Sahara TV Pakistan

06/12/2026

بنگلہ دیش : آرمی چیف جنرل وقار الزمان نے حج کی سعادت حاصل کرنے کے بعد داڑھی رکھ لی، جس پر مختلف حلقوں کی جانب سے انہیں سراہا جا رہا ہے۔
معروف محقق و مصنف روح الامین سدی نے اس اقدام کو اہم قرار دیتے ہوئے کہا کہ ایک اعلیٰ عسکری عہدیدار کی جانب سے مذہبی شعائر کی پاسداری قابلِ تحسین ہے۔ سوشل میڈیا اور عوامی حلقوں میں بھی جنرل وقار الزمان کے اس فیصلے پر مثبت تبصرے کیے جا رہے ہیں۔
بعض مبصرین کے مطابق یہ ذاتی اور مذہبی وابستگی کا اظہار ہے، جبکہ عوام کی ایک بڑی تعداد اسے ایک خوش آئند اقدام قرار دے رہی ہے۔
بنگلہ دیش کے آرمی چیف جنرل وقار الزمان کے اس اقدام پر مختلف طبقات کی جانب سے خیرمقدم کا سلسلہ جاری ہے

06/12/2026

منڈی بہاؤالدین: حلقہ NA-69 کی سیاسی صورتحال میں اہم پیش رفت سامنے آئی ہے۔ بھکھی شریف سے تعلق رکھنے والے چوہدری عبیداللہ گوندل نے اپنے خاندان اور ساتھیوں سمیت بھٹی گروپ میں شمولیت کا اعلان کر دیا۔
اس موقع پر سابق پرنسپل سیکرٹری پنجاب اسمبلی کے اعزاز میں ایک پروقار تقریب کا انعقاد کیا گیا، جس میں سیاسی، سماجی اور علاقائی شخصیات کی بڑی تعداد نے شرکت کی۔ مقررین نے چوہدری عبیداللہ گوندل کی شمولیت کو حلقہ NA-69 کی سیاست میں ایک اہم اضافہ قرار دیتے ہوئے اس اقدام کا خیرمقدم کیا۔

06/12/2026

واسوسبزی منڈی میں بجلی کی عدم فراہمی، پھڑیوں اوردکانداروں کی مشکلات میں اضافہ
تحریر: فیاض احمد بٹ
منڈی بہاؤالدین کی واسو سبزی منڈی میں گزشتہ کئی ماہ سےپھڑئیےاور دکاندار کاروبار کر رہے ہیں، مگر افسوسناک امر یہ ہے کہ تاحال انہیں بجلی کی سہولت فراہم نہیں کی گئی۔ شدید گرمی اور حبس کے موسم میں بجلی کی عدم دستیابی پھڑیوں اور دکانداروں کے لیے ایک بڑے عذاب کی صورت اختیار کر چکی ہے۔
اطلاعات کے مطابق مارکیٹ کمیٹی کی جانب سے دکانداروں کو یقین دہانی کروائی گئی تھی کہ منڈی میں بجلی کی فراہمی یقینی بنائی جائے گی، جبکہ ذرائع کے مطابق بجلی کا نظام اور سہولت وہاں موجود بھی ہے، لیکن اس کے باوجود دکانداروں اور پھڑیوں کو بجلی فراہم نہیں کی جا رہی۔ نتیجتاً کاروباری سرگرمیاں متاثر ہو رہی ہیں اور شدید گرمی کے باعث محنت کش افراد کو روزانہ مشکلات کا سامنا کرنا پڑ رہا ہے۔
مقامی دکانداروں اور پھڑی فروشوں کا کہنا ہے کہ اگر یہی صورتحال برقرار رہی تو گرمی کی شدت کے باعث کسی بھی وقت کوئی شخص بیمار ہو سکتا ہے یا کوئی ناخوشگوار واقعہ پیش آ سکتا ہے۔ انہوں نے کہا کہ بنیادی سہولیات کی عدم فراہمی سے ان کا روزگار بھی متاثر ہو رہا ہے۔
پھڑیوں اور دکانداروں نے وزیر اعلیٰ پنجاب، کمشنر گوجرانوالہ، ڈپٹی کمشنر منڈی بہاؤالدین، مارکیٹ کمیٹی اور دیگر متعلقہ حکام سے پرزور مطالبہ کیا ہے کہ انسانی ہمدردی اور عوامی مفاد کے پیش نظر فوری نوٹس لیا جائے اور واسو سبزی منڈی میں بلا تاخیر بجلی کی فراہمی یقینی بنائی جائے تاکہ گرمی کی اس شدید لہر میں محنت کش طبقہ مزید مشکلات سے محفوظ رہ سکے اور اپنے کاروبار کو بہتر انداز میں جاری رکھ سکے۔

06/10/2026

06/10/2026

بلال مارتھ کے حوالے سے مارتھ فیملی کا مؤقف📸
بلال مارتھ گزشتہ رات سے پولیس کی تحویل میں ہیں، جبکہ اب تک گرفتاری کی وجوہات کے بارے میں کوئی واضح مؤقف سامنے نہیں آیا۔

مارتھ فیملی کا کہنا ہے کہ بلال مارتھ ایک شریف، باکردار اور قانون کی مکمل پاسداری کرنے والے شہری ہیں۔ خاندان کے افراد ان کے کردار، دیانتداری اور سماجی خدمات کی گواہی دیتے ہیں اور اس مشکل وقت میں ان کے ساتھ کھڑے ہیں۔

فیملی کے مطابق بلال مارتھ کا کسی غیر قانونی سرگرمی سے کوئی تعلق نہیں رہا اور وہ ہمیشہ قانون کا احترام کرتے آئے ہیں۔ اسی وجہ سے خاندان اور عزیز و اقارب میں شدید تشویش پائی جاتی ہے۔

مارتھ فیملی مطالبہ کرتی ہے کہ معاملے کی شفاف اور منصفانہ تحقیقات کی جائیں اور اگر کوئی قانونی مؤقف موجود ہے تو اسے فوری طور پر عوام کے سامنے لایا جائے تاکہ حقائق واضح ہو سکیں۔

ہم بلال مارتھ کے ساتھ ہیں اور انصاف کے تقاضوں کی تکمیل کے منتظر ہیں۔

06/10/2026

06/07/2026

لاہور (سہاراویب ڈیسک) ٹک ٹاکر ندیم مبارک عرف نانی والا کو پولیس نے تھانہ ڈیفنس سی میں غفلت و لاپرواہی سے ڈرائیونگ کرنے اور سرکاری ملازم کو دھمکانے سمیت مختلف دفعات کے تحت مقدمہ درج کرنے کے بعد گرفتار کرلیا۔

پولیس نے بتایا کہ پولیس نے ملزم ندیم مبارک عرف نانی والا کو گرفتار کرلیا ہے، جن سے تحقیقات جاری ہیں اور آج عدالت پیش کیا جائے گا۔پولیس کے مطابق ندیم مبارک عرف نانی والا کے خلاف مقدمہ غفلت و لاپرواہی سے ڈرائیونگ کرنے، کار سرکار میں مداخلت اور سرکاری ملازم کو دھمکانے کی دفعات کے تحت درج کیا گیا
ایف آئی آر میں بتایا گیا کہ اپلائیڈ فار لگژری گاڑی کو رکنے کا اشارہ کیا تو ڈرائیور نے رکنے کے بجائے ون وے گاڑی بھگا دی، جس پر پولیس نے واقعے کا مقدمہ تعزیراتِ پاکستان کی دفعات 279، 186 اور 189 کے تحت درج کر لیا ہے۔ایف آئی آر میں کہا گیا ہے کہ ڈرائیور نے رایا کلب کے پاس جا کر گاڑی ون وے کے خلاف چلانی شروع کردی، جب سرکاری گاڑی کو ان کی گاڑی کے ساتھ لا کر دوبارہ روکنے کا اشارہ کیا تو انہوں نے اپنی گاڑی سے ہمیں سائیڈ مار کر حادثے کا شکار کرنے کی کوشش کی۔

نجی ٹی وی کےمطابق پولیس نے بتایا کہ جب انہیں روک کر کہا گیا کہ گاڑی کے ساتھ تھانہ چلیں تو انہوں نے دھمکیاں دینا شروع کیں۔پولیس نے بتایا کہ لاہور ٹریفک پولیس کی جانب سے شہر بھر میں سخت کریک ڈاؤن جاری ہے۔مزید بتایا گیا کہ لاہور ٹریفک پولیس کی طرف سے بوگس و جعلی اور غفلت لاپرواہی کا مظاہرہ کرنے پر متعدد مقدمات درج کروائے جاچکے ہیں وار بغیر نمبر پلیٹ، اپلائیڈ فار اور غیر قانونی سبز نمبر پلیٹس کا استعمال کرنے والوں کے خلاف بلا امتیاز کارروائیاں کی جا رہی ہیں۔

06/07/2026

منڈی بہاؤالدین: معروف ٹک ٹاکربلال مارتھ گرفتار
منڈی بہاؤالدین: سی سی ڈی پولیس نے معروف ٹک ٹاکر بلال مارتھ کو ایک نجی میرج ہال میں مبینہ طور پر اسلحہ کی نمائش اور سڑک پر رکاوٹ کھڑی کرکے ٹریفک کی روانی متاثر کرنے کے الزامات کے تحت گرفتار کر لیا۔
پولیس کے مطابق ملزم کے خلاف قانونی کارروائی کا آغاز کر دیا گیا ہے جبکہ مزید تفتیش جاری ہے۔
واضح رہیکہ بلال مارتھ یااسکےخاندان کااس حوالےسےبیان سامنےنہ آیاہے ان کاموقف ملنےپراپ لوڈکردیاجائیگا

06/07/2026

صحافی لالا اسرافیل خان کا قتل: آزادیٔ صحافت پر حملہ تحریر: فیاض احمد بٹ
بلوچستان کے ضلع موسیٰ خیل میں سینئر صحافی لالا اسرافیل خان کا بہیمانہ قتل نہ صرف ایک فرد کا قتل ہے بلکہ یہ آزادیٔ صحافت، حقِ اظہار اور عوام کی آواز کو دبانے کی ایک مذموم کوشش بھی ہے۔ لالا اسرافیل خان ایک نڈر، بے باک اور عوامی مسائل کو اجاگر کرنے والے پیشہ ور صحافی تھے جنہوں نے ہمیشہ سچ اور حق کی آواز بلند کی۔
ان کی شہادت نے صحافتی برادری، اہلِ خانہ اور عوامی حلقوں کو شدید صدمے سے دوچار کیا ہے۔ ایسے واقعات اس امر کی نشاندہی کرتے ہیں کہ پاکستان میں صحافیوں کے تحفظ کے لیے مزید مؤثر اور عملی اقدامات کی اشد ضرورت ہے۔
ہم حکومتِ بلوچستان، وفاقی حکومت اور قانون نافذ کرنے والے اداروں سے مطالبہ کرتے ہیں کہ شہید صحافی لالا اسرافیل خان کے قاتلوں کو فی الفور گرفتار کرکے قرار واقعی سزا دی جائے اور اس قتل کے محرکات کو بے نقاب کیا جائے تاکہ انصاف کے تقاضے پورے ہو سکیں۔
ساتھ ہی یہ بھی ضروری ہے کہ پاکستان بھر میں پیشہ ور صحافیوں کے جان و مال کے تحفظ کو یقینی بنایا جائے، صحافیوں کے خلاف بڑھتے ہوئے تشدد، دھمکیوں اور حملوں کا مؤثر سدباب کیا جائے اور آزادیٔ صحافت کے تحفظ کے لیے ٹھوس قانون سازی اور عملی اقدامات کیے جائیں۔
لالا اسرافیل خان کی صحافتی خدمات ہمیشہ یاد رکھی جائیں گی۔ ان کی شہادت سچائی کی راہ میں دی جانے والی ایک عظیم قربانی ہے، جسے فراموش نہیں کیا جا سکتا۔

06/07/2026

منڈی بہاءالدین( سجادشاہ سے ) معاون خصوصی وزیراعلی پنجاب برائے فوڈ سیفٹی اینڈ پروٹیکشن ڈیپارٹمنٹ پنجاب میڈیم سلمی بٹ نے ضلع منڈی بہاءالدین کا تفصیلی دورہ کیا، جہاں انہوں نے عوام الناس کو اشیائے ضروریہ کی مقررہ نرخوں پر فراہمی اور پرائس کنٹرول اقدامات کا جائزہ لینے کیلئے ڈی سی آفس میں ایک اہم اجلاس کی صدارت کی۔ اجلاس میں ڈپٹی کمشنر عدیل حیدر، ایڈیشنل ڈپٹی کمشنر ریونیو محمد جعفر چوہدری، اسسٹنٹ کمشنرز، پرائس مجسٹریٹس اور مختلف محکموں کے افسران نے شرکت کی۔ اجلاس میں پرائس کنٹرول نظام کو مزید مؤثر بنانے، فیلڈ مانیٹرنگ میں بہتری لانے اور عوامی سہولت کیلئے مختلف تجاویز پر بھی غور کیا گیا۔ اس موقع پر ڈپٹی کمشنر عدیل حیدر نے ضلع بھر میں پرائس کنٹرول مہم، مارکیٹ انسپکشنز، گرانفروشوں کے خلاف کاروائیوں اور عوامی ریلیف کیلئے کئے جانے والے اقدامات پر تفصیلی بریفنگ دی۔ ڈپٹی کمشنر نے بتایا کہ ماہ جنوری 2026 سے لے کر ابتک ضلع بھر کے پرائس مجسٹریٹس نے کل ایک لاکھ 45 ہزار 854 انسپکشنز کیں، 4413 اوور چارجنگ، 32 ملاوٹ اور 46668 پرائس کنٹرول ایکٹ کی مختلف خلاف ورزیوں پر ایک کروڑ 74500 روپے جرمانہ، 48116 وارننگز اور 3 دکانوں کو سیل کر کے 19 افراد کو گرفتار کیا گیا۔ ڈپٹی کمشنر عدیل حیدر کا کہنا تھا کہ ضلعی انتظامیہ حکومت پنجاب کی ہدایات کے مطابق عوام کو زیادہ سے زیادہ ریلیف فراہم کرنے کیلئے اپنی تمام تر صلاحیتیں بروئے کار لا رہی ہے تاکہ شہریوں کو معیاری اور سستی اشیائے ضروریہ کی فراہمی یقینی بنائی جا سکے۔ معاون خصوصی وزیراعلی پنجاب سلمیٰ بٹ نے پرائس مجسٹریٹس کی کارکردگی کا جائزہ لیتے ہوئے ہدایت کی کہ عوام کو ریلیف کی فراہمی حکومت پنجاب کی اولین ترجیح ہے اور ناجائز منافع خوری، ذخیرہ اندوزی اور گرانفروشی کے خلاف بلاامتیاز کارروائیاں مزید مؤثر بنائی جائیں۔ ان کا کہنا تھا کہ وزیراعلیٰ پنجاب کے ویژن کے مطابق اشیائے خوردونوش کی قیمتوں کو کنٹرول میں رکھنے اور عوامی مفادات کے تحفظ کیلئے تمام دستیاب وسائل بروئے کار لائے جائیں۔ انہوں کا مزید کہنا تھا کہ پیرا فورس اور پرائس مجسٹریٹس مارکیٹوں کی مسلسل مانیٹرنگ، قیمتوں کی نگرانی اور عوامی شکایات کے فوری ازالے سے عوام کو حقیقی ریلیف فراہم کرنے میں اپنا کردار ادا کریں۔