08/06/2026
U MBAJT TAKIMI I PËRBASHKËT NDËRMJET KBI PEJË DHE POLICISË SË KOSOVËS
Sot, në Xhaminë Nur në Pejë, u mbajt takimi i përbashkët ndërmjet imamëve të Këshillit të Bashkësisë Islame në Pejë dhe përfaqësuesve të Policisë së Kosovës, i udhëhequr nga Kapiten Dervish Haxhija dhe bashkëpunëtorët e tij.
Takimi u zhvillua në frymën e bashkëpunimit institucional për forcimin e sigurisë publike, parandalimin e dukurive negative dhe ngritjen e vetëdijes qytetare në komunitetin tonë.
Gjatë diskutimeve u trajtuan tema me interes të veçantë për qytetarët, ndër të cilat:
🔹 Parandalimi i rasteve dhe dukurive negative në komunitet;
🔹 Bashkëpunimi ndërinstitucional për sigurinë publike;
🔹 Fushata vetëdijesuese “Festo me zemër, jo me armë”;
🔹 Parandalimi i zjarreve gjatë sezonit veror;
🔹 Fenomeni i lëmoshëkërkuesve dhe sfidat që paraqet kjo dukuri në shoqëri.
Përfaqësuesit e Policisë së Kosovës theksuan rëndësinë e rolit të imamëve në edukimin qytetar, ruajtjen e rendit dhe kultivimin e përgjegjësisë shoqërore, ndërsa imamët shprehën gatishmërinë e tyre për të kontribuar përmes ligjëratave, hutbeve dhe aktiviteteve vetëdijesuese në shërbim të qytetarëve.
Në përfundim të takimit u riafirmua përkushtimi i përbashkët për të vazhduar bashkëpunimin në kuadër të Këshillit Lokal për Siguri Publike (KLSP), me synimin e ndërtimit të një mjedisi më të sigurt, më të qetë dhe më të përgjegjshëm për të gjithë.
Takimi u karakterizua nga një bashkëbisedim i hapur dhe konstruktiv ndërmjet imamëve dhe përfaqësuesve të Policisë së Kosovës. Imamët shtruan pyetje të ndryshme që lidhen me sfidat e sigurisë në komunitet, ndërsa përfaqësuesit e policisë ofruan sqarime dhe përgjigje konkrete mbi çështjet e ngritura.
Gjithashtu, u zhvilluan diskutime të arsyeshme dhe debate përmbajtësore rreth mënyrave më efektive të parandalimit të dukurive negative, forcimit të bashkëpunimit me qytetarët dhe rolit që institucionet fetare mund të kenë në promovimin e sigurisë dhe përgjegjësisë shoqërore.
Bashkëpunimi ndërmjet institucioneve fetare dhe atyre të sigurisë mbetet një garanci e rëndësishme për forcimin e vetëdijes qytetare, ruajtjen e rendit publik dhe ndërtimin e një shoqërie më të sigurt.
