09/09/2025
O‘zbekiston Respublikasi Oliy Majlisi Senati, Bosh prokuratura va Korrupsiyaga qarshi kurashish agentligi tomonidan tasdiqlangan “Toshkent shahrida korrupsiyaning oldini olish va unga qarshi kurashish, shu jumladan maishiy korrupsiyaga barham berish, jamiyatda korrupsiyaga nisbatan murosasiz munosabatni shakllantirish bo‘yicha Yo‘l xaritasi”da muhim vazifalar belgilangan edi.
Shu maqsadda bugun Korrupsiyaga qarshi kurashish agentligi direktori Akmal Burxanov boshchiligidagi Ishchi guruh Respublika ixtisoslashtirilgan onkologiya va radiologiya ilmiy amaliy tibbiyot markazi Toshkent shahar filiali faoliyatidagi raqamlashtirish ishlari, bepul dori-darmon, imtiyozli tibbiy xizmat turlari, bo‘sh koykalar, autsorsing xizmati va pullik xizmat turlari bilan yaqindan tanishdi.
Shuningdek, “Oloy dehqon bozori” misolida shahar bozorlarida maishiy korrupsiya va xufiyona iqtisodiyotning oldini olish bilan bog‘liq ishlar holati joyiga chiqqan holda o‘rganildi.
O'rganish jarayonida tibbiyot muassasida korrupsiyaning oldini olish ishlari lozim darajada amalga oshirilmaganligi, shuningdek, bozorda savdo rastalari uchun bir martalik yig‘imlarni qabul qilishda inson omilini istisno qilish va avtoturargohlarni raqamlashtirish choralari ko'rilmaganligi aniqlanib, ularni qisqa muddatlarda bartaraf etish choralarini ko'rish hamda sustkashlikka yo'l qo'ygan mas'ullarga nisbatan tegishli ta'sir choralari qo'llash ko'rsatib o'tildi.
