာတယ်။ ဒီအားထုတ်မှုတွေက အလဟဿမဖြစ်ခဲ့ဘူးဆိုတာ ဗီလာရဲ့လက်ရှိရလဒ်တွေက သက်သေပြနေတာပဲ။ ဖူလ်ဟမ်ကိုနိုင်တဲ့ပွဲကစပြီး အဝတ်လဲခန်းရဲ့ Mood က ပြောင်းလဲသွားတယ်။ အနာဂတ်လှုပ်ခတ်နေခဲ့တဲ့ အဓိက,ကစားသမားတချို့ကို စာချုပ်သစ်တွေချုပ်ဆိုနိုင်ခဲ့တယ်။ ထိပ်တန်းကလပ်တွေစောင့်ကြည့်နေကြတဲ့ မော်ဂန်ရော်ဂျာစ်အပါအဝင် အသင်းခေါင်းဆောင်ဂျွန်မက်ဂင်း၊ မာတီကတ်ရှ်၊ ဒစ်ဂ်ညာတို့ကို စာချုပ်သက်တမ်းတိုးခဲ့တယ်။ ၂၀၂၇၊ ၂၀၂၈ မှာ သက်တမ်းကုန်တော့မယ့် ဘွန်ဒီယာ၊ ကွန်ဆာ၊ တီလီမန်စ်၊ ပါအူတောရက်စ်တို့နဲ့ ဆွေးနွေးနေတယ်။ အသင်းရဲ့ Atmosphere က အပေါင်းလက္ခဏာဆောင်လာခဲ့ပြီး အူနိုင်းအမ်မရီရဲ့ ဗီလာပါ့ခ်ယန္တရားက တကျော့ပြန်အသက်ဝင်လာတယ်။ အမ်မရီရဲ့ လူစာရင်းမှာ ကျောရိုးက သူ့ရဲ့ဗီလာနည်းပြဘဝ ပထမဆုံးပွဲကတည်းက ရှိခဲ့တဲ့သူအများစု။ အသင်းကို နှုတ်ဆက်ခဲ့၊ ထွက်ခွာဖို့ အနီးစပ်ဆုံးဖြစ်ခဲ့တဲ့ မာတီနက်ဇ်ရဲ့ လက်စွမ်းက ပြန်အသက်ဝင်လာတယ်။ ကွန်ဆာက လက်ရွေးစင်အသင်းမှာပါပွဲထွက်သူဖြစ်လာပြီး မက်ဂင်း၊ ကာမာရာတို့လိုကွင်းလယ်လူတွေ၊ ကတ်ရှ်၊ ဒစ်ဂ်ညာတို့လို Fullback တွေက အားကိုးရဆဲပဲ။ ရာသီအဖွင့် ၁၉ ပွဲမှာ တစ်ဂိုးသာရခဲ့တဲ့ ဝက်ကင်းလည်း ဂိုးပေါက်ပြန်ရှာတွေ့ သွားခဲ့ပြီ ။

ဗီလာလူစာရင်းရဲ့ ပျမ်းမျှအသက်အရွယ်က ၂၇.၄ နှစ်ဖြစ်ပြီး ဖူလ်ဟမ်နဲ့အတူ အသက်အကြီးဆုံးကလပ်အဖြစ်ရပ်တည်နေတာဟာ ဒီနှစ်သင်းရဲ့ Squad building လိုအပ်ချက်ကိုဖော်ပြနေတယ်။ အူနိုင်းအမ်မရီဟာ သူလိုချင်ခဲ့တဲ့ ပစ်မှတ်တွေကို မရခဲ့သည့်တိုင်အောင် ရှိရင်းစွဲလူစာရင်းအတိုင်း ဗီလာကို လမ်းကြောင်းမှန်ပေါ် ပြန်ဆွဲတင်ခဲ့တယ်။ အငှားက ပြန်ရောက်လာတဲ့ ဘွန်ဒီယာပြန်အားကိုးလာရတာ ကျေနပ်စရာပါပဲ။ အငှားခေါ်ထားတဲ့ ဟာဗေးအဲလိယော့ကိုသိပ်မသုံးတာ၊ ဆန်ချို ပွဲထွက်ခွင့်မရသေးတာတွေက Recruiment plan တွေရဲ့ အားနည်းချက်ပဲ။ ဒါပေမယ့် ဗီလာဟာ မူရင်းစီနီယာတွေနဲ့ ပြန်အလုပ်ဖြစ်လာခဲ့တယ်။ ဘရိုက်တန်နဲ့ပွဲမှာ အမ်မရီက အက်စတွန်ဗီလာနည်းပြတွေထဲ နိုင်ပွဲအများဆုံးရှာဖွေနိုင်သူအဖြစ် မှတ်တမ်းဝင်သွားခဲ့တယ်။ တိုက်စစ်ရဲ့ဖန်တီးမှုလိုအပ်ချက်ရှိနေဆဲဆိုတာ သူတို့ရဲ့နိမ့်ကျတဲ့ xG ပမာဏမှာမြင်နိုင်ပေမယ့် ဧရိယာအဝေးကန်ချက် ၉ ဂိုးက ဗီလာရဲ့လက်နက်ပုန်းတွေဖြစ်လာတယ်။ ရာသီအဖွင့်မှာ တန်းဆင်းဇုန်ထဲရောက်နေတဲ့အသင်းဟာ ဒီညနေအစောဆုံးပွဲဖြစ်တဲ့ အာဆင်နယ်ကိုနိုင်ရင် ဇယားထိပ်နဲ့သုံးမှတ်အကွာကိုရောက်မယ်ဆိုတာ အတော်ပဲ အံ့ဩစရာကောင်းတယ်။ ဒါက အတွေ့ အကြုံရင့်နည်းပြတစ်ယောက်အနေနဲ့ အခက်အခဲတွေကို ရင်ဆိုင်ဖြေရှင်းပုံပဲ။ အတုယူစရာကောင်းတယ်။ အမ်မရီလက်ထက် အိမ်ကွင်းမှတ်တမ်းဟာ ဗီလာရဲ့ခေတ်သစ်သမိုင်းမှာ အတောက်ပြောင်ဆုံးဖြစ်နေခဲ့ပြီး ဒီခံတပ်ရဲ့မာကျောမှုနဲ့ပဲ ဇယားထိပ်က အမြင့်ပျံအာဆင်နယ်ကို ရပ်တန့်ဖို့ ကြိုးစားရမယ်။ ရလဒ်ဘယ်လိုပဲထွက်လာပါစေ အကန့်အသတ်ရှိနေတဲ့ပြင်ဆင်မှုတွေအလွန်မှာ အသင်းကိုခုလိုအခြေအနေအထိ ဆွဲတင်ထားနိုင်ခဲ့တာနဲ့တင် အမ်မရီကိုအမှတ်ပြည့်ပေးထားသင့်ပါတယ်.. ။

12/02/2025

Don't sleep on these players ( 1 )
▪ မာလစ်ခ်သီယော

ပရီးမီးယားလိဂ်ဗဟိုပြုလို့ ဥရောပတလွှားက Rising talent တွေ၊ ပရိသတ်တွေ သိပ်မရင်းနှီးသေးတဲ့ တက်သစ်စကြယ်ပွင့်တွေ၊ လက်ရှိရာသီမှာ အမြင့်ဆုံးစွမ်းဆောင်ရည်ကို တစိုက်မတ်မတ်ပြသနေကြတဲ့ စောင့်ကြည့်ချင်စရာကစားသမားတွေကို မိတ်ဆက်ပေးဖို့ စိတ်ကူးရတယ်။ ခေါင်းစဥ်ကိုတော့ 'Don't sleep on these players' လို့ပဲ နာမည်ပေးလိုက်တယ်။ ဒီအစီအစဥ်မှာ တင်ဆက်ပေးချင်တဲ့ မျက်စိကျချင်စရာ ပလေယာတွေ အများအပြားရှိနေပါတယ်။ ဥပမာ- ကိုမိုမှာ ကစားနေတဲ့ ရီးယဲလ်အကယ်ဒမီထွက်နီကိုပက်ဇ်လို လူငယ်ကြယ်ပွင့်တွေလည်း ပါမယ်။ ဘရန်းဖို့ဒ်အတွက် ဂိုးမြူးနေတဲ့ တိုက်စစ်မှုးအီဂေါ်သီယာဂိုလို ကစားသမားတွေလည်းပါမယ်။ ပရိသတ်တွေရင်းနှီးပြီးသားဖြစ်နိုင်ပေမယ့် နောက်ထပ်သန်းရာချီအပြောင်းအရွှေ့လို့ ယူဆရမယ့် အဲလိယော့အန်ဒါဆန်ကိုလည်း Analyse လုပ်ပေးချင်သေးတယ်။ ဖြည်းဖြည်းချင်း တစ်ယောက်ချင်းစီသွားကြတာပေါ့။ ပထမဆုံးဒီအစီအစဥ်မှာ မိတ်ဆက်ပေးချင်တဲ့သူအဖြစ် နယူးကာဆယ်ရဲ့ ဂျာမန်ကြယ်ပွင့်နောက်ခံလူမာလစ်ခ်သီယောကို ရွေးချယ်လိုက်ပါတယ် ။

အက်ဒီဟောင်းရဲ့ နယူးကာဆယ်က အိမ်ကွင်းမာသလောက် အဝေးကွင်းရလဒ်တွေယိမ်းယိုင်လေ့ရှိတဲ့အသင်းဖြစ်ပြီး ဒီရလဒ်ဆိုးတွေကိုပဲ အသင်းအတွက် ရောက်သင့်တဲ့နေရာကိုမရောက်စေတဲ့ အဟန့်အတားမျိုးဖြစ်နေခဲ့တယ်။ ပရီးမီးယားလိဂ်အဝေးကွင်း ၉ ပွဲဆက် နိုင်ပွဲပျောက်ဆုံးမှုကို ပြီးခဲ့တဲ့ weekend က အဲဗာတန်ရဲ့ Hill dickson Stadium မှာ ရပ်တန့်သွားနိုင်ခဲ့တယ်။ နယူးကာဆယ်ရဲ့ ကျိန်စာဆိုးကို ရပ်တန့်နိုင်ခဲ့တဲ့ဒီပွဲမှာ သွင်းဂိုးနှစ်ဂိုးနဲ့အတူ ခြေစွမ်းပြနိုင်ခဲ့သူက မာလစ်ခ်သီယောပဲ။ ပွဲ,စလို့ ၅၅ စက္ကန့်မှာပဲ လူးဝစ်မိုင်လီရဲ့ ထောင့်ကန်ဘောကနေ သီယောက ဦးဆောင်ဂိုးကို သွင်းခဲ့တယ်။ ပရီးမီးယားလိဂ်ရဲ့ ဒီရာသီအမြန်ဆုံးဂိုးဖြစ်လာတယ်။ နောက်ထပ်သွင်းဂိုးကို လူးဝစ်ဟောရဲ့ ဖြတ်တင်ဘောကနေ ခေါင်းတိုက်သွင်းယူခဲ့တယ်။ သီယောက ကစားသမားဘဝတလျှောက် သုံးဂိုးသာ သွင်းခဲ့ဖူးတာပါ။ ဒါက Career ၄ ဂိုးမြောက်၊ ၅ ဂိုးမြောက်တွေပဲ။ တိုက်စစ်မှုးဗိုတာမာဒေက သီယောရဲ့ ခေါင်းတိုက်အဆုံးသတ်စွမ်းရည်အားနည်းမှုဟာ အသင်းဖော်တွေကြား နောက်ပြောင်စရာတစ်ခုဖြစ်နေခဲ့ပြီး ဒီပွဲမှာသူ့အရည်အသွေးကို သက်သေပြခဲ့ပြီလို့ ချီးကျူးသွားတယ်။ တိုနယ်လီလိုပဲ မီလန်ကနေ ပြောင်းရွှေ့လာတဲ့ သီယောက ပွဲထွက်နေရာကို ချက်ချင်းပိုင်ဆိုင်ခွင့်ရခဲ့တာမဟုတ်သလို ပရိသတ်တွေအထူးတလည်ကြိုဆိုရတဲ့ ခေါ်ယူမှုမျိုးလည်း မဟုတ်ခဲ့ပါဘူး။ နယူးကာဆယ်ရဲ့ အကြိမ်ကြိမ် ငြင်းပယ်ခံရခြင်းတွေ၊ အီဆက်ခ် saga နဲ့တိုက်စစ်မှုးရှာပုံတော်ကသာ သတင်းတွေကို ကြီးစိုးထားခဲ့တာကိုး။ ဗိုတာမာဒေကို ကလပ်စံချိန်တင်ပြောင်းရွှေ့ကြေးနဲ့ ခေါ်ယူခဲ့သလို ဝီဆာ၊ ဂျေကော့ဘ်ရမ်ဆေးတို့က သူ့ထက်စျေးပိုကြီး၊ ပရိသတ်တွေနဲ့ ပိုရင်းနှီးခဲ့တယ်မဟုတ်လား။ ဒီတော့ ခပ်မှိန်မှိန်ပဲ ။

သီယောကို မီလန်ပွဲတွေမှာ ရင်းနှီးခဲ့ပြီးသားပါ။ အရည်အသွေး၊ အလားအလာရှိတဲ့ နောက်ခံလူတစ်ယောက်ဆိုတာကလွဲလို့ မျှော်လင့်တကြီးရင်ခုန်ချင်စရာကစားသမားမျိုးလို့တော့ မခံစားခဲ့ရဘူး။ အသက် ၂၄ ဆိုတော့ သူ့ Game မှာ မွမ်းမံစရာတွေကျန်နေသေးတယ်လို့ တွေးခဲ့တယ်။ ပရီးမီးယားလိဂ်မှာ မှတ်ကျောက်တင်ခံနိုင်ပါ့မလားပေါ့။ ကိုယ့်စိတ်ထဲ မရေရာပါဘူး။ ဒန်ဘန်း-ဖေဘီယန်ရှားတို့ကို ကျော်ပြီးချက်ချင်းနေရာဝင်ယူနိုင်မယ့်သူလို့လည်း မယုံခဲ့ဘူး။ ရေရှည်မှာတော့ အားကိုးရကောင်းကိုးရနိုင်မယ်ပေါ့။ ဒါထက် မပိုခဲ့ဘူး။ အသက်ရလာတဲ့ ဖေဘီယန်ရှားရဲ့နေရာအတွက် ရေရှည်အစားထိုးနိုင်မယ့် RCB တစ်ယောက်ကို နယူးကာဆယ်ရှာဖွေနေခဲ့တာ ကြာပါပြီ။ သီယောကို နှစ်နှစ်ခွဲဝန်းကျင်လောက် စောင့်ကြည့်နေခဲ့ပြီး စျေးကွက်ထဲ အာရုံစိုက်မှုကိုအလုံအလောက်မရတဲ့ Talent လို့ နယူးကာဆယ်က မြင်ခဲ့တယ်။ ပေါ်လိုမာလ်ဒီနီကိုယ်တိုင် ရှော်ကေးကနေ ခေါ်ယူခဲ့တဲ့ကစားသမား၊ မီလန်ရဲ့နည်းပြအပြောင်းအလဲတွေကြား သူ့ပါဖော့မန့်တွေ မတည်ငြိမ်ခဲ့ပေမယ့် အယ်လီဂရီက လက်မလွှတ်ချင်ခဲ့ဘူး။ ကိုမိုရဲ့ ကမ်းလှမ်းမှုကိုပယ်ချပြီး သီယောက နယူးကာဆယ်ကိုရွေးခဲ့တယ်။ အက်ဒီဟောင်းနဲ့တိုက်ရိုက်ဖုန်းပြောပြီးတဲ့အခါ ဒီဆုံးဖြတ်ချက်ကို အတည်ပြုပြီးသားဖြစ်သွားတယ်။ နယူးကာဆယ်ရဲ့ High performance consultant အဖြစ် တာဝန်ယူခဲ့တဲ့ ပေါလ်ဝင်စပါက ဒီခေါ်ယူမှုမှာ အဓိက,ကျခဲ့တယ်။

ဟဲဗီးဝိတ်လက်ဝှေ့သမားအန်သိုနီဂျိုရှူအာ၊ အင်္ဂလန်ရဲ့ Rugby ကပ္ပတိန်မာရိုအီတိုဂျီ၊ ရီးယဲလ်နောက်ခံလူရူဒီဂါတို့အတွက် အလုပ်လုပ်ပေးခဲ့ဖူးတဲ့ ပေါလ်က သီယောရဲ့ Character နဲ့ Mentality ဟာ ရူဒီဂါကို သတိရစေတယ်လို့ ဆိုတယ်။ ဖိအားတွေကြားမှာ ပြာယာခက်နေတာမျိုးမရှိပဲ တည်ငြိမ်ပြတ်သားတာကို ဆိုလိုတာပါ။ သီယောက ဘာစီလိုနာနဲ့ပွဲမှာ ဖေဘီယန်ရှား ဦးခေါင်းမူးဝေဒဏ်ရာရသွားပြီးနောက်ပိုင်း ဆက်တိုက်ပွဲထွက်ခွင့်ရလာတယ်။ ပွဲထွက်ခွင့်အတွက် အချိန်ယူစောင့်ဆိုင်းခဲ့ရပေမယ့် သူ့ရဲ့တိုက်ခိုက်လိုစိတ်၊ သင်ယူလိုစိတ်ကို ပြသနိုင်ခဲ့တာကိုမြင်ရတယ်။ ဘုန်းမောက်နဲ့ပွဲမှာ စတင်ပွဲထွက်ခွင့်ရပြီးနောက်ပိုင်း ပြိုင်ပွဲစုံ ၁၄ ပွဲအထိ ဆက်တိုက်ကစားထားတယ်။ ဝါရင့်နောက်ခံလူဖေဘီယန်ရှားရဲ့နေရာကို ဝင်ယူရတယ်ဆိုတာက ခံစစ်စွမ်းဆောင်ရည်နဲ့တင်ပြီးမသွားဘူး။ အသင်းရဲ့ Build-up မှာ အရေးပါတဲ့ ရှားရဲ့ ball playing, distrubution ကိုပါ အစားထိုးနိုင်ဖို့လိုတယ်။ သီယောက ဒီအလုပ်ကိုလည်း ကောင်းကောင်းကြီးလုပ်ပြနေတယ်။ Defensive Midfielder အဖြစ်ကစားခဲ့ဖူး၊ ယာယာတိုရေးကို အားကျခဲ့ဖူးတဲ့ သီယောရဲ့ Backgroud က အရေးပါလာတယ်။ ဘောလုံးကိုင်ထားချိန်မှာ သက်တောင့်သက်သာဖြစ်သလို Line-breaking pass တွေကို ရဲရဲတင်းတင်းပေးရဲပို့ရဲတာ မြင်ရတယ်။ ဒဏ်ရာပြဿနာတွေကြောင့် ဒန်ဘန်းကို ဘယ်ခြမ်းမှာသုံးရချိန်၊ ဂေါ်ဒွန်ပုံမှန်အောက်ရောက်နေချိန်တွေမှာ နယူးကာဆယ်ရဲ့ဘယ်ခြမ်းက အားနည်းသွားခဲ့တယ်။ လူးဝစ်ဟောပြန်ပါလာတော့ ဘယ်ခြမ်းဆီ တိုက်ရိုက်ပေးပို့နေတဲ့ သီယောရဲ့ Diagonal ball တွေနဲ့အတူ Left flank က ပြန်အသက်ဝင်လာပါတယ်။ Aerial duel win rate ၇၃.၉ % ဟာ ဗန်ဒိုက်ပြီးရင် ဗဟိုနောက်ခံလူတွေထဲ အကောင်းဆုံးမှတ်တမ်းအဖြစ် ရှိနေတယ်။ အဓိက,ကတော့ သူ့ရဲ့တည်ငြိမ်မှု၊ ပါးနပ်မှု၊ Composure / Consistentcy ဒီအပိုင်းတွေပဲ။ ငှက်ကျားပရိသတ်တွေရဲ့ မေတ္တာကိုရော အက်ဒီဟောင်းရဲ့ယုံကြည်မှုကိုပါ ပိုင်ဆိုင်ထားပြီဖြစ်တဲ့ သီယောဟာ ပြီးခဲ့တဲ့လထဲမှာ ဂျာမန်လက်ရွေးစင်အသင်းအတွက် Debut ကို ကစားခွင့်ရထားတယ်။ ဒီည ကစားမယ့် စပါးနဲ့ပွဲမှာရော သီယောတစ်ယောက် နယူးကာဆယ်ခံစစ်တန်းကို ဆက်ပြီးဦးဆောင်သွားနိုင်ဦးမလား။ ပရီးမီးယားလိဂ်ရဲ့ နောက်ဆုံးပေါ်ကြယ်ပွင့်အသစ်တွေထဲ သူ့နာမည်ကို အမှန်ခြစ်ပြီး စောင့်ကြည့်ရပါဦးမယ်.. ။

11/30/2025

ပေါင်သန်းရာချီ ရီပို့
▪ 90minCorner

မော်ဒန်ဘောလုံးကမ္ဘာက တစ်စထက်တစ်စ စီးပွားရေးပိုဆန်လာတာနဲ့အမျှ လည်ပတ်နေတဲ့ ငွေကြေးပမာဏဟာလည်း ကြောက်ခမန်းလိလိကြီးထွားလာခဲ့တယ်။ ပြောင်းရွှေ့ကြေးတွေဟာ ပေါက်ကွဲထွက်လာတယ်။ တော်ရုံကြယ်ပွင့်တစ်ယောက်ကို ပေါင်သန်း ၆၀၊ ၇၀ အောက်လျော့တဲ့စျေးနဲ့ရဖို့ ပိုခက်လာတယ်။ ကလပ် စံချိန်တင်ပြောင်းရွှေ့ကြေးတွေကို အသင်းလတ်၊ အသင်းငယ်တွေကအစ အသုံးပြုလာကြတယ်။ ဘဏ္ဍာရေးအရ အတောင့်တင်းဆုံးဖြစ်တဲ့ ပရီးမီးယားလိဂ်ကလပ်တွေက စျေးကွက်တိုင်းမှာ ဦးဆောင်လှုပ်ရှားတယ်။ လက်ရှိအချိန်ထိ သမိုင်းမှာ ပေါင်သန်း ၁၀၀ နဲ့အထက် အပြောင်းအရွှေ့ ၁၁ ကြိမ်အထိ ရှိလာခဲ့ပြီ။ ကမ္ဘာ့စံချိန်တင်ပြောင်းရွှေ့ကြေးတွေ အကြိမ်ကြိမ်သုံးပြခဲ့တဲ့ ရီးယဲလ်မက်ဒရစ်က ယူရိုသန်း ၁၀၀ အမြင့်ဆုံးသုံးဖူးတာဖြစ်ပြီး ပေါင်သန်း ၁၀၀ မှတ်တိုင်ကို မရောက်သေးတာတွေ့ ရမယ်။ ဒီလောက်မြင့်တဲ့ ပြောင်းရွှေ့ကြေးနဲ့အတူ နောက်ဆက်တွဲကပ်ပါလာမယ့် မျှော်လင့်ခြင်းတွေ၊ ဖိအားတွေအလယ်မှာ ပေါင်သန်း ၁၀၀ တန်ကစားသမား ၁၁ ယောက်ထဲ ဘယ်သူတွေက အောင်မြင်နေလဲ၊ ဘယ်အပြောင်းအရွှေ့ကတော့ ကျဆုံးခဲ့သလဲ လေ့လာကြည့်ရအောင်ပါ။

၁၁ ယောက်စလုံးကို ခြုံကြည့်လိုက်မယ်ဆိုရင် အပေါင်းလက္ခဏာထက် အကျအရှုံးတွေက ပိုများနေတာကို မြင်တွေ့ ရမယ်။ ပေါင်သန်း ၁၀၀ မှတ်တိုင်ကို နှစ်ကြိမ်တိုင်တိုင်ဖြတ်ကျော်ခဲ့ပြီး နှစ်ကြိမ်စလုံး လွဲချော်သွားခဲ့တဲ့ ဘာစီလိုနာကတော့ အထိအနာဆုံးအသင်းလို့ သတ်မှတ်နိုင်မယ်ထင်တယ်။ ကော်တင်ဟိုကို လီဗာပူးလ်ကနေ ပေါင် ၁၄၂ သန်းနဲ့ ခေါ်ယူခဲ့တယ်။ ပရီးမီးယားလိဂ်ကို လှပသပ်ရပ်တဲ့အဝေးကန်ချက်တွေနဲ့ အကြိမ်ကြိမ်ဖမ်းစားခဲ့သူ ဘရာဇီးလ်မှော်ဆရာလေးဟာ နူးကမ့်မှာ သူ့ 'မှော်' ကို ဘယ်တုန်းကမှ ရှာတွေ့ မသွားခဲ့ဘူး။ ဘာစီလိုနာ ကျရိပ်ပြလာတဲ့နေ့ရက်တွေမှာ အချိန်ရောနေရာရော မှားယွင်းသွားခဲ့ပုံရတယ်။ Debut ဂိုးကို သူ့ Trademark ကန်ချက်နဲ့သွင်းခဲ့တာကလွဲရင် ကော်တင်ဟိုကို ဘာဆာပရိသတ်တွေအမှတ်ရစရာဆိုလို ဘိုင်ယန်က ၂-၈ နဲ့နိုင်တဲ့ပွဲမှာ အငှားထွက်ကစားနေရင်း နှစ်ဂိုးပြန်သွင်းသွားတာပဲရှိပါလိမ့်မယ်။ ပြီးရင် ဂရစ်ဇ်မန်း။ ပေါင် ၁၀၇ သန်းနဲ့ ပြောင်းရွှေ့လာတဲ့ အက်သလက်တီကိုကြယ်ပွင့်ဟာ မက်ဆီဦးဆောင်တဲ့အသင်းမှာ ကစားပေါက်ထပ်နေတာတွေ၊ ဘာဆာရဲ့ အခင်းအကျင်းထဲ အံဝင်ခွင်ကျမဖြစ်ခဲ့တာတွေ၊ အဝတ်လဲခန်းထဲ အထီးကျန်ခဲ့တာတွေ.. စသဖြင့် ဆိုးဆိုးရွားရွားကျရှုံးသွားခဲ့ပြီး အသင်းဟောင်းအက်သလက်တီကို,ကိုပဲ ပြန်သွားရတယ်။ ဒီအပြောင်းအရွှေ့နှစ်ခုနဲ့ ဒမ်ဘီလီအတွက် သုံးခဲ့ရတဲ့စရိတ်တွေက ဘာတိုမြူချန်ထားခဲ့တဲ့ ဘာဆာရဲ့ဘဏ္ဍာရေးဆိုးမွေကို စတင်စေခဲ့တာလို့တောင် ဆိုနိုင်ပါလိမ့်မယ်။ ဂျာအိုဖီးလစ်ကို ပေါင် ၁၁၂ သန်းနဲ့ ခေါ်ယူခဲ့တဲ့ အက်သလက်တီကိုရဲ့ အဖြစ်ကလည်း မှန်းချက်နဲ့နှမ်းထွက်မကိုက်ခဲ့ပါဘူး။ ဂျာအိုဖီးလစ်ဟာ အက်သလက်တီကိုမှာမဟုတ် ချဲလ်ဆီး၊ ဘာဆာ၊ မီလန် ဘယ်မှာမှ ဘင်ဖီကာက သူ့ပါရမီကိုဘသက်သေမပြနိုင်ခဲ့ဘူးမဟုတ်လား ။

ကမ္ဘာ့တန်ကြေးအမြင့်ဆုံးအပြောင်းအရွှေ့တွေထဲ ထိပ်ဆုံးကဦးဆောင်နေတဲ့ နေမာ၊ ဘာပေတို့အတွက် ပီအက်စ်ဂျီဟာ ပေါင် ၃၆၅ သန်းလောက် အသုံးပြုခဲ့ရပေမယ့် ပြည်တွင်းရလဒ်တချို့နဲ့သာ ကျေနပ်ခဲ့ရပြီး သူတို့ရဲ့ပန်းတိုင် ဥရောပအောင်ပွဲကို နှစ်ယောက်စလုံးမရှိတော့ချိန်မှရခဲ့တယ်။ ဂျက်ဂရေးလစ်ရှ်နဲ့အတူ မန်စီးတီးရဲ့ Treble အောင်ပွဲကို ရခဲ့ပေမယ့် သူဟာ ဂွာဒီယိုလာလက်အောက် မရောက်ခဲ့သင့်တဲ့ တောင်ပံလူတစ်ယောက်ဖြစ်မယ်ထင်တယ်။ ပြီးရင် ဒီနွေမှာခေါ်ထားတဲ့ လီဗာပူးလ်ရဲ့ အီဆက်ခ်နဲ့ ဖလိုရီယန်ဗာ့ဇ်။ သူတို့ကို အောင်မြင်တယ်၊ မအောင်မြင်ဘူးသုံးသပ်ဖို့ အချိန်မလုံလောက်သေးပေမယ့် အဖွင့်မိနစ်တွေမှာတော့ နှစ်ယောက်စလုံး အသည်းအသန်းရုန်းကန်နေရတာကို မြင်တွေ့ နိုင်တယ်။ ဆိုတော့ ၁၁ ယောက်ထဲမှာ အများစုက ထင်သလောက်အလုပ်မဖြစ်ခဲ့တာကို တွေ့ ရပြီးနောက်ဆုံးကျန်တဲ့ ကွင်းလယ်လူသုံးယောက်ကတော့ ခုချိန်အထိ ကောင်းမွန်တဲ့ ခေါ်ယူမှုတွေအဖြစ် ရှေ့ဆက်နေကြတယ်။ ကိုင်စီဒို၊ အန်ဇိုဖာနန်ဒက်ဇ်နဲ့ ဒက်ကလန်ရိုက်စ်တို့ဖြစ်တယ်။ အန်ဇိုရဲ့ ပုံရိပ်က အာဂျင်တီးနားရဲ့ ကမ္ဘာ့ဖလားအောင်ပွဲနဲ့အတူ မွေးဖွားလာတယ်။ လုပ်အားနှုန်း၊ ပေါက်ကွဲအားကောင်းတဲ့ ကွင်းလယ်အဖျက်ကစားသမားတစ်ယောက်လို့ မြင်ခဲ့ကြပေမယ့် သူ့အတွက် ပေါင် ၁၀၆ သန်းပေးချေခဲ့တဲ့ ချဲလ်ဆီးမှာ အလုပ်ဖြစ်လာတဲ့နေရာက Advanced position တွေမှာ ဖြစ်နေတယ်။ ကိုင်စီဒိုကို Holding Midfielder အဖြစ် သုံးချိန်မှာ အန်ဇိုက ကွင်းလယ်တိုက်စစ်ပုံစံကစားတယ်။ ပါလ်မာဒဏ်ရာကြောင့် နားနေချိန်တလျှောက်လုံးလည်း ဒီအတိုင်းကစားခဲ့တယ်။ တစ်ပွဲပျမ်းမျှ ဂိုးပေါက်ခြိမ်းခြောက်မှုတွေ တရိပ်ရိပ်တက်လာခဲ့သလို ပြိုင်ဘက်ဧရိယာထဲ Late entry တွေက ချဲလ်ဆီးတိုက်စစ်အခင်းအကျင်းရဲ့လက်နက်ပုန်းတစ်ခုဖြစ်လာတယ်။ မက်ခီလီလီရဲ့နေရာလို့ ထင်ခဲ့ရတဲ့ ခေါ်ယူမှုက လမ်းပတ်ရဲ့ position မှာ ပိုအလုပ်ဖြစ်သွားခဲ့တယ်။

နောက်ဆုံးနှစ်ယောက်ကတော့ လက်ရှိပရီးမီးယားလိဂ်မှာရော ဥရောပမှာပါ အကောင်းဆုံးထိပ်တန်းကွင်းလယ်လူတွေလို့ သတ်မှတ်ရမယ့် ကိုင်စီဒိုနဲ့ ဒက်ကလန်ရိုက်စ်တို့ဖြစ်တယ်။ ကိုင်စီဒိုကလည်း အန်ဇိုလိုပဲ အသင်းဟောင်းမှာ All-rounder ပုံစံ ကစားခဲ့ပေမယ့် ချဲလ်ဆီးကိုရောက်တော့ လုံးဝ Number 6 တစ်ယောက်လို ပြောင်းလဲသွားတယ်။ ရင့်ကျက်တည်ငြိမ်လာတဲ့ကစားဟန်က ရုန်းကန်ခဲ့ရတဲ့ အစောပိုင်းနေ့ရက်တွေကို မေ့ထားလိုက်လို့ရပြီ။ Interception, tackle won အချက်အလက်တွေမှာ အမြဲထိပ်ဆုံးနားက ရပ်တည်နေသူဖြစ်သလို ပွဲဆက်တွေသိပ်များလာပေမယ့် ကြံ့ခိုင်မှုအပြည့်ပုံစံကောင်းကို ဆက်ပြီးပြသနေတုန်းပဲ။ တချို့ပွဲတွေမှာ ညာနောက်ခံနေရာက ပွဲထွက်လာပြီး Half-back ပုံစံကစားခဲ့တယ်။ Build-up မှာ ကွင်းလယ်ကို ဝင်လာပြီး ခံစစ်ကစားရတဲ့အခါ ညာခြမ်းဇုန်တွေဆီ ပြန်ပြေးသွားတယ်။ ကွင်းရဲ့နေရာအနှံ့ သူ့ခြေရာတွေထပ်နေခဲ့ပြီး မတည်ငြိမ်သေးတဲ့ ချဲလ်ဆီးခံစစ်ရှေ့က ပြိုင်ဘက်တွေအရင်ဆုံးဖြတ်ကျော်ရမယ့် အဟန့်အတားတစ်ခုအဖြစ် အမြဲတာဝန်ကျေခဲ့တယ်။ ပြီးရင် အာဆင်နယ်ရဲ့ ပေါင် ၁၀၅ သန်းတန် ဒက်ကလန်ရိုက်စ်ပေါ့။ ရိုက်စ်ကိုလည်း ဝက်စ်ဟမ်းမှာ ကစားခဲ့သလို Holding Midfielder ပုံစံ ကစားဖို့ခေါ်တယ်လို့ ယူဆခဲ့ကြတာပဲ။ ဒါပေမယ့် တဖြည်းဖြည်း သူ့အကောင်းဆုံး position က Box-to-box Number 8 role ဆိုတာ မြင်လာရတယ်။ ပါတေး၊ ဂျော်ဂျင်ဟိုတို့ကနေ ဇူဘီမန်ဒီရောက်လာတော့ သူ့အရည်အသွေးက ပိုတောက်ပြောင်လာတယ်။ တိုက်စစ်လိုက်ပါပုံတွေ၊ Off-ball-run တွေက အမြဲ Energy အပြည့် မြူးကြွနေပြီး ဥရောပရဲ့ Consistent အဖြစ် Set-piece taker တစ်ယောက်လည်းဖြစ်တယ်။ Role ချင်းမတူတဲ့ သူတို့နှစ်ယောက်မှာ ဘယ်သူကပိုကောင်းလဲ ရွေးချယ်ရခက်ပါလိမ့်မယ်။ ပေါင်သန်း ၁၀၀ ကျော် ကွင်းလယ်လူသုံးယောက်ရဲ့ အားပြိုင်မှုကို ဒီည ၁၁ နာရီမှာ ရင်ခုန်ခံစားခွင့်ရဦးမယ်။ ကမ္ဘာ့တန်ကြေးအမြင့်ဆုံးကွင်းလယ်ကပဲ စတန်းဖို့ဘရစ်ချ်ဟာ ငါတို့ခံတပ်လို့ ထပ်ပြောနိုင်မလား၊ ဒက်ကလန်ရိုက်စ်ကပဲ အာဆင်နယ်ရဲ့ ချန်ပီယံအိပ်မက်ကို ဆက်လက်ထွန်းညှိသယ်ဆောင်သွားမလား စောင့်ကြည့်ရပါဦးမယ်..။

Address

Village, FL
795128

Website

facebook.com

Alerts

Be the first to know and let us send you an email when 90 min corner posts news and promotions. Your email address will not be used for any other purpose, and you can unsubscribe at any time.

Shortcuts

Want your business to be the top-listed Media Company in Village?

90 min corner

12/23/2025

12/19/2025

12/13/2025

12/11/2025

12/06/2025

12/06/2025

12/02/2025

11/30/2025

Address

Website

Alerts

Shortcuts

Share

Category