29/04/2026
U mbajt mbledhja e rregullt e Kuvendit të Komunës së Mitrovicës
Nën drejtimin e kryesuesit të Kuvendit të Komunës, Safet Kamberi, dhe në prani të kryetarit të komunës, Faton Peci, nënkryetarit Enis Osmani, drejtorëve komunalë dhe asamblistëve, është mbajtur sot mbledhja e 8-të e rregullt e Kuvendit të Komunës.
Seanca ka nisur me një minutë heshtje në nderim të ish-ushtarit të UÇK-së, Ajet Uka nga Zhabari i Mitrovicës, i cili u nda nga jeta më 29 prill.
Gjatë mbledhjes, asamblistët propozuan disa pika shtesë në rendin e ditës, përfshirë rishqyrtimin e vendimit për formimin e komisionit për rivlerësimin e gjendjes ekonomiko-sociale të familjeve përfituese të banesave sociale, raportin teknik mbi dëmet nga rrëshqitja e dheut në lagjen Bair, si dhe Planin e Punës së Kuvendit për vitin 2026.
Në vijim, Kuvendi miratoi një sërë pikash të rëndësishme, ndër to procesverbalin e mbledhjes së kaluar, draft-rregulloren për plotësim të Rregullores për organizimin dhe funksionimin e administratës komunale, si dhe vendimin për bartjen e të hyrave vetanake të pashfrytëzuara nga viti 2025 dhe vitet paraprake në buxhetin e vitit 2026.
Po ashtu, u miratuan vendime për kompensimin e anëtarëve të komiteteve dhe këshillave lokale për vitin 2026, subvencionimin e fëmijëve me autizëm, si dhe vendosjen e një pllake përkujtimore për he**in Driton Veliu.
Kuvendi miratoi disa vendime për shfuqizimin e akteve të mëhershme që lidhen me komisione dhe procedura të ndryshme administrative.
Në kuadër të mbështetjes sociale, u shqyrtuan dhe u miratuan kërkesat për mbështetje financiare nga organizatat e dala nga lufta e UÇK-së, përfshirë Shoqatën e Familjeve të Dëshmorëve, Invalidët e Luftës, Veteranët e Luftës dhe Lidhjen e Invalidëve dhe Viktimave Civile të Luftës në Mitrovicë.
Gjithashtu, u prezantua raporti financiar për periudhën janar–mars 2026, si dhe u diskutuan çështje që lidhen me dëmet nga rrëshqitjet e dheut në lagjen Bair dhe planifikimin vjetor të punës së Kuvendit.
Ndërkohë, pika e rendit të ditës që kishte të bënte me raportin e vlerësimit të dëmeve të shkaktuara në biznese nga vërshimet është tërhequr për shqyrtim në një nga mbledhjet e ardhshme të Kuvendit.
