31/03/2025
Xhamia e vjetër në Abri të Ulët, Monument i lënë në harresë.🕌
Xhamia e vjetër në fshatin Abri të Ulët, të komunës së Skenderajt, e njohur ndryshe si Xhamia e Abrisë, është një monument i rëndësishëm i trashëgimisë kulturore dhe fetare në Kosovë. E ndërtuar rreth 141 vjet më parë, kjo xhami ka shërbyer si vend faljeje për banorët e zonës dhe një simbol i identitetit dhe besimit të tyre. Më vonë, në vitin 1987, iu ndërtua edhe minarja.Megjithatë, sot kjo xhami është lënë pa përkujdesje dhe ndodhet në gjendje tërësisht të demoluar. Kjo situatë ngre nevojën urgjente që Komuna e Skenderajt dhe institucionet përkatëse qeveritare të ndërhyjnë për ta restauruar dhe për ta përfshirë në listën e trashëgimisë kulturore të mbrojtur.Sipas burimeve lokale, xhamia u ndërtua nga komuniteti i fshatit, nën organizimin e Xhemail Abri-së, duke reflektuar përkushtimin e banorëve për ndërtimin e një vendi adhurimi dhe bashkimi.Në kuadër të kësaj çështjeje, ju sjellim pamje të realizuara sot, pikërisht në ditën e dytë të festës së Fitër Bajramit, për të treguar gjendjen aktuale të xhamisë dhe domosdoshmërinë e ndërhyrjes së institucioneve përkatëse për ruajtjen dhe restaurimin e saj.
