GHAG FM

09/25/2025

09/25/2025

په ترکیه کې د ا.ا سوداګریز اتشې په استانبول کې د کرنې اړوند شپږم نړۍوال کانګرس کې ګډون کړی دی.

په دغه غونډه کې چې سید حماد هاشمي پکې حضور درلود، د بېلابېلو هېوادونو ښاروالیو، دولتي چارواکو او سوداګرۍ خونو استازو برخه اخیستې وه.

د غونډې موخه د کرنې په برخه کې ګډې همکارۍ، د تجربو تبادله او د اقتصادي ظرفیتونو معرفي کول بلل شوې ده.

د صنعت او سوداګرۍ وزارت د معلوماتو له مخې، ښاغلي هاشمي له لوړپوړو ترکي چارواکو سره د افغاني کرنیزو محصولاتو د معرفي، د ګډو نندارتونونو جوړولو، د صادراتو د زیاتوالي، د اردو بندري ظرفیتونو د کارولو او د پانګونې د جلب په اړه خبرې کړې دي.

09/25/2025

په هندوستان کې د کلکتې ښار د سختو ورښتونو او سېلابونو له امله له درنې مرګ‌ژوبلې سره مخ شوی دی.

د رویټرز خبري اژانس د هندي چارواکو په وینا، په دې پېښه کې ۱۲ تنه مړه شوي دي.

راپورونه وايي چې دغه کسان د سړکونو د ډوبېدو، د ترانسپورټ ګډوډۍ او د اوږدې مودې لپاره په اوبو کې د بند پاتې کېدو له امله خپل ژوند له لاسه ورکړی دی.

د چارواکو په خبره، دا د ۱۹۸۸ زېږديز کال وروسته په کلکته کې تر ټولو سخت باران بلل کېږي.

09/25/2025

امریکا د ملګرو ملتونو د دې اونۍ په غونډه کې د غزې د سولې لپاره ۲۱ ماده ییز پلان شریک کړی دی.

د امریکا استازي، سټیو ویتکاف، ویلي چې هیله لري په راتلونکو څو ورځو کې د غزې په تړاو د پام وړ لاسته راوړنې وشي.

اخوا د امریکا ولسمشر ډونالډ ټرمپ هم د تېرې دوشنبې په ورځ له یو شمېر عربي هېوادونو لکه سعودي عربستان، قطر او مصر سره په همدې تړاو خپلې وړاندیزونه شریک کړي دي.

د غزې د سولې خبرې داسې مهال روانې دي چې په دې سیمه کې د اسراییلي پوځیانو له لوري جګړې زور اخیستی دی.

09/25/2025

د صنعت او سوداګرۍ وزارت وايي، د روان کال په لومړیو شپږو میاشتو کې د افغانستان د سوداګرۍ کچه شپږ میلیارده او ۷۸۳ میلیونه ډالرو ته رسېدلې ده، چې د تېر کال د وروستیو شپږو میاشتو په پرتله ۳۰ سلنه زیاتوالی ښيي.

د دغه وزارت ویاند، اخوندزاده عبدالسلام جواد، ویلي چې یوازې د ۱۴۰۴ کال په لومړیو شپږو میاشتو کې افغانستان په یادې کچې سوداګري ترسره کړې ده.

د نوموړي په وینا، د تېر کال د وروستیو شپږو میاشتو په پرتله د سوداګرۍ کچه د پام وړ لوړه شوې ده.

09/25/2025

د امریکا ولسمشر ډونالډ ټرمپ د ملګرو ملتونو د عمومي اسمبلۍ د اتیایمې غونډې په څنډه کې د نهو اسلامي هېوادونو له مشرانو سره د غزې د راتلونکې په تړاو خبرې کړې دي.

په دې ناسته کې د سعودي عربستان، متحده عربي اماراتو، قطر، مصر، اردن، ترکیې، اندونیزیا او پاکستان مشرانو ګډون کړی و.

د راپورونو له مخې، ټرمپ په دې غونډه کې یوه طرحه وړاندې کړې چې اساسي محور یې د غزې د کړکېچ حل، له غزې څخه د اسراییلي ځواکونو تدریجي وتل او د سیمه‌ییزو هېوادونو ګډو ځواکونو ته د غزې د امنیت سپارل دي.

همدارنګه، د امریکا ولسمشر له اسلامي هېوادونو غوښتي چې د غزې د بیارغونې لپاره پراخې مالي مرستې ځانګړې کړي.

09/24/2025

د ایران ستر مذهبي مشر علي خامنه‌يي ویلي، چې په اوسنیو حالاتو کې له امریکا سره خبرې هېڅ ګټه نه لري، بلکې د ایران لپاره به ستر زیانونه ولري.

د نوموړي په وینا، امریکا د تهران د اټومي فعالیتونو او د یورانیمو د غني کولو پروګرام د بندېدو غوښتنه کوي، چې دا خبرې نه؛ بلکې د واشنګټن د غوښتنو تحمیل دي.

09/24/2025

د متحده ایالاتو ولسمشر ډونالډ ټرمپ په نیویارک ښار کې د ملګرو ملتونو د عمومي اسمبلۍ په غونډه کې وویل چې په غزه کې باید سمدلاسه جګړه ودرول شي.

ټرمپ ادعا وکړه چې نوموړي په غزه کې د اوربند د ټینګښت لپاره په جدي هڅو بوخت دی.

09/24/2025

د پاکستان د بلوچستان ایالت په مستونګ کې پر جعفر اېکسپرېس اورګاډي د چاودنې له امله د ښځو او ماشومانو په ګډون ۱۲ تنه ټپیان شوي دي.

د پاکستاني پولیسو په وینا، چاودنه هغه مهال رامنځته شوه چې کویټې ته روان اورګاډی د سپیزینډ سیمې څخه تېرېده.

د راپورونو له مخې، د پېښې پر مهال په اورګاډي کې ۲۷۰ مسافر سپاره وو.

09/24/2025

د ریاست‌الوزرا اداري مرستیال مولوي عبدالسلام حنفي د افغانستان لپاره د ملګرو ملتونو له ځانګړې استازې روزا اوتنبایوا سره د مخه ښې کتنه کې د نوموړې له خدماتو مننه کړې ده.

سرچینو ویلي، چې په افغانستان کې د روزا اوتنبایوا درې کلن ماموریت پای ته رسېدلی دی.

حنفي په دې لیدنه کې ټینګار کړی، چې په افغانستان کې د بشري مرستو لپاره ګڼ اړمن کسان شته او اړینه ده چې نړۍوال مسوول بنسټونه دې برخې ته ځانګړې پاملرنه وکړي.

09/23/2025

قزاقستان د سیمه‌ییزې همکارۍ په پیاوړتیا کې مهم رول لري

د ملګرو ملتونو سرمنشي انتونیو ګوترېش د قزاقستان له ولسمشر قاسم جومارت توکایف سره په لیدنه کې، د سیمې د همکارۍ په پیاوړتیا کې د دغه هېواد د رول ستاینه کړې ده. ګوترېش په ځانګړي ډول د ملګرو ملتونو د پایدار پرمختګ د اهدافو د سیمه‌ییز مرکز د کوربتوب یادونه کړې، چې د منځنۍ اسیا او افغانستان لپاره په قزاقستان کې جوړ شوی دی. د دواړو لورو ترمنځ په خبرو کې د سیمې او نړۍ پر تازه تحولاتو او د قزاقستان او ملګرو ملتونو پر همکاریو بحث شوی دی. همدارنګه، په دې لیدنه کې د ډیجیټلي کېدو او مصنوعي ځیرکتیا د راتلونکي پر اهمیت ټینګار شوی دی.

09/23/2025

فرانسې په رسمي ډول د فلسطین دولت په رسمیت وپېژاند

فرانسې په رسمي ډول د فلسطین دولت په رسمیت وپېژاند او له دې سره د بریتانیا، کاناډا، اسټرالیا او هسپانیا تر څنګ وروستی هېواد شو چې فلسطین دولت په رسمیت پیژني.
د فرانسې ولسمشر ایمانویل مکرون د دوشنبې په ورځ د ملګرو ملتونو د عمومي اسمبلۍ د سرمشریزې پر مهال په نیویارک کې وویل: "د سولې وخت رارسېدلی او په غزه کې روانه جګړه هېڅ ډول توجیه نه لري."
فرانسې او سعودي عربستان د دوشنبې په ورځ د ملګرو ملتونو د عمومي اسمبلۍ په ترڅ کې د یوه ورځني کنفرانس کوربه توب وکړ، چې موخه‌یې د "دوو دولتونو حل‌لارې" د ملاتړ هڅې وې.
د جرمني، ایټالیا او امریکا په ګډون اووه هېوادونو په دې غونډه کې ګډون ونه کړ.
ولسمشر مکرون په غونډه کې دا هم تایید کړه چې بلجیم، لوګزامبورګ، مالټا، اندورا، او سان مارینو به هم ژر د فلسطین دولت په رسمیت وپېژني.