06/12/2024
Federata e Motoçiklizmit të Kosovës është pranuar zyrtarisht në Federatën Ndërkombëtare të Motoçiklizmit gjatë ditës së premte.
Në mbledhjen e radhës të mbajtur në Spanjë, ky institucion, i drejtuar nga Jorge Viegas, ka dëgjuar rrëfimet e motoçiklistëve nga Kosova dhe historinë e këtij sporti në vendin tonë.
Delegacioni kosovar, i kryesuar nga kryetari Nuhi Llugaxhiu, ka prezantuar me sukses të kaluarën, aktivitetet dhe misionin e Federatës së Motoçiklizmit të Kosovës, duke theksuar rëndësinë dhe potencialin e saj në zhvillimin e këtij sporti.
Në përfundim të mbledhjes, me 83 vota pro dhe vetëm 6 kundër, Federata e Motoçiklizmit të Kosovës u pranua ndërkombëtarisht. Ky vendim hap një kapitull të ri për këtë federatë, duke i mundësuar realizimin e aktiviteteve madhore në të ardhmen.
