14/03/2025
Янги Андижон – Андижоннинг энг обод ҳудудларидан бири бўлади
Бугун адирликлар бағрида барпо этилаётган Янги Андижон шаҳрига ташриф буюрган ҳар қандай киши амалга оширилаётган қурилиш ва бунёдкорлик ишларидан ҳайратланиши аниқ. Кенг, равон йўллар, бири-биридан кўркам кўп қаватли уйлар, атрофи гулларга бурканган йўлакчалар, умуман, адирлик бағри бўстонга айланаётгани ҳар қандай одамнинг ҳавасини келтиради.
Президентимиз Шавкат Мирзиёев Андижон вилоятига аввалги йиллардаги ташрифида вилоятнинг адир зоналарида кўп қаватли уйлар қуриш ва шу орқали аҳолини арзон, замонавий уй-жойлар билан таъминлаш муҳимлигини таъкидлаб, ушбу лойиҳани амалга оширишга тамал тошини қўйган эди.
Бугун Андижон тумани адирликларида 410 минг нафардан зиёд аҳоли яшаши мумкин бўлган Янги Андижон шаҳрини барпо этиш борасидаги ишлар қизғин олиб борилмоқда.
Умумий майдони 4 минг гектарни ташкил этадиган шаҳарнинг 1 минг 439 гектар майдонида 40 минг хонадондан иборат 2 мингта кўп қаватли турар-жойлар, савдо масканлари қад ростлайди. Шунингдек, 223 гектарда хизмат кўрсатиш, 1 минг 820 гектар майдонда яшил ҳудудлар ташкил этилади. Бундан ташқари, 499 гектар майдон йўллар ва бошқа инфраструктура объектларидан иборат бўлади.
“Янги Андижон шаҳри” лойиҳаси бир неча босқичда амалга оширилади. Биринчи босқичда 5, 7 ва 9 қаватли 192 та кўп квартирали уй, 1 минг 680 ўринли умумтаълим мактаби, 420 ўринли мактабгача таълим ташкилоти, 250 қатновли поликлиника, трикотаж корхонаси, ипотека маркази, қатор ишлаб чиқариш, савдо ва хизмат кўрсатиш объектлари қурилиши белгиланган.
– Айни кунда тасдиқланган режа асосидаги ишлар қизғин олиб борилмоқда, – дейди вилоят ҳокимлигининг қурилиш ишлари бўйича масъул мутахассиси Шоҳруҳбек Собиров. – Хусусан, ҳозирга қадар 2 минг 460 хонадонли 82 та кўп қаватли уй фойдаланишга топширилди. Бундан ташқари, 1-умумтаълим мактаби, мактабгача таълим ташкилоти, поликлиника, ипотека маркази, трикотаж фабрикаси, “Ватанпарвар боғи”, қатор савдо ва хизмат кўрсатиш объектлари ишга туширилди.
Ҳудудни ташқи муҳандислик ва коммуникация тармоқлари билан таъминлаш бўйича биринчи навбатдаги ишлар ҳам изчил олиб борилмоқда. Жумладан, ҳозирга қадар ҳудудга 18 километр узунликдаги электр, 24 километр табиий газ, 11,4 километр алоқа, 42 километр ичимлик ва оқова сув тармоғлари тортилиб, ишга туширилди, 22,9 километр узунликдаги йўллар барпо этилди.
Уй-жойлар, ишлаб чиқариш ҳамда ижтимоий соҳа объектларини ичимлик суви билан таъминлаш мақсадида умумий қиймати 33 миллиард сўмга тенг лойиҳа доирасида сиғими 4 минг метр-куб бўлган сув сақлаш ва узатиш иншоотининг ишга туширилганлиги эса ҳудудда ичимлик суви масаласини тўла ҳал этди.
– Янги Андижон шаҳридаги гўзал манзарани кўриб, кўз қувнайди, – дейди шаҳардаги 21-уйнинг 5-хонадонида яшовчи, меҳнат фахрийси Абдураззоқ Шарипов. – Шароитлар яхшилиги учун аёлим билан шу ерга, ўғлимнинг хонадонига келиб яшаяпмиз. Эрталаб сайр қиламиз, баҳаво жойлар бўлгани учунми саломатлигимизга ҳам ижобий таъсир кўрсатяпти.
Ёшим етмишга яқинлашяпти. Очиғи, кейинги йилларда юртимиздаги, вилоятимиздаги ўзгаришлардан, бунёдкорлик ишларидан ақлим шошиб қолмоқда. Ҳар қадамда ўзгариш, янги қурилиш. Қисқа муддатда барпо этилаётган бир-биридан чиройли биноларни кўриб, шу кунларга етказганига шукр қиламан. Илоҳим юртимиз тинч, мана шундай хайрли ишлар бошида турган юртбошимиз омон бўлсин.
Биз ушбу ҳудудда иш бошлаган мактабгача таълим ташкилотида бўлдик. Муассасада яратилган шарт-шароитларни кўриб, очиғи ҳавасимиз келди.
– Умумий қиймати 18,4 миллиард сўмга тенг лойиҳа доирасида барпо этилган, қарийб 1 гектар майдонга эга, 420 ўринли мактабгача таълим ташкилотимизда айни кунда 6 та гуруҳда 180 нафар болажон тарбияланмоқда, – дейди ташкилот раҳбари Машхурахон Машрабова. – Замонавий қиёфага эга муассасамизда болажонларни мактаб таълимига тайёрлаш, интеллектуал салоҳиятини юксалтириш, ҳар жиҳатдан етук ва баркамол тарбиялаш учун зарур барча шароитлар яратилган. Ошхона, ўйин ва спорт майдончалари, мусиқа, спорт, шахмат, рус, инглиз тили тўгарак хоналари зарур жиҳозлар билан таъминланган.
Масканда 38 нафар малакали педагог ва тарбиячилар болажонларга билим, тарбия бермоқда. Айниқса, Шоҳида Омонова, Шоҳсанам Отажонова, Моҳигул Маҳмудова, Феруза Маҳамматқодирова, Раъно Тўраева, Муҳтарам Умрзоқова сингари малакали устоз, тарбиячи ва ёрдамчи тарбиячилар фаолиятидан барча мамнун.
– Янги Андижон шаҳрига кўчиб келганимизга кўп вақт бўлгани йўқ, – дейди Муҳайё Содиқова. – Икки нафар фарзандимни ушбу боғчага берганман, шароитлари жуда яхши.
Эрталабдан фарзандларим тезроқ боғчага, боғча опамга борайлик, деб хар-хаша қилади. Болаларимнинг боғчага талпинишларидан биламанки, улар боғчада кўнгилларини чоғ ўтказади.
Жорий йилда ҳудудда яна 1 минг 132 хонадонли 40 та кўп қаватли уй фойдаланишга топширилиши кўзда тутилган. Айни кунларда ўнлаб қурилиш ташкилотлари томонидан қурилиш ишлари қизғин олиб борилмоқда.
Андижон шаҳридаги “Бинокор мадад қурилиш” масъулияти чекланган жамияти томонидан ҳудуддаги мактабгача таълим ташкилоти биноси, кўп қаватли уйлар барпо этилди.
– Айни кунда қурувчиларимиз 2 ва 3 хонали яна иккита 9 қаватли уй қурмоқда, – дейди жамият раҳбари Хуршидбек Ҳабибуллаев. – Қурилиш ишлари белгиланган режа асосида олиб борилмоқда. Шу кунларда 50 нафарга яқин мутахассис ва қурувчиларимиз иш олиб бормоқда. Махсус кран ва бошқа техника воситаларидан фойдаланилмоқда.
Янги Ўзбекистонимизнинг Янги Андижон шаҳридаги дастлабки иншоот ва уй-жойларини барпо этаётганлигимиздан, андижонликларни янги уй-жойлар билан таъминлаш ишига ҳисса қўшаётганлигимиздан фахрланамиз.
Ҳудуддаги Ипотека марказида давлат хизматлари агентлиги, банклар ва бошқа хизмат кўрсатиш ташкилотлари шохобчалари, қурилиш ташкилотлари офислари жойлашган бўлиб, янги уй олмоқчи бўлган фуқароларга субсидия, кредит ажратиш ҳамда бошқа барча турдаги хизматлар шу ернинг ўзида кўрсатилиши йўлга қўйилган.
Янги Андижон шаҳрида 5,5 гектар майдонда барпо этилган “Ватанпарвар” боғининг ҳам рамзий маъноси бор. Боғдаги “Ватанга қасамёд” монументи, ўрнатилган ҳарбий техникалар музейи, концерт ва томошалар майдонлари, Ватан озодлиги, тинчлиги ҳамда ҳимояси йўлида жон фидо қилган марҳумлар хотирасига ҳурмат сифатида ўрнатилган ёдгорликлар ҳар қандай кишининг қалбида унутилмас таассуротлар қолдиради.
Амфитеатр, дам олиш жойлари, кафетерийлар, болалар ўйингоҳи, декоратив пиёдалар йўлаклари, суғориш ва ёритиш тизимларига, автотураргоҳ ва бошқа кичик архитектура иншоотларига эга бўлган, 19 гектар майдонда ташкил этилаётган манзарали боғ ҳудуд қиёфасини янада гўзал бўлишига хизмат қилади.
Катта ҳажмдаги қурилиш, бунёдкорлик ишлари олиб борилаётган Янги Андижон шаҳри яқин йиллар ичида шубҳасиз, Андижоннинг энг кўркам, энг обод ҳудудларидан бирига айланади.
Фахриддин Убайдуллаев
