https://www.facebook.com/970088089731840/

KosovaExpress, Pristina (2026)

10/05/2026

“Rruga e Currilave në gjendje skandaloze, na u bë makina për amortizatorë!”

Një qytetar nga Durrësi ka denoncuar gjendjen alarmante të rrugës kryesore që lidh qytetin me zonën e Currilave, një nga zonat më të frekuentuara dhe turistike të bregdetit.

Nga pamjet e dërguara, segmenti rrugor duket i degraduar pothuajse nga fillimi në fund, me gropa të shumta përgjatë korsisë, duke krijuar vështirësi serioze për drejtuesit e automjeteve dhe trafik të ngadaltë në zonë. Në video shihen automjete që detyrohen të manovrojnë mes gropave për të shmangur dëmtimet, ndërsa rruga ka fluks të lartë qarkullimi edhe gjatë mbrëmjes.

Qytetari shprehet se situata po u shkatërron makinat çdo ditë:

“Përshëndetje, në fillim sezoni rruga kryesore Currila-Durrës komplet me gropa nga fillimi në fund. Na është bërë makina për amortizatorë e gomina. Mirë ne, po ka aq shumë turistë dhe fluks njerëzish sa po na e flliqin Durrësin.”

Banorët dhe drejtuesit e mjeteve kritikojnë Bashkinë e Durrësit dhe kryebashkiaken Emiriana Sako, duke thënë se një nga akset më të rëndësishme turistike të qytetit është lënë në mëshirë të fatit pikërisht në prag të sezonit veror.

Sipas tyre, është e papranueshme që rruga që çon drejt një prej zonave më të frekuentuara të bregdetit të jetë në këtë gjendje, ndërsa turistët dhe qytetarët përballen çdo ditë me gropa, dëmtime automjetesh dhe rrezik në qarkullim.

09/05/2026

Korrupsioni ha ushqimin e konviktorëve/ Emiriana Sako i dhuron familjes Sinani nga Karbunara kontratën 1 miliard lekë

Ushqimet që konsumojnë nxënësit e konvikteve dhe fëmijët në Durrës i ha korrupsioni qysh në momentin kur bëhet tenderi! Kryetarja Bashkisë Durrës, Emiriana Sako, krejt e shkujdesuar në deyrë, cdo vit ia jep dhuratë fondin një familjeje. Nga familja e Shemsi Sinanit nga Karbunara e Lushnjes dhe fëmijët e tij tregtar varet shëndeti i nxënësve. Nëse shuma e paguar nën dorë për të fituar tenderin është madhe, zvogëlohen racionet, konsumohen ushqime të skaduara, furnizimet mbushen me artikuj të lirë jo të shëndetshëm.

Emiriana Sako ka besim tek Shemsi Sinani dhe i jep cdo vit tenderat e ushqimit të Qendrës Ekonomike të Arsimit. Por qytetarët nuk kanë se si të jenë të sigurtë me këtë marrëdhënie. Shqetësimi lind nga fakti se Shemsi Sinani është i dënuar për korrupsion në tenderat e ushqimeve.

Së fundmi, Emiriana Sako i ka dhënë Sinanit afro 1 miliard lekë (përfshirë TVSH) për furnizmin me ushqime për vitin 2026.

Ky është një tender i ndarë në 5 lote. Në lotin e parë ka marrë pjesë vetëm Argjend Daci (person fizik) dhe “Kazazi meat” shpk që kanë specializim për mishin.

Në 4 lotet e tjera ka marrë pjesë vetëm familja Sinani. Kompanitë e tjera, duke e ditur fituesin e paracaktuar nuk kanë marrë mundimin të afrohen.

Prokurimi i Bashkisë Durrës me objekt “Loti II – “Blerje bulmet dhe nënprodukte të tij” e ka fondin limit rreth 324 milionë lekë pa TVSH.

Tenderi është mbajtur më 27 mars 2026 me vetëm një pjesëmarrës, kompaninë “Sinani Trading” SHPK. Dhe më 29 prill është shpallur zyrtarisht fituesi.

Tenderi ka merituar “Flamur te kuq” që sinjalizon korrupsionin. Sipas tabelës së furnizimit, peshën e rëndesës e zënë qumështi, kosi dhe vezët.

Ndërkaq, në pjesën tjetër është prokuruar “Loti III– “Blerje bukë” (bukë gruri, thekre dhe integrale). Me fondin afro 60 milionë lekë do të paguhet furnizimi i përditshëm me bukë. Tenderin e ka fituar kompania e vetme pjesëmarrëse që u paraqit, “4S” shpk, edhe kjo, pjesë e familjes Sinani. Kështu, në të nëjtën ditë është shpallur fituesi zyrtar, që ka bërë ofertë gati sa fondi limit.

Edhe ky tender është dekoruar me “flamur korrupsioni”. Po si mund të ketë mungesë konkurrence, kur Durrësi ka me dhjetëra prodhues të bukës? Këtë situatë e krijon korrupsioni i bashkisë.

Prokurimi tjetër, Loti IV – “Blerje artikuj ushqimor kolonial” (ambalazhuar/paketuar) e ka fondin limit mbi 130 milionë lekë. Në këtë tender të bën përshtypje se oferta fituese është anomalisht e ulët.

Për shkak se në këtë tender është proania e një kompanie të dytë, Sinani rezulton se e ka dhënë një ofertë shumë të ulët. Kështu, oferta e Sinanit është 85 milionë lekë. Në rastin kur janë të vlefshme dy ose më pak oferta, në përputhje me nenin 93 të Ligjit për Prokurimet Publike, oferta vlerësohet anomalisht e ulët kur ajo është ulur më shumë se 25% të fondit limit të përllogaritur. Nuk e dimë se si e ka justifikuar këtë ofertë Sinani, ndërkohë që duhej refuzuar nga komisioni. Në këtë rast rrezikohet furnizimi me mallra pa cilësi, po ashtu vihet në dyshim realizimi i sasisë së kontraktuar, pasi cmimet e ushqimeve nuk mund të ulen kaq shumë në raport me fondin limit. Presupozohet që fondi është hartuar pas sondazheve me tregun nga komisioni i tenderit.

Pjesa e fundit e ushqimeve është furnizuar me tenderin “Loti V– “Blerje fruta dhe zarzavate” me fondin 236 milionë lekë.

Për mungesën e konkurrencës, edhe ky tender është shënuar me “Flamurin e kuq”.

Shpjegojmë këtu se themeluesi i kompanive është Shemsi Sinani, i cili me firmën “Sinani Trading” shpk është akuzuar për vjedhje me tenderat.

Më parë kompania quhej “M. B. KURTI” SHPK, por pas shumë abuzimeve dhe numrit të lartë të tenderave ndryshoi emri në “Sinani Trading” shpk, për t’i shpëtuar drejtësisë. Gjithsesi në vitin 2018 aferat e kësaj kompanie u zbuluan dhe pronari i saj Shemsi Sinani doli para drejtësisë.

Një hetim dyvjecar i Prokurorisë për Krimet e Rënda arrestoi ish-zv/drejtorin e përgjithshëm të Burgjeve, Iljaz Labi dhe administratorët e 4 kompanive private të cilët dyshoheshin se përmes një skeme korruptive fiksonin tenderat e ushqimeve që zhvillonte kjo drejtori. Procesi gjyqësor zgjati afro dy vjet, ku pas hekurave shkoi edhe ish -Drejtori i Përgjithshëm i Burgjeve Artur Zoto, ndërsa në fund, Gjykata e Apelit për Krimet e Rënda e shpalli atë të pafajshëm duke dënuar zëvendësin e tij Iljaz Labi dhe administratorët e kompanive Dogel, Vllaznia, M.B. Kurti dhe Nelsa.

Nga hetimi i prokurorisë dhe provat e administruara gjatë procesit gjyqësor, rezultoi se pronarët e këtyre kompanive Elidjan Laskaj, Ylber Kalaja, Shemsi Sinani dhe Nexhmi Balla bënin marrëveshje me njëri – tjetri për të paracaktuar fituesin në procedurat e tenderimit të ushqimit që organizonte Drejtoria e Përgjithshme e Burgjeve.

Sinani, kreu i kompanisë “Sinani Trading” shpk kishte fituar tenderin pa garë dhe me probleme në dokumentacione, asaj kohe Gjykata e Lartë vendosi katër vite burg për të. Nga hetimi ka rezultuar se administratorët takoheshin me njëri-tjetrin dhe binin dakord për pjesëmarrjen në tender, duke shkëmbyer informacionin dhe duke përpiluar dokumentet e pjesëmarrjes në prokurime, në mënyrë të tillë që të fitonte njëri prej tyre. Sipas bisedave që ata bënin. Administratorët e këtyre shoqërive me në krye Shemsi Sinanin paraprakisht përcaktonin edhe se cili prej tyre do të dilte fitues në njërin prokurim apo në secilin lot prokurimi.

Është konstatuar se në këto prokurime janë korruptuar zyrtarë të lartë të kësaj drejtorie. Ndërsa biznesmenët u dënuan për korrupsion aktiv të personave që ushtrojnë funksione publike në bashkëpunim. Nga Gjykata e Apelit për Krimet e Rënda u ndëshkuan me 2 vjet e 6 muaj heqje lirie Shemsi Sinani dhe Elidjan Laska, 2 vjet heqje lirie për Nexhmi Ballën dhe liri me kusht për Ylber Kalanë.

Nuk kaluan as disa muaj, që kompanitë e themeluara nga Ylber Kalaja, dhe Nexhmi Balla si dhe një tjetër që lidhet me të afërm të Shemsi Sinanit të nisin të marrin sërish dhjetëra tendera. Dhe një pjesë të mirë të tyre kanë rezultuar fitues, madje edhe në një që ka si objekt “Blerje artikuj ushqimorë, për Drejtorinë e Përgjithshme të Burgjeve” më 22 qershor 2020.

Sinani u largua formalisht duke ia lënë kompaninë të birit. Për disa vjet Sinani Trading nuk ka fituar në asnjë garë, duke qëndruar në heshtje.

Subjekti ka vijuar normalisht të marrë pjesë në prokurimet publike që ka zhvilluar Agjencia e Blerjeve të Përqendruara, por në shumicën e rasteve nuk ka paraqitur ofertë financiare duke luajtur rolin e firmës që shton pjesëmarrjen në garë.

Megjithatë dokumentet tregojnë se një tjetër kompani e cila lidhet me djalin e Shemsi Sinanit, Xhino Sinani, rezulton të ketë fituar dhjetëra kontrata për shërbimin e furnizimit me ushqime duke nisur nga viti 2020. Ne ate kohe, shoqëria “4S” ka marrë pjesë në 20 procedura dhe është shpallur fituese në 15 prej tyre kundrejt një fondi prej 700 mijë dollarësh.

Më pas, kompanitë e familjes Sinani me seli në fshatin Karbunarë të Lushnjës, nuk do të ndaleshin, por do gtë fitonin kryesisht pa garë pjesën e tyre të tortës së kontratave të ushqimit.

Vetëm Sinani Trading aktualisht numëron mbi 400 tendera publikë të përfituar në këtë sektor. Një numër të përafërt kontratash numëron edhe kompania “4S” shpk.

Ndërkaq, biznesi i familjes Sinani me Emiriana Sakon është konsoliduar tashmë. Por të dy palët janë subjekte të SPAK për cështje të tjera. Burime pranë Prokurorisë së Posaçme bëjnë me dije se 4S shpk ndodhet nën hetim për deklarim të të dhënave fiktive gjatë marrjes pjesë në një garë të zhvilluar nga Agjencia e Blerjeve të Përqendruara, pjesë e dosjes ku u arrestuan 9 zyrtarë të këtij institucioni si të dyshuar për aferën e uniformave të policisë.

Ndërsa Kryebashkiakja Emiriana Sako është thirrur në SPAK më 17 maj 2024 për skandalin e inceneratorëve.

gijotina.com/

09/05/2026

20 MILIARD LEKË ka përfituar çifti i krimbur në para Alma dhe Nikolin Nikoqiri për të ushqyer të sëmurët në QSUT

Alma Tafani, ish-bashkëshortja me letra e Nikolin Jakës (aka Nikolin nikoqiri), oligarkut të kompanisë së bylmetit ZEPA Natyral, dyshja e denoncuar ndër vite nga JOQ Albania për standardet skandaloze të punës, si në ushqimin e të sëmurëve e po ashru edhe në pastrimin e çarçafëve të spitaleve, kanë histori të gjatë zhuli mbi shpinë.

Mjafton të rikujtojmë se në një video të publikuar disa vite më parë nga JOQ, furgonët e kompanisë së bylmetit ZEPA NATYRAL funksiononin si transportues të çarçafëve të pisët të spitaleve të vendit, nga ku mori edhe nofkën oligarku Jaka.

Duket se që nga ajo kohë nuk ka ndryshuar asgjë për çiftin, literalisht të krimbur në para.

Tafani e cila mori përsipër barrën e fajit për Nikolinin, është e vetmja e përmendur në skandalin e helmimit të punonjësve të akademisë së policisë, me krimbat që kishin pushtuar ushqimin, ndërkohë që oligarku ka mbetur i paprekur.

Vetëm nga QSUT, pa llogaritur institucionet e tjera shtetërore çifti Jaka-Tafani ka përfituar mbi 18 MILIARD LEKË pa TVSH për të ushqyer të sëmurët në këtë spital ndër vite.

09/05/2026

ARRSH hap 4 tenderë: 46.7 milionë € për të riparuar rrugët në Juglindje

Autoriteti Rrugor Shqiptar ka shpallur këtë të premte katër gara të rëndësishme për të siguruar mirëmbajtjen e 1,313 kilometrave rrugë në të gjithë vendin deri në vitin 2030.

Me një fond limit total prej afro 46.7 milionë eurosh, ky investim katërvjeçar synon të adresojë dëmtimet e rënda që pësuan akset kryesore nga reshjet e fillimvitit, ku shembjet e rrugëve si ajo Librazhd-Pogradec dhe dëmtimet në aksin Qukës-Qafë Plloçë nxorën në pah nevojën urgjente për ndërhyrje.

Kompanitë e interesuara kanë kohë të dorëzojnë ofertat e tyre deri më 11 qershor, ndërkohë që kontratat do të mbulojnë riparimin e asfaltit, stabilizimin e skarpateve dhe mirëmbajtjen dimërore për të garantuar qarkullimin e lirë.

Rajoni juglindor do të marrë pjesën më të madhe të këtij financimi, duke u konsideruar si zona më problematike dhe më e kushtueshme për t'u mbajtur nën kontroll.

Loti i tretë, i cili mbulon akset kryesore të Rajonit Qendror dhe Juglindor, ka një vlerë prej 14.3 milionë eurosh dhe parashikon mirëmbajtjen e 22 segmenteve, përfshirë Korridorin 8 dhe rrugë kyçe si TEG-Kërrabë, Lushnje-Berat dhe Lushnje-ByPass Fier. Ky përqendrim i fondeve në juglindje vjen si pasojë e sfidave të vazhdueshme natyrore që ky rajon paraqet për strukturën e rrugëve dhe sigurinë e udhëtarëve.

Përveç juglindjes, fondet janë ndarë edhe për pjesën tjetër të vendit përmes tre loteve të tjera që mbulojnë nevojat specifike të rajoneve Jug, Qendër-Verilindje dhe Veri. Rajoni Jugor do të mirëmbahet me një fond prej 12.4 milionë eurosh për akse si Tepelenë-Gjirokastër dhe Levan-Vlorë, ndërsa 11.5 milionë euro janë parashikuar për rajonin që lidh Thumanën, Durrësin dhe Peshkopinë.

Së fundmi, loti i parë i dedikohet veriut të vendit me 8.5 milionë euro për segmente nga Miloti deri në Muriqan. Ky plan afatgjatë synon që përmes mirëmbajtjes së rregullt të shmangen bllokimet e rrugëve dhe të rritet siguria në komunikacionin rrugor shqiptar për vitet në vijim.

09/05/2026

Kullat i “qepen” bregdetit, projekte shumëkatëshe në KKTU nga Velipoja, Qerreti, Golemi e Saranda

Katër mbledhjet e fundit të Këshillit Kombëtar të Territorit dhe Ujit kanë marrë në shqyrtim disa qindra kërkesa për leje ndërtimi e zhvillimi ku përfshihen projekte turizmi, rezidencialë, infrastrukturë publike, ndërhyrje në energji dhe transport.

Në mbledhjen e datës 30 mars 2026 bie në sy një kërkesë për shtyje leje ndërtimi të Inceneratorit të Tiranës. Projekti që mbart pas vetes dosje të tëra hetimore, vijon të mbetet ende në fazën e tij të parë pavarësisht qindra milionë eurove që kanë shkuar drejt këtyre projekteve në vend.

Konkretisht vendimi i KKTU specifikon “Leje për shtyrje afati të Lejes së Ndërtimit për objektin: “Ndërtimi i landfillit, inceneratorit dhe rehabilitimi i venddepozitimeve ekzistuese, Faza 1”, me vendndodhje në bashkinë Tiranë, me subjekt zhvillues shoqërinë “Integrated Energy BV SPV” sh.p.k.”.

Ndërkohë në të njëjtën mbledhje bien në sy kërkesa për projekte në bregdet qoftë për fshatra turistikë që në fakt më shumë janë projekte rezidenciale qoftë për ndërtesa shumëkatëshe. Kështu leje janë kërkuar për ndërtime në Palasë, Himarë, Sarandë por nuk mungojnë as në Shëngjin.

Ajo që bie në sy është që shumëkatësh*t po bëhen tahsmë normale për zonën bregdetare. Kërkesat e subjekteve në Shëngjin janë për ndërtime 17 kate apo dhe 27 kate teksa në zonën e Golemit janë një seri ndërtimesh “24 kate mbi tokë, objekt aparthotel dhe shërbimi 8, 11, 16 kate mbi tokë dhe 3 kate nëntokë”. E njëjta situatë është dhe në Vlorë.

Në mbledhjen e datës 17 prill në listë bien në sy disa leje për ndërtime në Tiranë kryesisht me funksion banimi, të cilat nisin nga pak kate e deri në 45 kate ndërkohë nuk mungojnë as kullat si “Hotel 36 kate mbi tokë dhe 3 kate nëntokë”, me vendndodhje në Qerret, Bashkia Kavajë”, “Struktura polifunksionale, hotelerie dhe banimi me 18 kate mbi tokë dhe me 1 kat nëntokë me pishina”, me vendodhje në Velipojë.

Po kështu bie në sy leja për një stukturë brand name që do të ndërtohet brenda një prej subjekteve që ka marrë statusin e investimit strategji. Bëhet fjalë për Resort Turistik “Grand Hayatt Palase” me objekt hotelerie, casino dhe shërbime, me 1-7 kate mbi tokë dhe 2-8 kate nëntokë, me vendndodhje Bashkia Himarë .

Edhe në Sarandë bie në sy kërkesa për leje “Kalyx, Hotel me 5 yje me 20 kate mbi tokë dhe 4 kate nëntokë”, me vendndodhje në Rrugën “Idriz Alidhima”. Në Shëngjin janë edhe dy projekte të tjera si “Lyonesse Tower” me 1,2,3,15,19, 20 kate mbi tokë dhe 2 kate parkimi nëntokë”, me vendndodhje në Shëngjin, Bashkia Lezhë dhe “Struktura (banim, shërbime, hotel) 1, 7, 8, 9, 14, 15 dhe 20 kate mbi tokë dhe 3 kate pjesërisht nëntokë”, me vendndodhje në Malin e Shëngjinit, Bashkia Lezhë.

Në mbledhjen tjetër të datës 24 prill dhe atë të 29 prill bien në sy kërkesa për leje për ndërtimeë shumëkatëshe në Tiranë por edhe në rajone të tjera si Fushë Krujë teksa kryeson bregdeti siç është objekt rezidencial dhe hoteleri me 33 kate mbi tokë dhe 4 kate nën tokë”, me vendndodhje në Bashkinë Vlorë./ Monitor

09/05/2026

E bëj burgun për ty! Njeriu i vogël nën aktorin e madh!

U pa gjallë (live) rënia e një aktori të madh, e futur brenda një njeriu të vogël. Bedelët dikur bënin ushtrinë për djemtë e të pasurve, kundrejt parasë, sot ofrohen burra me emër si aktori i madh Robert Ndrenika, që të bëjë burgun për të tjerët, edhe pse ai “tjetri” nuk është dosido, por kryebashkiaku i Tiranës.

“Çtë ka mbetur (koha e burgut) vi e bëj unë. Paç uratën”, tha aktori Robert Ndrenika ndërsa puthi në ballë Erion Veliajn, qau, kapërdiu lëmshin në fyt dhe mezi u ul duke në karrige pranë idhullit Veliaj.

Kjo mendje e ndritur, e pa rroitur ende (të paktën kështu ngjan), u bë gati për të bërë burgun për Veliajn, kryebashkiakun e Tiranës i cili akuzohet për gjashtë vepra penale në 13 raste, mes të cilëve “korrupsion pasiv”, “shpërdorim detyre” dhe “fshehje pasurie”.

Ja ashtu me atë bastun në dorë, me mendjen e kthejellët, aktori Robert Ndrenika (Artist i Popullit), do merrte rrugën me furgon burgu drejt Durrësit për të bërë një më një kohën e mbetur të Veliajt. Pse jo edhe frymën ta jepte në një qeli, i izoluar. Ky është vetëofrimi i një kategorie njerëzore që dashurohen deri në çmenduri me politikanë dhe individë që në adoleshencë shiste fiq për të blerë një palë atlete, ndërsa në rini bënte dy dasma me kursimet e pensionit të nënës.

Shtyhet gjyqi i Veliajt kundër prokurorit Dado
Po pse ky adhuqim i Ndrenikës për veliajn? Në ditët më të zeza për Veliajn, kur me urdhër të Ramës u kthye në kamikaz të vogël për të shembur Teatrin Kombëtar, aktori Robert Ndrenika fillimisht doli kundër shembjes, më pas ndërroi mendje, duke dalë në qëndrime pro shembjes.

Ky rast nuk u humb nga Veliaj. Ndrenika u përfshi në projekte të bashkisë ku lëvroheshin shuma të mëdha në emër të artit. Ndrenika ishte aty, me dorën në benefite dhe fytyrën e dalë në treg e cila shërbente për imazhin e shprishur të sërës së politikanëve, përfshi Veliajn.

Aktori i qindra roleve, njeriu i përkëdhelur në komunizëm dhe po aq në “hibrit demokracinë” e sotme mbart mbi vete talent të madh, ose të paktën publiku ynë e deshi, duatrokiti dhe vlerësoi, pa e kuptuar se militantizmi politik dhe adhurimi për individë të akuzuar për hajni e batërdi do e kthenin aktorin e madh në njeri kaq të vogël.

09/05/2026

Akuza e anëtarit të KVO: Korrupsion në tenderin 9.5 mln € të RTSH-së, vlera u dyfishua

Një anëtar i Komisionit të Ofertave ka hedhur dyshime të forta mbi tenderin 9,5 milionë euro të Radiotelevizionit Shqiptar për mirëmbajtjen e rrjetit të shpërndarjes DVB-T2 për katër vitet e ardhshme.

Kapitali publikon shkresën konfidenciale, në të cilën një nga 5 anëtarët e KVO-së, i caktuar nga vetë RTSH, denoncon se vlera e tenderit që u fitua nga Idea Tel e biznesmenit Idlir Karkini është fryrë me 60 për qind krahasuar me çmimin që ka kushtuar i njëjti shërbim në katër vitet e mëparshme.

“I njëjti operator (Idea-Tel) ka kryer me nënkontraktim shërbimin për periudhën 2021-2025 me një çmim prej 5.6 milionë euro pa tvsh. Ndërkohë që për të njëjtin shërbim (e njëjta periudhë dhe objekt pune) ka ofruar 9 milionë euro ose 61 për qind më shumë” thuhet në opinionin denoncues, që anëtari i KVO i ka bashkangjitur vlerësimit të fituesit.

Rrjeti i shpërndarjes DVB-T2 për Radiotelevizionin Shqiptar u ndërtua nga kompania gjermane Rode & Shwarz dhe kushtoi 20 milionë euro. Por mirëmbajtjen për katër vitet e shkuara kompania gjermane ja nënkontraktoi kompanisë Idea-Tel për një vlerë prej 5,6 milionë euro.

Tani që i njtji shërbim prokurohet me tender publik nga RTSH, çmimi për katër vitet e ardhshme është fryrë në mënyrë konsiderueshme dhe rritja reale e tij krahasuar me periudhën e mëparshme është edhe më e madhe se sa denoncon anëtari i KVO-së.

Kjo pasi vlera fituese e tenderit nga bashkimi i operatorëve Idea-Tel dhe Real Com është 899.3 milionë lekë, që me kursin aktual bëjnë rreth 9.4 milionë euro dhe jo 9 milionë sa thuhet në opinionin e vlerësimit.

Pra gati 4 milionë euro më shumë nga vlera me të cilën e njëjta kompani, pra Idea Tel, e e kreu këtë shërbim për katër vitet e shkuara duke e nënkontraktuar nga Rode & Shëarz, që bëri të gjithë sistemin.

Por fryrja gati dyfish e çmimit nuk është denoncimi i vetëm. Sipas shkresës, tenderi ka qenë thuajse para garë, pasi nga 3 ofertat e paraqitura, njëra ishte totalisht fiktive, pasi nuk kishte asnjë dokument, ndërkohë që oferta e dytë kishte mangësinë e autorizimit të prodhuesit.

“Praktikisht numri i ofertave të vlefshme është reduktuar në një duke eliminuar konkurrencën reale. Oferta e fituese e Idea-Tel dhe Real Com është thuajse në nivelin e fondit limit, pa reflektuar ulje të çmimit, çka tregon mungesë të presionit konkurrues,” vijon opinioni i vlerësimit që ka bërë anëtari i KVO-së.

Fondi limit i tenderit për mirëmbajtjen e rrjetit të shpërndarjes DVB-T2 të RTSH për një periudhë katër vjeçare ishte paracaktuar 906 milionë lekë. Idea-Tel dhe Real Com u shpallën fituese me çmimin 899.3 milionë lekë ose sa 99.3 për qind e fondit limit. Domethënë në një tender prej 9.5 milionë euro RTSH kurseu vetëm 70 mijë euro. Këto çmime ofrohen vetëm kur tenderi nuk ka presion konkurrues dhe kompania e paracaktuar fituese nuk ka frikë nga konkurrenca.

Megjithatë opinioni denoncon se kompania fituese nuk përmbush as kriteret. “Tek Idea-Tel dhe Real Com mungojnë diplomat e universitetit për katër inxhinierë dhe kontratat e punës për të gjithë stafin e deklaruar. Gjithashtu në bazë të informacionit në dosje nuk mund të provohet nëse stafi inxhinierik i të dy kompanive ka eksperiencë të punës në lidhje me sistemet DVB-T2,” vijon shkresa.

Pavarësisht kundërshtimeve të forta nga një prej anëtareve të KVO, Drejtoria e Përgjithshme e RTSH shpalli fitues bashkimin e kompanive Idea-Tel dhe Real Com në një proces prokurimi pa garë dhe me vlerë të fryrë gati dyfish. /Kapitali.al

09/05/2026

Babëzia nuk ndalet/ Kullat mbërrijnë edhe në Gjirin e Lalzit, leje për 14 kate

Një kullë e lartë plot 14 kate do të jetë ndërtesa më e lartë në zonën e Gjirit të Lalzit, ku deri më tani qeveria ka dhënë vetëm leje për komplekse dhe fshatra turistikë, deri në 4 kate, ndërsa me këtë kurs, e gjithë zona pritet të shndërrohet në një Golem të dytë.

Duket se mania për të ndërtuar, në lartësi, ka prekur edhe zonat bregdetare, të cilat deri më tani kanë pasur ndërtime të ulta, hotele të ulta dhe të shtrira, teksa synimi pas kësaj nisme është betoni.

Ditët e fundit, Agjencia e Zhvillimit të Territorit ka zbardhur lejen e radhës, ku është miratuar me kusht leja e ndërtimit për objektin “kompleks, hoteleri 1, 3, 13, 14 kate mbi tokë, rezidencë dhe shërbime 1-3 kate mbi tokë, me tarraca të shfrytëzueshme dhe me mur rrethues”. Vendndodhja është në Bashkinë Durrës, dhe subjekti zhvillues është shoqëria “Bpi Blessed Property Invest”.

Pastrimi i parave në Shqipëri arrin kulmin e dekadës, skemat dhe rreziqet ekonomike
Leja e ndërtimit do të jepet vetëm pasi firma të plotësojë dokumentacionin tekniko-ligjor dhe pagesën e taksës së ndikimit në infrastrukturë për llogari të Bashkisë së Durrësit.

Vox News shfletoi dokumentet shoqëruese të kësaj leje, ku rezulton se parcela ndodhet në një zonë me karakter agrikulturor, are, me një sipërfaqe totale prej 7333 m².

“Brenda kësaj parcele nuk kemi asnjë strukturë ekzistuese. Në këtë truall parashikohet realizimi i një resorti me funksione hotelerie, apartamente dhe shërbime turistike, duke u bazuar në të dhënat dhe parametrat teknikë përkatës”, thuhet në dokument.

Vox News shfletoi edhe dokumente të tjera, nga Qendra Kombëtare e Biznesit, ku rezulton se pronar i firmës zhvilluese, “Bpi Blessed Property Invest”, është Erald Mata, një 36-vjeçar nga Dibra. Administrator i shoqërisë është Agim Isaku, po nga Dibra, ndërsa ajo që bie në sy është se firma në fjalë ka një kapital prej vetëm 100 mijë lekësh.

Natyrshëm lind pyetja se me çfarë parash do t’a ndërtojë këtë kompleks? Vox News ka mësuar se, Mata dhe Isaku kanë qenë pronar të bar-restorant “Ibiza” në zonën e Gjirit të Lalzit. Nëse do të shohim në QKB, rezulton se të dyja NIPT-et e këtij subjekti janë pezulluar dhe çregjistruar kohë më parë.

Vox News shfletoi dokumente të tjera të kësaj leje ndërtimi, ku rezulton se kulla që do të ndërtojnë do të jetë plot 14 kate, duke u bërë ndërtesa më e lartë në zonë e duke i dhënë fund idesë se ajo zonë është vetëm për fshatra turistikë dhe ndërtesa të ulta, por në harmoni me natyrën.

Duket se babëzia për të ndërtuar apo projektet që kanë paraqitur, apo ndërhyrjet, kanë sjellë që qeveria ti nënshtrohet këtyre personave. Por, me këto ritme, duket se e gjithë zona do të kthehet si Golemi, Mali i Robit, Qerreti apo edhe vetë Durrësi.

Në projekt duket kulla e madhe në fillim dhe më pas disa struktura ngjitur me njëra-tjetrën. /Voxnews

09/05/2026

Raporti: Aktivistët dhe gazetarët në Shqipëri përballen me klimë sfiduese dhe armiqësore

Raporti vjetor i organizatës së Mbrojtësve për të Drejtat e Njeriut (Civil Rights Defenders) për vitin 2025 konstatoi se 12 muajt e fundit u karakterizuan nga një mjedis sfidues për gazetarët, grupet e margjinalizuara dhe aktivistët e të drejtave të njeriut në Shqipëri, me presione, kërcënime, intimidime, linçime dhe përndjekje ligjore ndaj tyre.

Një raport i fundit i organizatës Civil Rights Defenders për vitin 2025 nxori në pah sfidat kryesore që hasën aktivistët, gazetarët dhe organizatat e shoqërisë civile përgjatë punës së tyre në mbrojtje të të drejtave të njeriut si edhe të lirisë së medias në Shqipëri.

Sipas gjetjeve të raportit, aktivistët dhe mbrojtësit e të drejtave të njeriut në vend gjatë vitit të kaluar u hasën me sfida të tilla si intimidim, fushata linçimi, përndjekje ligjore dhe survejim.

“Vihet re një rritje e numrit të padive SLAPP, teksa aktorë të fuqishëm hodhën akuza për shpifje për të heshtur zërat kritikë të aktivistëve”, shkruan raporti i Civil Rights Defenders.

Aktualisht, Shqipëria nuk ka një mekanizëm ligjor për të ndaluar paditë SLAPP, edhe pse ka disa plane për të transpozuar direktivat anti-SLAPP të BE-së deri në vitin 2027.

“Aktivistë mjedisorë dhe komunitetet u targetuan kryesisht nga paditë SLAPP në vitin 2025”, shkruan më tej raporti lidhur me raste specifike.

“Në një rast të njohur, një kompani hidrocentralesh paditi tre aktivistë nga Mirdita pasi ato u shprehën mbi dëmet mjedisore që do shkaktonin hidrocentralet në zonën e mbrojtur të vendbanimit të tyre”, citojnë të dhënat e raportit të Civil Rights Defenders.

Sipas CRD, në këtë rast, në vend që të adresonte shqetësimet e komunitetit kompania ngriti një padi për shpifje dhe fyerje, duke pretenduar se deklaratat e aktivistëve i dëmtonin imazhin kompanisë.

Kjo përkthehet në sfidë të dyfishtë për aktivistët, ku në njërin front ato duhet të përballen me betejën në mbrojtje të mjedisit, ndërsa në frontin tjetër duhet të mbrojnë lirinë e tyre të shprehjes në gjyq.

Nga ana tjetër, iniciativat e një survejimit masiv potencial, të tilla si projekti i qeverisë “Smart City” që parashikon instalimin e mijëra kamerave në ambiente publike, ishte një tjetër sfidë e identifikuar nga raporti i Civil Rights Defenders që ka ngritur shqetësime të mëdha për privatësinë.

Edhe pse Kryeministri Rama e promovoi këtë projekt si “syri magjik për sigurinë publike”, ekspertët e sigurisë digjitale vunë në pikëpyetje mungesën e transparencës dhe të planit të masave për mbrojtjen e të dhënave.

“Pa një plan masash mbi mbrojtjen ligjore specifike për të dhënat, ky projekt krijon kushte për abuzim me survejimin, qoftë nga agjenci shtetërore apo qoftë nga hakera dashakeqës”, citon raporti i Civil Rights Defenders.

Aktivistët shprehen se në kushtet e mbrojtjes së dobët institucionale, dobësive në sigurinë kibernetike dhe mungesës së një autoriteti për mbrojtjen e të dhënave, rritet risku që të dhënat personale ose pamjet të keqpërdoren, të rrjedhin, apo të shfrytëzohen nga aktorë dashakeqës.

Më tej, intimidimi direkt i aktivistëve të të drejtave të njeriut dhe aktorëve mediatikë nga aktorë shtetërorë si policia, shërbimet e sigurisë, dhe zyrtarët shtetërorë, mbeti një shqetësim real sipas të dhënave të Civil Rights Defenders për vitin 2025.

“Aktivistët e të drejtave të njeriut raportuan ndërhyrje dhe intimidim nga policia, ku të paktën 20 gazetarë dhe portale mediash u përballën me sulme verbale dhe fizike nga zyrtarë të shtetit”, citon raporti.

Gjithashtu raporti përfundimtar i OSBE-ODIHR mbi zgjedhjet parlamentare përcaktoi se “në shumë raste pati intimidim dhe ndërhyje në punën e gazetarëve në ditën e zgjedhjeve”.

Përtej zgjedhjeve, autoritetet policore u përfshinë edhe një aksion të paprecedentë në Gusht të vitit 2025, ku u bllokua sinjali i medias News 24, aksesi i gazetarëve në vendin e punës, dhe u sekuestruan mjetet e punës të Focus Media Group, me justifikimin e mosmarrëveshjeve ligjore dhe administrative.

Organizatat në mbrojtje të lirisë së medias si Media Freedom Rapid Response dhe Reporterët pa Kufij kanë theksuar se pothuajse çdo gazetar kritik në Shqipëri mund të presë që të paditet apo të kërcënohet në një pikë të profesionit të tij.

Edhe pse në Janar të vitit 2026, parlamenti amendoi Kodin e ri Penal duke përfshirë një dekriminalizim të pjesshëm të shpifjes, ky ndryshim citon vetëm gazetarët e regjistruar dhe të njohur, duke përjashtuar kështu mbrojtjen e aktorëve të tjerë që mbrojnë interesin publik.

Gjithashtu raporti i Civil Rights Defenders vëren se fushatat e linçimit online që shënjestrojnë aktivistët dhe gazetarët me narrativa dezinformuese dhe retorika armiqësore janë intensifikuar gjatë vitit 2025.

“Mediat ‘Fact-checkers’ dhe organizatat e pavaruara mediatike u etiketuan si ‘tradhëtarë’ apo ‘agjentë të huaj’, në përpjekje për të diskretituar punën e tyre, me narrativa dezinformuese dhe konsiprative të ekstremit të djathtë që i lidhinin ato me propagandën ‘pro-Sorosiane’”, citojnë gjetjet e raportit.

Një tjetër narrativë dezinformuese që u përhap përgjatë vitit 2025 lidhej dhe me adaptimin e ligjit për Barazi Gjinore në Parlamentin e Shqipërisë, kur grupet konservatore nisën një fushatë të re dezinformuese për të keqinterpretuar përmbajtjen dhe dispozitat e ligjit.

“Qindra postime që amplifikoheshin nga zërat konservatorë shpërndanë në rrjet artikuj që pretendonin se ligji do të lejonte martesat e të njëjtit seks, do krijonte gjini të shumëfishta, apo se do të shkatërronte familjet shqiptare”, citon raporti.

Komuniteti LGBTI+ ishte në qendër të këtyre sulmeve të kësaj fushate dezinformuese, duke nxitur më tej frikën dhe urrejtjen e shoqërisë ndaj tyre.

Kjo nuk ka qenë hera e parë që aktivistët LGBTI+ ishin shënjestër e fushatave të linçimit apo kërcënimeve online, pasi sipas Civil Rights Defenders ato dhe grupe të tjera të margjinalizuara janë vazhdimisht target i gjuhës së urrejtjes apo kërcënimeve në vend./ BIRN

KosovaExpress

10/05/2026

09/05/2026

09/05/2026

09/05/2026

09/05/2026

09/05/2026

09/05/2026

09/05/2026

09/05/2026

Address

Website

Alerts

Shortcuts

Share

Category