21/08/2025
Komuna e Mitrovicës e gatshme për fillimin e vitit shkollor 2025/26
Në Sallën e Kuvendit Komunal, u mbajt takimi me drejtorët e institucioneve edukativo-arsimore të komunës, takim i cili u udhëhoq nga Drejtoresha e Arsimit, Drita Kadriu.
Qëllimi i këtij takimi ishte përgatitja për fillimin e vitit të ri shkollor 2025/26, si dhe diskutimi i çështjeve të rëndësishme për mbarëvajtjen e procesit arsimor në të gjitha shkollat e Mitrovicës së Jugut.
Në takim u theksua se në disa shkolla janë duke u zhvilluar punime intensive për renovim gjeneral, me synim krijimin e kushteve më të përshtatshme dhe moderne për nxënësit dhe stafin arsimor, ku pavarësisht punimeve që po vazhdojnë, të gjitha shkollat janë të gatshme për të nisur vitin e ri shkollor.
Drejtoria e Arsimit do të vazhdojë përkushtimin e saj për ngritjen e cilësisë dhe standardeve në arsim, duke ofruar mbështetje të vazhdueshme për çdo institucion shkollor.
Drejtoresha e Arsimit, Drita Kadriu, falënderoi të gjithë drejtorët e shkollave për kontributin, përkushtimin dhe punën e tyre të palodhshme, duke theksuar se arsimi ka qenë dhe do të mbetet prioriteti kryesor i udhëheqjes sonë në Mitrovicën e Jugut.
Po ashtu, me këtë rast u shënua edhe pensionimi i Drejtorit Xhafer Maliqi, të cilit Drejtoria e Arsimit i shprehu mirënjohje dhe falënderim të veçantë për kontributin shumëvjeçar dhe rolin e tij të çmuar në zhvillimin e arsimit në komunën tonë.
Me këto përgatitje dhe me respekt për kontributin e secilit, Komuna e Mitrovicës së Jugut është e gatshme të mirëpresë nxënësit dhe mësimdhënësit në fillim të vitit të ri shkollor, duke synuar një proces arsimor cilësor, gjithëpërfshirës dhe të suksesshëm.
