GHAG FM

06/19/2026

د امریکا او ایران غونډه لغوه شوه
د سویس د بهرنیو چارو وزارت ویلي، د امریکا او ایران ترمنځ هغه غونډه چې ټاکل شوې وه د جمعې په ورځ د بورګن‌اشتوک په سیمه کې ترسره شي، لغوه شوې ده. د راپورونو له مخې، دغه پرېکړه وروسته له هغې شوې چې سپینې ماڼۍ د امریکا د ولسمشر د مرستیال جي ډي ونس سفر د لوژستیکي ستونزو له امله لغوه اعلان کړ. ټاکل شوې وه چې دا خبرې اترې د امریکا او ایران ترمنځ د وروستي هوکړه‌لیک پر بنسټ د اټومي مذاکراتو د ۶۰ ورځني بهیر د پیل لپاره ترسره شي. بلخوا، ایراني رسنیو راپور ورکړی چې تهران د خبرو اترو د بل پړاو له پیل مخکې د امریکا له لوري د موقتي هوکړې د عملي کېدو د نښو غوښتنه کړې، او ویل کېږي چې د همدې غوښتنې له امله یاده غونډه د هوکړې له لاسلیک یوه ورځ وروسته لغوه شوې ده.

06/19/2026

سنټکام: د ایران پر بندرونو سمندري بندیزونه لرې شول
د امریکا مرکزي قومندې (سنټکام) ویلي، چې د ولسمشر ډونالډ ټرمپ د لارښوونې پر بنسټ د ایران بندرونو او ساحلي سیمو ته د داخلېدونکو او وتونکو بېړیو پر وړاندې لګېدلي سمندري بندیزونه پای ته رسېدلي دي. سنټکام په یوه بیان کې ویلي، امریکایي ځواکونه به نور د عربي خلیج او عمان خلیج له لارې د ایران بندرونو ته د بېړیو د تګ راتګ مخه نه نیسي او سمندري تګ راتګ به د نوې هوکړې له مخې دوام ولري. خو د یادې قومندې په وینا، امریکایي جنګي بېړۍ به د هوکړې د پلي کېدو د څارنې او د سیمې د سمندري امنیت د ساتنې لپاره په سیمه کې خپل حضور ته دوام ورکړي.

06/19/2026

اوکراین: د روسیې د تېلو پر تصفیه‌خونه مو برید کړی
روسیې ویلي، د پلازمېنې مسکو په سویل ختیځ کې د تېلو پر یوې تصفیه‌خونې د اوکراین د بې‌پیلوټه الوتکو (ډرون) برید له امله پراخه اورلګېدنه رامنځته شوې ده. اوکرایني چارواکو ویلي، د روسیې د تېلو له صنعت څخه ترلاسه کېدونکي عواید د جګړې د تمویل لپاره کارول کېږي او د یاد برید موخه د روسیې د انرژۍ او لوژستیکي وړتیاوو کمزوري کول وو. بلخوا، د اوکراین ولسمشر ولادیمیر زلنسکي په فرانسه کې د جي-۷ هېوادونو غونډې ته ویلي چې د جګړې روان وضعیت د اوکراین په ګټه روان دی او هېواد یې د خپلو اهدافو د ترلاسه کولو لپاره پرمختګ کړی دی.

06/19/2026

ونس: اسراییل دې د امریکا او ایران پر هوکړې نيوکې نه کوي

د امریکا د ولسمشر مرستیال جي ډي ونس اسراییلي چارواکو ته خبرداری ورکړی چې د ډونالډ ټرمپ او د امریکا او ایران ترمنځ د وروستۍ هوکړې پر وړاندې له نیوکو ډډه وکړي.
ونس ویلي، امریکا هر کال اسراییل ته نږدې څلور میلیارده ډالره پوځي مرستې ورکوي او د دغه هېواد د دفاعي تجهیزاتو ډېره برخه د امریکایي مالیه ورکوونکو له بودجې تمویلېږي. نوموړي ټینګار کړی چې اسراییل باید دغه واقعیت په پام کې ونیسي.
په همدې حال کې، په امریکا او اسراییل کې ځینې سیاسي څېرې د واشنګټن او تهران پر وروستۍ هوکړې نیوکې کوي او وایي چې دا هوکړه د ایران د توغندیز او اټومي پروګرام د محدودولو لپاره کافي ضمانتونه نه لري.

06/18/2026

06/18/2026

متقي او روزمیري ډیکارلو د بشري مرستو پر بهیر خبرې کړې
د بهرنیو چارو وزیر، مولوي امیر خان متقي، د ملګرو ملتونو د سرمنشي د سیاسي او سولې جوړونې چارو له مرستیالې، روزمیري ډیکارلو، سره ټلیفوني خبرې کړې دي. د سرچینې د معلوماتو له مخې، د خبرو پر مهال اړمنو افغانانو ته د بشري مرستو د رسولو او د مرستو د بهیر د لا اغېزمنتیا په اړه بحث شوی دی. دواړو لورو د بشري مرستو د ښه همغږۍ، اړمنو خلکو ته د مرستو د رسېدو او د مرستو د شفافیت د زیاتوالي پر لارو چارو هم نظرونه تبادله کړي دي.

06/18/2026

د صنعت او سوداګرۍ وزارت مرستیال د تاشکند نړیوال پانګونې فورم کې ګډون وکړ
د صنعت او سوداګرۍ وزارت مرستیال، مولوي احمدالله زاهد، د یوه رسمي پلاوي په مشرۍ د ازبکستان په پلازمېنه تاشکند کې د نړیوال پانګونې فورم (TIIF-2026) د پرانیستې په مراسمو کې ګډون کړی دی. د یاد وزارت د معلوماتو له مخې، په دې نړیوال فورم کې د نړۍ د شاوخوا ۹۰ هېوادونو لوړپوړو چارواکو، پانګه‌والو او سوداګرو ګډون کړی او د اقتصادي همکاریو، پانګونې او سوداګریزو فرصتونو په اړه یې بحثونه ترسره کړي دي.

06/18/2026

د عامې روغتیا وزارت: د درملو او روغتیايي خوړو په برخه کې د چینایي پانګوالو سره د همکاریو پر پراختیا خبرې شوې
د عامې روغتیا وزارت خبر ورکړی، چې د دغه وزارت د خوړو او درملو مرستیال، مولوي حمدالله زاهد، له یو شمېر چینایي پانګوالو سره د درملو او روغتیايي خوړو په برخه کې د پانګونې او همکاریو د پراختیا په اړه خبرې کړې دي.
د وزارت په وینا، په دې کتنه کې دواړو لورو د درملو او درملیزو خامو موادو په برخه کې د اقتصادي او تخنیکي همکاریو پر پراختیا، په افغانستان کې د پانګونې پر فرصتونو، د تجربو پر لېږد، د نوې ټکنالوژۍ پر کارولو او د ګډو همکاریو پر پراخولو بحث کړی دی.

06/18/2026

د افغاني سرې میاشتې ټولنې له لوري ۴۰ تنه رواني ناروغان تر درملنې او روغېدو وروسته خپلو کورنیو ته وسپارل شول.