10/13/2026
د پنجشېر ۷ زره او ۲۳۴ قیراط زمرد د نږدې ۷ میلیونه افغانیو په ارزښت وپلورل شول. د پنجشېر د والي ویاند سیفالدین لټون ویلي، چې دغه اندازه زمرد د کانونو د ساتنې کمېټې د پلاوي په حضور کې د قانوني لیلام له لارې پر کورنیو سوداګرو پلورل شوي دي. د نوموړي په وینا، د دغو زمردو بیه ۶ میلیونه او ۹۹۴ زره او ۵۰۰ افغانۍ ده. هغه زیاته کړې، چې اوس مهال د پنجشېر له زرو ډېر ځوانان په دغه ولایت، د کابل په بازارونو او بهرنیو هېوادونو کې د زمردو د پېر او پلور په برخه کې کار کوي. لټون ویلي، چې تر اوسه په پنجشېر کې د قیمتي منرالونو ۱۷ ډولونه پېژندل شوي، چې ځینې یې، د زمردو په ګډون، په رسمي او قانوني ډول استخراجېږي.
