22/09/2025
Ndahet nga jeta aktori i njohur shqiptar, Enver Petrovci
Bota e artit shqiptar është në zi pas ndarjes nga jeta të aktorit dhe regjisorit të njohur, Enver Petrovci. Lajmin e hidhur e ka konfirmuar bashkëshortja e tij, Valbona Petrovci.
Enver Petrovci lindi më 28 shkurt 1954 në Prishtinë. Dashurinë për skenën e shfaqi që në moshë të hershme, duke u orientuar drejt studimeve në Shkollën e Lartë Pedagogjike të Prishtinës në degën e aktrimit. Më vonë, ai vazhdoi formimin e tij profesional në Fakultetin e Arteve Dramatike në Universitetin e Beogradit, ku u diplomua si aktor.
Karriera e tij artistike u ngjit në kulm në skenat e teatrit, veçanërisht në atë të famshëm “Atelieja 212” në Beograd. Rolet e tij të spikatura në këtë skenë e bënë një figurë të dashur dhe të njohur në të gjithë ish-Jugosllavinë, ku u vlerësua si një nga aktorët më të shquar të kohës.
Pas përfundimit të luftës në ish-Jugosllavi, në vitin 1999, Petrovci riktheu me forcë krijimtarinë e tij, duke ndërtuar një karrierë të pasur artistike kryesisht në Kosovë, Shqipëri, por edhe më gjerë. Me talentin, energjinë dhe profesionalizmin e tij, ai mbeti një emër i paharruar i skenës dhe ekranit shqiptar.
Enver Petrovci do të kujtohet për gjithçka i dha kulturës shqiptare: art, emocion, dhe frymëzim për breza të tërë artistësh.
😭😭😭😭
