30/11/2025
Shoqëria civile paralajmëron:
Zgjedhjet e parakohshme nuk do ta ndërpresin krizën institucionale
Para zgjedhjeve të parakohshme parlamentare të caktuara për 28 dhjetor, skena politike e Kosovës mbetet thellë e ndarë, ndërsa përfaqësues të shoqërisë civile nga komuniteti shqiptar dhe serb paralajmërojnë se zgjedhjet e ardhshme me gjasë nuk do të sjellin stabilitet dhe as dalje nga bllokada institucionale. Edhe pse Gjykata Kushtetuese ende nuk është deklaruar lidhur me ankesën e Listës Serbe për zgjedhjen e nënkryetarit të Kuvendit, ekspertët vlerësojnë se një vendim eventual tashmë nuk mund të ndikojë në procesin zgjedhor, pasi parlamenti është shpërndarë.
Mujaj: “Është e vështirë të besohet se zgjedhjet e dhjetorit do të japin rezultat të ndryshëm”
Drejtori i organizatës “Syri i Vizionit” nga Peja, Veton Mujaj, konsideron se votimet e reja janë pasojë e një ngërçi të gjatë, por nuk përbëjnë garanci për dalje nga kriza.
“Pamë pamundësinë për formimin e qeverisë, e tani hyjmë në një proces të ri zgjedhor, i cili vështirë se mund të japë rezultat të ndryshëm nga ai i shkurtit. Çdo gjë tregon se procesi politik po shkon drejt prillit, kur skadon mandati i presidentes, dhe atëherë janë të mundshme zgjedhje të reja”, tha Mujaj.
Drejtori i Qendrës për Veprim Shoqëror Afirmativ, Miki Marinkoviq, thotë:
“Mendoj se në këtë situatë, kur Kuvendi është shpërndarë dhe janë shpallur zgjedhje të reja, mendimi i Gjykatës Kushtetuese mund të jetë vetëm rekomandim për ciklin e ardhshëm zgjedhor, pra për konstituimin e radhës së Kuvendit. Besoj se në këtë drejtim ata do t’u përshtaten rrethanave politike aktuale dhe do të nxjerrin një rekomandim apo mendim që do të jetë i detyrueshëm në raundin tjetër. Kështu që nuk mendoj se ndonjë vendim i Gjykatës Kushtetuese në këtë moment mund ta ndalë këtë proces. Thjesht, zgjedhjet janë shpallur, do t’i kemi më 28 dhjetor dhe Gjykata Kushtetuese nuk do të përzihet”, tha Marinkoviq.
Ai shtoi se kriza institucionale mund të ishte zgjidhur që në fillim të vitit, por mungoi vullneti politik.
“Kjo krizë ka mundur të kapërcehet që në shkurt. Megjithatë, nuk ka pasur vullnet politik. Qartë shihet se plani i Vetëvendosjes ishte të fitonte kohë shtesë në mandat teknik, që situata në veri të konsolidohej. Kjo për serbët që jetojnë atje mund të nënkuptojë presion shtesë dhe shpërngulje”, theksoi ai.
Nga Iniciativa e Re Shoqërore, Milica Andriq Rakiq vlerësoi se bllokada politike ishte e pritshme dhe se viti është i humbur.
“Nuk ekzistonte mundësi bashkëpunimi midis opozitës së atëhershme dhe pushtetit. Zgjedhjet e reja me gjasë nuk do ta ndryshojnë raportin e forcave. Lëvizjes Vetëvendosje i mungojnë të paktën dhjetë për qind të votave për të arritur shumicë të qëndrueshme, dhe nëse nuk e arrin këtë – gjithçka mbetet njësoj”, tha Rakiq.
Ajo paralajmëron edhe për rrezikun e paralizës së zgjatur institucionale.
“Edhe nëse formohet qeveria, nëse nuk ka shumicë të qartë për zgjedhjen e presidentit në mars, ekziston mundësia për zgjedhje të reja. Kjo nënkupton një periudhë të gjatë qeverisjeje teknike pa legjitimitet të plotë”, shtoi ajo.
Prizren: Komisioni Zgjedhor gati, qytetarët tashmë po kërkojnë ndryshim të vendvotimit
Ndërsa analistët paralajmërojnë pasiguri politike, institucionet lokale po përpiqen që pjesa teknike të zhvillohet rregullisht. Në Prizren, Komisioni Komunal Zgjedhor tashmë po punon me kapacitet të plotë.
Zyrtari ekzekutiv i KKZ-së, Nusret Bityqi, tha se gjithçka është gati për mbajtjen e zgjedhjeve më 28 dhjetor.
“Këtë vit kemi organizuar zgjedhje tre herë dhe jemi plotësisht të përgatitur edhe për këto të parakohshme. I kemi konfirmuar vendvotimet, gjithsej 76, duke përfshirë një vend për votim me kusht. Infrastruktura dhe stafi janë të siguruar”, theksoi Bityqi.
Ai shtoi se qytetarët po e shfrytëzojnë aktivisht mundësinë për të ndryshuar vendvotimin.
“Që nga fillimi i fushatës informuese më 26 nëntor, deri tani 154 qytetarë kanë paraqitur kërkesë për ndryshimin e vendvotimit. Interesimi është i madh dhe procesi po zhvillohet pa probleme”, tha ai, duke kujtuar se afati është 16 dhjetori.
Kjo temë u realizua nga Radio Peja, Radio Gorazhdeci, Radio Astra dhe TV Prizreni në kuadër të projektit “Zëri i Komunitetit”.
