12/18/2025
THEMELUESIT E UT- ISHIN TË NDJEKUR HAP-PAS HAPI
(Veprat flasin-fjalët i merr era...)
UNIVERSITET I TETOVËS, në dokumentet e UDBA-s
Me rastin e 30 vjetorit të themelimit të organeve drejtuese të UT.
Mbledhja e IX e Këshillit Mësimor-Shkencor e Universitetit të Tetovës. Tetovë,
Zgjedhja e Organeve Drejtuese të UT, 08. 01. 1995
Më datën 8 janar në lokalet e Partisë Demokratike Popullore, ishte caktuar të mbahet mbledhje e zgjeruar e Këshillit të Universitetit të Tetovës, e IX me radhë. Kjo mbledhje ishte cilësuar me rëndësi të veçantë, pasi duhej të konstituoheshin Organet e UT dhe të emëroheshin Përgjegjësit e Universitetit dhe të fakulteteve veç e veç. Megjithatë, kjo mbledhje nuk e pati rrjedhën siç ishte planifikuar, pasi në momentin e dhënë, në lokalet e PDP, hynë forcat e policisë.
Kryetari i Këshillit për themelimin e Universitetit, Dr. Fadil Sulejmani, pasi konstatoi se në sallë janë të pranishëm të gjithë të ftuarit e Këshillit dhe përfaqësuesit e mjeteve të informimit, konsultoi të pranishmit për rendin e ditës. Pasi i lexoi disa çështje të karakterit procedural, e në kuadër të kësaj u vendos që Rektori i Universitetit dhe Prodekanët të emërohen për dy vjet, (pasi pati propozime që ky afat të jetë edhe tre vjet) nga poshtë u dëgjuan të rënat e derës të lokalit të PDP-së. Njëri që ishte kujdestar në lokal, na bëri me dije se është policia. Menjëherë në lokal kanë hyrë 8 persona, nga të cilët katër kanë qenë të veshur me uniforma dhe 4 civilë. Derisa mbahej mbledhja, policia ka bërë bastisjen. Së pari bënte identifikimin e të gjithë të pranishmëve, mandej konstatimin e pranimit të atyre që kanë qenë me dokumente, me ç’rast u mor Dr. Bedri Kamberi, pastaj kontrolluan të gjitha materialet që kanë lidhje me Universitetin e Tetovës, duke i marrë disa nga ato.
Sipas një raporti sekret të Ministrisë së punëve të Brendshme, në mbledhjen e 8.I.1995, kanë qenë: Dr Fadil Sulejmani, Miftar Zyberi, Vebi Xhemaili, Gjylymsere Kasapi, Sadi Bexheti, Reshat Qahili, Enver Shala, Ilaz Xhemaili, Nexhbedin Beadini, Kasamedin Abdullai, Agim Shabani, Zehra Ajrullahi, Shiqibe Beadini, Murtezan Ismaili, Dr Masar Kodra, Dr Ismail Hoxha, Sami Ibrahimi, Nexhibe Palloshi, Tahir Zajazi, Murat Murati, Halim Purellku, Dr. Agni Dika, Qenan Sheji, Rahmi Tuda, Agim Amiti, Florije Kastrati (Sela), Petrit Pollozhani, Isen Reçi, Ramiz Abdyli, Feti Mehmedi, Milaim Fejziu, Sefedin Haruni, Mixhait Reçi dhe prof. Bedri Kamberi.
Edhe përpos kërkesave të inspektorëve që mbledhja të ndërpritet menjëherë, Këshilli vazhdoi mbledhjen në një vend tjetër.
Pas një diskutimi të gjerë, Këshilli mësimor-shkencor i Universitetit të Tetovës, në mbledhjen e nëntë të 8.I.1995, në bazë të nenit 8, të Aktit për themelimin e Universitetit, mori vendim për emërimin e organeve përkatëse të Universitetit, përkatësisht të fakulteteve.
Për Rektor të parë të Universitetit të Tetovës u zgjodh Dr Fadil Sulejmani, ndërsa Prorektorë u zgjodhën: Dr. Murtezan Ismaili dhe Dr. Sefedin Haruni.
Për dekan të Fakultetit Filozofik u emërua Dr. Masar Kodra, ndërsa Prodekanë Dr. Ramiz Abdyli dhe Mr. Vebi Xhemaili. Ndërsa për dekan të Fakultetit Filologjik u emërua Dr. Rahmi Tuda, ndërsa prodekanë si ushtrues i detyrës Mr. Sami Ibrahimi dhe Mr. Nexhibe Palloshi; për dekan të Fakultetit Juridik u emërua Mr. Abdulla Aliu (ushtrues detyre). Ndërsa prodekanë Mr. Asllan Bilalli (ushtrues detyre) dhe Mr. Osman Kadriu (ushtrues detyre). Për Dekan të Fakultetit Ekonomik u emërua Dr. Beqir Zhuta, ndërsa Prodekanë Mr. Mixhait Reçi (ushtrues detyre) dhe Mr. Shaban Prevalla (ushtrues detyre). Për Dekan të Fakultetit Matematiko-Shkencor, u emërua Dr. Hisen Reçi, ndërsa prodekanë Mr. Nexhbedin Beadini (ushtrues detyre) dhe Mr. Sadi Bexheti (ushtrues detyre). Për dekan të Fakultetit të Arteve, u emërua kompozitori Ismail Hoxha, kurse për Prodekanë, piktori Meli Zenku dhe piktori Miftar Mehmeti.
Të gjithë këta persona të emëruar përbëjnë SENATIN E UNIVERSITETIT TË TETOVËS.
U THA, U BË, NJË TEMPULL I SHEJNTË I SHQIPTARËVE TË MAQEDONISË..
URIME-URIME GËZOFSHI BREZ- PAS BREZI
Prof. Dr. Vebi Xhemaili-një ndër Themeluesit e UT... 18.12.2025
