18/06/2026
Tragjedi në Ruboc të Kamenicës: 84-vjeçari humb jetën pasi u rrokullis me traktor
Një ngjarje tragjike ka ndodhur pasditen e së mërkurës në fshatin Ruboc të Kamenicës, ku një burrë 84-vjeçar ka humbur jetën gjatë punës me traktor.
Sipas informacioneve fillestare, autoritetet janë njoftuar për një aksident në një zonë fushore-malore të fshatit, ku një person ishte rrokullisur me traktor.
Në vendin e ngjarjes kanë dalë menjëherë njësitë policore dhe ekipi mjekësor, i cili ka konstatuar vdekjen e viktimës në vendngjarje.
Viktima është identifikuar si Miroslav Nikolic, 84 vjeç.
Gjatë ekzaminimit të vendit të ngjarjes, autoritetet kanë gjetur viktimën nën një traktor të tipit Ferguson 39, i cili ishte rrokullisur pjesërisht mbi trupin e tij.
Në vendngjarje kanë dalë prokurori kujdestar, hetuesit rajonalë dhe ekspertët e kriminalistikës, të cilët kanë kryer këqyrjen e detajuar të vendit ku ndodhi aksidenti. Më pas, edhe ekipi i Institutit të Mjekësisë Ligjore ka realizuar ekzaminimin fillestar të trupit.
Me urdhër të Prokurorit të Shtetit, trupi i pajetë është dërguar në Institutin e Mjekësisë Ligjore në Prishtinë për kryerjen e autopsisë dhe ekzaminimeve të nevojshme mjeko-ligjore.
Sipas të dhënave paraprake, nuk ka indikacione për përfshirjen e personave të tjerë në këtë rast. Megjithatë, organet kompetente po vazhdojnë hetimet për të sqaruar plotësisht rrethanat e ngjarjes.
Traktori është gjetur i rrokullisur në terren malor, ndërsa 84-vjeçari kishte mbetur poshtë tij pa mundur të shpëtojë.
Për shkaqet e sakta të vdekjes pritet raporti përfundimtar nga autopsia.
📸Sinjali
