01/15/2026
ក្រៅពីស្នើសុំស៊ុយអែត និងអាមេរិកឈប់លក់សព្វាវុធឱ្យទៅថៃ បក្សជំនាន់ថ្មីជំរុញឱ្យរដ្ឋាភិបាលគិតគូរពង្រឹងវិស័យការពារជាតិ
⏰ ផ្សាយថ្ងៃទី១៥ ខែមករា ឆ្នាំ២០២៦
👁👁 អានព័ត៌មានលម្អិត៖ https://www.cambodiadaily.com/2026/01/16/00/32/86381/
🙏 សូមជួយឧបត្ថម្ភ ឌឹ ខេមបូឌា ដេលី តាមរយៈ GoFundMe ៖ https://gofund.me/302d534f
🔽
ប្រធានបក្សជំនាន់ថ្មី ជំរុញឱ្យរដ្ឋាភិបាលកម្ពុជាគិតគូរពីការអភិវឌ្ឍវិស័យការពារជាតិឱ្យបានរឹងមាំ និងឆាប់រហ័សបំផុត នៅពេលដែលប្រទេសផលិតអាវុធ ដូចជាប្រទេសស៊ុយអែត ជាដើម នៅតែបន្តលក់សព្វាវុធឱ្យប្រទេសថៃ យកមកប្រើប្រាស់ដើម្បីឈ្លានពានកម្ពុជាទៀតនោះ។
គួរបញ្ជាក់ថា ប្រទេសណាក៏ដោយ គេចំណាយថវិកាទិញអាវុធយុទ្ធភណ្ឌទំនើបៗដើម្បីការពារអធិបតេយ្យជាតិ និងបូរណភាពទឹកដីគេជាអាទិភាព។ រីឯប្រទេសផលិតអាវុធយុទ្ធភណ្ឌធ្វើសង្គ្រាម ក៏មិនមែនផលិតដាក់តាំងទុកមើលដែរ គឺគេធ្វើលក់ បើប្រទេសណាចង់បាន គេលក់ឲ្យ ដោយពិចារណាលើទំនាក់ទំនងគ្នា តើជាមិត្ត ជាសម្ពន្ធមិត្ត ជាដៃគូយុទ្ធសាស្ត្រ ឬជាប្រទេសអ្នកទិញធម្មតា ភ្ជាប់ជាមួយនឹងលក្ខខណ្ឌផ្សេងៗ។
ប្រទេសស៊ុយអែត ដែលផលិតយន្តហោះចម្បាំងធុនស្រាល Gripen Jas 39 ដោយរោងចក្រឧស្សាហកម្ម SAAB ក៏មិនខុសពីក្រុមហ៊ុនចិន នរិនកូ (NORINCO), ឥណ្ឌា, អាមេរិកាំង Boeing, Northrop, Grumman, រុស្ស៊ី ឬក្រុមហ៊ុនអង់គ្លេស, បារាំង, អាល្លឺម៉ង់, អ៊ីតាលី និងឆេក នោះដែរ។ កងទ័ពខ្មែរក៏ទិញពីចិន ក្នុងបំណងដូចគ្នាដែរ។
លោក មាជ សុវណ្ណារ៉ា ប្រធានគណបក្សជំនាន់ថ្មី ប្រាប់សារព័ត៌មាន The Cambodia Daily នៅថ្ងៃទី១៤ មករា នេះ ដោយអះអាងថា ឆ្លងកាត់សង្គ្រាមដែលលោកថាថៃឈ្លានពានលើប្រទេសកម្ពុជាទាំងពីរលើកកាលពីពេលថ្មីៗនេះ រដ្ឋាភិបាលកម្ពុជាគួរតែដឹងច្បាស់ដោយខ្លួនឯងហើយថា ដើម្បីធានាវិស័យការពារជាតិរបស់ខ្លួនរឹងមាំយូរអង្វែង ត្រូវការកែសម្រួលអ្វីខ្លះ ជាពិសេសវិស័យកងទ័ព និងបញ្ហាអំពើពុករលួយ ជាដើម។
លោក មាជ សុវណ្ណារ៉ា លើកឡើងថា ក្នុងពេលដែលលោកផ្តល់យោបល់ឱ្យរដ្ឋាភិបាលពង្រឹងវិស័យយោធាកម្ពុជា លោកក៏បានដាក់ញត្តិទៅរដ្ឋាភិបាលស៊ុយអែត និងអាមេរិក រួចហើយដែរ ដើម្បីស្នើសុំឈប់ផ្ដល់អាវុធឲ្យថៃ បន្តទៅទៀត រហូតដល់មានការស៊ើបអង្កេតពេញលេញពីអន្តរជាតិជុំវិញសង្គ្រាមដែលថាថៃបានឈ្លានពានកម្ពុជានោះ។
ប្រធានគណបក្សជំនាន់ថ្មីរូបនេះ ផ្តល់យោបល់ឱ្យរដ្ឋាភិបាលសម្លឹងមើលឱ្យបានវែងឆ្ងាយពីអនាគតជាតិកម្ពុជា ថាតើមហាអំណាចមួយណាដែលគួរតែជ្រើសរើសធ្វើជាសម្ពន្ធមិត្តរបស់ខ្លួន ជាពិសេសពិនិត្យមើលបទពិសោធសង្គ្រាម ២១ថ្ងៃជាមួយថៃ ថាតើមហាអំណាចមួយណាដែលខ្នះខ្នែងជួយប្រទេសកម្ពុជា។
ការអះអាងនេះ ធ្វើឡើងបន្ទាប់ពីបក្សជំនាន់ថ្មីដាក់ញត្តិទៅរដ្ឋាភិបាលស៊ុយអែត ស្នើសុំបញ្ឈប់ផ្តល់អាវុធឲ្យថៃ ដើម្បីកុំឱ្យពួកគេប្រើអាវុធស៊ុយអែត វាយប្រហារប្រទេសកម្ពុជាលើកក្រោយទៀត។
កាលពីថ្ងៃទី០៩ ខែមករា ឆ្នាំ២០២៦ គណបក្សជំនាន់ថ្មី បានដាក់ញត្តិទៅរដ្ឋសភាអាមេរិក និងរដ្ឋសភាស៊ុយអែត ដោយស្នើឲ្យឈប់ផ្ដល់អាវុធឲ្យប្រទេសថៃ និងបិទមុខងារបច្ចេកទេសយន្តហោះចម្បាំងម៉ាក Gripen ជាបន្ទាន់ផងដែរ។
គណបក្សជំនាន់ថ្មី បានលើកឡើងនូវលក្ខខណ្ឌចំនួន៤ ក្នុងញត្តិនេះ ដោយស្នើឱ្យប្រទេសស៊ុយអែត បិទមុខងារបច្ចេកទេសយន្តហោះចម្បាំង Gripen ដែលកងទ័ពថៃ បានប្រើប្រាស់ឈ្លានពានកម្ពុជា និងទប់ស្កាត់អវិសមភាពយោធាផងដែរ ព្រោះសង្គ្រាមដែលថៃ ឈ្លានពានកម្ពុជា ថៃបានប្រើយន្តហោះចម្បាំង Gripen វាយប្រហារ ទាំងដែលកម្ពុជាគ្មានយន្តហោះចម្បាំងមួយគ្រឿងផងនោះ។
ចំណុចនេះ លោកមិនបានពិនិត្យសមត្ថភាពទ័ពអាកាសខ្មែរ ដែលប្រើយន្តហោះ មិក-១៧, មិក-១៩, មិក-២១ និងឧទ្ធម្ភាគចក្រ HIND Gunship នោះទេ ដែលគេតែងចោទសួរថា មូលហេតុអ្វីបានជាទ័ពអាកាសខ្មែរមិនប្រើយន្តហោះទាំងនោះ? តើយន្តហោះទាំងនោះចតនៅឯណា?
ជាងនេះទៀត បក្សជំនាន់ថ្មី ក៏បានស្នើឱ្យបិទការលក់ និងបញ្ឈប់ការផ្តល់ការថែទាំនានា រួមទាំងផ្នែកបច្ចេកទេស និងការហាមឃាត់ការលក់យន្តហោះចម្បាំង ឬដ្រូនបន្ថែមទៀតឱ្យយោធាថៃ ផងដែរ ព្រោះប្រទេសស៊ុយអែត មិនគួរជាប់ឈ្មោះជាចំណែកនៃអំពើរំលោភច្បាប់តាមរយៈការផ្ដល់អាវុធដល់ភាគីឈ្លានពានកម្ពុជាឡើយ។
ទាក់ទងនឹងចំណុចនេះ លោក សុខ សុគន្ធ អ្នកវិភាគស្ថានការណ៍ស្រុកខ្មែរតាមបណ្ដាញសង្គម ធ្លាប់បានអធិប្បាយថា គ្មានប្រទេសឧស្សាហកម្មផលិតគ្រឿងសព្វាវុធចម្បាំង លក់អាវុធខ្លួនឲ្យទៅដើរឈ្លានពានគេនោះទេ គេប្រើសម្រាប់ការពារខ្លួន។
គណបក្សជំនាន់ថ្មី ស្នើឱ្យសហរដ្ឋអាមេរិក និងរដ្ឋាភិបាលស៊ុយអែត ស៊ើបអង្កេតការផ្ទុះសង្គ្រាមនេះ ដោយផ្អែកលើសន្ធិសញ្ញាប្រវត្តិសាស្ត្រ ដូចជា សន្ធិសញ្ញាព្រំដែនឆ្នាំ១៩០៤ និងឆ្នាំ១៩០៧ ក្រោមមូលដ្ឋានច្បាប់អន្តរជាតិ។
សង្គ្រាមកម្ពុជា-ថៃ ទាំងពីរលើកមានរយៈពេល ២៦ថ្ងៃ ខណៈកងទ័ពថៃ បានប្រើយន្តហោះចម្បាំងគ្រប់ប្រភេទដែលខ្លួនមាន វាយប្រហារលើកម្ពុជា ក្នុងនោះក៏មានយន្តហោះចម្បាំងម៉ាក Gripen របស់ប្រទេសស៊ុយអែត ផងដែរ ដើម្បីទម្លាក់គ្រាប់បែកចូលជ្រៅក្នុងទឹកដីកម្ពុជារាប់សិបគីឡូម៉ែត្រ។
យោងតាមគេហទំព័រ Smallarmsurvey បង្ហាញថា ប្រទេសថៃ មានយន្តហោះចម្បាំងដូចជា៖
> ប្រភេទ T-50TH ទិញពីប្រទេសកូរ៉េខាងត្បូង ចំនួន ១៤គ្រឿង
> យន្តហោះចម្បាំងប្រភេទ F-16 ទិញពីសហរដ្ឋអាមេរិក ចន្លោះពី ៤៧ ដល់ ៥៤គ្រឿង
> យន្តហោះចម្បាំងម៉ាក Gripen ចន្លោះពី ៧ ដល់ ១១គ្រឿង
> យន្តហោះចម្បាំងប្រភេទ Northrop F-5 Tiger II ចំនួន ១១គ្រឿង
> និងយន្តហោះម៉ាក Dassault/Dornier Alpha Jet A ចំនួន ១៨គ្រឿងផងដែរ។
កាលពីថ្ងៃទី២៤ ខែធ្នូ ឆ្នាំ២០២៥ ប្រធានសភាពាណិជ្ជកម្មអាមេរិកប្រចាំកម្ពុជា លោក ខេស៊ី បាណែត បានអះអាងថា យោធាថៃ បានប្រើយន្តហោះទម្លាក់គ្រាប់បែកចូលជ្រៅក្នុងទឹកដីកម្ពុជា ចម្ងាយ ៩៨គីឡូម៉ែត្រ ក្បែរតំបន់ទេសចរណ៍ភ្នំសំពៅ ខេត្តបាត់ដំបង។
ចំណែកឯទូរទស្សន៍ថៃ Thai PBS បានរាយការណ៍ថា ថៃបានធ្វើការវាយប្រហារតាមអាកាសទៅលើឃ្លាំងលាក់អាវុធនៅតំបន់ព្រំដែនដាច់ស្រយាលនៃខេត្តបាត់ដំបង នៅថ្ងៃទី២៤ ខែធ្នូ ឆ្នាំ២០២៥ ឃ្លាំងលាក់អាវុធក្នុងកាស៊ីណូរបស់ឧកញ៉ាស្តេចគ្រញូង ទ្រី ភាព នៅថ្មដា ខេត្តពោធិ៍សាត់៕
📢 អានព័ត៌មានលម្អិតលើគេហទំព័រ https://www.cambodiadaily.com/
