31/10/2025
OLTMISH YILLIK TAJRIBA – SIFAT, MAS’ULIYAT VA AN’ANALARGA SADOQAT BILAN
Hurmatli bosmaxona jamoasi, aziz hamkasblar!
Sizlarni “Navoiy kon-metallurgiya kombinati jamg‘armasi” tasarrufidagi Bosmaxonaning 60 yilligi bilan chin dildan tabriklayman!
Insoniyat taraqqiyotining eng muhim va yagona kaliti – bu avloddan-avlodga o‘tib boradigan bilim va tajribaning to‘g‘ri, savodli tarzda uzatilishidir. Aynan yozuvning paydo bo‘lishi insoniyat sivilizatsiyasining rivojida beqiyos o‘rin tutadi. U bilim va tajribaning saqlanishi, keyingi avlodlarga uzatilishini ta’minladi.
Bugungi k***a bosmaxonalar ta’lim, tibbiyot, davlat boshqaruvi yoki sanoat korxonalari uchun zarur bo‘lgan hujjat, blank va axborot tashuvchilarini tayyorlovchi eng muhim bo‘g‘in hisoblanadi. Turli shakl va ko‘rinishdagi bosma mahsulotlar – bu har qanday tashkilot ishining ajralmas qismidir. Ular ish samaradorligini oshiradi, tartibni saqlaydi va qulaylik yaratadi.
Navoiy kon-metallurgiya kombinati (NKMK) faoliyatida ham hujjat aylanishining aniqligi, tizimliligi va ishonchliligi muhim ahamiyatga ega. Kombinat bo‘linmalarida turli hujjatlar ishlab chiqiladi va qayta ishlanadi, bu esa o‘zaro hamkorlikni ta’minlaydi. Shu sababli, NKMK tizimida alohida bosmaxona tashkil etilgan bo‘lib, u hujjatlar bilan ishlash va axborot ishlab chiqarish bo‘yicha keng ko‘lamli xizmatlarni ko‘rsatadi.
NKMK bosmaxonasi 1965-yil 25-oktabrda tashkil etilgan. Bosmaxonaning birinchi jamoasi atigi yetti kishidan iborat bo‘lgan bo‘lib, ularga o‘sha davrda Goldman David Lazerevich rahbarlik qilgan. 1966-yilga kelib, xodimlar soni 29 nafarga yetgan.
Dastlab bosmaxona 105 kvadrat metr maydonda joylashgan, uning 89 foizi ishlab chiqarish jihozlari bilan to‘ldirilgan edi. Shu davrdan boshlab, bosmaxona faoliyati doimiy ravishda kengayib, ishlab chiqarish hajmi ham oshib bordi. 1973-yilda esa bosmaxona yangi, zamonaviy binoga ko‘chirilgan va ilg‘or texnik jihozlar bilan ta’minlangan.
Bugungi kunga kelib, bosmaxona turli ko‘rinishdagi bosma mahsulotlar – blankalar, jurnallar, plakatlar, hujjat shakllari, reklama materiallari va boshqa turdagi nashrlarni ishlab chiqarmoqda. Har bir bosma mahsulot dizayn, sifat va texnik talablar asosida tayyorlanmoqda.
Bosmaxona xizmatlaridan nafaqat kombinatning ichki bo‘linmalari, balki boshqa korxonalar, tibbiyot muassasalari va ta’lim tashkilotlari ham foydalanib kelmoqda.
Bugungi k***a bosmaxona jamoasi 30 nafar malakali mutaxassisdan iborat bo‘lib, ularning har biri o‘z ishining ustasi hisoblanadi. Har bir xodimning mehnati bu umumiy jamoa muvaffaqiyatining ajralmas qismi.
60 yil – bu yaqin tarix, biroq fidokorona mehnat, yangilanish va yuksalish yillari. Shu yillar davomida bosmaxona jamoasi o‘zining texnik salohiyati, jipsligi va mehnatsevarligi bilan NKMK tizimida ishonchli hamkor sifatida mustahkam o‘rin egalladi. Har bir nashr, har bir sahifa bu Jamg‘arma jamoasining mehnat faxri, korxona hayotining muhim bir bo‘lagidir.
Bugun 60 yillik yubiley bu nafaqat faxrli sana, balki mehnat, hamjihatlik, sadoqat va yangilanish ramzidir. Ishonchim komilki, sizlarning jips jamoangiz, tajribangiz va kasbga muhabbatingiz kelgusida ham jamg‘arma faoliyatini yanada yuksaltirishga xizmat qiladi.
Hurmatli hamkasblar!
Sizlarni ushbu qutlug‘ sana – Bosmaxonaning 60 yillik yubileyi bilan yana bir bor samimiy tabriklayman! Sizlarga mustahkam sog‘lik, bardavom ijodiy g‘ayrat, mehnat zafarlarini va oilaviy farovonlikni tilayman.
Har bir bosilgan sahifa sizlarning mehnatsevarligingiz, jamoaning sadoqati va “NKMK jamg‘armasi”ning faxrli tarixining bir bo‘lagi bo‘lib qolaversin!
Bayramingiz muborak, aziz do‘stlar!
Dilshod OCHILOV
“NKMK jamg‘armasi” direktori
