https://www.facebook.com/970088089731840/

KosovaExpress, Pristina (2025)

12/12/2025

Paradoksi/ Ekonomia rritet, papunësia në vendnumëro

Ekonomia e vendit u zgjerua me 3.5 për qind në tremujorin e dytë të këtij viti, por të dhënat e fundit nga anketa e INSTAT tregojnë se në qershor-shtator numri i të punësuarve në grup-moshën 15-64 vjeç ra me 19,561 persona në krahasim me të njëjtën periudhe të 2024.

Teksa punësimi ra, papunësia mbeti në vend-numëro e pandryshuar në krahasim me një vit më parë, duke sinjalizuar se, problemet kryesore lidhen jo me rritjen e personave që kërkojnë punë, por me tkurrjen e vetë forcës së punës.

Rënia e shpejtë e popullsisë po e bën të palexueshëm faktin se sa vende pune po hapen realisht nga zhvillimi ekonomik.

Duke analizuar të dhënat sipas grup-moshave shihet tkurrja më e fortë e numrit të të punësuarve është tek të rinjtë 15–29 vjeç mbi 11 mijë persona më pak të punësuar se një vit më parë.

Ky grup është ai që kontribuon më shumë në uljen e përgjithshme të punësimit dhe pasqyron se emigracioni i të rinjve vazhdon me ritme të larta. Edhe grup-mosha 30–64 vjeç ka pësuar rënie me mbi 8,500 persona, çka sugjeron se jo vetëm të rinjtë, por edhe punonjësit me eksperiencë po largohen nga tregu i punës, shpesh drejt emigracionit.

Krahas efektit demografik punësimi po ndikohet nga kriza që ka përfshirë sektorët me intensitet të lartë pune të tilla si industria dhe bujqësia. Shumë biznese, veçanërisht në sektorët që punësojnë numër të madh punonjësish si prodhimi fason po shkurton punonjës për shkak të falimenteve që po vijnë nga rënia e kërkesës në tregjet ndërkombëtare dhe humbjet e kursit të këmbimit.

Nga ana tjetër nën-sektorët e ndërtimit, shërbimet dhe aktivitetet sezonale kanë ulur ritmet e rekrutimeve për shkak të kostove në rritje dhe presionit të pagave.

Zhvillimet demografike mbeten problematike. Popullsia në moshë pune po zvogëlohet, numri i të rinjve që hyjnë në treg vazhdon të bjerë, ndërsa emigracioni mbetet i lartë.

Në një treg pune me më pak ofertë punonjësish, ulja e punësimit reflekton tkurrje të fuqisë punëtore. Në tremujorin e tretë 2025 forca e punës në moshën 15-64 vjeç ishte 1,150,656 persona ose 20,344 persona më pak se në të njëjtën periudhe të një viti më parë, me tkurrje -1.7%.

Në vendet e zhvilluara ulja e punësimit sjell automatikisht rritje të papunësisë, por në Shqipëri një pjesë e atyre që humbin vendin e punës nuk regjistrohen si të papunë sepse janë të gatshëm të largohen jashtë vendit, ose zgjedhin të mos jenë aktivë në treg deri sa të gjejnë kushte më të favorshme./ Monitor

12/12/2025

Babëzia e betonit/ Pallat 12 katësh te “Brryli” në Tiranë, ndërtues Demokrat Valteri, lejen Edi Rama

Babëzia e betonit prek edhe lagjen ekzistuese në Tiranë, ku mes tyre po ndërtohen godina shumëkatëshe pa asnjë plan urbanistik apo pa mbajtur as distancat.

Një rast i tillë është denoncuar nga banorët pranë zonës së “Brrylit” në Tiranë, të cilët thanë se leja është dhënë disa muaj më parë dhe synon që sheshi i pallatit të vjetër, të cilit çuditërisht i doli edhe pronari, të kthehet në një masiv të madh betoni.

Pas denoncimit, redaksia shfletoi dokumente nga Këshilli Kombëtar i Territorit, ku rezulton se leja është për një pallat plot 12 katësh mbi tokë dhe 3 kate nëntokë. Leja e firmosur nga Edi Rama i është dhënë firmës “Walter Construction”, me pronar shtetasin Demokrat Valteri, teksa ditët e fundit është zbardhur edhe pozicionimi.

Në maketin e publikuar duket mjaft qartë kjo babëzi. Pallati 12 katësh është ngjitur me një tjetër pallat ekzistues, madje është në zonën që dikur ka qenë sheshi i pallatit të vjetër.

“Kjo është një ndër zonat më në zhvillim të qytetit, duke sjellë një numër të madh fluksesh. Ndërsa, më në brendësi, zona në studim ka mungesë infrastrukture, me objekte kryesisht te ndërtuara para viteve ‘90 dhe me mungesë të hapësirave publike e rekreative” shkruhet çuditërisht në dokumente.

Pikërisht në një nga këto sheshe, që duhet të ishte i banorëve, po ndërtohet edhe godina e re. Por, nëse ndërtohet, a ka më sheshe dhe hapësira publike dhe rekreative? Ku do t’i bëjë këto sheshe kjo firmë, apo edhe firmëtarët që i dhanë lejen, në tarracën e pallatit?

Në dokumentet që ka hulumtuar redaksia jonë shkruhet se njësia ndodhet përgjatë Bulevardit “Bajram Curri”, në afërsi të Spitalit Universitar Obstetrik Gjinekologjik “Koço Gliozheni”. Mësohet se godina e re do të shfrytëzohet për banim, infrastrukturë dhe 2 % për shëndetësi.

“Në zonë paraqiten godina të amortizuara dhe me ndërhyrje të shumta spontane nga banorët. Objekti 5 kate mbi tokë është me strukturë murature, me fasadë të pa suvatuar në disa pjesë dhe me ballkone të mbyllura individualisht me panele alumini ose PVC, duke krijuar një pamje jo uniforme” thuhet në dokument.

Pikërisht trualli ku do bëhet pallati i ri ka qenë sheshi i pushimit të atij pallati. Nëse nuk do të ishte zaptuar, apo t’i kishte dalë çuditërisht pronari, zona do të ishte mjaft funksionale. Nëse vetë shteti bën aksione për lirimin e hapësirave publike, sytë duhet t’i kishte kthyer edhe nga këto biçim troje. / Voxnews

11/12/2025

BE i kërkon Shqipërisë të kthejë 33 milionë € të shpërdoruara nga fondet IPARD–2!

Bashkimi Evropian ka kërkuar nga Shqipëria të rimbursojë mbi 33.5 milionë euro, të konsideruara si fonde të përdorura në mënyrë të parregullt në kuadër të programit IPARD II gjatë viteve 2020–2022. Shuma rezulton pas hetimeve të kryera nga Zyra Evropiane Kundër Mashtrimit (OLAF), e cila ka identifikuar 52 raste abuzimi me fondet e destinuara për zhvillimin rural dhe mbështetjen e fermerëve shqiptarë.

Komisioni Evropian thotë se çdo shumë e keqpërdorur duhet t’i kthehet buxhetit të BE-së. Autoritetet shqiptare, sipas KE-së, kanë angazhuar një kompani të specializuar ndërkombëtare për të kryer një auditim të plotë mbi grantet, pagesat dhe funksionimin e sistemit të brendshëm të menaxhimit dhe kontrollit të IPARD II. Auditimi është mbyllur dhe qeveria është në fazën e vlerësimit të masave korrigjuese.

Shqipëria rezulton të ketë nivelin më të lartë të fondeve të përdorura në mënyrë të parregullt në rajon, duke tejkaluar madje edhe Turqinë.

Duke qenë se bëhet fjalë për fondet e taksapaguesve të Bashkimit Evropian, Komisioni pret që autoritetet shqiptare ta trajtojnë këtë çështje me seriozitet maksimal. BE rithekson gatishmërinë për të vazhduar mbështetjen ndaj fermerëve shqiptarë dhe sektorit agro-ushqimor, por vetëm nëse garantohet mbrojtja e interesave financiare të Unionit.

Krahas fondeve të IPARD II, pezull mbeten edhe transferimet për programin IPARD III, që arrijnë në 146 milionë euro, prej të cilave 112 milionë janë kontribut i Bashkimit Evropian. Afati për përfitimin e këtyre fondeve skadon në vitin 2027, dhe Shqipëria rrezikon t’i humbasë nëse nuk rikthen besimin e institucioneve evropiane përmes masave të shpejta dhe efektive korrigjuese.

Aktualisht, po zhvillohet një procedurë dypalëshe mes Komisionit Evropian dhe autoriteteve shqiptare, me synimin për të garantuar zbatimin sa më të shpejtë të rekomandimeve dhe vendosjen e mekanizmave të duhur të kontrollit.

Paralelisht me institucionet evropiane, çështja e abuzimit me fondet IPARD po hetohet edhe nga Prokuroria e Posaçme Kundër Korrupsionit dhe Krimit të Organizuar (SPAK).

11/12/2025

Rruga Berat–Veleshnje prej vitesh në gjendje të mjerueshme, banorët kërkojnë ndërhyrje nga bashkia

Prej më shumë se 16 vitesh, rruga që lidh fshatin Veleshnje me qytetin e Beratit vijon të jetë në gjendje të rëndë, pa asnjë investim të qëndrueshëm nga institucionet përgjegjëse. Segmenti është lënë totalisht në harresë, duke u kthyer në një nga problemet më të mprehta të zonës.

Një emigrant, i rikthyer ditët e fundit në Shqipëri, denoncon se punimet e kryera nga Bashkia Berat janë tepër sipërfaqësore dhe nuk zgjidhin asgjë. Ai thotë se këto 'investime' “janë qesharake” dhe tregojnë mungesën e seriozitetit në trajtimin e një rruge kaq të rëndësishme për komunitetin.

Sipas tij gjatë stinës së dimrit situata bëhet më problematike. Rruga shndërrohet në baltë dhe gropa të mëdha, duke e bërë pothuajse të pakalueshme për automjete dhe këmbësorë. Banorët rrezikojnë përditë, ndërsa fëmijët hasin vështirësi për të shkuar në shkollë, pacientët për të mbërritur në qendrën shëndetësore dhe fermerët për të transportuar prodhimet e tyre.

Banorët i bëjnë thirrje Bashkisë Berat të mos mbyllë sytë ndaj këtij problemi që zgjat prej më shumë se një dekade e gjysmë. Ata kërkojnë një ndërhyrje serioze dhe të qëndrueshme që të rikthejë lëvizjen normale dhe t’i japë fund ndjesisë së braktisjes nga shteti.

Denoncimi i qytetarit:

"JAM NJE EMIGRANT JETOJ JASHT SHTETIT PARA CA DITESH JAM KTHYER SHQIPERI....DESHA TE PUBLIKOJA PUNIMET E BASHKIS BERAT LIDHUR ME RRUGEN BERAT VELESHNJE QE E SHTRUAN PARA 10 DITESH PAMJET DO I SHINI ANONIM TE LUTEM FLM. PAMJET QESHARAKE LUM NE PER KTE SHTET"

11/12/2025

Thellohet pabarazia ekonomike/ Gjysma e qarqeve me të ardhura më pak se 50% e Tiranës

Përqendrimi i aktivitetit ekonomik dhe i popullsisë në Tiranë po thellon pabarazinë ekonomike ndërmjet 11 qarqeve të tjera dhe kryeqytetit.

Të dhënat mbi ekonominë e Rajoneve të publikuara së fundmi nga INSTAT që i referohen vitit 2023, tregojnë se, gjysma e qarqeve rreth 5 prej tyre e kishin PBB-në për frymë më pak se gjysma e kryeqytetit.

Qarku me të ardhurat më të ulëta është Kukësi, me vetëm 40.2% të Tiranës, çka vë në dukje pabarazitë e mëdha territoriale në vend. Pas tij vijnë Dibra dhe Berati, me rreth 43–44% të nivelit të Tiranës, ndërsa Elbasani dhe Korça shfaqin një situatë pak më të mirë, por sërish nën 50% te të ardhurave për frymë të Tiranës.

Lezha dhe Shkodra gjithashtu kanë të ardhura për frymë që variojnë nga 50.7% deri në 56.4% të Tiranës, Gjirokastra ngjitet në 62.5%, duke hyrë në grupin e qarqeve me të ardhura më afër mesatares kombëtare.

Në vijim, Vlora, Fieri dhe Durrësi paraqiten si qarqet më të zhvilluara jashtë Tiranës, me nivel të të ardhurave që shkon nga 71% në mbi 79% të vlerës së kryeqytetit, për shkak të peshës së lartë të sektorëve të turizmit, industrisë dhe transportit në këto rajone.

Në vitin 2023, në rajonin e Veriut, ku bëjnë pjesë qarqet e Shkodrës, Durrësi, Lezhës, Kukësit dhe Dibrës PBB për frymë është 819 mijë Lekë ose 16,80 % nën mesataren e vendit.

Në rajonin Qendër, ku bëjnë pjesë Tirana dhe Elbasani, PBB për frymë rezultoi 1,9 milionë lekë në 2023 ose 21,8 % mbi mesataren e vendit.

Në rajonin e Jugut të vendit, ku përfshihen qarku i Beratit, Vlorës, Fierit, Gjirokastrës dhe Korçës PBB për frymë ishte 845 mijë lekë në 2023 ose 14,12 % nën mesataren e vendit.

Niveli më i lartë i PBB-së për frymë në vitin 2023, u regjistrua në Qarkun Tiranë, me 1.3 milionë lekë, duke u vlerësuar 38,9 % mbi mesataren e vendit. Pas tij renditet Qarku Durrës me PBB për frymë 1.086 mijë Lekë, duke u vlerësuar 10,31 % mbi mesataren e vendit dhe Qarku Fier me 1.042 mijë Lekë, 5,82 % mbi mesataren e vendit.

Niveli më i ulët i PBB-së për frymë u vlerësua në Qarkun Kukës me rreth 549 mijë Lekë dhe PBB për frymë, e ndjekur nga qarku Dibër me rreth 595 mijë Lekë dhe PBB për frymë e këtij qarku dhe qarku Berat me 599 mije Lekë.

Në vitet në vijim hendeku i ekonomik me rajonet e tjera pritet të thellohet më tej, për shkak se PBB-ja e kryeqytetit po rritet me ritme më të shpejta./Monitor

11/12/2025

Vodhën fondet e rindërtimit në Kombinat, arrestohen zyrtarë të Bashkisë Tiranë dhe biznesmenë

Prokuroria e Tiranës ka lëshuar 8 masa sigurie për një grup personash, mes të cilëve 5 zyrtarë të Bashkisë Tiranë dhe Inspektoratit të Mbrojtjes së Territorit (IMT), si dhe tre përfaqësues të kompanive private, pas hetimeve për abuzime me fondet publike në zonën e Kombinatit.

Hetimet nisën në vitin 2021 pas një kallëzimi për prishjen e një pallati pa vendim zyrtar nga IMT. Nga hetimi u zbulua se në janar të vitit 2021 Bashkia Tiranë kishte shembur gjashtë objekte, përfshirë pallatin nr.140, ndërsa dy muaj më vonë ishte miratuar një fond për “Demolimin dhe evadimin e mbetjeve ndërtimore” për 15 pallate, ku ishin përfshirë edhe objektet e shembura më herët.

Sipas Prokurorisë, në dokumentacionin e tenderit janë konstatuar punime fiktive dhe të dhëna të rreme, çka solli dëm financiar për buxhetin e Bashkisë Tiranë.

Skema e dyshuar e abuzimit

Hetimi tregon se kompanitë “Arb & Trans-2010” shpk, “Klajger Konstruksion” shpk dhe “Maging Studio” shpk kanë përfituar fonde për punime që nuk janë kryer realisht. Preventivat dhe procesverbalet e punimeve janë hartuar mbi dokumente të falsifikuara, pa verifikim në terren nga punonjësit e IMT-së apo Drejtorisë së Emergjencave Civile.

E padëgjuar, vartësi nis hetimet për shefin e prokurorisë Dibër, shkak sekuestrimi i një makine
Ekspertiza grafologjike ka vërtetuar firmosjen e dokumenteve të pavërteta nga disa drejtues institucionesh, të cilët kishin detyrimin ligjor për t’i lëshuar ato.

Personat ndaj të cilëve janë dhënë masa sigurie:

Aurel Çuko, Drejtor i Përgjithshëm i Emergjencave Civile – arrest në shtëpi

A.B, Drejtor i Drejtorisë së Emergjencave Civile – arrest në shtëpi

Eleana Guçe, përgjegjëse sektori në Drejtorinë e Emergjencave Civile – detyrim paraqitje

Sokol Qehajaj, specialist i IMT pranë Bashkisë Tiranë – arrest në shtëpi

Rexhina Rakipi, specialiste e IMT – detyrim paraqitje

Aleksandra Muhametllari, përfaqësuese e “Maging shpk & Imes-D shpk” – detyrim paraqitje

Shyqyri Maloku dhe Fatmir Firi., përfaqësues të kompanive “Arb & Trans-2010” dhe “Klajger Konstruksion” – detyrim paraqitje

Të hetuarit akuzohen për veprat penale “Falsifikimi i dokumenteve”, kryer në bashkëpunim dhe “Shpërdorimi i detyrës”, parashikuar nga nenet 186 dhe 248 të Kodit Penal.

Sipas Prokurorisë, dokumentet e falsifikuara janë përdorur për të justifikuar disbursimin e fondeve publike për punime që nuk janë kryer, duke dëmtuar financiarisht institucionin. Hetimet po vijojnë për të përcaktuar vlerën e saktë të dëmit dhe përgjegjësinë e plotë ligjore të personave të përfshirë.

11/12/2025

Ushqimet e importit më të lira, por në tregjet e pakicës çmimet vetëm rriten! Më të larta se në BE

Importet e ushqimeve të importuara janë në rënie të vazhdueshme në tre vitet e fundit, por kjo tkurrje nuk po reflektohet në tregjet e pakicës, kur të njëjtët artikuj janë në rritje për të njëjtën periudhë krahasimi.

Sipas të dhënave të përpunuara nga Doganat një kilogram nga grupi ”Ushqime dhe pije alkolike” kushtoi 116.7 lekë në tremujorin e tretë të vitit 2025. Kjo vlerë ishte 0.7 për qind më e ulët se në të njëjtën periudhe të vitit 2024 dhe 8 % më pak se në tremujorin e parë të vitit 2024.

Të dhënat mbi importet e ushqimeve tregojnë rritje të sasive në dy vitet e fundit, por edhe rënie të vlerës për kilogram. Rritja e vizitorëve të huaj ka krijuar kërkesë më të lartë, teksa po zëvendësohet edhe mungesa e prodhimit vendas.

Nga ana tjetër në tregjet e pakicës çmimet e ushqimeve, duke përfsh*të edhe ato të importit janë rritur rreth 3% këtë vit, pak më tepër se inflacioni i përgjithshëm.

Teksa importuesit janë duke blerë më lirë për shkak të ofertës më të bollshme ose luhatjeve në tregjet ndërkombëtare, tregtarët në vend nuk e transmetojnë këtë ulje te konsumatori.

Marzhet tregtare në fushën e tregtisë janë të larta për shkak të përqendrimit të lartë çka u jep kompanive të mëdha më shumë fuqi për të ruajtur çmimet e larta edhe në kushtet kur kostoja e furnizimit ka rënë.

Vitet e fundit, kostot e brendshme janë rritur, nga pagat dhe shpenzimet më të larta të transportit të cilat amortizojnë një pjesë të uljes së çmimit të importit.

Sakaq, Shqipëria si një vend në zhvillim ka reagim të vonë ndaj ndryshimeve në tregjet ndërkombëtare edhe për ushqimet.

Ka ende një praktikë që në periudha të pikut të konsumit, si stinën e turizmit apo fund-viti, çmimet shpesh rriten edhe për shkak të kërkesës së fortë, pavarësisht se importet mund të jenë më të lira.

Për herë të parë në vitin 2024 çmimet e ushqimeve në Shqipëri janë 1% më të shtrenjta se mesatarja e Bashkimit Europian, në një kohë që të ardhurat sipas metodës së fuqisë blerëse janë sa 41% e mesatares së BE-së.

Nga viti 2005 deri në 2018-n, çmimet e ushqimeve në Shqipëri ishin mesatarisht sa 68-78% e mesatares së BE-së. Nga 2018-a filloi kërcimi i tyre, teksa në 2023-n, çmimet në Shqipëri ishin mesatarisht vetëm 7% më të lira se mesatarja e BE-së. Ndërsa në 2024-n çmimet u barazuan për herë të parë, madje e tejkaluan lehtë me 1%.

Produktet më të shtrenjta ushqimore për familjet shqiptare në raport me BE-në janë vezët, djathi dhe qumështi, që kanë kërcyer në 131% të mesatares së BE-së, nga 119.5% vitin e mëparshëm. Edhe ushqimet e tjera janë rreth 25% më shtrenjtë se në BE (124.8%). Pijet jo alkoolike janë 19% më shtrenjtë se në Europë. Më lirë shqiptarët blejnë cigaret që kushtojnë sa 47% e mesatares europiane./ Monitor

11/12/2025

Fundi pa lavdi i flamurit të qeverisë/ Autoriteti i Aviacionit Civil pezullon Air Albanian

Pas gati 7 vitesh humbjesh, male me borxhe dhe marrëveshjesh okulte për të financuar udhëtimet me charter të kryeministrit, fati i kompanisë flamur të Shqipërisë, Air Albania, duket se ka mbërritur në fundin e palavdishëm, por të pashmangshëm. Kapitali ka mësuar se Autoriteti i Aviacionit Civil është detyruar të pezullojë liccencën e krenarisë imagjinare të qiellit shqiptar për mospërputhje me legjislacionin.

Një burim nga brenda kompanisë i tha Kapitalit se vendimi është marrë në fillim të këtij muaji dhe se prej tre ditësh Air Albania nuk kryen më asnjë fluturim.

“Operimet e Air Albania janë pezulluar përkohësisht nga Autoriteti i Aviacionit Civil, për mosveprim në përputhje me standardet e aviacionit civil,” i tha Kapitalit një burim brenda qeverisë i informuar për çështjen. Sipas burimit, pezullimi i Air Albanias do të qëndrojë në fuqi pa afat derisa kompani të plotësojë të gjitha detyrimet e kërkuara nga ligji i Aviacionit Civil.

Pezullimi nga AAC do të thotë se tashmë kompania nuk ka të drejtë të kryejë më asnjë fluturim dhe ccdo sh*tje biletash është potencialisht një mashtrim.

Disa ekspertë të tregut të fluturimeve i thanë Kapitalit se plotësimi i detyrimeve nga kompania në kushtet e krizës së thellë financiare në të cilën ndodhet ka shumë pak gjasa të ndodhë dhe me shumë mundësi, pezullimi nga AAC është grushti i fundit që vulos përfundimisht fatin e Air Albanias.

E ardhmja e kompanisë flamur të shumëtrumbetuar nga qeveria tani duket gjithnjë e më e pasigurt. Të dhënat e FlightAëare tregojnë se prej datës 7 dhjetor kompania nuk ka operuar asnjë fluturim dhe vazhdon të anullojë në seri rrugë të planifikuara për në Milano dhe Stamboll nga Aeroporti Ndërkombëtar i Tiranës.

E themeluar në vitin 2018 pasi qeveria shqiptare ia revokoi licencën Albanian Airlines, Air Albania ka qenë krenaria imagjinare e Shqipërisë për shtatë vitet e fundit.

E financuar pjesërisht nga Turkish Airlines, fati i Air Albanias duket se u vulos përfundimisht pak javë më parë, kur Turkish njoftoi daljen nga kompania shqiptare dhe sh*tjen e 49 për qind të aksioneve që zotëronin në këtë kompani.

Ndërsa linja ajrore kombëtare e Turqisë nuk dha shumë detaje mbi arsyet e sh*tjes së Air Albania, ajo finalizoi një marrëveshje për të shpenzuar 300 milionë euro për një aksion minoritar në linjën ajrore spanjolle me kosto të ulët, Air Europa, e cila është më e njohur gjerësisht.

Male me borxhe dhe faliment i pashpallur

Muajt e fundit Air Albania është përballur me një seri padish në gjykatat ndërkombëtare për mosshlyerje të detyrimeve. Kompania ajrore është paditur të paktën nga dy shoqëri të huaja për mospagesën e qirasë së avionëve, ndërkohë që borxhet e saj vetëm sa shtohen.

Shifra reale e borxheve të Air Albania mbetet e panjohur pasi kompania nuk publikon asnjë bilanc financiare. Por mali i detyrimeve vlerësohet në dhjetra milionë euro duke përfshirë borxhet ndaj furnitorëve, Tatimeve, aeroporteve dhe punonjësve.

Por pavarësisht se është praktikisht e falimentuar, Air Albania vazhdon të mos e shpallë falimentin zyrtarisht. Pezullimi i liçencës nga Autoriteti i Aviacionit Civil duket se është goditja finale, që do të hedhë në tokë përfundimisht krenarinë imagjinare të qiellit shqiptar, e cila më shumë se krenari për vendin u themelua për të financuar udhëtimet me charter të kryeministrit.

Ky i fundit është akuzuar nga opozita si shkaktari kryesor i falimentimit të Air Albanias për shkak të udhëtimeve me Ismailin personal, që iu vu në dispozicion nga Air Albania./Kapitali.al/

11/12/2025

Nga përurimi te rrëshqitja e masivit, shembja që zbuloi problemet e rrugës Qukës-Qafë Plloçë

Mëngjesin e 23 nëntorit, disa familjarë nga Tirana nisën një udhëtim drejt Maliqit për të marrë pjesë në një përkujtimore. Ata vendosën të kalonin nga rruga e re Qukës – Qafë Plloçë, pak javë pas ceremonisë inauguruese, ku daullet, veshjet popullore dhe buka me qiqra tipike e juglindjes ishin pjesë e festës.

Por të gjitha makinat e nisura herët u detyruan të devijonin rrugën, pasi Qafë- Plloça ishte bllokuar nga një masiv i madh shkëmbor.

“Ishim të pavendosur se nga do të kalonim për shkak të motit të keq, por në fund zgjodhëm rrugën e re,” tregon Geri, një nga udhëtarët, duke shtuar se përvojën e morën si mësim. “Nuk bëhet në mot të keq, e aq më pak në dimër”, përfundon ai.

Problemet nisën që herët

Problemet e para me rrugën që u hap për qarkullim në shtator nisën që në javët e para. Por pamjet e çarjes të skarpatës dhe rënies masive të gurëve në nëntor treguan degradimin e shpejtë të veprës më të shtrenjtë dhe më të stërzgjatur të infrastrukturës në Shqipëri.

“Reshjet e dendura të shiut… kanë shkaktuar çarjen e skarpatës dhe rënien e gurëve në trup të rrugës në km 35,” tha ARRSH në një njoftim në rrjetin social facebook më 23 nëntor.

Për të lehtësuar qarkullimin e mjeteve, Autoriteti Rrugor ndërtoi një kalim të përkohshëm në kilometrin 37, pjesa e fundit e rrugës Qukës – Qafë Plloçë.

Seksioni ku ka ndodhur shembja është më i shtrenjti për kilometër. Një segment prej 9.2 kilometrash që ka kushtuar 70 milionë dollarë. E thënë ndryshe 7.6 milionë dollarë për kilometër.

Një javë pas ndërtimit të bypassit si zgjidhje emergjente nga ARRSH, Faktoje udhëtoi drejt juglindjes dhe vizitoi zonën. Pamjet nga segmenti i tretë, ku kishte ndodhur shembja masive, ishin të njëjta me ato të ditës së parë.

Masivi shkëmbor vijonte mbi asfalt, barrierat të shtrembëruara dhe skarpatat mbrojtëse nuk ishin përfunduar. Mjetet devijonin nga kalimi paralel i përkohshëm.

“Për këtë rrëshkitje do të bëhet monitorim dhe studim gjeologo-inxhinierik për të arritur zgjidhjen më të mirë teknike dhe sigurinë në rrugë”– ARRSH për Faktoje.al.

Por problemet nuk janë të izoluara vetëm në këtë segment. Edhe në pjesë të tjera të rrugës ka problematika me elementët kyë të sigurisë rrugore, skarpatat mbrojtëse mungojnë duke vënë në rrezik kalimtarët.

Rruga u përurua pa përfunduar

“Ndodhemi në segmentin Qukës- Qafë Plloçë, tashmë totalisht i përfunduar…”, deklaronte zëvendëskryeministrja Belinda Balluku gjatë përurimit.

Por dy muaj më vonë, masivi shkëmbor bllokoi rrugën, duke vënë në provë sigurinë dhe menaxhimin e këtij projekti që kërkoi gati dy dekada pune dhe qindra milionë dollarë. Dhe ndonëse u festua me daulle dhe valle popullore, rruga u inaugurua e papërfunduar plotësisht.

Segmenti i tretë i rrugës, ai nga km 33 deri në 43, nuk ishte ende dorëzuar kur qeveria e hapi për qarkullim aksin Qukës -Qafë Plloçë.

Faktoje kishte kërkuar informacion nga ARRSH dhe përgjigja erdhi më 28 nëntor, një ditë para shembjes. Sipas Autoritetit Rrugor punimet në rrugë kishin përfunduar, por punohej ende për përforcimin e skarpatave me ankora dhe rrjeta mbrojtëse.

Përgjigje kjo që faktonte një problem të njohur në Shqipëri, rrugët shpesh inaugurohen pa u përfunduar plotësisht. Si afat, ARRSH dha fundin e muajit nëntor.

“Kontraktori është në periudhën e defekteve, ka pastruar dherat e rëna në rrugë dhe po punon për stabilizimin e skarpatave”- ARRSH, 28 nëntor 2025.

Por masivi shkëmbor nuk priti dorëzimin. Ai rrëshqiti, duke bllokuar rrugën dhe duke treguar se inaugurimet ceremoniale nuk garantojnë siguri. Autoriteti u detyrua të shtynte afatin e dorëzimit të seksionit në fundvit dhe të ndërtonte një bypass të përkohshëm që devijon trafikun.

Përfundim

Aksi Qukës – Qafë Plloçë i gjatë 43,4 km nisi të ndërtohej 16 vite më parë. Ndonëse u inagurua me daulle dhe bukë me qiqra, të dhënat zyrtare faktojnë se rruga nuk ishte përfunduar.

Shembja masive në pjesën e fundit të rrugës nxorri në pah mungesën e sigurisë, edhe pse fatura e projektit infrastrukturor ka qenë e majme dhe punimet kanë zgjatur për vite me radhë.

Nisur nga informacionet e mbledhura dhe verifikimi i kryer, deklaratën e zëvendëskryeministres së pezulluar nga detyra, Belinda Balluku se ‘segmenti Qukës- Qafë Plloçë është i përfunduar…’ e kategorizojmë të pavërtetë.

/ESMERALDA TOPI- FAKTOJE.AL

09/12/2025

260 milionë euro rrugë, shembet sërish Qukës–Qafë Plloçë!

Rruga Qukës–Qafë Plloçë, një nga investimet më të mëdha të dekadës me kosto marramendëse prej 260 milionë euro, vazhdon të shfaqë probleme të rënda vetëm pak muaj pas inaugurimit. Ndërsa ende nuk është zgjidhur drama e shembjes masive pranë tunelit, dëmtime të tjera serioze janë shfaqur në segmentin që lidhet me Pogradecin.

Në fshatin Gështenjas, trotuari i të gjithë pjesës anësore ka rrëshqitur dhe është shembur plotësisht, duke dëmtuar edhe rrjetet nëntokësore. Ekspertët paralajmërojnë se tashmë rrezikohet edhe vetë karrexhata, çka mund ta kthejë zonën në një pikë të rrezikshme për qarkullimin.

Edhe pse aksi kalon mes zonave të banuara, prej muajsh ai është krejtësisht pa ndriçim, duke vënë në rrezik jetën e këmbësorëve dhe banorëve lokalë. Investimi që përfshinte zgjerimin e korsive, vendosjen e trafikndarësve, trotuareve dhe sistemit të ndriçimit, u përfundua që në shtator të vitit 2018, por rezultatet sot tregojnë problemet e rënda të cilësisë së punimeve.

Vetëm dy muaj përdorim kanë mjaftuar që rruga e shumëpritur të dalë jashtë funksioni. Specialistët flasin për mungesë studimesh të mirëfillta gjeologjike dhe mangësi serioze në projektim e mbikëqyrje. Ajo që duhej të ishte një shteg strategjik i lidhjes Perëndim–Lindje, po shndërrohet në një shembull të pastër të keqmenaxhimit të fondeve publike.

Ndërkohë, SPAK po vijon hetimet për tenderat e këtij segmenti, ku nën lupë ndodhet ish-zv/kryeministrja Belinda Balluku dhe procedurat e ndjekura gjatë realizimit të projektit.

09/12/2025

Rritet rreziku i obezitetit në Shqipëri: 1 në 4 fëmijë shkojnë në shkollë pa konsumuar mëngjesin!

Rritet rreziku i obezitetit në Shqipëri: 1 në 4 fëmijë shkojnë në shkollë pa konsumuar mëngjesin!

Një në katër fëmijë shqiptarë shkon në shkollë pa ngrënë mëngjes, duke anashkaluar vaktin më të rëndësishëm të ditës. Të dhënat e Institutit të Shëndetit Publik tregojnë se rreth 25% e nxënësve nuk konsumojnë mëngjes, një zakon që rrit rrezikun e mbipeshës dhe obezitetit.

Sipas raportit që mat sjelljet e shëndetshme të fëmijëve në moshë shkollore në të gjithë Europën, Shqipëria renditet ndër vendet e para për konsum të rregullt të frutave dhe perimeve nga të vegjlit. Megjithatë, mungesa e mëngjesit mbetet një problem shqetësues, pasi ndikon drejtpërdrejt në metabolizëm dhe kontrollin e peshës trupore.

Specialistët e shëndetit theksojnë se zakonet e shëndetshme ushqimore, kombinuar me aktivitet fizik të rregullt dhe kufizimin e kohës përpara ekraneve, janë faktorë kyç për parandalimin e mbipeshës. Obeziteti tek fëmijët po shndërrohet në një sfidë globale.

Të dhënat më të fundit tregojnë se 1 në 10 fëmijë të moshës 5–19 vjeç jeton me obezitet, duke u ekspozuar ndaj rreziqeve serioze shëndetësore si diabeti i tipit 2, sëmundjet kardiovaskulare dhe disa lloje kanceri.

Ekspertët apelojnë që prindërit të sigurojnë një mëngjes të balancuar çdo ditë, pasi ai ndihmon jo vetëm në mbajtjen e peshës së shëndetshme, por edhe në përqendrim, energji dhe performancë më të mirë në shkollë.

KosovaExpress

12/12/2025

12/12/2025

11/12/2025

11/12/2025

11/12/2025

11/12/2025

11/12/2025

11/12/2025

11/12/2025

09/12/2025

09/12/2025

Address

Website

Alerts

Shortcuts

Share

Category