Ozoda Habibullayeva (2025)

14/05/2025

УМР ЙЎЛДОШИМГА

Роббимнинг суюкли бандасиман мен –
Бежиз Сизни насиб қилмаган-ку У!
Дунёим сиз бор-чун жаннатларга тенг!
Сиз бор учун унда йўқ ҳадик, ғулу.

Сиз билан бир тан-у бир жон бўлай, деб,
Кўзингиз қаърига келади чўкким.
Муҳаббат умрга энг чиройли зеб,
Усиз дили ёруғ, юраги тўқ ким?!

Мени севгандайин севинг ўзни ҳам,
Зарра дард кўрмасин жисм-у жонингиз.
Ўзингиз суянчим, тоғим, ҳамма дам,
Ўзимман ҳаммадан меҳрибонингиз!

Яшамоқ энг яхши бахтдир, сиз билан,
Кўнглингиз кўнглимнинг нурли қуёши.
Бахтимга ҳеч қачон хаста бўлманг ва
Доимо бор бўлинг, умр йўлдошим!

Озода ҲАБИБУЛЛАЕВА

03/02/2025

"Tongdalik"dagilardan... 3.02.

01/02/2025

Oʻgʻlim bilan geografiya darsi...

16/12/2024

★★★

Koʻnglingni och, koʻnglingni,
Qara, axir sovqotdim.
Ostonangni koʻrdingmi,
Yumaloqlab qor otdim.

Och koʻnglingni, bir lahza,
Kirib chiqay isinib.
Yashaganing yaxshimas
Yaxshi soʻzga qisinib.

Muzlab borar sochlarim.
Kafting necha daraja?
Isinib ol, de – ishqning
Vazifasini bajar.

Qizgʻon meni qorlardan,
Yuzlarimdan oʻpar u.
Oʻratib qoʻy qalbingni,
Soʻng alamdan boʻlsin suv.

Nima qilsang qil, faqat
Meni asra sovuqdan.
Qish men uchun mashaqqat,
Axir meni mart tuqqan...

Ozoda HABIBULLAYEVA

09/12/2024

Топишмоқ истадим.
Топишмоқ
юбординг тушимда, ўнгимда.
Мен сени ўттиз йил изладим,
Охири "ҳой" дединг кўнглимдан.

Энди кут, мен сени яхшилаб
Севишни олайин ўрганиб.
Юролсам сен томон мардона,
Ўшанда бораман кўргани.

Ўшанда юз бурма, ўшанда
Кулиб де "азизам, кел қани".
Қошингда вужудим ёришсин –
Рост бўлсин наздингда севганим.

Ҳозирча билганим борлигинг,
Дидингни англамам лек ҳали.
Қодирсан, қилиб қўй художон,
Кўнглимни ишқингнинг ватани.

Озода ҲАБИБУЛЛАЕВА
12.2024

23/11/2024

★★★

Oʻquvchining taʼlim va tarbiyasi toʻrt kishining koʻtarishiga moʻljallangan va bir manzilga olib borilishi kerak boʻlgan katta zambilga oʻxshaydi. Bu toʻrt kishi : oʻquvchi, oʻqituvchi, ota va ona.
Agar bu zambilni koʻtarish bilan bu toʻrtovlondan faqat bir nafari shugʻullansa, zambilni deyarli koʻtara olmaydi. Agar ikki kishigina shugʻullansa zambilni koʻtara olishi mumkin, lekin bunda muvozanat baribir saqlanmaydi va albatta toʻrt kishiga moʻljallangan zambil ikki kishini hech qancha yoʻl bosmasidan charchatadi va manzilga yeta olishmaydi. Agarda zambilni uch kishi koʻtarsa, holat nisbatan yaxshilanadi. Lekin baribir bir kishining kuchi ishtirok etmayotgani uchun boshqalarga yuk biroz ogʻirlik qilishi mumkin. Oʻsha bir kishining zambilni koʻtarmayotgani sababli qolgan uch kishi yoʻlni toʻxtab-toʻxtab bosib oʻtishga majbur. Berilgan muddatda manzilga yeta olmasliklari ham mumkindir, balki. Xullas yetishmayotgan bir kishining evaziga qolgan uch kishi koʻproq kuch sarflashi kerak. Agar toʻrt kishining barchasi zambilni birgalikda koʻtarishsa, ularning hech biriga ortiqcha yuk tushmaydi va bu holatda uzoqlarga ortiqcha qiyinchiliklarsiz borish mumkin...

Sizlar nechtasizlar? Zambilni necha kishi koʻtaryapti?

Ozoda HABIBULLAYEVA

15/10/2024

...АЛО(!)

Қарайман минг бора жовдираб,
Келарми сендан ёр, хат-хабар.
Чиқмайди телефон овози,
Кўнглингни кезаман дарбадар.

Излайман ҳар битта бурчагин,
Борми, деб исмимдан битта ҳарф.
Афсусми, нимадир ортади,
Бўлмайди нимадир бартараф.

Тоттириб тўймадинг, тўймадинг,
Кутишнинг бемаза, шўр таъмин.
Умиднинг бошини узмадим –
Ўзгармас сен дея рақамим.

Гар келса сендан хат, қўнғироқ,
Қувончдан кўкраги ғозийдим.
Бир марта эслаб ёр, "адашиб
Тушибман," десанг ҳам розийдим...

Озода ҲАБИБУЛЛАЕВА
08.2024

14/10/2024

ЭСЛАТМА

Менга тиш қайрама, сочма заҳрингни,
Муштингни ўзингга қайтиб бераман.
Кўрсатмоқчи бўлсанг зарра қаҳрингни,
Турмуш ўртоғимга айтиб бераман.

Оғир юк кўтариш мумкинмас менга,
Қаддимни букишга урина кўрма!
Зўр бўлсанг ўзингга, ҳайиқай нега?!
Кичкина бўлсам ҳам сендан-да зўрман.

Эшигим тагига ташлама ташвиш,
Қолдирсанг сен фақат туҳфалар қолдир.
Сенга енгилмайман, бу бўлмағур иш,
Чунки менинг икки ёш болам бордир.

Чалма оёғимдан, қоқилиб кетсам,
Тишимнинг оқини кўраверасан.
Эй, ҳаёт, қачон-ки сўнгингга етсам,
Шунда оқ байроқни менга берасан.

Озода ҲАБИБУЛЛАЕВА
10.2024

12/10/2024

ТАЪМ

Сендан бирон хабар кутаман доим,
Бир марта салом, деб ёзсанг бўларди.
Кўнглингни тор қилган бунча худойим,
Бир марта ҳол сўра, хушнуд бўлардим.

Майли, расмий бўлсин, ёкида нохуш,
Бўлса ҳам майлига сиёсат ҳақда.
Розиман ҳар қандай хабаринг учун.
(Барибир ёзмайсан шеъримни мақтаб)

Сен учун битаман бир нималарни,
Сен учун суратлар жойлайман фақат.
Ўзимни унутиб қўйиш осондир,
Сени унутмоқлик бунча машаққат!

Нималар қиласан бунча онгимда,
Дарбадар, дайдийсан кўнглимни бунча.
Ичимда яшайсан, аммо, лек, бироқ,..ўлиб кетмасайдим сенга етгунча.

Ё кетгин кўнглимдан, ё ёз хат, хабар,
Билишим керак-ку борлигим, ахир.
Кутишга қилма-да бунча сафарбар,
Муштоқлик – номакоб...
зардоб...
ва тахир...

Озода ҲАБИБУЛЛАЕВА
10.2024

23/07/2024

СУҲБАТ

Узоқ суҳбатлашгим келар сиз билан,
Гаплашсак дунёнинг ишлари ҳақда.
Даставвал нолисак муаммолардан,
Кейин давом этсак ҳаётни мақтаб.

Англасак нимага борлигимизни,
Қалбларга шимилса суҳбатнинг таъми.
Ноаён туйғулар чулғаса бизни,
Изласак ҳисларнинг ватанин.

Одамлар қизиқмас, қизиқмас кимдир,
Сарфламам суҳбатнинг бунга бир онин.
Кўнгилнинг ичими, қаерларгадир
Танишга борайлик Худони.

Баъзида сукутдан ёқимли сас йўқ,
Орада оҳангин тинглаймиз уни.
Сокинлик кўнгилга тутандириқ, чўғ,
Совурсин бад ҳислар кукунин.

Сиз билан гаплашиш мароқли бирам,
Англатишлар сизда содда, жўнгина...Узоқ суҳбатлашгим келар сиз билан,
(Десангиз суҳбатнинг сўнгида...)

Озода ҲАБИБУЛЛАЕВА
07.2024

20/07/2024

ҚИЗИМГА

Қизим, айтсам, яшаш унча осон эмас,
Дунё тўлган соф ҳислардан тўйганларга,
Манфаатин энг олдинга қўйганларга,
Муҳаббатни сафсатага йўйганларга.

Йиллар бўйи яшаяпман ташна бўлиб,
Сенинг ширин юзларингга, йиллар бўйи.
Йиллар бўйи курашаман шу ҳис билан.
Билмайманда, сенга олам хуш ёқарми...

Қизим, сени шундай яхши кўраман-ки,
Этак-этак бахт берасан кечалари.
Орзиқаман, лекин баттар авайлайман
Юзчаларинг тушларимга кирган сари.

Сенга тўғри келмас қизим, бу жамият,
Қизғонаман кенгмас дунёқарашлардан.
Кўрсатаман бўялса гар оққа ҳаёт...
Ҳозир эса сени дилда сақлагайман.

Қизим, сени шундай яхши кўраман-ки,
Йиллар бўйи курашаман шу ҳис билан.
Жонга дармон кулгуйингни кўрмоқ учун
Ташкил топса эди дунё яхшилардан...

Озода ҲАБИБУЛЛАЕВА
07.2024

06/05/2024

СЎРОВ

Етар энди кет мендан нари,
Сен-ла бахтли бўлмам, англадим.
Сен қалбимга кирганинг сари
Ҳақ олдида ҳолим тангладим.

Юрагимдан кет, узоқларга,
Чиқ, кўнглимнинг эшигин ёпай.
Безовталар қилмагин қайта,
Хотиржамлик, ҳаловат топай.

Доим сени танлаб яшадим,
Кучлисанда, олов, ўрасан.
Ўз домингга тортиб яшадинг,
Ёқимлисан, завққа жўрасан.

Қилаяпман баъзан, йўқ, тез-тез,
Сен туфайли ножўя ишлар.
Оҳ, Худога йўлиққаним кез
Қолмасайдим ўзимни тишлаб.

Кет...

Кет, дейман-у, сендан айрилиш
Келмайди-да сира қўлимдан.
Минг бор хайр дейман, минг бора
Салом, дейсан чиқиб йўлимдан.

Оҳ тортаман ўйлаб барини,
Келолмасам керак сенга бас.
Қани, ўзинг мендан аразлаб
Қолсанг эди, бир умрга, Нафс...

Озода ҲАБИБУЛЛАЕВА
05.2024

Ozoda Habibullayeva