14/01/2026
NJOFTIM PËR QYTETARË
Të nderuar qytetarë, Komuna e Shtimes, në kuadër të takimeve koordinuese për organizimin e “Ditëve të Reçakut”, të zhvilluara me Policinë e Kosovës, si dhe bazuar në masat e sigurisë të prezantuara nga ana e tyre, ka ndërmarrë rregullimin e përkohshëm të qarkullimit rrugor me rastin e 15 Janarit, përvjetorit të Masakrës së Reçakut, për shkak të aktiviteteve dhe homazheve përkujtimore që do të zhvillohen gjatë kësaj dite, njoftoheni se do të zbatohet regjim i veçantë i qarkullimit rrugor, sipas planifikimit në vijim:
Rrugëtimi i organizuar (njëkahor): Rrugëtimi fillon nga qyteti i Shtimes, përmes rrugës “Tahir Sinani”, duke vazhduar në drejtim të rrugës së Prizrenit. Hyrja drejt fshatit Reçak do të bëhet përmes rrugës “Lidhja e Prizrenit” (nga enti special), e cila do të shërbejë vetëm për hyrje dhe qarkullimi do të zhvillohet në një drejtim. Rrugëtimi vazhdon drejt Memorialit në fshatin Reçak.
Kthimi pas homazheve:
Pas përfundimit të vizitave në Reçak, kthimi do të realizohet njëkahor, përmes rrugës “15 Janari”. Më pas, qarkullimi vazhdon në rrugën “William Walker”, deri në dalje. Në fund, mund të shfrytëzohet edhe rruga unazore (rruga e re), për të vazhduar drejt Shtëpisë së Kulturës në qytetin e Shtimes.
Sqarime të rëndësishme për qarkullimin:
Rrugët “William Walker” dhe “15 Janari” NUK do të shfrytëzohen për hyrje, por vetëm për dalje. Do të ketë mbyllje në hyrje të rrugës “William Walker”, me qëllim që vizitorët të mos kyçen nga kjo rrugë. Mbyllje do të ketë edhe në afërsi të rrugës “Qorr Ilazi”, nga drejtimi i fshatit Petrovë, do të shërbejë vetëm për dalje, pa hyrje.
Qarkullimi do të zhvillohet ekskluzivisht në një drejtim, sipas udhëzimeve të policisë dhe shenjëzimit rrugor.
Parkimi: Parkingu pranë Memorialit në Reçak do të shërbejë vetëm për krerët e shtetit, ambasadorë, delegacione të larta dhe familjarë të martirëve, veçanërisht për ata që kanë nevojë për transport për shkak të moshës. Parkim shtesë do të sigurohet në: oborret e familjarëve në fshatin Reçak; oborrin e shkollës në Çestë të Reçakut. Parkimi pranë Shtëpisë së Kulturës në Shtime do të jetë i rregulluar dhe i menaxhuar gjatë mbajtjes së Akademisë Përkujtimore. Hapësirat përreth Bibliotekës do të jenë në dispozicion edhe për pjesëmarrësit e tjerë të Akademisë.
Qytetarët luten të respektojnë udhëzimet e zyrtarëve policorë në mënyrë që aktivitetet përkujtimore të zhvillohen me dinjitet dhe pa pengesa.
Faleminderit për mirëkuptimin dhe bashkëpunimin tuaj,
Komuna e Shtimes
