Qyteti i Gjakovës i njohur për traditën që ka në fushën e arsimit dhe të kulturës ndër shekuj, në mbarim të viteve të shtatëdhjeta pasurohet me mediumin e parë radiofonik, me Radio Gjakovën. Nga ajo periudhë e deri më sot, kanë kaluar shumë ngjarje me të cilat është e lidhur ngusht Radio Gjakova, duke qenë pjesë e përditshmërisë gjakovare, ashtu siç është e lidhur edhe historia e qytetit për
këto tri dekada. Kjo, për faktin se frymëmarrja dhe rrita e qytetit është pasqyruar përmes programeve të përgatitura në këtë medium informativ dhe argëtues. Në fund të viteve të 70-ta, kur komuna e Gjakovës po shëndërrohej në një qendër të madhe ekonomike me një zhvillim të hovshëm në të gjitha fushat e jetës dhe të punës, doli nevoja e domosdoshme për themelimin e një radioje lokale. Këtë kërkesë të qytetarëve të Gjakovës e nxorën para Kuvendit Komunal deputetët e atëhershëm të Gjakovës, me miratimin e të cilit konstituohet Radio Gjakova, me seli në Pallatin e Kulturës “Asim Vokshi”, aty ku funksionon edhe tash.
