31/08/2025
Nën flamujt palestinezë, nga Spanja nis misioni më i madh i solidaritetit për Gazën që do të vizitojë 44 vende
Një flotilë që transporton ndihma humanitare dhe aktivistë, përfshirë aktivisten suedeze për ndryshimet klimatike Greta Thunberg, pritet të niset nga Barcelona me synimin për të "thyer bllokadën ilegale të Gazës". Anijet do të nisen nga ky qytet portual spanjoll për të "hapur një korridor humanitar dhe për t’i dhënë fund gjenocidit ndaj popullit palestinez". Ende nuk dihet saktësisht sa anije do të nisen dhe në çfarë kohe, por në pamje shihet se përgatitjet kanë filluar dhe disa prej tyre kanë mbajtur fjalime. Pritet që flotila të arrijë në enklavën bregdetare të shkatërruar nga lufta në mes të shtatorit.
Të gjitha këto anije mbajnë ushqime, ujë dhe barna dhe kanë kërkuar kalim të sigurt për dorëzimin e tyre.
“Kjo do të jetë misioni më i madh i solidaritetit në histori, me më shumë njerëz dhe më shumë anije se të gjitha përpjekjet e mëparshme së bashku”, tha aktivisti brazilian Thiago Ávila për gazetarët në Barcelonë javën e kaluar.
Organizatorët thonë se dhjetëra anije të tjera pritet të nisen nga portet tuniziane dhe të tjera në Mesdhe më 4 shtator. Aktivistët do të organizojnë gjithashtu demonstrata të sinkronizuara dhe protesta në 44 vende si shenjë solidariteti me popullin palestinez.
Përveç Thunbergut, flotila do të përfshijë aktivistë nga disa vende, ligjvënës evropianë dhe figura publike si ish-kryetarja e Bashkisë së Barcelonës, Ada Colau.
“Kjo është histori për Palestinën. Këtu bëhet fjalë për mënyrën se si njerëzve u mohohen qëllimisht mjetet bazë për mbijetesë”, tha aktivistja suedeze Thunberg në një konferencë për shtyp.
Ajo do të jetë një nga figurat më të njohura të ekspeditës, krahas aktorëve Susan Sarandon dhe Liam Cunningham, si dhe aktivistëve, politikanëve si ish-kryetarja e Barcelonës Ada Colau dhe gazetarëve.
Izraeli ka bllokuar tashmë dy përpjekje të aktivistëve për të dorëzuar ndihma me anije në Gaza, gjatë qershorit dhe korrikut.
